ANNI LEH KEINI

Khawvêlah hian mihring kan tam zawh poh leh ngaih dàn hrang a tam mai a ni. Khawvêl mihring zîngah ngaih dàn inang chiah tû mah an awm thei lo; phîr inang berte pawh pâwn lamah hriat hran harsa khawp an nih pawhin an rilru erawh chu danglamna eng emaw tak a awm ṭhin.

Naupang tê ka nih lai aṭangin British sawrkarah khuan Conservative Party ka ṭan ṭhin a. Eng vàng nge tih pawh ka hre chuang lo. Indopui II-a Prime Minister ropui tak Sir Winston Leonard Spencer Churchill (1874–1965) vàng kha a ni ber ang. Winston Churchill kha ze mak tak a ni a; chu chu amah ka ngaih sàn chhan a ni ve tlat! Lady Astor (1879–1964) nèn khân an inmil lo khawp a; Lady Astor khán vawi khat chu, “Ka pasal ni la chuan, i thingpui in tûrah túr ka pawlh ngat ang,” a ti a. Churchill-a chu a diau lo nasa mai, “Ka nupui ni la, nang hrawn reng âi chuan ka in lui sak ang,” a ti ve thung. Indopui II-naah Neville Chamberlain-a (1869–1940) hnuaiah British chan a chau hle mai; chutih lai tak chuan May 10, 1940-ah Winston Churchill-a chu Prime Minister ah an dah ta a; May 13-ah Cabinet member-te hnênah, “I have nothing to offer but blood, toil, tears and sweat” tiin a hrilh a. He thû bawk hi chumi ni chuan House of Common-ah a sawi nawn leh ngat a ni. 

USA politics-ah chuan Middle School kal lai aṭang tawhin Republican ka ṭan ve thung a; a chhan pawh Abraham Lincoln-a (1809–1865) vàng a ni ber. Abraham Lincoln-a kha mi rethei ding chhuak a ni a. Ukil hna a thawh laia thubuai neiten an rawih pawha a ṭanna tùr chu dik lo ni-a a hriat chuan thu dik tak sawi ngat ngam, chak lo zâwk nih hnial lo a ni. Tûn thleng hian US inthlanah Republican Party khu chak se ka duhpui a; President ah pawh Republican ka ṭan deuh zêl. Chuti chung chuan Democrat lamah pawh ngaih sàn ka nei tho, ka pâwngpaw hnâwl burh lêm lo!

Kum 2016 US President thlanah khân rin loh takin Donald Trump (b. June 14, 1946) a tling khiah mai a; mak ka ti angreng hle. He pa pui roh hi politician pawh ni lo, sumdâwng hausa a ni a; kum 2020-a a sum neih chu US $ 2.1 billion a ni a, US mi hausa zîngah 275-na, khawvêlah 1001-na a ni. Hmàn kumah khân Wrestling (WWE)-ah Vince Mcmahon (b. August 24, 1945) nèn an inbei a; a chak záwkin chak lo zâwk lû mehsak tùr a ni. Trump-a a chak záwk a, Mcmahon lû a mehsak lai kha mitthlaah a la châm reng. 

Donald Trump kha mipui vote hmu tlêm záwk siin Electoral College vote 306 hmuin President ah a tling ta nulh mai (Hillary Clinton vote hmuh 232). President a han nih tákah chuan tûn hmaa sakhaw mi lutuk pawha ngaih theih lêm loh, nupui pawh tûna a pawm lai nèn 3 lai nei tawh kha Kristianna humhimtu angin a rawn inlantîr thiam a; Evangelical Kristian Franklin Graham-a ten an rawn ṭan bawk a. White House-a Barak Obama thil lo tih tawhte chu a ṭhiat bawrh  bawrh mai a; ram dang nèna inlaichinna pawh a duh angin a kalpui buan buan a. Mizo ngaih sàn tûr tak zâwngin Israel a ṭan tûk a; Jerusalem-ah US Embassy a han sawn ngat phei kha chu mi tam tak tân chuan ‘Super Hero’ a nih phah ringawt!  

US-ah thil a tih ṭhat leh ṭhat loh lam chu keini chuan kan zuk hriatpui pha ve lêm lo; USA-a awm Mizo ṭhenkhatte erawh chuan an ṭan vû tûk mai. An sawi dàn chuan sum leh pâi lamah an ṭhat phah a; Kristiante an zalèn ta sawt niin an sawi bawk. A dikna chin thui tak a awm ngei ang; US President meuh chuan tih ṭhat táwk nei tùrah ngâi ila. 

Kum 2020 US President inthlan hun a lo thleng a; tûn hi US politics-ah hruaitu ṭha an tlákchham lai a ni mai àwm mang e. Democrat-ah pawh hruaitu ṭha an nei vak bîk lo a ni ang, a tâwpa rawn lawr ta ber chu kum lama upa deuh tawh Joe Biden (b. November 20, 1942) a ni ve mai a. Republican lamah lah Donald Trump-a’n din leh a tum ruh si, tû mah han khing tùr an awm lo. Donald Trump leh Joe Biden inhnial hmasak záwk ṭum phei kha chuan an che phuai dûn tak zet a nih kha!

