HLÂN LEH NA’NG CHE SILAI LEH ROSE-PÂR

“Thim pik chu enga ruangah ngai duh suh,

Kawng chu kan la hmu thei tho dawn alawm.

Engmah kumhlun tur a awm lo,

November ruahsur vawt tak chen hian.”

Mizorama cable TV zam luh a nih hma hret, a nih tirh leh a nih hnua khawpui tlangval hard rock/ heavy metal lam ngaina chin, guitar perh ṭhin kha chu ṭingṭang han hlan tawp la, Guns N' Roses (GNR kan tih awlsam mai) hla pahnih-pathum tal perh thei tura beisei a ni.

An hun laia rock band tam tak anga hla pahnih-khat vawrh fuh vanga arbawm chhe kang ang maia rawn alh hluai an ni ve lo. An tlo tlut mai a ni. A ngaisang tawh laklawh vek kha chu anmahni-ah kan nghet tlur mai a ni.

Anmahni ka hriatna leh ka duh ṭanna "Sweet Child o' Mine"-a an guitar play thiam tuma ka beih nasatzia leh ka thiam mumal theih si lohzia te kha aw! Khati lai khan guitar tutorial video lamte chu a rim a ra pawh kan la hre ve phak lo va. Tape recorder aṭanga mahni zir zira lo zir a nih loh chuan, a thiamte perh ngunthluk taka lo chîk rûk khiau kha a ni mai a. A man hma chi leh talent nei bik tan lo kha chuan khirh duh fuat fuat tak a ni.

An zai leh rimawi kha rimawi zei leh zia chi hrang hrang (punk rock, blues rock, heavy metal, hard rock, leh hair metal) lehburh a ni a. Hlawhtlin mai loh kha chu tih tur dang an nei lo. Mahni chanpual ṭeuhvah an theuneu lo tlang nasa mai si a. An zaipu ber Axl Rose phei chu keini chhuana kan icon ber pakhat a ni.

Kum 1991-a Home Guards’ Training Center-a NCC Camp kan neih te khan, meipui chheh zanah, an hla “Patience” kha zaithiam vang ai mahin, zah tawrh chak vangin solo-in ka sa nghe nghe a. Axl Rose-a sam ṭawnna sen ang kha ka neih remchan mai loh avangin lukhum hmathlawk a letling zawngin ka khum a. Ka kawngah kamis sen a duma ṭial ka suih a, a chet dan (dance gyrations) ang thei tur ber khan sirsawnin ka han inthên hlawh hlawh a. Faifuk lam hi ka tlakchham lam tak a nih avangin ka ṭhianpa, tun hnua cancer hrikina a ngam loh ṬK-a Hnamte hian tlawk nalh fahranin min faifuksak hlarh hlarh a. Mahse, ka thiam fahran lo a ni ang, a ṭha zawng, a chhe zawngin sawi zui ka hlawh lo em mai.

He’ng hla leh anmahni ka duh aṭang khan, belte phai thei lo ang maiin hla leh rimawi chu an lak aṭang khan a kang chat thei tawh lo. Thâl peih chhung kha chu a awm a ni ringawt. Mizoram thingthlang kilkhawr ber ber thleng khan a fan phak a.

Welcome to the Jungle, Paradise City, Civil War, You Could Be Mine, Don't Cry, November Rain, Yesterdays, So Fine, etc. thleng thleng khan kawngpui metal thlen lohna hmunah pawh he heavy metal group zai hian a thleng a ni.

Mi hla, “Live and Let Die” (Paul McCartney), “Knocking On Heaven’s Door” (Bob Dylan), "Since I Don't Have You" (The Skyliners) an sak lahin anmahni hlaah chanin, an chhuah thei bawk si.

I used to Loved Her, bakah khan, You Ain't The First tih kha ka’n tuipui leh em em mauh mai a. C. Lalrinmawia Dichambawihpui ang bawka zu rui awphawia, uluk duhdah deuhva sak chi kha a ni a.

U Nonova cassette dawr Musicatto-ah khan ka duh duh hi lawrin, collection ka va siam ve ngawt zel a. Knocking On Heaven’s Door tih hla GNR sak ka hawn ṭum phei kha chuan ka lawmna kha a va han sosang lehzual tak em aw. Kan in chung kan dah ruah deuhthaw lai kha a ni a. tape recorder-ah ka hlum let ngat ngat a, ka zai nawntir tlut tlut mai a, a ring berah a volumn kha ka dah bawk a. Ka ngaithla tlaivar ṭhak niin ka hria.

Nun kha a mawlin a mawi a, khawvel a naupang a, khawvel ka ta a ni. Kum 25 vel a vei ta. Khatih hun lai boruaka kir leh theihna remchang hi minit 5 chauh tal han awm leh se aw, ka ti fo ṭhin.

Mahse, hei pui, khatih hun lai boruak ang deuh thaw-a kir leh theihna remchang chu a awm dawn a ni awm e. December ni 8, 2017 hian Bawngkawn Field-a Royal Stag Aizawl Rock Fest 2017 awm turah Guns N roses Official Tribute Band Guns 2 Roses chu London aṭangin an lo kal dawn e, an tih chu!

Guns 2 Roses hi GNR keh darh laia anmahni hriatpui thlapa, an sulhnu vawng nung tura an zahna lantirtu group din a ni a. GNR nen paw’n vawi 3 lai lo tour ho tawh an ni a. An tour pawh hian Axl-a aw lo fit tawh vak lo nen, stage chang hnem zawkah an ṭang ziah nghe nghe âwm e. Guns 2 Roses te hi GNR original member: Steven Adler, Slash, Axl Rose, Gilby Clarke te hian an tour-pui vek tawh a. Chuvangin GNR Original member-te hian an fachuam enin an en tihna a ni a, a namai lo hle.

Guns 2 Roses te hi group chuangtlai tawh angreng tak, kalna tur dang an hriat ngang loh avanga Mizoram lo thleng ta an ni awzawng lo a nia. An tour calender, nakkum 2018 November thlenga an tarlan han en pawh hian an tozia leh an indaih lohzia chu a lang reng a. Khawvela Festival lian leh ropui, abikin Europe-ah phei chuan chanchinbu lu-a hawrrawp hraw-a tarlan hlawh fo an ni a. Khawvela club hmingthang ber pawla sawi, Liverpool-a mi The Cavern Club, The Beatles lar chhuahnaah te pawh zan zawnin an hralh fai ṭhak thei a ni.

Chuti ang taka mite duh rawn hlawh mek kan chang bik hi kan vannei hle tiin, sawi nawi neuh neuh lovin, kan buzawlah i lo chheihpui ang u aw le!