MITTUI NENA HMUN-KHAWHAR NGHÂKTUTE TAN

“A rei tlawk tlawk mang e!” tiin nî i lêng a. Zan lah a tawi chuang lo; i mal ngawih ngawih a. Hringnun hi i lakah a hrohrâng a chhiain, a inhrosa nasa a, i tlin tawh ngang lovin i hre ṭhin em ni? “Ka tuarah chuan a tâwk ta!” tiin duhtâwk i ngah titih ta a ni, ti rawh maw?

A chang hi chuan e, engkim mai hi a kal dik lo fai vêl vek ni te hian a hriat ṭhin a. Vanduainate hi kan mal dawn a, lungngaihna hi kan ta bil ni te hian kan hre rum rum ṭhin.

Mahse, chuti anga nun khawhar leh baihvai nei bik ni a i inhriat chuan, hei hi lo hre rawh, i mal lo a ni a. Mitin mai hian nâ kan tawrh châng a awm vek a; mittui pêk kan ni vek ang hian, tupawh mai hian lungchhe vankaia ṭah hawm hawm chang kan nei asin.

Beidawnga boruaka i bân vâwr mai lo khan, i ṭhenrualte’na an lo chelh theih turin i hman lamah i kut kha phar chhuak rawh le.

I nunna hrui kha thlah mai lovin, lo la inchelh tâng fan fan teh. Ṭang rawh, ṭang rawh, ṭang hrâm hrâm rawh!

He American zaipawl (band) REM hla “Everybody Hurts” hi ka tuichilh tirh aṭanga kum 25naah pawh, he hla hian min la tha-hrui a, min la tichak cheu mai ka ti. Heti ang hi a ni thu leh hla ṭha thiltihtheihna chu!

He mahni intihhlum dodalna hla (anti-suicide song) hi phuahtu bulpui ber chu an band khuangpu Bill Berry a ni a; eng chenah nge midang an tel ve hriat fak a har tawh a ni. Mi beidawng tawhte tana beiseina meichher chhitsak hi a tum ber a ni. A thu a fiah a, a tluantlam em em chhan hi a phuahtu berina a sawi dan chuan, tleirawl leh rawltharte tinzawn râna phuah a nih vang a ni. “Nun hian eng nge maw awmzia a neih le?” ti a beidawnga ral mai turte pual he hla nguai, chuai ruai mai thuchah laimu ber chu, “Ṭang rawh, ṭang rawh, ṭang hrâm hrâm rawh! (Hold on, hold on, hold on!)” tih hi a niin ka hria.

REM hlaho reng reng hi a thuchah tlang rên râwn a vang viau mai. Khirh, hriatthiam har leh chai deuh fe ngai a ni tlangpui. Anmahni ka hmelhriat ṭanna hla, “Losing My Religion” te hian eng nge a sawi ber pawh ka la hrethiam ziktluak chiah lo.

'Everybody Hurts' hi khawvela hla lungchhiatthlak leh thinlung khawih bera thlan a ni mauh mai, chumi kawngah chuan Elton John-a hla 'Candle in the Wind' pawh a khûm hial a ni.

“When the day is long and the night, the night is yours alone,

When you're sure you've had enough of this life, well hang on.

Don't let yourself go, everybody cries and everybody hurts sometimes.

Sometimes everything is wrong. Now it's time to sing along.

When your day is night alone, (hold on, hold on)

If you feel like letting go, (hold on)

When you think you've had too much of this life, well hang on.

Everybody hurts. Take comfort in your friends,

Everybody hurts. Don't throw your hand,

Oh, no. Don't throw your hand;

If you feel like you're alone, no, no, no, you are not alone!

If you're on your own in this life, the days and nights are long,

When you think you've had too much of this life to hang on.

Well, everybody hurts sometimes,

Everybody cries. And everybody hurts sometimes.

And everybody hurts sometimes. So, hold on, hold on.

Hold on, hold on. Hold on, hold on. Hold on, hold on.

(Everybody hurts. You are not alone.)”

ZÂNGKHAW BUNGBU

Sangha zuar bula putar ṭhu chu kutdawh emaw tih palh awl tak turin a bawrchhawr a. A mit khur thûk tak aṭang chuan khawvel hi khawngaih thla la takin a thlir doh doh va. A vanglai nî-in a liamsan tawh a; hringnunin a kal pel mek tih hai rual a ni lo.

A chêr fîm ral mai a, a inthuamna pawh pawnchhe bân khâwm emaw tih mai tur a ni. A biang leh a hmuihmul vel ṭo fir fer ṭuak avangin a hmai chu hmuarin a bâwm emaw tih mai tur a ni.

Tu’n ka ui ka ar an ti lo va. Han be lûmlâmtu pawh an awm lem lo. Tukhaw ngaihsak lohvin a lo kawi chuang awm ve mai mai a.

Mit tla dawna amah ka thlir reng lai chuan, ka nu chuan, “Tun hmaa Aizawl mi hausa fapa hmelṭha, kei ka ni inti ve chin, intivei leh chapo ve tak, nupuiah pawh a hun laia Aizawl nula hmelṭhaa sawi ve hat nei ve ngat a nih saw,” tih min hrilh a.

Kan zinga mi lian leh sang ber pawh hian naktuk hi kan hmu phâk si lo va, chapo va, han intivei tur kan va awm lo tak êm!