NGAIAH NEIH LUL SUH AW!

Ka fin, ka fel, ka thiam, ka theih vang ni hlek lova kum thar ka han chuang kai ve thei hi Pathian khawngaihna leh zahngaihna vang liau liau a ni tih mai loh chu puh tur dang ka hre lo.

Krismas tûk te khan thih ngamin damdawi in ka lût a. Khami tûk tluka mahni nunna chelh din tuma ka beih nasat kha ka hre ngai lo. Thiam leh theih a tawi teh e.

Ka vuan fan fan a, chelh din a hnekin ka vawnna kha a pît zâwk zar zar ni ber hian ka hria a. Beidawn a tawngkhawng tak tak chinah kha chuan rilru-ah, “Heaven is near and I can't stay here; Goodbye, world, goodbye,” tih hla kha a inthumrawn tlut tlut a. Dam khawchuah leh inbeiseina reng reng ka ka nei lo tak tak a.

Thivar leh thisen ip 4 min pe nghal sawk sawk a. Theihtâwpa min han enkawl hnuah ka ziaawm chho ta a. Tunah chuan in lamah ka awm ve leh ta. Nungdama min la zuah bik avang ringawt pawh hian hnuk a ulh ṭeuh mai a; ka mittui a tlâk mai loh nan ka meng zau lui hrâm hrâm a ni.

Ka rilru-ah Lake View Thlanmuala, Capitol Hill, Seattle,Washington-a Kungfu lalpa Bruce Lee-a fapa Brandon Lee (1965 - 1993), kum 28 mi awrh, a hmangaih êm êm Eliza Hutton nena inneih tuma an intintuah mêk lai, an inneih hun pawh ni 17 chauhin a daidang tawh tiha, “The Crow” film an channaa tihpalh thilthu-a an kahhlum tâk thlanlunga thuziak mawi êm êm mai kha a lo lang iarh iarh a.

Heti ang hian a inziak a nih kha

“Engtik hunah nge kan thih dawn kan hriat miau loh avangin hringnun hi belte phai thei lo angah riak kan ngai châwk thin. Amaherawhchu, engkim mai hi tâwp leh tiam chin nei, rei lo tê atana ruat a lo ni si.

"I naupan laia i hun hlimawm chhinchhiahtlak tak mai, i nunkhaw rahbi pawimawh tak i tuk laite kha vawi engzat nge chhui kir leh theihna tur hun remchang neih i inrin? Ṭum 4 emaw,
ṭum 5 emaw a ni mahna, chuti zât zât pawh chu a ni kher lo vang.

"Thla êng lo chhuak te hi vawi engzah nge hmu leha i inrin? Vawi 20 vel pawh a ni mahna. Amaherawhchu he’ng thilte hi vawi duai lo la tawng zel tura inngaih mai a va awl tehlul êm!”

He thu ropui tak hi Paul Bowles-a lehkhabu "The Sheltering Sky" (1949) aṭanga Brandon-a’n a thih hma lawka a changthlan a ni a.

Ni e, zing ni chhuak leh tlai ni tla te pawh hi vawi duai lo la hmu la hmu turah kan inngai thla rawk ṭhin a, ngaihhlut nachang pawh kan hre lem lo. Amaherawhchu engtik nî-ah emaw chuan tlai ni tla-in kâwlah min liampuiin, zing ni chhuak pawh kan tel lova a chhuah hun a la thleng ve ngei dawn si a!

ZO-LEI-DAI MIN BELHSAN TA SI

Ṭhian kawm nachang ka hriat tirh aṭanga ka
ṭhian, ka sakei mei vialpui, David L. Hrahsel (1974 - 2015) chuan Krismas hma lawk, ni 23 khan min theih lohsan a; urlâwk ni khan, ama ṭawngkam takin, “Zo-lei-dai” min belhsan ta. Ngaituahna a mang, sawi tur a vâng. Hlohna runthlâk, chânna lungchhiatthlâk a va ni em! Ka khawvel hian ngai a awh leh tawh dawn lo a nih hi!

A pa Japanese chem seia kangṭai hmun kan tuk darh te, Huanmawng tuikhura kan chen rûk te, Park Tlanga tlângsâm kan bawh ên te, Krismas dawna kan bûk sual te, Kâwnvenga a BMX (bicycle) ka thlawh liampui te, Tuikhurmuala an tuikhuah bula mei kan zûk rûk te, St Paul’s Hall-a kan concert te, leh ka hre reng tawh lo emaw ka tih thil tam tak, ho mai maia lang hi ka mitthla-ah a lo lang zut zut mai.

