CONGREGATIONALIST & PRESBYTERIAN CHURCH

Kum 2013 August thla aṭanga Vànglaini chanchin­bu an tihlen dâwn khân Joint Editor-in kâr khatah thuziak vawi khat thawh ve tùrin min rawn sâwm a. Inrinni min pêk chhan pawh hi ‘Sunday School zirlai te pawh i khawih duh ang a’ a tih vàng a ni. Thil pakhat han zep lawk ila; mi ṭhenkhatin Kohhran Thurin zirna bu ka siam emaw an ti a, Synod Bookroom-ah an lam ṭhin a ni àwm e; mahse chutiang siam eng mah ka nei lo a, siam pawh ka tum rih bawk hek lo. Nikum November thlaa chhuak, Synod Newsletter Volume XXVIII No. 374, phêk 2-naa ‘Hriattîrna’ No. 2-ah khán ‘Puitling Sunday School zirlaibu, mi dangin an lo ziah ve chungchâng’ tih Synod Officers Meeting thu kha Synod Secretary-in a rawn chhuah a. Khatah khán ‘mi dangin sumdàwnna ang titiha kalpuia an lo ziak ṭhin hi’ tih a tel a. Kum 2013-a Sam hrilhfiahna leh 2014-a Paula Lung In Tàn Lehkhathawn ka ziakte tinzâwna thuchhuah kha siam a ang hle a. Chutiang chu mi tam takin an ngaih dàn a nih thu min rawn hrilh bawk a. Chuvàngin sumdàwnna rilru pu-a ziak ka ni lo tih mipui hriatah ka han puang tel duh bawk a. Bible bu pum pui hrilhfiahna siam hi ka dam chhûng project atân ka neih lai a ni a. Bible indawta ziah ka tum hran lo a, ka rilrua lo lang angin ka ziak mai dâwn a ni. Puitling Sunday School zirlai tùr hi kum 3 hma lama thlan lâwk a ni ṭhin a. Hemi hria hian Bible zir dâwn kumah chuan Myanmar aṭangin hrilhfiahna bu a lo chhuk deuh ziah a. An hrilhfiahna siam dàn lah hi kan kohhran zirtîrna nèna inkalh deuh takte a ni fo lehnghâl a; chûng lehkhabute chu Synod Bookroom-ah hian an zuar kum tin bawk a. Chûngte chu zawrh loh ngam a ṭha zâwk ang em? Tûn hma khán Kohhran Upa ṭhenkhatin Puitling Sunday School zirlaibu duh tâwk loin a puitu ni àwm tak an lo ziak ṭhin a. Kei bák tu dang ziak an awm loh laia thuchhuah lo awm ta mai hi a mak angreng a; ka ziah ve hi Thuthlung Hlui hrilhfiahna ka siam kal zêl kârah ka han pêng kâwi lawk chauh a ni. Tûn hnuah pawh ka pêng kâwi leh zawk lo ang tih a sawi theih loh. Kohhran Thurin erawh hi chu ka ba lam a nih loh avàngin ziah ka tum lo.

India ramah Kohhran inzawm khâwm (organic union) lian tak pahnih a awm a. Pakhat chu Church of South India (CSI) hi a ni a; a dang chu Church of North India (CNI) a ni. Church of South India lo pian theih nâna bul tumtu Kohhran pahnih chu Presbyterian leh Congregationalist te an ni. Congregationalist hi Mizoten kan hmêlhriat vak lo a; eng ang Kohhran nge a nih tih zawhna pawh ka dawng tam hle. Khawthlang lama Kohhran pâwl (denomination) pakhat a ni ṭhin a. India ramah missionary te rawn tîrin kohhran eng emaw zât an din a ni. Congregationlist Kohhran chu inrèlbàwlna lamah tualchhûng kohhran (local church)-in thu tâwp a nei a. Presbyterian angin Pastor Bial, Presbytery leh Synod tih angreng an nei hran ve lo. Pathian biak dàn kalhmangah pawh liturgy phuah sa an hmang ve lo a; a tlachawp an uar thung a ni. Khawvêl hmun danga Baptist Kohhran pawh Congregationalist ang deuh bawka tualchhûng kohhran thuneih lenna a ni a; Mizoramah hian khawvêl hmun danga Baptist Kohhran kalhmang an zui lo a, Presbyterian Kohhran kalhmang zuiin an kal zâwk a ni.

Congregationalist leh Presbyterian hi khawvêl kohhran inzawm khâwm (church union)-ah hmahruaitu pawimawh tak an ni ṭhin. England ramah pawh khuan Presbyterian Church of England leh Congregationalist chu inzawmin United Reformed Church (URC) an din a. Kan rama missionary Rev. A. Robert-a luhna Westminster College (Cambridge) kha tûnah chuan URC ta a ni a. India chhim lamah pawh kum 1908-ah khân South India United Church (SIUC) chu Presbyterian leh Congregationalist inzawmin an din a ni a. SIUC hi Church of South India lo din theihna tùra sûlsutu bulpui ber a ni. SIUC hnathawh rah chu lo pâr chhuakin September 27, 1947-ah Church of South India (CSI) chu a lo ding ta a. CSI-ah hian kohhran pâwl hrang hrang – Presbyterian, Congregationalist, Anglican Church, British Methodist Church te an inzawm khâwm a. Anglican Church hi a lian ber an ni a, an tih dàn zuiin CSI chu Bishop nei kohhran a ni. CSI hi tûnah chuan India ramah Catholic tih lohah chuan Kohhran lian ber an ni a. Member maktaduai 4 aiin an tam tawh a, tualchhûng kohhran 14,000 zet an nei a, minister pawh 11,214 an nei bawk.

