USA PRESIDENT THLAN AṬANGA ZIR TUR

Tûn kârah khawvêla thil thleng danglam tak, ‘thil mak’ ti-a sawi theih hial chu USA President-ah Donald Trump-a thlan tlin hi a ni. Khawvêl a barakhaih a; US mipui ngei pawhin mak an ti a. Hillary Clinton-i a ngui hnâp mai a; kei erawh ka lo lâwm ve tum hrang bawk. Middle School-a ka kal lai aṭangin USA politics-ah Grand Old Party (GOP) an tih Republican Party hi ka lo ṭan daih tawh a. A chhan ni ber chu US President 16-na Abraham Lincoln-a vàng kha a ni ang. Abraham Lincoln-a chanchin hi ka chhiar nasa ve a; ngaihnawm ka ti tâwp thei lo. Tûn thleng hian US inthlan a nih rêng rêngin Republican Party hi ka ṭan ta ngar ngar a ni.

Donald John Trump-a (b. June 14, 1946) chanchin ka hriatna hi a rei tawh a; kei aia thla 9-a upa a ni. Mi hausa tawntâw ni si, mak deuh taka khawsak châng a nei. Vawi khat chu Vincent Kennedy McMohan-a (b. August 24, 1945), WWE neitu nèn wrestling-ah an inbeih ṭum khân a chak zâwkin a chak lo zâwk lu meh kawlhsak tùr a ni. Donal Trump-a chu a chak zâwk a, Vincent McMohan-a lû a meh kawlhsak a nih kha. Millionaire pachal-in millionaire pachal dang a sawisa a ni ber mai. Khatih lai khân USA President chuh a la tum ngai hauh lo ang. US politics khu a mak angreng a; rin loh deuh hi President-ah an ṭang leh tlat ṭhin. Film star Ronald Reagan-a, (Republican bawk) President-a a han tling mai te kha a ropui danglam. Ani phei kha chu US President ropui ber pâwl a ni. June 12, 1987-ah khân kum 25 lo ding tawh Berlin Wall-a chhak leh thlang inkal pawhna awm chhun Brandenburg Gate-ah thu sawiin, USSR President hnênah, “Mr Gorbachev, he bang hi ṭhiat rawh,” (Mr Gorbachev, come here to this gate! Mr. Gorbachev, open this gate! Mr. Gorbachev, tear down this wall! ) a han ti mai te kha; November 9, 1989-ah chuan Berlin bangpui chu vuak chhiat a nih ták kha!

Kar hmasa maiah khân Donald Trump-a campaign-puitute pawh an mangang hle tawh a ni. “Kan chak lo dâwn” an ti hman tawh; chutih lai chuan Trump-a chu campaign-in a la buai hle a. An campaign boruak han en chuan Hillary Clinton-i chu a kalna apiangah mipui an buk zâwk niin a lang a; USA-a inthlan boruak thlir lâwktu zawng zawngin Hillary Clinton-i chak tùrin an ring vek. Trump-a tân chuan campaign tawh loh law law mai àwm tak a ni; mahse a ti laklawh tawh a, patling tân a tâwp thlen hmaa bânsan ngawt chi a ni tawh lo. A chak lo a nih pawhin patling taka chak loh a ngai dâwn a ni mai. Khatih lai khân USA economist 60 chuang ṭangrualin Trump-a vote lo tùrin ngenna an lo thawn darh leh bawk nên; Donald Trump-a dotu chu a ni tèlin an tam tial tial emaw tih tùr a ni.

November 8-a vote an thlák ṭan chiah pawh khân Donald Trump-a chu hniam zâwkah ngaih a la ni zêl. Chutih lai chuan Hillary Clinton-i tân Lady Gaga chu a rawn intâr lang a; uar êm êmin Hillary tân a campaign a. USA zawng ram changkâng ngang a ni a; inthlan tûk lawkah result a chhuak leh nghâl mai a. A tîrah chuan Hillary Clinton-in hma a han hruai ve tituai deuh a; mahse hun a lo kal zêl a, Donald Trump-a chu a chak zâwkah a ṭang ta zar zar mai a. WhatsApp group ka telnaahte chuan US inthlan results chu phûr takin an rawn târ chhuak ṭhin a. Result a chhuah belh zêl a, Trump-a chu chak zâwk tùr ngei a nih a chiang ta. Khawvêl hi a linglet ta em maw ni le tih mai tùr a ni. Result chhuah kim hma hmain Trumpo-a chu chakah puan a ni ta mai a; chutih lai chuan Hillary Clinton-i chu a tawm bo daih thung!

Final result-ah chuan Electoral College vote 538-ah Donald Trump-an vote 306 hmuin Hillary Clinton chuan232 chauh a hmu ta a; tling tùrin vote 270 hmuh a tâwk. Mipui vote-ah chuan Hillary Clinton-i chu vote nuai khat aia tamin a sâng zawk a; mahse Electoral College-ah vote 74 zetin Trump-a a phâk si lo! Hei chauh hi a la ni ta lo, US Senate leh House of Representatives-ah chuan Republican-in majority nihna an chang ve ve bawk. Donald Trump-a tân chuan Congress in hniha Republican an chak zâwk bawk si avàngin rorèl pawh hnip deuh tùra ngaih a ni.

