DUH TAK PRUDENCE (Dear Prudence)

Kan upa berte’na fapa pahnih an neih hnu-a, beisei ru ang reng tak, beisei ngam êm êm chiah si lo va fanu an han nei ta nawlh mai chu an lawm hle mai a. Ka û phurna pawh a sosang ngang mai. “Mafel, a Sap hming tur common si lo, mawi deuh, lo ngaihtuah rawh,” tiin mi kha a bel chawt a. Kha lam department-ah kha chuan mi a ring tâwk ve hle ni tur a ni.

Sap hming, mawi leh lam nuam tur ngaihtuah chuan chawhnu pumin ka thluak ka han sâwr bing ta ngat ngat a. Tlai lamah chuan, mi hlimho ṭawng takin, “Prudence” tih hi ka dawng ta nawlh a. Ka u hnenah chuan ka han thlen vat a, ani chuan lungsi takin min lo pawmpui var a. A fanu nausen Sap hmingah chuan “Prudence” (Phrudens) tih chu a sa ta a. A hming awmzia chu, fing taka thutlûkna siam theihna, fimkhur thiamna, thuhnudawn taka chetna, kan ti thei awm e. “Purûn Deni” te an ti mai mai ang tih chu ka hlauthawng ru angreng fû. Jason te pawh “Ze Sawna” kan ti a; “Richard” te, “Châta”; “Michael” te “Maia” kan ti mai mai ṭhin si a.

Tunah chuan kha nausen duhawm tak khan M.Com. a zo ve dawn ta der mai zu nia. A chang chuan hun hi meithallâwn ang maiin a thlawk fur fur mai ni te hian a hriat ṭhin. Amah venga hualhimtu, Lalpa a ropui e!

Prudence tih hming pu hi hmun thumah ka lo hre tawh a. John Bunyan-a thawnthu ziah ropui tak, Kristian Vanram Kawngzawh Thu (The Pilgrim’s Progress)-ah khan kan hmu a. Mizo ṭawnga letlingtu Chuautera’n “Fimkhuri” tiin a dah a. Kristiana’n Zion Tlang a panna kawnga a chawlhna Lal In Mawi (Palace Beautiful)-a nula thianghlim leh hmelṭha, Kristiana lo chiau-autu palite zinga mi, Kristiana hnena, “A chang chang talin i lo kalna ram chu i ngaihtuah ngai lo maw?” ti a lo zâwttu kha a ni.

Mizo ṭawnga nula leh tlangval inngaihzawn thawnthu awm tawhah chuan sawi hlawh leh ngainat hlawh bera chhâl ngam hial tur, Alexandre Dumas Fils' thawnthu ziah “The Lady of Camellias” (La Dame aux Camelias - 1852), J.F.Laldailova’na “Camille” tia a lehlinah khan Prudence chu kan hmu leh bawk a. Heta mi erawh hi chu hminga han chawi chhan tlâk a ni fahran lo:

“A nulât vânglaia Margareti ang bawka "val tin pârlâwr" an tih ang mi hi a lo ni tawh a. Nu chawm lampang hi a ni a, a vul lai pelh-ah lemchan hna lama intukluh hi a han tum leh a, a hmêl leh thiamnain a pha si lo. Chutah khawpui milian hmeichhe lukhum style tak tak zawrhna dawr hawngin ei a zawng ta a. Kum sawmli a kai tawh hnu pawh hian a mit chu la lêrh tak a ni; ngaihsak der duh tân chuan a neih ei zawk pawha kawm theih tak a ni ang. A hming chu Prudence Duvernov-i a ni,” tih kha a ni.

Ka fanu (neice) hming atana ka sak chhan ber zawk chu The Beatles hla, John Lennon phuah (a hnua Paul McCartney nena an phuah dun anga an sawi leh tâk), an album “The Beatles” (“White Album” ti a sawi ṭhin)-a an dah, “Dear Prudence” tih hla vang kha a ni. A thu leh a thlûk, mawi ka tiin, ka duh thlu ngang a ni ber e.

He hla hi John Lennon-a’na India rama a phuah a ni a. The Beatles-hovin thlarau lama harhna, pâwlna, ênna, leh varpawhna thar an neih theih nana Maharishi Mahesh Yogi hnuaia an inkulh laia lo awm ve pakhat, lemchan thiam (film star) lar Mia Farrow laizâwn, Prudence Farrow a phuahna a ni a.

Hemi hmuna an kal chhan thlarau lama finvarna chan tum chuan Prudence hian a la runthlâkin, a bei ngawrh bik hle a; midang zawng zawng aia Pathian hnen thlen hmasak a tum ruh hle. Fianrial hun hmangin a riahbûkah chuan chawlhkâr thum lai a inkhârkhip tlat mai a. Amah anga harh chhuahna beia inkulh vete zingah chuan a tel ve ngai lo va; rual a kawmin, rual a pawl ve lo.

