ECI vs PATHIANNI SERH

TV chanchin thar puan kan ngáithla a; kan beng verh tak mai pakhat chu Election Commission of India (ECI) chuan December 3, Pathianni-a MLA inthlanna votes chhiar ṭhulh a remti lo tih a ni. Mi ṭhenkhat chuan he thil hi engah mah an ngái lo maithei a; mi tam tak erawh chuan ECI-in Pathianni kher khera votes chhiar a ti lui tlat chu hriat thiam harsa an ti thung. Engati nge heti taka ECI hian Pathianni-a votes chhiar ṭhulh a duh loh tlat tih hi hriat thiam har tak a ni. Hmàn deuha ECI hotute an lo kal khân Kohhran leh NGO hruaitute khán Pathianni-a vote thlák chu ti lo tùrin an lo sawi ngei a; chumi zàwm chuan Pathianni-ah chuan MLA thlan kha kan ti lo ta phawt a. Mahse, votes chhiar hun atân chuan December 3, Pathianni an rawn ti lui leh ngat thung a. ECI hotute lo kal khân Kohhran leh NGO hruaituten Pathianni-a votes chhiar loh ni se tih an lo sawi tel lo ni àwm taka sawi an awm a; chû tak chu ECI pawh hian an chhuanlam a ni mahná! A enga pawh chu ni se, heti taka ngen lawm lawm chung pawha an ti duh lo lui tlat hi chu hriat thiam har tak a ni hrim hrim! BJP sawrkarna hnuaiah hian Kristiante kan chép sáwtzia ti langtu pawimawh tak a ni phawt mai.

ECI chuan Rajasthan-in Dev Uthani Ekadashi ni-ah inthlan ti lo tùra a ngenna chu a pawmsak a; hemi ni-ah hian mi tam tak an inneih ṭhin vàng a ni. Mizoramin Pathianni-a votes chhiar ni lo se ti-a kan ngenna erawh chu min hnâwlsak thung si. Chû vàng chuan chanchinbu pakhatah chuan ‘EC hears Rajasthan, not Mizoram’ tiin an chhuah nghé nghé a. Mizoramin Pathianni-a votes chhiar loh kan ngenna hnâwl a nih thû leh Rajasthan-in Dev Uthani Ekadashi ni-a inthlan loh an ngenna pawmsak a nih thû an ziak a ni.

Pathianni-a votes chhiar leh chhiar loh chungchángah hian Mizo zîngah pawh mi tin ngaih dàn a rual vek lo ang tih chu a lang chiang sá a. Amaherawhchu, heti taka Kohhran leh NGO hruaituten kan ngen lawm lawm chung pawha ECI-in kan ngenna a pawm duh lo lui ngat hi chu hriat thiam harsa tak a ni. Kan sawi tawh ṭhin angin BJP sawrkar hnuaiah hi chuan Hindu ni ve lote chu kan chép tawlh tawlh ta mai chu a ni a; hetih láia ‘BJP Party ka vuan e’ lo ti tlat táwk kan awm reng mai hi chu Kristian kan nih ve pawhin kan sakhua hian min thunun lo hle tihna a ni ang a. Kristian kan nihna áiin eng emaw beisei dang kan nei lian zawk tihna a ni ngei ang!

NGO hruaitute hian Pathianni-a votes chhiar chungcháng hi engtin nge an kalpui zel dáwn kan hre pha ve lo a. Eng ang pawhin ngèn nawn leh pawh ni se, lung bang sut ang maiin an khãwk hlen ang a, December 3-ah chuan kan duh lo chungin votes chhiar chu ECI hian a ti lui hrim hrim dáwn pawh a ni maithei bawk a. ECI hi a thuneihna chinah chuan thû hlur mai a ni a; inthlanna thilah chuan a hnuaia thawk ni lo pawh a duh dàn dàna sawntîr nawl nawl thei a ni a. India rama sawrkar péng pakhatah chuan ECI tluka thuneihna záu hi a awm lo hial ang! Chû vàng tak chuan a tih tawhah chuan a nghet bur a ni ber ang.

