Easter Sunday Sermon ISUA THAWHLEH ANGIN KAN THO LEH ANG Joh 20.6,7; Phil 3.21

Kumin March 5, 2015 Easter Sunday zàna Presbyterian Kohhran thupui chu a chunga mi khi a ni a. Paula chuan Phil 3.21-ah heti hian a lo ziak a, “Ani chuan a thawhin, engkim pawh ama thu thuin a awmtîr thei, chumi thawhzia ang zêlin, kan tlàwm lai taksa hi (lehlin tharah kan taksa tlâwm tak hi) ama taksa ropui anga awm tùrin a siam ṭha leh ang” tiin. Apostol-te thuvawnah khán “Taksa thawhlehna ka ring” tih a ni a. Kan Kohhran Thurin number 10-naah khán, “Ni hnuhnungah chuan mitthite chu kaihthawhin an awm ang a, mi zawng zawng Krista rorèlna ṭhutphah hmaah an lang ang a, he dam chhûnga an thiltih ṭhat leh ṭhat loh ang zêlin rèlsak an ni ang. Ringlote leh mi sualte chuan thiam loh changin an sual hremna an tuar ang; Krista ringa a thu zàwmtute erawh chu a langchanga thiam chantîrin an awm ang a, ropuinaa lawm luhin an awm ang” tih a ni bawk.

Paula hian a lehkhathawn hmasa lamah thawhlehna chungchâng hi fiah thei ang bera sawi tumin a bei a. Mahse tho leh taksa pu a la nih bîk si loh avàngin a tumah a hlawhchham niin ka hre ṭhin. 1 Kor 15-ah tho leh taksa awm dàn tùr a sawi tam hle a, “ṭawih theia tuhin a awm a, ṭawih thei loa kaih thawhin a awm; chawimawi loha tuhin a awm a, ropui taka kaih thawhin a awm; chak loa tuhin a awm a, thiltihtheihna neia kaih thawhin a awm; mihring lam taksaa tuhin a awm a, thlarau lam taksaa kaih thawhin a awm. Mihring lam taksa a awm chuan thlarau lam taksa pawh a awm ang” (1 Kor 15.42–44) te tiin kimchang takin tho leh taksa chungchâng a sawi a; mahse a sawi fiah zo tak tak chuang lo. A upat lamah, Rome khuaa a tàn laiin Philippi mite hnêna lehkha a thawnah erawh chuan tho leh taksa awm dàn tùr chu thu tam tak hmanga sawi fiah tum tawh chuang loin ṭawngkam tlêm têin, “Ani chuan a thawhin, engkim ama thu thuin a awmtîr thei, chumi thawhzia ang zêlin, kan tlàwm lai taksa hi ama taksa ropui anga awm tùrin a siam ṭha leh ang” a ti sam ta êt mai a. Kan dam lai hian tho leh taksa awm dàn tùr hi sawi fiah theih a ni lo rêng a ni.

Phil 3.21 thuin a tihchian êm êm chu Lal Isua thawh leh angin kan tho leh dâwn tih hi a ni a. Isua thawh leh dàn chu Chanchin Ṭha bu lamah kan hmu a. Puana tuam, aloe leh murra pawh bûk tam tak nêna an phùm tawh kha, a thawh leh tûkah khán thawhsan vekin, a taksa erawh chu tihdanglama awmin a tho leh ta a ni. A thawh leh hnûah chuan hun leh hmun (time and space)-in daidangin a khuahkhirh ve tawh lo. Emmau kawngah ṭhian dùn pahnih kal lai a pâwl a; zanriah an kîl laiin a kut aṭangin tu nge a nih an hriat veleh a bo ta daih a. Jerusalem-ah Petera teho pindan chhûngrilah an inkhàrkhip tlat a; chu inah chuan tu ma hawnsak ngai loin a lût leh mai a. Hmàna hmun khatah chauh a awm theih lai ang kha ni tawh loin a thawh leh hnûah chuan mit khap kâr loah hmun tinah a awm thei ta a ni. A thawh leh hnua a inlàr ṭum khatah khân a zirtîrte ngei pawh thlarau hmûah an inngai a. Mahse Isuan an hnênah, “Ka kutte, ka kephahte hi en rawh u, hei keimah ngei kha ka nih hi! Mi dek ula, en rawh u; mi hmuh ang hian thlarauin tisa leh ruh a nei lo e” a ti a (Lk 24.39). He thu hi hrilhfiahtu ṭhenkhatin an hrilhfiah dik lo palh ṭhin a; tholeh taksa chuan thlarau angin tisa leh ruh a nei lo tiin an sawi a. Mahse Isua sawi awmzia chu ‘thlarau chuan tisa leh ruh a nei lo; kei erawh hi chuan tisa leh ruh ka neih hi’ a tihna a ni. Kan thawh leh hunah pawh Isua angin tisa leh ruh kan nei ang a; kan tisa leh ruh erawh chu tûna kan dam laia mi ang ni loin tisa leh ruh ropui zâwk a ni tawh ang. Chutiang taksa pu ngei chuan Isua ringtute pawh hi kan tho leh dâwn a ni; chutih hunah chuan Paulan, “Kan tlàwm lai taksa hi ama taksa ropui anga awm tùrin a siam ṭha leh ang” a lo tih hi a takin kan la chang ngei dâwn a ni.

