BEAUTIFUL DARLING BOY

Maimichhing la, engmah hlau suh aw. Phûng a awm tawh lo, a tlanchhe daih. I pa heta ka awm tawh hi. Ka hrai bungdawntuai, hmelṭha ber mai tê.

I muthilh hmain, rei lo tê tal ṭawngṭai ṭhin la. Nitin mai hian, kawng tinrengin hringnun hi a ṭha chho telh telh mai a nih hi.

I lo puitlin hun tur ka va han nghakhlel tehreng em! Mahse nang leh kei hian dawhthei taka kan nghah fan fan a ngai rihin ka ring. A chhan chu i puitlin hun thleng tur chuan kawng thui tak zawh a la ngai a. Kawr khirhkhan kân a, kal kai ngai a la tam si.

Ni e, kawng chu la thui tak a ni. Chuvangin, tunah rih chuan, kawngpui i kân dawnin ka kut hi vuan rawh aw. Nun chu tih tur dang duanga kan hmanhlel laia thil lo thleng hi a ni. Ka enchim loh, ka hrai bungdawntuai, hmelṭha ber mai tê.

John Lennon kha a fa û Julian ngaihsak hman lo lêk khan, mawngvawm bâ ang maiin a eizawnna lamah a ṭul a. A fapa han awm a, han awih nan âwl lai a nei hman lo a ni ber.

Kum 1975-a Yoko nena an fapa Sean a lo pian khan, John Lennon chuan, a hma anga tisual nawn leh tawh lo turin, zai leh rimawi lama a eizawnna zawng zawng chu chawlhsanin, hun puma inchhungkhura “pasal ṭha” ni tur chuan a inpapêk ta tawp a.

Sean-a kum 4 mi vel a nihin hla phuah a ṭan leh a, chuta a hla phuah zinga pakhat chu, a fapa tan liau liauva a phuah, "Beautiful Boy (Darling Boy)" tih hi a ni.

He hla-ah hian khawvela ṭawngkam sawi chhawn hlawh pawl tak pakhat, "Life is what happens while you're busy making other plans," tih hi a awm a, “Nun chu tih tur dang duanga kan hmanhlel laia thil lo thleng hi a ni,” tihna a awm e. He thu hi Lennon-a ir-âwm chhuak a ni lo va, thuziakmi, cartoonist ni bawk, Allen Saunders ṭawngkam, “Life is what happens to us while we are making other plans,” tih January 1957-a Reader’s Digest chhuaka mi, chhetê-a her danglam a ni. Ni e, kan nunkhua hi sawi lâwk leh ruahman lâwk theih tak tak a ni lo va, a chhe zawng, a ṭha zawng hian kan hmuh lâwk loh leh duan lawk loh thil hi a lo thleng zut zut mai a ni.

He thu nemnghet chiang em emtu chu he hla an tlangzarh aṭanga chawlhkar 3na, December ni 8, 1980-a a phuahtu leh satu John Lennon an kaphlum ta mai kha a ni.

Ka fapa Steven Ramthanmawi, kum i tlin hlan nghakhlel em emin, John Lennon-a’n a fapa Sean-a hnena, “I can hardly wait to see you come of age,” a tih hi dawhthei takin kum 18 kan lo sakpui ta.

Nimin 18. 10. 2017-ah khan ram dana kum lama puitlinga chhiar i lo ni ta e!

I la dai ngai loh puitlinna kawng zawh chu i zâm ang a, i zei lo vang tih ka hria. Mahse, zam hauh suh. Hei chen venghim a, vuan a, vil tlattu che i Pathian hian a kalsan thut che ring hlek suh.

Mipa naupang aṭangin puitling patuai (young adult) i lo ni ve ta. Vawi engzâta tam pawh i birthday hi hmu-in, hmang la, ka tan “Lalbawiha” (my darling little boy) nih hi i

ṭhulh ngai dawn lo. Ka thinlung hlapuia a “note” mawi lai ber i ni zel dawn a ni.

I ṭhatna tura insiam a, inthlak danglam (change) hi hlau ngai suh la, hun kal tawhah chêng reng lo la (nimina i tâp reng chuan engtin nge naktuk duhawm zawk i hmachhuan theih ang?), nangmah inhmuhniamin, inkhawngaih ngai lo la, hlim hman lo khawpin inngaihtuah runthlak lutuk suh.

Mi zawng zawng tih-lâwm tum suh ang che, an joker rawih lai i nih loh kha. Chu chu hlawhchhamna chahbi a ni si a. Nangma lawmna lam i theihnghilh ṭhak ang a, a tawpah tumah tilawm chuang si lovin, i rethei thlâwn mai mai ang. Mi zawng zawng lawmna siam tumte hi khawvela mal leh khawhar ber ber an ni ṭhin asin. I nihna anga an lâwm lo che a nih chuan, an phu lo che-ah ngai rawh. Thuziakmi Paulo Coelho-a’na a lo sawi ang deuhvin, midang laka ‘aw’ i tihna lamah khan, nangmah leh nangmah kha ‘aih’ in ti suh ang che. Mi zawng zawng lung tih-awi i tumna lamah khan i inhloh daih thei tih hria la, fimkhur rawh.

Nangma remtihna tel lo chuan tumahin an teitê thei lo che tih hria ang che. Teitêt theiha awm chu an tê sa a, midang hnuhhniam theih chu an hniam sa tihna a ni ṭhin.