Rilru huaisen leh kawlh tak mai a ni a, a hnungtawlh mai mai ngai lo. Primary sikul kawta hockey kan khelh a, goalkeeping leg guards nen infam at-a goal a vên a, vuak goal a har êm avanga mau tiangkawm suih chawp hmanga tipalh titiha a hmaia na vak lo va ka vuak te khan, a mit han huaizia chu, khap pawh zu han khap ṭha duh hlek lo va.

Naupan laiin ho hran nei ve ve khan kan awm a; kan indo ṭhin. Mahse, rei lo tê-ah kan inchhûn fin ta a nih kha. A hnu-ah football team kan din a, kan hmingah ama phuah “The Ṭawih” tih kha kan hmang zet a, mahse official tournament-ahte kan tel a ngaih tâkah chuan “Soccer Rockers Club” ti khan kan hming kan thlâk a, rei fê kan ding zui ta nghe nghe a ni.

Chutah band kan han din ho leh a. “Geetanjali Band” kan inti a, chhuak hmasa lama ka lo sawi tawh ang khan, Mizo zinga Mizo ṭawng ngata mipui hmaa “rap” hmasa ber kan nih loh vek pawhin, a hmasa pawl chu kan ni ve ngat ang. David-a nen khan kan inchham chhawk a, a ni kha kan vocalist ber a ni nghe nghe.

Hla a phuah nasa a, kan phuah dun (co-written) a awm nual a, a thlûk ka siamsak pawh pahnih-pathum chu a awm ang. A tleirawl rîm ṭhin pi laka a tuitla lo deuhvina hla fiam “Ka Pi” tih a phuah te kha kan hlimpui thei teh asin, “Ka Jacket dum aṭangin min chhinchhiah a,” tihte kha a tel nuaiin ka hria.

Naupan lai aṭang khan ani kha kan hmuipuipu leh min chawk hlimtu ber a ni a. Mi dangina a thawnthu kan hriat ve miah loh Kariba thawnthu (Lake Kariba Legends) te kha a Nu Kûngi te in ruakah khan min chan (re-enact)-pui nasa ṭhin a; directing lama a kalna pawh a rei tawh fû a nih chu.

Thil han sawi hrim hrim bakah khan, sawi uar kha a thiam hle mai a. Chhuanawma’na a vawk hmuh lenzia a sawi pawh, hmuhpui ve hawt si lo khan, “Chu ai chuan ...” ti chhunzawm zat thei kha a ni a. Ka thawnthu tawi ziah “Riahrûn Râpawm (Haunted House)” tiha a character pakhata ka hman Hmachhuana kha amah ngei hi a ni.

Mi tlawmngai leh mi verther lo a ni a. A hmel a chhiat loh ang bawkin, a rilru pawh a ṭha duam mai. A bula awm a nuamin, a hahdamthlak a. Vanramah pawh a bula ṭhut an inchuh nak nakin ka ring a ni.

Ṭawnghmang a thiam bakah, thil thar chher chhuah thiam leh mi themthiam (creative & artistic) tak mai kha a ni a. “videography” lama a sânzia te kha mi tam takin an la hrilhfâk hial a ni. LPS Cable News Network-ah video journalist-a lût a, MJA lama a inhmang zui ta pawh kha a chemkalna tak niin ka hria.

A la naupangin hmachhawp hlenchhuah tur a la ngah em em a; a fanu Cindy leh Baby te’n pa an la mamawh ngawih ngawih nen. Lungchhiatna tur a tam a, inhnemna tur a tlem hle si.

Kum 20 chuang liam taa a lehkha min thawn hmawr bâwk nana a ṭawngkam hman, ‘Lung-chhiatthlak hle mah se Pathian rorel danah ngai r’u,’ (23/8/1993) a tih kha kan pawm mai loh chuan.

Spartan mi huaisen, Elysium Huan mawiah chuan i thla muang takin chawl tawh se, kei paw’n ka la rawn zawm ve ang che. Mahse, tunah mai lo deuh aw, tun maiah lo deuh.

SERENITY PRAYER

Lalpa ṭawngṭaina tih lovah chuan he “Serenity Prayer” an tih mai hi khawvela ṭawngṭaina lâr ber pawl a ni hial âwm e. American theologian Reinhold Niebuhr-a phuah a ni.

“Pathian, ka thil tihdanglam theih lohte lungdam taka pawm thei turin lungmuanna min pe la,

Ka tihdanglam theih thilte tidanglam ngam turin huaisenna min pe la,

An pahniha danglamna thliar thiam turin finna min pe ang che.”