TUN HNAIA KA HUN HMAN DAN

Kár kal ta Nilaini khân ka ṭhianpa P.Vanluia@Paluia of Saron Véng ka va tlawh a. Ka tlawh chhan chu Chhûngan Krismas ni-a a thingpui in lâi thla a rawn tàr chhuah ka hmuh khân a hmél a chuai riaua ka hriat vàng a ni. Dárkár 3 dáwn lái kan inkàwm a, kan hlim dùn hle.

Kum thar ni-a thla lák dun ka rawt a, ka va pan zâwk tùrin kan inbe fel a.

Ka pheikhawk bun kha kum 2018-a aliexpress.com aṭanga ka chah, a chhûng lum a ni a. Ka bun chhintir a, a bun táwk ve chiah. A dang, a rawng dum ka neih tho avàngin pakhat chu pék ka intiam a.

A tûkah chuan ka pheikhawk bun ngai bawk bunin, pakhat záwk, a dum chu kengin ka va léng leh a. A duh thlang tùrin ka ti a, a dum chu a thlang ta záwk a. Pheikhawk chhûng lum a nei ve ta chu ka làwmpui hle.

Inrinni zànah khán kan Pastor, Rev.ZD LALHMACHHUANA leh Pro Pastor Rev. Z. Lalduhzuala kan kohhranin thlahna inkhâwm kan nei a. Thlahna thuchah ka sawi. Pastor kan thlah apiang hian ka awmna bial a nih avànga lo awm an huphurh thû an sawi ziah a. Mahse, mi sawi ṭhaih dàn leh an rin ang ka lo nih si lohzia hi am sawi uar hle ziah bawk.

Pathianni zànah khán inkhâwm ka hruai a. Kum 2023 chhûnga kan kohhrana mi chatuan ram pan ta mi 7 sùnna kan nei a, inkhâwm kan ṭha hle. Hla 3 thlan sa, tàr chhuah ka nei a, 2 chu lènkhâwm zai thlûka sak tùr a ni a. Zaipáwl an zái bawk. Zan dang ái chuan inkhâwm kan rei hret, dár 8:10-ah kan báng.

Nimin khán ruai ṭheh dáwnah nu pakhatin inkhâwm hruai ṭha min tih thû min hrilh teh tlat a. A pasal nèn an lawina kohhrana ka awm ve vànnei an intih thû min hrilh zui? Tak tak ni maw?

Kum thar ni, chawhma inkhâwmah thû ka sawi. Thupui kha 'Kawng thar leh nung' tih a nih kha. Minutes 35 chiah ka sawi.

Chawhnu inkhãwm bànah ka ṭhianpa Paluia te in chu taxi-in ka pan a. Chhúnga pawh a lo awm tawh a. Ka ṭhianpa nèn thlá kan lák dun zawhah ka hâw leh ta a ni.

Kum thar zànah kan Pastor-in thû a rawn sawi ve thung a, clerical collar kual chhuak, a ṭha chi ka lo pe.

Nimin chu Chawnpui Kohhran Upa KM ZAKHUMA vùinaah ka zuk tel. Mi kan ṭhahnem hle. In lama thlahna ka nang hman. A ruang ka va en chu a nupuiin min lo ṭah khum. Thlahna hun hmangtu khán a hming a lam dik lo. Zakhûma a ni lo a, Zakhuma a ni, a ri khum khum tiha khum anga lam tùr.

Biak ina vuina chu Aizáwl West II Presbytery Moderator, Upa B.Lalrinkima, mitthi tho leh an tih kha a ni! A vûi ṭha viau. Vui zawha thla kan lákpui zawhah Vaivakàwn ka pan a, taxi ka la a, ka hâw nal nal a, dár 2:30-ah in ka thleng.

Ruai ṭheh tûrin dár 3-ah biak in ka pan a. Nu pakhatin min lo chibai a, Dam reng rawh. I thih kan phal lo a ti a. Ka kutah eng emaw ni a dah a. Kan inchibai zawha ka han en chuan chéng za nga notes 2 a lo ni a. Beisei loh lam aṭangin mitthi vùinaa ka kalna sènso chéng za ruk khuh dâwrh khawp pawisa ka dawng tlat mai.

Nimin tlãiah Chhûnga'n ka ṭhianpa nèna kan thlalák dun chu min rawn thawn a. Ka lâwm hle mai.

Hmélin puãk ti ve ta lo chu lan ṭhat viau thû a awm lo a. Mahse, keimahni rau rauah hmuh hrehawm khawp chuan kan chhe lutuk bîk loin ka inhria!

He article hi a boral hma ni, 03/01/2024, 8:30am a a ziah a ni a, a thuziah hnuhnung ber a ni. - Editor