A ṬHA ANG E!

Tûnlaia biak in chhûnga ṭawngkam lãr ber pakhat chu “A ṬHA ANG E” tih hi a ni ang. Biak in chhûngah chang a ni lo a, hmun dangah pawh thu sawi apiang deuh thàw hian an thu sawi tàwpah “A ṭha ang e” tiin an tlip deuh zêl tawh nia! He ṭawngkam “A ṭha ang e” tih hi hawihhàwmna ṭawngkam ah kan ngai ta deuh ber a ni àwm e. Biak in hrang hranga Kohhran Ziaktu thu puang hian vawi hnih vawi thum - ni lo, vawi li vawi nga lai an hman châng a awm.

Inkhâwm Hruaitu leh Thuhriltute pawhin an hmang ve zêl tho. Eng an tihna nge ni ber ang? “A ṭha ang e” tih tel lo khân an titàwp thiam lo em ni ang le? A tel loa thu sawi theih ni si, kan intihhmuh leh tawh a ni àwm e. Mizo ṭawng hman dànah hian fîmkhur leh uluk a ngai hle a. Tûnlai hian social media-ah kan hmang duhtui lo ta hle mai hi Mizo ṭawng tihchingpenna kawng khat a tling. A bîkin nula leh tlangvâl leh tleirãwl lamten an hmang uluk lo lehzual a. Social media-a an thu ziah tam tak hi chu vowel tel lo, ‘ngaihruatin lunglèn a hril chang chang’ tih ang vêl a ni. KṬP leh YMA chuan Mizo ṭawng humhalh leh vèn him lamah ṭan an la mêk a; hetianga tih nachâng an hria hi a làwmawm hle. Chutih laiin an member-ten a zawm lamah ṭan an la ve thung em tih erawh chu zawhna pawimawh tak a ni. 

Social media-a hawrawp kim loa thu ziah hian kan ṭawng a tichingpen nasa thei hle tih hriat reng a ṭha. Vawi khat chu kei pawhin ‘aw’ hmanna tûrah hmang loin ‘o’ ka hmang ve ngawt mai a; ka thu ziah lo chhiartu pakhat chu “Engati nge hetianga i tih ve ták mai? I inhmeh lo” tiin min rawn khak nghâl a. Chuta ṭang chuan ka sim hneh hle; facebook a ni emaw, WhatsApp a ni emaw hawrawp kim ngei hmang hlîrin thu ka ziah phah ta a ni. Mizo ṭawng hman tam hi inzirtîr a ngai hle. Kan titina leh kan thusawiahte hian ṭawng dang, a bîkin sâp ṭawng kan hmang uar hle mai. Zonet-a Mizo ṭawng hman chungchânga titi honaa mi pakhatin a rawn thur chhuah khân kan nihna dik tak a pho lang chiang hle. “Baby, bathroom light off rawh” tih kha; Mizo ṭawng thumal pakhat chauh a tel a, chu chu a tàwpa ‘rawh’ tih chiah hi a ni. “Mâtê, bual in êng kha tithim rawh” tih ni se, ang lo hûin kan hre tawh zâwk mai thei. Tûnlai chhanah Mizo ṭawng hlang ringawt chuan thu a sawi hleih theih tawh lo tih chu kan hria; mahse mi tam tak hi chuan sâp ṭawng kan hmang tel tam lutuk mah mah a ni. 

Hemi chungchângah hian kohhran lam pawh kan fihlîm chuang lo; fihlîm lo satliah pawh ni loin a hmang uar tak pawh kan ni àwm e. Mahni awmna kohhran bîk pawh han thur chhuak ila. Mizoram Synod Inkhâwmpui thu ngaihtuah tûrah meuh pawh sâp ṭawng telh tam lutuk ngaih mawhna a lo lût tawh a nih kha. ‘Synod’ leh ‘Presbytery’ tihte hi chu inkhâwmpui hming bîkah neih ta ila. Kohhran Hmeichhia chuan ‘inkhâwmpui’ an nei a; KṬP chuan ‘conference an nei a, ‘half year meet’ an nei leh bawk. Kohhran Pavalai Pawl phei chuan a tîr aṭang rêngin ‘Meet’ an nei nghâl ringawt! Hei hi chu inkaihhruaina duangtute thiam loh liau liau a ni. Kha thil ngaihtuah laia Pastor senior takin, “Engah nge ‘Meet Meet’ in rawn tih bîk?” a tih kha bengah a la châm reng mai!

Zonet-ah hian nu pakhatin thil chi hrang hrang siam dàn a rawn entîr ṭhin a. A kut chu a themthiam hle a; Mizo ṭawng hlang hman erawh chu a thiam lo thung a. August 24 zàna thil siam dàn a entîrnaah chuan sâp ṭawng thumal a hman ka lo chhinchhiahte chu - “Basket, Box, Centre, Chip, Continue, Current, Cut, Fervicol, Fix, Fold, Glue, Hot glue, Instagram, Join, Mark, Measure, Newspaper, Next show, Opposite, Press, Process, Request, Rought table, Size, Technique.” Ka chhinchhiah hman chin hi thumal 25 a ni a; hêng zînga ṭhenkhat phei hi chu vawi hnih vawi thum a hmang nawn nghe nghe a ni. Hei hian TV-a kan thil tihnaah pawh hian sâp ṭawng kan hmang uar tak zet tih a tichiang hle. 