Hetiang taka ECI-in Pathianni min bawh chhiat luihtîr a hreh loh tákah chuan Pathianni serh chungchángah hian kan ngaih dàn pawh a zal phah palh mai ang tih pawh a hlauhawm hlel lo a. Chû vàng chuan tûn hmá pawha ka rawn ziah tawh ṭhin Pathianni serh chungcháng hi ka rawn thãi lang nawn leh a ni. Pathianni serh chungcháng hi Thuthlung Hlui-a Thu Sàwm Péka innghat a ni tih chu kan hre ṭheuh a. Juda-ten Sabbath an serh ang tak erawh chuan kan serh ve lo.

Kum 1998 khán Holland ramah ‘Reading the Bible from the Jewish Perspective’ tih zirin thla khat lái ka zuk awm ve a. Zirtàwpni tlãi khat chu Juda ina zanriah ei tùrin kan hotuten mi 5/6 vél ṭheuin min sem darh a. Kan zanriah ei hun a lo thlen chuan dár 6 hnu lam a nih avàngin Sabbath a inṭan tawh a. Kan ei tùrte chu a tuihnái ṭha bawk a, kan ṭhian pakhat chuan thlalákna phawrhin a thla lák a tum ta mai a. Kan chaw eina tùr nû chuan, “Keini chuan Sabbath-ah thlá kan la ngái lo,” a ti a; kan ṭhianpa chu thlá la lo tùrin kan hrilh ta a ni.

Tûn thleng hian Jerusalem khawpuiah khu chuan Sabbath an la serh ṭha hle mai a. Kum 1998-a Holland-a ka kal hãwng lam kha Jerusalem-ah ni 8 ka rawn chám chho a. Sabbath ni takin Olive tláng lama ka kal hãw lam kha Ben Yehuda Street-ah zanriah ei tùrin ka phei a. Inrinni tlãi dár 6-ah pawh dàwr an la hawng lo tlat mai a. Dár 7 vélah chuan an rawn hawng pheuh pheuh chauh a; rilṭàm tawh nák aláiin ka thin an ti rim lek lek mai! Juda-te chuan Sabbath an la serh ṭha hle!

Mizoram Presbyterian Kohhran chuan ‘Kristian Nun Kaihhruaina – Sakhaw Lam’ tihah kán No.2-naah, “Ringtu zawng zawngten Pathianni an serh tùr a ni. Khawvél thil tih láwk theih leh ni danga tih theih – lei leh zawrh te, thu pawimawh dang sawi te tih loh tùr a ni...” tih a ni a. Hei hi kan zàwm ṭha hlawm em âw? Pathianni-a thil lei chîng kan la tam àwm e. Pathianni-a thil lei chîng kan awm chuan a zuartu an la awm tihna a ni ang a. Pathianni-a thil zuar ṭhin kan la awm chuan a chunga mi khi kan zàwm ṭha lo tihna a ni.

A chunga mi zàwm ṭha deuh ka hriat mi pathum chanchin ka sawi ang. Pakhat chu Pastor a ni a; amah dah nghet tùrin kum 2002 khán Kàwnpuiah ka zuk kal a. Pathianni chhùnah chuan Pastor Quarters-ah chuan bâwng hnute zuar a lo kal a, “Bâwng hnutê in lei duh em?” a rawn ti a. Pastor chuan, “Pathianni-ah thil kan lei ngái lo,” tiin a lo chhâng a; bâwng hnute zuar chu a lét vang vang mai!

Pakhat dang chu Aizáwl Model Vénga chhûngkaw pakhat an ni. ATC zirlái pakhat thi chu Siaha lama thawn phei hmáin Model Vénga a chhûngte inah a ruang an la a. ATC zirtîrtute chu zîng kárah kan va kal a; eng emaw inràwn ngái a awm avàngin ṭhenawm in hnãi berah chuan inráwn khâwm tùrin kan kal a. Chû in neitute chhûngkua chuan tûkṭhuan an lo ei mék a; an ina ka luh dáwn chuan an kawngkapui páwn lama thu ziak chu ka han chhiar a, “Pathianni-ah Top Up Kan Thun Thei lo,” tih hi a lo ni a. Anni chhûngkua khán Pathianni an serh ṭha hle a ni ang. Tûn thleng hian tûte chhûngkua nge an nih erawh chu ka hre ta chuang lo!

