CHAWHCHAWRÂWI

Kum 1998 khân lehkhabu pakhat ‘Chawhchawrãwi’ ka ti chhuak tawh a; thupui hrang hrang, kalhmang inang lo tak tak 24 a chuang a ni. Tûn ṭum chu thupui bík nei loin ‘Chawhchawrãwi’ tiin kum thar 2020-a ka huanga thu hmasa bera mi tùr ka rawn fawm khâwm a ni. Kum 2019 kan hman ṭan khán sawrkár thar kan neih hlim a ni a; beiseina sáng tak nèn sawrkar thar hma lák dàn tùr kan thlír a. Kawng chhãwng, traffic awm lohna khawpui awm chhun, chêng nuai 3 sem tih angreng boruak khán min luah hneh bawk a; hlim deuh si, ringhlel deuh bawk siin kum bul kan ṭan a ni ber. 

Kum tìr lamah khua a ṭha rei a; sawrkar thar pawhin sum awm ang ang hmangin kawngpui dung siam ṭhat hna a han thawk a. Kum hnih chhûng Mizoram kawng chhiat rûnpui lo tuar tawh boruak aṭanga thlìr chuan kawng han ṭha thar leh deuh ta chu kan lâwm hle a. Aizâwl leh Lunglei inkár pawh dárkár chuti zát lekin a thlen theih tawh tiin hmâi a uang ṭan hle a. Mahse hun a lo kal leh deuh a; kawngpui siam ṭhat hna chuan chawlh a la leh rih ta deuh a, insèlna boruakin min chîm leh ṭan ta. 

Kum 2020-ah hian eng tak ang hman ang maw? Kawng chhãwng sawi vul lai khán “Kum 2/3 hnûah chuan” tia sawi hmuh kha kan ni a. Kum khat chhûngin ban pakhat pawh a la ding si lo a; kum hnihnaah hi chuan khawi laiah emaw chuan ban tlém azáwng tal chu a ding hman ém ang chu maw! Chutih lai chuan kêa kalna kawng chhãwng awm chhunte pawh a chul leh zo ta. Bazar Bûngkàwna leh Canteen Kuala mite hi a thar deuh, sawrkar hmasain a siamtír, a siamtu pawh tûna sawrkara Minister pakhat lár tak hi a ni àwm e. Kei - kêa kal tam ta ngang chuan hêng kawng chhãwng awm chhunte hi ka zawh fo a; hmàn nía Canteen Kual chunga mi ka zawh lai chuan a chung lam hmun ṭhenkhat chu bawhhlawh dah nân an lo hmang leh fur tawh a. A zia lo ṭhin hle mai. Zodin Square-a leh Khatla-a mite hi a hlui tawh bawk a; sawrkar hian máwi deuh záwkin a thar siam vat sela. 

Kum 2019 chhûnga thil sawi hlawh tak pakhat chu MLA hlawh tihpun a ni; a pung hrim hrim kha chu thu dang ni se, a punna sáng lutuk deuh khán sawi a hlawh zual phah a ni ang. India ram State hrang hrang MLA hlawhte chu internet aṭangin a hmuh theih vek a; chûngte nèna khaikhin chuan Mizoram MLA-te hlawh thar chu a ṭha ber páwl a ni ta. Mahni state thawh chhuah nei lo ber, tute tih dàn takah emaw ‘Delhi drip khaia nung’ tân chuan a lutuk deuh tih mai palh a awl ang. MLA-hoin an hlawh tùr Assembly House-a an sawi ho lai kha ka lo ngaithla ve ràn a; an zínga hausa ber ni ngei tùra rin khán “MLA nih chu a lo retheihthlák ngei mai” a ti teh tlat kha a mak. MLA nih hi a lo retheihthlák a nih pawhin Shakespeare-a ṭawngkam takin ‘retheihna nuam’ a ni ngei ang! 

Kum 2019-a thil thleng lian tak chu MP thlan a ni a; Mizoramah pawh inbeihna a nasa hle. Candidate-te sawi hlawh ber leh buaipui ber chu Citizenship Amendmend Bill (CAB) kha a ni a. Candidate zawng zawngin an duh loh thu uar takin an sawi vek; an zínga pakhat phei chuan CAB pass a nih chuan Indian Parlianment-ah Mizoram inlák hranna tùr Bill put luh a tum thu a sawi hial. A va huaisen tak ém! Mahse a tling lo chiang zual zíngah a tel hlauh si. 

Indian Parliament-ah chuan CAB chu Amit Shah-a’n a han pu lût ta ngei a. An put luh hma hret Inrinni (7.12.2019)-ah Mizoram Synod Inkháwmpui ro rél lai chuan CAB pass a nih loh nána kohhranten ṭawngṭai rualna neih tùrin a rél ta thung; Pathianni (8.12.2019) zàna ṭawngṭaina neih hman ngei tùrin Synod hotuten thu hmanhmawh an chhuah ta a; Mizoram Presbyterian Kohhran chuan December 8, 2019, Pathianni zànah CAB pass a nih loh nân 

ṭawngṭaiin Pathian kan àu ta chur chur mai a ni. 