Mizo ṭawng humhalh tûr hian kan ṭan tlàn a pawimawh hle. Mizo Academy of Letters (MAL) chuan Mizoram sawrkarah Mizo Language Development Board (MLDB) din tûrin a ngèn tawh ṭhin a; mahse eng sawrkar mah hian tihpuitlin an la tum rih lo a ni ang. Kum 2010-ah khân Mizoram sawrkar chuan Mizo Language Committee (MLC) a din a; sawrkar gazette-a chhuah meuh mah ni se, office nei lo, thawktu bîk nei lo, MBSE office nghen chhana din mai a ni a; tûnah tak phei chuan kum khat aia rei mah a ṭhu tawh lo nghe nghe a. Mizo Language Development Board din ni se, thawktu nghet leh office hrang neiin awm sela, Board chu Mizo ṭawng tihhmasâwn kawngah thuneihna sâng tak pêk ni sela, tûn ai chauh chuan hmâ kan sâwn thei deuh ang. 

Inrinni kal ta khân Union Home  Minister Amit Shah chu Aizâwl-ah a lo kal a. Mizoram sawrkar hotuten mamawh nia an hriat thil hrang hrang sawipuiin an lo thlen ngei mai. Thil hmaih lian tak an nei- chu chu Mizo ṭawng hi Indian Constitution Eighth Schedule-a telh rawtna an lo thlen tel miah lo! Engtin nge an hmaih theih? Mizo ṭawng tihhmasâwn lam hi an hawi pha lo em ni? Zirlai kal khâwm zînga sâp ṭawng lam nalh dàn inzirtîr mai mai hi a ngai lo; tuipui ràl ṭawng chu eng ang pawhin lam ila, miin kan ṭawng an hriat theiha kan duh zâwng kan sawi theih chuan a táwk! Mahni pianpui ṭawng hmang dik thiam lo nih zahthlákzia leh mualphothlákzia hi hriata harh chhuah a hun tawh záwk a ni. 

Indian Constitution an siam hlim kha chuan Eighth Schedule-ah hian ṭawng 14 chiah a awm a; tûnah erawh chuan ṭawng chi hrang 22 a awm tawh a; chûngte chu- (1) Assamese. (2) Bengali, (3) Bodo, (4) Dogri, (5) Gujarati, (6) Hindi, (7) Kannada, (8) Kashmiri, (9) Konkani, (10) Maithili, (11) Malayalam, (12) Meitei (Manipuri), (130) Marathi, (14) Nepali, (15) Odia, (16) Punjabi, (17) Sanskrit, (18) Santali, (19) Sindhi, (20) Tamil, (21) Telugu, (22) Urdu te a ni. Kan ṭhenawm Meitei (Manipuri) ṭawng pawh a tel a; chutiang bawkin kan en sàn vak bîk loh Santali pawh a tel! 

Tûnah hian Eighth Schedule-a telh tûra dîl mêk chu ṭawng  44 a awm a. Mizo ṭawng pawh chûng zîngah chuan 31-naah a awm ve rân a. Chûng ṭawng chi hrang 44-te chu- (1) Angika, (2) Banjara, (3) Bajjika, (4) Bishnupriya, (5) Bhojpuri, (6) Ladakhi, (7) Bhotia, (8) Bundelkhandi, (9) Chhattisgarhi/Kosali, (10) Dhatki, (11) Indian English, (12) Indian French, (13) Garhwali (Pahari), (14) Garo, (15) Gondi, (16) Gujjar/Gujjari, (17) Haryanvi, (18) Ho, (19) Kachachhi, (20) Kamtapuri, (21) Karbi, (22) Khasi, (23) Kodava (Coorgi), (24) Kokborok, (25) Kumaoni (Pahari), (26) Kurukh, (27) Kurmali, (28) Lepcha, (29) Limbu, (30) Magahi, (31) Mizo (Lushai), (32) Mundari, (33) Nagpuri, (34) Nicobarese, (35) Himachali, (36) Pali, (37) Rajbanshi, (38) Rajasthani, (39) Sambalpuri, (40) Shaurseni, (Prakrit), (41) Siraiki, (42) Sylheti, (43) Tenyidi, (44) Tulu te a ni. 

Tûna Indian Constitution Eighth Schedule-a telh dîl ṭawng 44 zîngah hian Mizo ṭawng aia tênau záwk eng emaw zah a tel a; kan kawmthlang lawka mi Kokborok pawh a tel hi. Hêng ṭawng 44 lai hian Eighth Schedule- a telh an duh a nih chuan hláwkna a awm ngei a ni ang. Mizo ṭawng hi kan State sawrkar ṭawng a ni bawk a, Mizoram sawrkar hian Eighth Schedule-a telh tûr hian theih tâwp chhuahin bei ta sela; mipui leh kohhran leh NGO hrang hrangte pawhin sawrkar kut tichak tûrin nawr ve bawk ila. 

Mizo ṭawng hi Eighth Schedule-ah tel sela chuan Civil Services Examination (IAS exam)-a Optional Papers zîngah hian Mizo Literature chu a tel ve thei ang a; Mizo fate zînga IAS nih tumte tân chuan thil làwmawm tak a ni ang a; Mizo ṭawngin an exam thei dâwn a ni. Eighth Schedule-a Mizo ṭawng a tel theih nân inlungrual tlâng taka hmâ kan lák a ngai a ni.