Mitthi thawhlehna chungchângah hian pâwl ṭhenkhat chuan keini hi chiang lo min ti ṭhin a. Mi an lo thih hian, “A Lalpa hnênah a chàwl ta” kan ti a; a thlarau chu Lalpa hnênah vànramah kal nghâlin kan ring a. Mi ṭhenkhat erawh chuan mi a lo thihin tàwp vang vang rih tùrin an ngai a; nakinah Isua lo kal leh hunah kaih thawh ni chauh tùrin an ngai. Chutiang chu keini chuan kan rin dàn a ni ve lo. “A Lalpa hnênah a châwl ta” kan tih hian an thlarau chu vànah kal nghâlin kan ring a, Isua hnênah chàwl ta niin kan pawm a ni. Chutiang chu Kohhran pâwl tam takin an rin dàn a ni. Kan mite zîngah hian thih dâwn hnaiha an kalna tùr hmu lawk, “Min chelh tawh suh u, ka kalna tùr a nuam êm mai” ti an awm fo a; an thil hmuh hi a takah kan ngaihsak mai a. Kohhran pâwl ṭhenkhatah chutiang thil hmu an awm ve lo a nih chuan an inenfiah deuh a ngai mai àwm mang e!

Kan thih chuan kan taksa (ruang) chu thlànah kan phûm a, a ṭawih ral ṭhin a, ‘lei chu leiah, vaivut chu vaivutah’ a chang leh ṭhin. Mi ṭhenkhat chu vànduai avàngin an taksa a kàng ral vek a; ṭhenkhat chu sakeiin an ei zo vek a; ṭhenkhat chu nghapuiin an dawlh a, an ṭawih ral vek bawk a. Mahse kan taksa chu eng anga ral tawh pawh ni se ni hnuhnungah, Isua lo kal leh hunah chuan kaih thawh leh a ni dâwn. Chutih hunah chuan kan tlàwm lai taksa ngei hi Isuan ama taksa ropui anga awm tùrin a siam ṭha leh dâwn a ni. Tichuan, famkim lo mihring taksa kha taksa famkim a lo ni tawh ang.

He thil hi mi tam takin an hre thiam ṭhin lo. Sakei ei zawh tawh te, meiin a kan ral tawh te chu thlàna kan phùm nên chuan danglam deuh tùrin an ngai a, kaih thawh tùr awmin an ring thei mang lo. Pathian thiltihtheihna hi an ring nêp hle tihna a ni. Mi thiamte chuan khawvêla thil eng mah hi a ral tak tak thei lo an ti. A awm dàn leh nihna erawh chu a inthlák thei. Mihring taksa pawh nunga kal âwt âwt thei kha a thih hnu ni rei lo têah vaivutah chang mah se a ral thei lo. Chutiang chuan kan taksa chu eng anga boral pawh ni se, a ral ṭhak thei tak tak lo. Chuvàngin Pathian thiltihtheihna huang chhûngah chuan mihring taksa ral vek tawh anga kan ngaih kha ral loin kaih thawh tùr a la awm zui zêl a ni. Isua lo kal leh hunah chuan a thiltihtheihna ropui tak hmangin amah ringtute taksa ral tawh anga kan ngaih kha kai thoin kan thlarau, ama hnêna awm tawh nèn chuan mit khap kâr loah pumkhatah awmin mihring famkim kan ni tawh dâwn a ni. Chumi hunah chuan Paulan, “Kan tlàwm lai taksa hi ama taksa ropui anga awm tùrin a siam ṭha leh ang” a lo tih hi ringtu zawng zawngin kan chang tawh ang. Ringlotute pawh chutiang deuh chuan kaih thawhin an awm ve tho ang a; mahse anni erawh chu chatuan hremnaa lût tùrin an thlarau leh an lei taksa chu pumkhata siam a ni ve thung ang.

He hun - kan taksa tlâwm tak, tholeh Isua taksa anga kaih thawh a nih hun tùr chu ringtute nghahfák vàwrtàwp chu a ni a. Isuan a tisa put lai nîah khân tihhluma a awm hnûah ni thum chhûnga a thawh leh tùr thu a sawi ṭhin a (cf. Mk 8.31; Joh 2.19). Lazara a kaih thawh dâwn khán Marthi leh Mari te unau hnênah, “Kei hi thawhlehna leh nunna chu ka ni, tu pawh mi ring chu thi mah sela a nung reng ang” a ti a (Joh 11.25). Kan thiha thlàna kan inpùm hian kan thlarau chu Lalpa hnênah a chàwl ta a; nakinah Isua lo kal leh hunah, kan lei taksa thlànmuala vui liam ták ngei kha, Isua tho leh taksa ropui anga siam ṭhat hun nghâkin a awm ta a ni. Chutiang chuan taksa thawhlehna nghákin kan thlarau chu Lalpa hnênah a chàwl ta a. Hun hnuhnungah Isua lo kal leh hunah chuan mit khap kâr loah kan thlarau Lalpa hnêna châwl ta leh kan taksa ral vek tawha kan ngaih kha a inzawm leh ang a. Isua tho leh taksa ang khán taksa ropui zâwk neiin chatuanin kan awm tawh ang a; chutih hunah chuan mihring famkim tak tak Isua ang tak kan ni tawh ang. He thu hian ringtute chu kan inthlamuanna tùr a ni. Ringtute chu Lal Isua thawh leh angin kan la tho leh vek dâwn, “Ani chuan a thawhin, engkim ama thu thuin a awmtîr thei, chumi thawhzia ang zêlin, kan tlàwm lai taksa hi ama taksa ropui anga awm tùrin a siam ṭha leh ang.”