Mizoram Presbyterian Kohhranin CAB pass a nih loh nâna kan ṭawngṭai túk lawk 10.12.2019-ah chuan Lok Sabha-ah dárkár 8 emaw chauh an sawi ho hnûin CAB chu pass a ni ta. A túk maiah chuan Rajya Sabha-ah pawh CAB chu an ngaihtuah ve leh a; Rajya Sabha pawh chuan dárkár 6 chauh an sawi ho hnûin an pass leh ta bawk. Parliament-in Bill a pass rêng rêng chu India President pawmpui a ngai a; CAB chu President pawm tùrin a rang a rangin an theh phei a, ani pawh chuan ni khat pawh rial loin a pawmpui ve leh ta mai bawk! India President zínga ropui bera mi tam takin an ngaih Abdul Kalam-a kha President la ni ta sela, chuti maia awlsam chuan a pawm a rinawm loh. Thil ka hre thûk vak lo ná a, CAA chu Indian dàn pass tawh zínga kal chak ber a nih ka ring. 

Tûnah chuan CAB chu Citizenship Amend­ment Act (CAA - 2019) a ni ta. He dàn ang chuan Bangladesh, Pakistan leh Afghanistan-a tihduhdahna tuar Hindu, Sikh, Parsi, Buddhist leh Kristiante, dàn loa India lo lûtin lehkha pawimawh nei lo mah se kum 6-naah chuan India khua leh tui an ni sam ta ét tawh mai dâwn a ni. Kristian ni lo sakhaw dangte hi chu Hindu notê an ni sâ a. ‘Kristian’ telh ve a nih avàng hian ngaih tih ṭhat ngawt chi a ni lo. Chu bákah North-East-a State ṭhenkhat, Mizoram tiamin CAA-in a huam tel loh avàng hian làwm ríkngawt tùr lah a ni hek lo. Mizoram Synod-in CAB pass a nih loh nân ṭawngṭai a rawt khán North East State ṭhenkhat, Mizoram pawh telin a huam lo ang tih boruak chu hriat a ni tawh; CAB pass kha Mizoram Synod inkhâwmpui khán a duh lo hrim hrim a ni záwk. 

CAA a lo din chan tákah chuan dona a nasa hle; India hmàrchhakah pawh dotu an tam hle a; do àwm lo taka ngaih States hrang hrangah pawh an do nasa ta viau mai a; eng angin nge India ram boruak hi a kal zêl dâwn hriat thiam a harsa ta. CAA mai ni loin a mei ang maia zuitu National Register of Citizens (NRC) leh National Population Register (NPR) boruakin a rawn buk thuah nghâl bawk a. India ram States ṭhenkhat chuan CAA, NRC leh NPR an pawm loh thû na takin an sawi chhuak ta tial a; Kerala State Assembly-ah phei chuan CAA dona thû an pass ta hial. 

Mi ṭhenkhat chuan CAA chu paih thlák leh a nih theih nân Supreme Court-ah an thlen mék a; amaherawhchu, Supreme Court hian a paih thla ngam ngût ang em? Supreme Court Judge tam tak hi BJP sawrkar hnûa ruat an ni a; chûngho chuan anmahni cháwi liantu sawrkar thil tih chu an paih duh/ngam ang em? India ram court sáng ro rèlna thleng hian politics rim a nam thui tawh hle a nih a rinawm. Tûn anga CAA, NRC leh NPR dona hi a kal zéla India ramn State hrang hranga a darh zél chuan India ram hian Indira Gandhi hun lai ang khán ‘Emergency’ kan hmabák lo ang tih a sawi theih loh. 

CAA duh loh avàng hian khawvél ram hrang hrang pawhin India an en dàn hi a danglam ṭan deuh ta bawk a! CAA, NRC leh NRP hian Muslims a thliar bík avàngin Muslim ram 

ṭhenkhat Saudi Arabia, Kuwait, United Arab Emirates, Qatar, Bahrain leh Oman-te chuan India hrék dàn tùr an ngaihtuah ṭan mêk a. Saudi Arabia phei chuan India rama tuialhthei la thlit fìm loh a thawn luh ṭhin 83% chu tih tàwp a tum tih thãwm a awm a; Iran pawhin Saudi Arabia tih dàn hi a zui thuai dáwn ni àwm tak a ni. 

Eng nge kan tih tùr? CAA, NRC & NRP chu barh luih pawh ni mah ila, Mizoten taima taka hna thawkin kan ram tih hmasáwn chak hi kan tih tùr a ni. Chumi atân chuan Mizoram sawrkar mawh a lian ber lo thei lo. Kan ram dung leh vãngah kawngpui ṭha ti tlang riah ruah sela; electric, tui leh ei leh in tùr min hlui ṭha táwk sela. A bík takin ramri hrúlte hi awmna tlákin ti hmasâwn vat rawh se. Mipui pawhin tih tùr kan nei; ramri hrúlahte hian awm hreh lo ila. Kan ram hi kan hmangaih tak tak a nih chuan keimahnin mawh kan phur lian ber. NRC leh NPR tih a ngaih hunah pawh sawrkár hnathawkten rinawm tak leh dik taka an tih a ngai; ram leh hnam humhalhna leh din chhuahna chu an kutah a innghat tlat dáwn a ni. 

CAA, NRC leh NPR-te hi India ram hi Hindu ram (Hindutva)-a siam tumna hmanraw lian tak a ni tih hi hai lo ila. BJP thang kama áwk lo tùr chuan keimahni kan pawimawh ber. Kashmir dinhmun ti danglam thut duhtu chuan North East India-a awmte inhung bíkna hi mit khap kár loah an ṭhiat thei; ngaih tih ṭhat ngawtna chi a ni lo. Kristiannaa kan ngheh bur a ṭûl a; India sawrkarin eng hmanrua pawh hmang se, Daniela leh a ṭhiante anga Pathian lama ding nghet tlat mi kan nih a ngai a. Nehemia anga, “Hna ropui tak ka thawk a, ka lo chhuk thei lo,” (Neh 6.3) ti-a ṭan kan khawh bur a ngai dâwn.