US inthlan result chuan khawvêl a barakhaih a! Trump-a hi mi maksak deuh a ni a; candidate a nih tirh aṭanga a thusawi tam takin US mipui ngaih a tiṭha lo a. Mexico nèna an inrina bang pin a tum thu te, an rama mi lo lût ru, awm hlen tate thawn chhuah a tum thu te, ISIS-ho tukdawl a tum dàn te, hmeichhe chungchâng a sawi dàn te chuan mipui a barakhaih fo a. Hillary Clinton-i phei chuan US President atân ‘mi tling lo’ (unfit) ti hialin a bei a. A nungchang hlui phawrh ni àwm takin hmeichhe ṭhenkhat an lo pên chhuak a; an laka che mawi lo angin an rawn puh hnuhnawh a. Chutih kârah a chhiah pêk ṭhat loh chungchângte chu amah beih nân Clinton-in a hmang bawk. Mahse chûng puh chhiatna zawng zawng chu eng mah loah chantîrin Trump-a chu US President 45-na ah a tling tlat si!

US hmeichheho vote chu a hmu tam lo; mahse US mingo mipa vote a hmu tam hle a; chu chu a tlinpui a ni ber. US hian President ropui lêm lo tak Barrack Obama term hnih an hrawn ta a; khawvêl politics-ah US dinhmun a tla hniam hle. Chu tak chu remchângah hmangin Donald Trump-a- chuan US chu ram ropuiah, khawvêl politics-ah zahawma dah leh a intiam chuan a rûk takin mipui rilruah hna a thawk a ni ang. US politics-ah Democrats hi ngaih dàn nei zau, thil la zam zâwk an ni a. Republicans-ho erawh chu thil duhtui zâwk an ni. Clinton-in ‘same sex marriage’ (mipa leh mipa, hmeichhia leh hmeichhia inneih) a pawm laiin Donald Trump-a erawh chuan a pawm bau lo. Clinton-in nau tihtlák phalrai duh laiin Trump-an a phalrai ve duh tlat lo!

Clinton-i campaign boruak lian zâwk hle mah se, bêl ruak vuak ang maia thãwm chang ná a ni ta; vote thlák hunah Democrats-ho an phûr tâwk lo. An rilru takin an party candidate chu US President ah meuh chuan an iai tihna a ni ang. Donald Trump-a tlin chhan ber ni-a lang chu Evangelical Christian-ten an vote rawn vàng niin a lang; anniho chu Donald Trump-a ang bawka ‘same sex marriage’ leh nau tihtlâk duh lotute an ni a. US mipui ngaih dàn zal tawh tak zîngah mi duhtui Kristian an la inphûm rû a; chûngho zârah chuan Donald Trump-a a tling ta nawlh ni berin a lang. USA-a Juda awmte khu mi hausa an ni hlawm a; Trump-a hian Israel a ṭan tlut bawk si a; Juda-hoin Trump-a an vote rawn ngei bawk ang.

Donald Trump-a chu Protestant Kristianah pawh Presbyterian pachal a lo ni a; sakhaw ngaihsak tak angin lang lo mah se amahin a insawi angin Pathian ṭih ru tak a ni tlat mai a. Vice President atana a thlan Miker Pence lah evangelical Kristian ruh tak a ni bawk si. Pathian a ṭihna chu a tâwpah a hlawhtlin phah ve thung a ni ang. A unaupain zû a tih luatah ani chuan zû a nghei hmak thung. US inthlan aṭang hian Mizoten eng nge kan zir chhuah ang le? Clinton-i emaw Trump-a emaw, a tu zâwk zâwk pawh hi US President ropui tak an ni kher lo ang. Tûn hi US-in President candidate an neih chhiat ṭum a ni mai thei. Donald Trump-a hnuaiah ram pawhin hma a sâwn lutuk lo mai thei. US mipuite erawh chuan candidate duhthusàm lo ve ve rau rauah Pathian ṭih zâwk, zu in duh lo bur chu President ah an thlang tling tlat mai.

Kum 2018-ah MLA kan thlang leh dâwn a; Mizote fiaha kan awm hun a ni dâwn. Khawiah nge kan rinawmna hi kan dah? Party-ah nge Pathian leh a kohhranah tih chu a lo lang ang. Kohhran duh loh zâwng tilui tlat party kan thlang tling a nih chuan heti taka harhna changa Pathian thu hlimpui ṭhin hian kan nunah nghawng a nei hlawl lo tihna a ni ang. Ram hruai tùr kan duh ang tak mi ṭha kan hmu rih lo a nih pawhin a chhia rau rauah Pathian kohhranho duh dàn ngai pawimawha zah thiam mi kan thlan erawh chuan kan ram tlu chhe zêl tùr chu chhan chhuahin a awm ang. Chhan tlák kan la awm asin. US President inthlan hi dârthlalanga hman a ṭha mang e!