PASTOR INCHEINA

Hmàn ni (3.2.2015) khán WhatsApp-a Mizo Synod Pastor Group-ah (Mizoram Synod Pastor Group tih ni zâwk se) hian Synod hruaitute zînga pakhatin tûnlaia Pastor ṭhenkhatin hmui hmul zuah an rawn chîng thar hi a ngaihmawh deuh thu a rawn târ lang zauh mai a. Ani meuhin rawn tilang duh ta chu tiin sawi zuinaah chuan ka inrawlh ve a. Kei pawh tûn hnai thil pawh ni chuang loin hmàn aṭang tawhin Pastor zîngah hmui hmûl emaw khabe hmul emaw zuah ka hmuh hian ka ṭim deuh ṭhin. An inhmeh viau azeng pawh chu a ni bîk si lo a. Pathian thu ka zirpui ngei pakhat pawhin chutiang chuan a zuah ṭhin a; a hmêl a chhiat phah zâwkin ka hria a. Mahse a piang thar ta deuh emaw ni, tûnah chuan a lo mêt kawlh ta vek mai a, a hmêl pawh a ṭha sawtin ka hria. Kan hnathawh azirin kan inchei dàn hian kawngro su tùr a nihna chin a awm. Chu chu Biak In chhûngah chauh ni loin kan khawilo nihna hmun apiangah a lang tùr a ni ang.

Hmui hmul zuah chungchâng kan sawi ho lai chuan kei lah pêk chuan bari ṭhen bawk ka lo buaipui leh hmanhmawh a. Lêngzèm chanchinbuah, ‘Revd Chuauṭhuama pension hnûah ATC zirlai lu kawlh an tam sawt an ti’ tiin an lo chhuah emaw ni? Nikum Synod (2014)-ah khán Pastor nemngheh tùr leh Pro Pastor lák thar zîngah khán a zâtve vêl chu bari ṭhen an ni ve leh ta tlat mai a. Bari nei tawh mang loa lu mêt phirsi hlîr chu an ni bîk dâwn lo a nih hi tiin ka ngaihtuah neuh neuh a. Pastor ṭhenkhat chuan ‘gel’ nèn pawha an sam an thunun hleih theih loh thu an rawn sawi ve thung a. An lu an meh phirsi luih tlat chuan thunun a har deuh pawh a ni ang! Tum leh tum lohah a innghah ka la ring ta fan. Bari han sawi tákah chuan Pastor ṭhenkhat chal ngalh ve tak tak, sam tlêm bawk si tân chuan bari ṭhen tùr alawi a awm lo ve thei bawk ang. Hmân ni khán ATC Bus-ah Pastor pension, kei aia kum khata naupang chu ka hmaah hian a ṭhu a. A sam a lo tlêm bâkah a chal a ngalh ve angreng tawh bawk nèn, bari han ṭhen hlei thei a ni lo tih ka hmu. Mahse Pastor naupang tê tê, sam la duah ṭha tak takin football player ṭhenkhat lu meha an lu an meh luih tlat chuan thunun tak tak ngaihna chu a awm kher lo ang. Mi ṭhenkhatin lu mêttuten hetiang lo chuan an mêt thiam lo an tih pawh hi a âwihawm lo. Lu kan mehtîr chuan kan duh dàn kan sawi a, kan sawi angin an mêt mai zâwk a ni. Thil hi chu tum tak tak leh tak tak loh azir a ni ber zâwkin a lang.

Chutianga lu lam ringawt kan sawi ho lai chuan thil pakhat clerical shirts hák chungchâng ka han thawh ve leh a. Clerical shirts hi Pastor-ho hian an ha tam lo angreng hle. Tûnah hian Presbyterian Kohhran Pastor-te chu sakramen inkhâwmah leh mitthi vui inkhâwmah chuan ha deuh ngei tùra beisei an ni ta a. Tûn hma deuh phei kha chuan Pastor senior zîngah clerical shirts ngaisâng vak lo, neih pawh nei lo an awm a ni àwm e. Tûnah erawh hi chuan Synod inkhâwmpui meuhin ro min rèl hnan ta a, neih ngei tùrah kan ngai tlâng ta a ni. A hák hun thûah erawh chuan inkhâwmpui laiin Pathianni-ah emaw an ha ṭhin a. A bák chu sakramen ṭheh inkhâwm leh mitthi vuinaah a ni deuh ber. Hei bákah hian châng an zauh vak lo. Tûn hma kha chuan Catholic puithiamho hian eng lai pawhin an ha reng emaw tih tùr a ni a. Office-ah puithiam kawr vâr nên an lo kal chuan ngaihsak pawh an hlawh nge nge ṭhin a, an zahawm bîk tlat alâwm.