Inthlan result a lo chhuak a; Donald Trump-a chu mipui vote leh electoral college-a vote-ah a a hmu tlêm záwk a ni. Joe Biden-a’n mipui vote 81,268,757 (51.3%) a hmu a, Trump-a’n mipui vote 74,216,722 (49.9) a hmu thung. Joe Biden hi kum 1932 hnu lamah President ding lai khingtuin mipui vote hmu tam ber a ni! Electoral College vote-ah Joe Biden 306 a hmu a, Trump-a’n 232 a hmu ve thung. Hei hi 2016 inthlana vote hmuh dàn letling chiah a ni! Trump-a’n chhuanlam chi hrang hrang siamin ‘inthlanna tihchingpen’ tiin a bei kual vêl a; a beihna apiangah a hlawhchham zêl lawi si. Trump-a’n a lamṭangte a fuih pawrh a ni deuh ber a. January 6 a lo thleng a; US Congress-in Donald Trump leh Joe Biden vote hmuh an nemngheh hun a ni. Trump-a lamṭangten inbuatsaih láwkna ṭha tak neiin Capitol an bei ta; thil pawh an tichhe nasa viau. Mi 5-in an thih phah. Trump-a chuan inthlan result chu hneh chhuh a tum tih mai tùr a ni. Capitol beih hi sâp ṭawngin ‘coup, insurrection, sedition, act of terror’ an ti. A tâwpah US Vice President Mike Pence chuan Joe Biden-a chakna chu a nemngheh ta. 

Trump-a hi mi phûnglûng deuh, Mizoin ‘pa dâr lum’ kan tih ang deuh niin a lang; a rilru hi a let deuh but but ṭhin a ni ang. President a nih chhûngin a hnuaia thawk mi 181, Vice President hnuaia thawk mi 10 leh Department hrang hrang 17-a thawk mi 296 a bàn/an bâng hman a ni. 

Donald Trump hi a naupan lai chuan Sunday School-ah a kal ve ṭhin a; kum 1959-ah khân First Presbyterian Church (Jamaica, Queens)-ah member puitlinga lâk luh a ni. October 2020 aṭang erawh kha chuan pâwl lo pâwl (non-denominational Christian) a inti ta thung! Kristianna humhimtu anga a inlantîr thiam vàng a ni mahná, Mizo tam tak ṭan a hlawh a; amah ṭantu zîngah Pastor leh Kohhran Upa pawh an awm! Amah ṭantu chuan Trump-a sawisèlna apiang chu ‘fake news’ an ti zêl. Beisei tùr awm tawh loh hnûah pawh ‘Bei nge sei Rûn dung’ tiin thu belh chian dâwl lo an vawrh darh reng a; mi tam tak hruai khawlotu an ni. Anni chuan thu dik táwk loin mipui an hrãi a; hei hi thil fel lo tak a ni. 

Joe Biden hi Catholic a ni a; John F. Kennedy nèn US President zînga Catholic awm chhun an ni. Democrat-ho khu ‘liberal’ záwk an ni a; mawngkawhur leh patil inneih te, nau tihtlák te phalrai an duh. Chuvàng chuan USA-a Evangelical Christian-te leh Mizoten an ngaina lo. Democrat âi chuan Republican mi President ah tling se duh an tam záwk maithei! Kan duh ang erawh chuan thil a kal thei vek bîk si lo. Trump-an Republican a tihchhiat khu siam ṭhat leh hman a nih chuan 2024-ah Republican an ding chhuak leh thei mahná!

Tûnah chuan USA-ah President Joe Biden tih lohah chuan Kamala Harris leh Speaker Nancy Pelosy (b. March 26, 1940) khu thil tithei ber an ni ta! Joe Biden-a thi palh hlauh a nih chuan Kamala Harris khu US President a ni ang. Kamala Harris khu Hinduism-a sei lian, tûnah chuan a pasal vàng nge Baptist a ni tawh! Kamala Harris khu thi ve leh ta sela, Nancy Pelosy khu US President tùr a ni. Nancy Pelosy pawh Joe Biden ang bawkin Catholic a ni a; mawngkawhur leh patil inneih leh nau tihtlák phalrai duhtu a ni. 

Joe Biden leh Kamala Harris chu lák luh an nih hma lawk khân Catholic biak in St. Matthew the Apostle Cathedral of Washington-ah an inkhâwm a; Father Kevin O'Brien chuan inkhâwm a kaihruai a. He inkhâwmah hian Speaker Nancy Pelosy, Senate Majority Leader Chuck Schumer, Senate Minority Leader Mitch McConnel, House Minority Leader Kevin McCarthy leh President lák luh huaihawttu Chairman Senator Amy Klobuchar te pawh an tel. 