India hmàr lama Kohhran inzawm khâwm lian ber chu Church of North India (CNI) hi a ni a. CNI-ah hian tualchhûng kohhran 3500, bishop bial 26, member 1,500,000 vêl an awm a. Minister 1200 vêl an awm bawk. India chhim lama kohhran inzawm khâwm tuma an beih lai aṭanga inzawm khâwm dàn tùr ngaihtuaha kawng lo zawng ve tawh an ni a. Mahse inzawm khâwm tùr zîngah hian British Baptist an tel a; anni hian baptisma chantîr dànah duh dàn bîk riau an neih tlat avàngin inzawm khâwm hun pawh an tihkhawtlai phah ta a ni. CNI-a tel kohhrante chu Presbyterian, Congregationalist, Anglican Church, British Baptist, Church of the Brethren, Methodist Church (British & Australia) leh Disciples of Christ te an ni a. Kum 1996 Synod-ah Agra leh Lucknow diocese-te chu CNI aṭangin an chhuak a; United Church of Northern India (UCNI) kha an tinung thar leh ta zâwk a. Church of the Brethren pawh kum 2006 khán an chhuak ve leh bawk. CNI hi India ram chhim lam State 4 – Kerala, Tamilnadu, Andhra Pradesh leh Karnataka tih lohah chuan an awm deuh vek a ni. American Methodist te chu CNI-ah hian an tel ve duh lo a. A chhan lian ber chu an Bishop-te hlawh a tam fâl si a, inzawm khâwma an tel chuan an hlawh a tlahniam dâwn a, an tel loh phah ta nge nge a ni. American Methodist hi tûnah chuan Methodist Church of India (MCI) tih an ni.

India ramah kum 1875-ah khán Presbyterian Alliance siam a ni a. Kum 1904-ah Presbyterian pâwl hrang hrangin ‘Presbyterian Church in India’ an din leh a. Hei hi zirlaibuin PCI–I a tih chu a ni a. A hmingah hian ‘in India’ tih a ni a; tûna PCI hi chu ‘of India’ tih a ni thung. PCI hmasaah khán Presbyterian Church of Assam chu a tîrah a tel ve lo a; kum 1921-ah a invènna (reservations) eng emaw nei chungin a zawm ve ta chauh a ni. Kum 1924-ah chuan PCI hmasa leh Congregationalist te chuan United Church of Northern India (UNCI) an din a; an ziah dàn tak chu ‘United Church of Northern India (A Union of Presbyterian Churches in India)’ tih a ni a; bracket chhûngah hian ‘church’ ti mai loin ‘churches’ tih a ni a, ‘of India’ ti loin ‘in India’ tih a ni bawk. UCNI hi Presbyterian Church of Assam (PCA) khán kum 1923-ah a zawm a. UNCI hian Thurin Puanchhuah 12 a nei a; chuta ṭang chuan Presbyterian Church of India (PCI) Thurin Puanchhuah 10 hi siam a ni.

Thil pakhat chhinchhiah tlák tak chu India rama Kohhran inzawm khâwmah hian Presbyterian hi hmahruaitu a ni ṭhin a. An inzawm khâwm hnûah pawh mahni Kohhran zia (Presbyterian zia) hloh nasa ber a ni àwm e. Hei hi a chhan eng nge ni ang tiin ka ngaihtuah nasa tawh a. United Theological College-a BD ka zir laiin Church History zirtîrtu Prof. Fred Downs-a pawh ka zâwt a; mahse min chhâng mûmal lo. A chhan ni ta ber àwma ka ngaih chu Presbyterian chu kan insawrkarna (polity)-ah kan innghat ber a; kohhran pâwl dang angin zia eng emaw uar bîk tak kan nei lo. Kohhran ṭhenkhatin baptisma chan dànah hnim phûm kher an uar tûk laiin keini erawh chu chutiang kan ni lo. Thil uar bîk tak kan neih loh avàngin pâwl dang lakah pawh kan insiam rem thei zêl a. Tûnah pawh hian Mizoram Presbyterian Kohhran hian ṭhenawm kohhrante tih dàn ka la nasa bîk hle a ni. Kohhran inpumkhatna kawngah pawh hmahruaitu kan ni thei zêl bawk a. Mizoramah kohhran inpumkhatna kan sawi thar leh ta a. Kohhran pakhat (organic union)-ah insiam dâwn tak tak ila, Presbyterian hi chu insiam rem thei ber kan nih a rinawm. Pâwl ṭhenkhat chuan an thil uar bîk kha vawn nun reng an duh ang a; CNI din tlai chhan pawh Baptist-ho vàng a nih kha. Pâwl ṭhenkhatin chîm ral an lo hlau tum hrang bawk ang a. Presbyterian Kohhran aiin a tak takah chuan Kohhran pâwl dang hian inpumkhat an harsat zâwk a rinawm. Tûn hmaa missionary phun kohhran pathum – Presbyterian, Baptist leh ECM inzawm khâwm tum lai pawha thil thleng kha hetiang hi a ni. Presbyterian Kohhran hi chuan pâwl dang rem kan harsat lo zaw ber zêl ang.