Tûnlaiin khawthlang ramah chuan clerical shirts hi ni tin a nih êm loh pawhin Pastor-ten an ha tam hle. A rawng thûah chuan Bishop nei kohhran chuan senduk leh senlâr hi chu Bishop kawr rawngah an neih deuh a. Tûnah chuan clerical shirts pawh a dung zâwnga ṭialte pawh an siam ta a; puithiamho chuan ni tin incheina ang deuhin an hmang a. Kamis pângngai anga ṭhui, a nghâwngah erawh chuan clerical collar vuah mai theihin an siam ta. Duh hun hunah clerical collar kha lák thlák theih a ni a; chutianga collar lák thlák chuan kamis pângngai ang deuh chiah a ni. Mizoramah hian clerical shirt ṭhui mai chu a harsa lo; mahse clerical collar hi hmuh a har thung si. Hetiang a nih hi chuan Synod Office hian Pastor-te clerical collar tùr hi Sâpram aṭangin chah ṭeuh sela, Pastor-ho hi man loin sem mai se a ṭha ngawt ang. Kum 2000 chho lai vêl kha chuan Kohhran hruaitute Sâpram lama zin thûah an la insûm hle a; an zinnaa nuamsa taka an lo sâwngbàwl dàn pawh sawi tam an duh lo. Kum 2000 kuma Synod hruaitu pali PCUSA nèna thuthlung siam tùra an kal pawh khán an lo haw kha chu Moderator khán a nawmzia lam sawi vak lo tùrin a zinpuite a chah hial a ni. Tûnah erawh chuan Kohhran hruaitute hi Sâpram lamah kum tin zin tâwk an awm ta deuh ziah a; hetianga hruaitute zin hian clerical collar hi rawn hàwn ṭeuh sela. A rit vak bawk si lo, kalkawngah buaipui tùr a awm lo ang. Online pawhin a chah theih bawk a; mahse a thawn man a to duh phian. Clerical collar pakhat man hi £ 1.20 emaw lek ni mah se clerical collar 5 chah ta ila, thawn manah ringawt

£ 15 aia tlêm lo sèn a la ngai. Chuvàngin kan hruaitute zin hian kohhran sumin lei sela, a free-a Pastor kan pe phal a nih êm loh pawhin a man hû tâwkin an khul mai ang chu! Synod meuhin ha tùra kan rêl hnan tawh a nih avàngin Pastor-te chuan clerical collar na ná ná chu a free-in dawng ve mai sela. Clerical collar hi lei mai tùr a awm loh avàngin Pastor ṭhenkhat chuan damlo enkawlna drip bâwm ruakte hi an lo hmang ṭhin a lo ni a. Chutiang lo hmang Pastor pakhat chu kei pawhin ka ta pakhat ka pe ringawt tawh a ni. Kawr hi chu hêng laiah an ṭhui thiam ve tho a; Sâprama mi chah chuan a thawn man nèn kawr pakhatah Rs 3500/- vêl sèn a ngai.

Chutiang chuan clerical collar chu kohhran office-in lo nei ta sela, tu chin nge a pêk ang? Nemmngheh tawh Pastor chin nge ni ang a, Pro Pastor a pe tel ve ang em? Pro Pastor pe tel ve ta sela, Pro Pastor an nih chhûngin clerical shirt an hák a rem ang em? Hei hi hmàn ni-a Mizo Synod Pastor Group-ah chuan kan sawi lang ta a. Sawi honaa rawn tel Pastor tam zâwk chuan Pro Pastor-te chuan clerical shirts ha ve lo tùrah an rawn ngai ta mauh mai! Synod hruaitu zînga pakhat sawi honaa rawn tel ve erawh chuan Pro Pastor-in clerical shirts an hák rem lohna a hriat loh thu a rawn sawi ve thung. An zîngah chuan ṭhûro zînga choâk awm ang mai ka ni ta. Kei chuan Pro Pastor ka nih lai khán clerical shirt ka ha ṭhin tlat. A chhan chu min kaihruaitu Pastor-in ka hák a remti a; kan bial kohhran mipui pawhin an phût bawk. Kohhranho nèn kan inkawmnaah chuan ‘inneihnaah leh mitthi vuinaah chuan clerical shirt ha ngei ula kan duh’ an ti ve tlat mai a. Clerical shirt ka lo nei sa thlap bawk si a, ka ha ve ta ṭhin a ni. Chutih laia Lungleia kan hotupa ber, Synod Secretary leh Moderatror lo ni tawh pawh khán ‘chu e, kha e’ a ti miah lo.

Sawi honaa lo tel ve pakhat chuan, “Sir, nang chu thiamna lamah pawh mi bîk i ni a; chuvàngin i tih chu mi pawhin an hre thiam ang chu” a rawn ti a. Mahse ‘mi bîk ka ni lo’ tih ka hrilh a. Khawvêl hmun dangah hian Pro Pastor kan tih ang chiah hi an nei ve lo emaw ni? Church of South India-ah khuan Assistant Pastor an neiin ka hria a; chûngho chuan puithiam kawr an ha ve thoin ka hria a. ATC-ah pawh Visiting Professor-a tûn hnua lo thawk tawh Prof. Sebastian Kiran-a pawh khán Assistant Pastor a nih laiin a ha tlatin ka hria. Ka hre sual palh pawh a ni mai thei. Dàn lamah chuan khawiah mah Pro Pastor-in clerical shirt a ha tùr a ni tih emaw a ha tùr a ni lo tih emaw a awm lo ang. An háka mak kan tih chuan kan rilru lam a intiam lo tihna a ni ang a, an hák ṭha kan tih chuan a sual vak a rinawm chuang lo. Kum 1993 Synod (Mission Vêng Biak In)-a min nemngheh ni-a kan thlalâk kha ka han zawng chhuak leh a; nemngheh mi 10 zîngah khán keimah chauhin clerical shirt ka ha. Tûna Pastor-ho hian clerical shirt hi an Pro Pastor lai khán nei ta sela, hák an chák viau ṭhin lo’ng maw? Lo ha ta sela, thil tisualah kan ngai ang em? Mipuiin Pro Pastor-te hi clerical shirt ha tùrin kan beisei em? Kei zawngin Pilata ṭawngkam takin, ‘Pro Pastor ka nih laiin ka hák kha, ka ha zo tawh’ ka ti mai dâwn!