Kamala Harris lák luh a nih khân Pathian hmingin thû a tiam ve a. Joe Biden chuan kum 1893 aṭanga an chhûngkaw Bible lian tak, a nupui Jill Biden-in a ken chungah kut nghatin thû a tiam thung. Joe Biden-a thinlungah Kristiannain hmun a la chang ve tih chu a hriat theih a; eng ang takin nge a sakhua hian a kaihhruai dâwn tih erawh chu hunin a la hril zêl ang. White House-a Trump-a’n Kristianna thil a lák luhte kha rawn ṭhiat tak ang maw? 

Donald Trump-a lâk luh a nih kha chuan Kohhran pâwl hrang hrang puithiamin chanvo an chang hlawm a; Juda rabbi thlengin an tel a nih kha. Joe Biden lák luhnaah erawh chuan amah Catholic a nih ang bawkin Catholic mi an langsár deuh bîk. Father O’Donovan, Lagy Gaga, (kum 34, Hollywood filmstar zînga hniam bera an sawi ṭhin, ft 5-a sâng), Jennifer Lopez (kum  46, ft 5.5, kg 59) te chu Catholic an ni a; Gareth Brooks kha Trump-a anga ‘pawl lo pawl’, Republican mi ruh lutuk lo, Obama pawh lo ṭan tawh a ni. A tàwpa malsàwmnaa ṭintu Rev. Silvester Beaman kha kum tam tak Joe Biden-a mi mal ṭhian ṭha, Bethel African Methodist Episcopal Church Pastor a ni. Hla chhamtu Amanda Gorman kum 22 mi chauh hla rawn chham kha Capitol beih January 6 zàna a phuah a ni.

Kum 1956-ah khân US Congress Joint Session chuan ‘In God We Trust’ tih chu ‘National Motto’ ah a lo pawm a; President Dwight Eisenhower-a’n July 30, 1956-ah khân a lo nemnghet a. Kum 1776 aṭanga an hman ṭhin Latin ṭawng ‘E pluribus unum’ (Out of many, one) tih chu a luahlàn a ni. US pawisa-ah ‘In God We Trust’ tih chu chhut kai a ni a. ‘In God We Trust’ ti ṭhin kha President Joe Biden khuan a ṭhiat duh mai ang em? 

US President kal chhuakin President thar tân duhsakna thuziak an hnutchhiah ṭhin. Donald Trump-a chuan White House a chhuahsan dâwnah President thar Joe Biden-a tân thuziak tãwi tê a hnutchhiah ve a, “Joe, you know I won” tih a la ni ta hrãm; a thuziak hnuaiah a hming a ziak (sign) thlap nghe nghe. A chak lo záwk tih chu khawvêlin a hre chiang a; chak ni se, White House chhuahsan a ngâi nâng! Chak a duh luatna hian a bual ã deuh a ni mahná! Tih àwm leh àwm loh pawh a hre hrang tawh lo!

Donald Trump ṭantute pawhin an lamṭanga an ngaih Fox News chuan mipui ngaih dàn a lákah chuan 42% chuan Donald Trump chu US President chhe ber (worst President)-ah an pawm tih a ni a; 22% erawh chuan President ṭha berah an la pawm lui zêl bawk. Tim Naftali (Clinical Associate Professor of History at New York University) chuan US President hrang hrang chhiat leh ṭhatna uluk taka a chhuinaah chuan Donald Trump chu US President chhe berah a ngai a; a chhe ber ni ṭhin President 15-na James Buchanan (1857–1861) a khûm tiin a ziak. Khumna ṭha lo tak a ni!

Politics âtchilh tawh laklawh hi chu an chhah thei viau a ni ang, Mizo Union vànglai pawh khân, “Uṭawk pawh candidate se, ka vote ang,” an ti a ni àwm e. Mizoramah pawh Trump-a âtchilhtute ang maia mahni party hotute âtchilh an awm thei ang. Mi thiam takte pawh politics-ah an zuang lût a; ngaihtuahna fîm hmang ngam loin an pute hlauh tlawn rêng rêngin an hmanhlel ta mai emaw tih tùr an ni. Pute infaksiak boruakah an chêng a; hetiang hi chuan ram ropui kan thleng ngai lo ang. Trump-a tân beisei tùr a awm tawh lo chung pawha beisei lui tlatte ang bawkin Mizoramah pawh hruaitu beiseiawm tawh lote laka rinna kan nghah zui zêl chuan khua a vâr har ngawt ang le! US politics khu dárthlalanga hmang thiam khawpin harh chhuah a hun ta hle lo maw? Nge kan la mãwl haih haih zui zêl záwk dáwn? 

Joe Biden leh Kamala Harris lák luh inkháwma lo kalte khán hmai tuam an ngái pawimawh hle mai kha entawn tlák tak an ni. Khua a vâwt bawk a ni ang, kut kawr an bun fur a; inchibai rem bîk hek lo le, kut kawr chhanah kut tum an insîktîr ringawt a nih kha! 

Ho mai mai han rawlh ila: Mizo hian zun kan ngah bîk emaw ni, inkhâwmpui leh thil tihkhâwmnaah hian rei lo têa zung tûra chhuak an tam thei hle a; US President lák luh hun chhûng kha a rei teh lul nèn, zung tùra kal an awm loh hmèl hle! Nge an îp ṭâng tâng záwk le?