A pathumna chu ka pa kha a ni. Kum 1955 khán kan khaw hnuaia huanah thingfanghma tlàn Tuklo leh Tawlláwt awh nán thlangthlèng kan kam a. Ni tin thang áwk chãngin kan zuk feh dùn ṭhin a; ni khatah Tuklo leh Tawlláwt 40/50 te kan hàwn ṭhin. Inrinni tlãiah erawh chuan ka pa chuan khán kan thlangthlèng kam chu a ti per vek a; Pathianni-a sava awh a duh lo. Thawhṭanni tûk zîng takah thangthlèng chu a zuk kam leh vek a; tûkṭhuan ei khamah kan zuk kal dùn leh ṭhin. Ka pa kha chuan Pathianni-ah chuan thlawhhma chanchin sawi te hi a duh ve lo a; mi zînga a awm pawhin thlawhhma chanchin emaw, khawvél thil emaw an sawi chuan a ngáwi daih zél! Kristian Nun Kaihhruaina — Sahaw Lam khi a lo zàwm ṭha hle niin ka hre ta. Inrinni-ah a inbual láwk vek a; Pathianni-ah chuan a hmãi pawh a phih ngãi lo niin ka hre bawk. Tûnlái mi nèn chuan kan dang hle àwm e!

Ka pa ka chhunna lái tak chu Pathianni-a thil lei ka duh lo hi a ni. Vawi khat erawh chu loh theih loh thilin min nang tlat mai le! Synod Secretary (Sr) ka nih kum (2001) khán Synod Hospital doctor an nuar tlat mai a. Loh theih loh thilah Synod Officers Meeting kha Pathianni tlãiah ATC-a kan Quarters-ah neih a ngái a; zànah doctor-te nèna inhmu zui tùr kan ni. Keini chhûngkaw tlém tê chuan patling 8 ei khawp sa lei láwk lo nei hek lo i, Pathianni chawhnu inkháwm bángin Leitan South-a Ramhmangaihi arpa ka lei hãwng a; a mitdel a lo ni lehnghãl! Chû chu Pathianni-a ka thil lei awm chhun a la niin ka hria. Thil dangah entawn tlák ni vak lo mah i la, Pathianni-a thil lei lohah hi chuan insûm thei ve tak chu ka ni. Hmãn deuh lawk khán Pathianni-ah ka allergy a chhuak nasa khawp mai a; biak inah pawh hnap ka hru reng mai a. Kan kawmthlangah damdawi dàwr chu a awm reng ná a, Pathianni a nih avàngin ka hawntîr duh lo. Ka tuar khawchhuak thei ta hrãm chu a nih ve kha! Mahni inhrem chu ka ni ngawt e!

Election Commission of India hian Pathianni-a votes chhiar kan duh lo chung min chhiar luihtîr a nih pawhin sãhãwk takin mipui hi awm lo i la. Kan rilru chuan Pathian lam hawi reng thung se la. Tûn hnûah Pathianni bawh chhiat chìn phah nán hmang zui lo bawk i la. ECI hian Pathianni serh thû-ah min nawr ṭang hlauh záwk se la. Mizoram hi India ram mai ni loin khawvél pum puiah Pathianni serh ṭhat berna ram ni tùrin ṭan i la thar sauh záwk teh ang u..

BJP sawrkar hnuaiah hi chuan zalènna kan nei tlém tawlh tawlh ang tih hria i la. Chutih láia ‘Ka BJP e’ lo tih hi sim hmak záwk teh ang u. Mi hausa leh ṭhalái hausak thut duhho hian BJP hi an bawh deuh ber ang. Sum ûmin i BJP suh ang u!