Thusawi an ngaihthlak zawh te, chaw an ei kham te chuan midang chu inkawm hlimin, an zai ho dal dal ṭhin a. Prudence erawh chu tawi khawmuang lovin a pindan a pan ding a, a inkhung hrang nghal ngat ngat thin. Ât khat a che deuh niin ṭhenkhat chuan an ngai hman a. John Lennon phei chuan, “Khawthlang lam chu ni se, rilru buai dah khawmna inah an dah daih ang,” a ti nghe nghe a ni.

Amah hmangaihtute chuan chuti ngawt ngawta a awm chu felhlel an ti a. Pâwn chhuak a, rual kâwm ve tura thlêm turin, “Nangni’n in hmin thei deuh mahna,” tiin John Lennon leh George Harrison chu an ṭahawh ta ringawt a.

Chutah chuan he hla mawi tak mai, Julian Lennon phei chuan, “Ka pa hla phuahah chuan ka duh ber pawl a ni,” a tih hial hi a lo phuah ta a ni. He hla hi kum 1968 khan an thunin an tlangzarh nghal a. He hlaah hian an khuangpu Ringo Starr erawh chu a tel ve lo. An pawl a chhuahsan lailâwk lai a ni a, Paul McCartney-a’n a lo hmui a ni.

“Duh tak Prudence, tualchai turin i lo pâwnchhuak dawn lo’m ni?

Duh tak Prudence, ni thar diai mai hi han lawm ve teh.

Nî a tlangsang a, van a pawl riai a;

Nangmah ang maia mawi leh duhawm a ni,

Duh tak Prudence, lo chhuakin i tualchai ve lo vang maw?

“Duh tak Prudence, i mit kha mengin han hawi chhuak la,

Khaw êng uarh mai te hi han en vêl teh.

Dam diaiin thlifim a thaw heuh heuh va,

Savate chuan, “Thil engkim nen hian in

inzâr zawm tlat a ni,”

Tiin zaiin an lo awi ang che.

Duh tak Prudence, i mit lênin i lo hawi chhuak lo vang maw?

“Duh tak Prudence, naupang tê anga

I nui sen sen hmêl kha min han hmuhtir teh le.

Chhûm hlâwm hrang hrangte khi

Daisy-par thil khâwm ang maia mawi a lo

ni dawn asin,

Chuvangin, i nui hmêl min han hmuh leh teh le.

Duh tak Prudence, kan tan i seih lo vang maw?”

(Dear Prudence, won't you come out to play,

Dear Prudence, greet the brand new day,

The sun is up, the sky is blue;

It's beautiful and so are you.

Dear Prudence, won't you come out to play

Dear Prudence, open up your eyes,

Dear Prudence, see the sunny skies;

The wind is low, the birds will sing,

That you are part of everything.

Dear Prudence, won't you open up your eyes?

Dear Prudence, let me see you smile,

Dear Prudence, like a little child;

The clouds will be a daisy chain,

So let me see you smile again.

Dear Prudence, won't you let me see you smile?)

PARA-TEL-LO-TROOPER-HO

Himalaya tlang dunga khawsa hnam pakhat, Kum 1871 Vailena Mizorama lo chhuak ve Gorkha/ Gurkha (Gorkhali/ Gurkhali kan tih mai) hi hnam kawlh leh huaisen - hnam kawlhsen. Chhel, tuarfei, leh pachang tak an ni a. An huaisen hi an thanpui hle a ni.

Indian sipai commander ropui bera an chhal ṭhin, Field Marshall S H F J 'Sam' Manekshaw pawh khan, Gurkha sipai a hrâwn hrep hnu khan, “Miin thih ka hlau lo an tih chuan, dâwt an sawi a nih loh vek leh, Gurkha an ni tihna a ni ang,” a ti mauh mai.

Huaisenthlâk leh pa rem rem ka tih deuh chu "One Crowded Hour" tih lehkhabu Tim Bowden ziaha mi kha a ni.

Kum 1964-a Borneo-a thil thleng a sawi a. Gurkhali sipaiho kha an hotupa’n Indonesia mite bei tur khan thlawhna atanga zuan thlak an hreh leh hreh loh a zâwt a.

Anni chuan, “Hreh hran lo ve, mahse thlawhna tlemin thlâwk muang deuh se, duh dan chuan dûm chung velah ni thei se la, feet 100 aia sang lovah thlâwk bawk se,” tiin an chhang a.

An hotupa chuan, “Chuti anga hniama kan thlawh te chuan in parachute a parh hman na’ng,” tiin a lo hnial a.

Gurkhali sipaiho chuan, “Aw, a hma-in parachute hman tur tih i sawi hlei nem,” an ti hem mai! An hauva zuanthlak kha an hreh hlek lo a lo nia.