Inngaitlawm la; mahse, inngaihniam ngai suh ang che. Uangthuangin intivei suh la. I vaupung tina ngai hek suh, sakeiin sa a seh lai hian a hahum chiam chiam ngai lo a nia. Mihring tumah hi tlu thei lo leh petek thei lo khawpa ding nghet kan awm lo. Thilsiam zingah pawh tluk theihna laka fihlim chu changpât tih angrengte mai hi an ni.

Hmingthanna tlang chhipa chuang chhuak tur chuan tlawmna ruam zawh a ngai hmasa

ṭhin. Thingah pawh a rah tamna zar apiang a kur hniam ṭhin hi.

Bêl chu a têt poh leh a so rang tih hria la, thinrimna hritha lo lakah inveng fimkhur la. Thinrimna pai daih vanga inchhir ta ngawih ngawih hi an tlem teh asin. Thinrimna hi kan chhia leh ṭha hriatna khawnvar chhem hlumtu thlipui huaisar tak a ni. Thinrim chuan rilru a fim thei mang mang lo va. Rilru fim lah hi an thinrim ngai mang mang lo bawk. Kan thinrim apiang hian kan hlim theihna hun rangkachak a lothlawnin kan khaw­ral zel a ni, tih hria la, thinrim engphiarin engmah ti suh ang che.

Zirlai i nih angin i zirlai kha ngaih pawimawh hmasakah neih la, inthlahdah lo hram ang che. Pass tur ringawtin zir lo la, thiam turin zir ang che. Vawiina i thiamna khan naktuka i nih tur thui takin a hril dawn a ni. I tana ṭan mar a ngaih hun lai tak a ni. Thawhrimna aiawh zo emaw, thlak thei emaw engmah a awm lo. Han insang phek la, i rin aia nasa nangmahah khan theihna leh chakna a awm tih i hre thei ang.

I rilru-in suangtuah la, i thinlungin ring la, i chakna-in i tum chu i hlawh chhuak thei ang. I tum a sân miau chuan i tlâkna pawh a hniam chhe thei lo. Arsi lâk i tum miau chuan i kutin vaivut mai i lâwk lo vang. Tumna i neih loh chuan tumahin an pui thei lo vang che. Tumna i neih erawh chuan tumahin an dâl thei lo vang che. I tumram i thlen theihna tura lei indawh pawimawh ber chu mahni inthunun theihna kha a ni tih hria ang che.

Harsatna i tawhte kha remchangah i chantir thei a ni tih hria ang che. Tihsual palh leh hlawhchham hlau lo vang che. I hlawhchham palh pawhin thil tih i nei a, i awm mai mai lo a ni tih lantirtu a ni a. Chu’ng chu i tan zirtirtu ṭha an ni thei tih hria la, an zir tur chhawp che chu zir chhuah tum rawh. Mihring hmelma lian leh hlauhawm ber chu natna hrichhia emaw, ruihhlo emaw, ralthuam ṭihbaiawm emaw a ni lo va, beidawnna zawk hi a lo ni.

Zirna chuan hriatna a pe a, hriatna chuan thiltihtheihna a keng a, thiltihtheihna chuan zahawmna a pai ṭhin. Bei la, beih nawn hreh suh. First draft awm lovin masterpiece a neih theih ngai loh. Milem mawi taka ziak tur chuan i ziah sa vawi tam tak i hmeh hlawm a, i paih hmasak a ngai ṭhin. Hlawhtlinna leh hlimna hmu tur hian kawng awlsam leh pumpelh a awm lo.

Ṭawngṭai hlamchhiah ngai suh ang che. Tisa, rilru leh thlarauva i chakna thahrui ber tur a ni si a. Mahni harsatna en lovin, Pathian chakna lam en zawkin ṭawngṭai ṭhin ang che. Pathianina a awih mut theihnghilh che a, a kaihthawh theihnghilh hma che chu, ṭawngṭai hi theihnghilh ngai suh. A ngaihthla peihte hnenah Pathian chuan thu a sawi thin a, a ṭawngṭai peihte chu Pathianin a ngaithla ṭhin. Buai deuh hian ṭawngṭai a har ṭhin, mahse, ṭawngṭai hian buaina a chhâwk zangkhai thin.

Dil tur i neih vang chauhvin ṭawngṭai lo la, Pathian chunga lawmna chhan tur i ngah em avangin ṭawngṭai fo zawk ang che. Pathian i zawlpuia i hnuhthlak theihna leh Pathian zawlpuia i chhoh theihna hmanrua a ni. A hnena thlen turin thil te lua a awm lo ve. “Engah mah mangang suh u; engkimah ṭawngṭai leh dîlin, lâwm thu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” (Phil 4:6,7) ti a Apostle Paula’n a lo sawi tawh kha.

Hei i ṭhat lai hun i hmang chho dawn mek a, hlim thei ang berin hmang la ka duh a ni. Hlimna hi hlimthla ang a ni a, eng ang pawhin ûm mah la, i man thei tak tak ngai lo vang. A êng lam hawi zawnga i kal tlat erawh chuan, hlimna chuan hlimthla angin a zui zel ang che. Hausakna hian hlimna a thlen kher lo va, retheihna phei chuan mi a tihlim hranpa lo khawp mai. Chantâwka lungawinaah hian hlimna dik chu a lo par chhuak ṭhin tih hria ang che. Hlimna dik tak hi chu a thlawna dawn a ni fo va, a lem zawk lei tur hian insenso fo a ngai ṭhin.

Vawi khat bak ṭhalai i ni dawn lo tih hi hre reng la, i ṭhat lai chen ang che. Thuhriltu’n, “In ṭhat lai hun a rei dâwn lo.’ a tih hi, i rin aiin a rei lo vang aw.

ASAP ASAP (Always Say A Prayer, As Soon As Possible).