FAKE NEWS vs THUTAK

Kâr hmasa (23.1.2021)-a ka thuziak paragraph 17-naah khân Trump-a’n Biden hnèna a lehkha hnutchhiah ni àwm tak an theh darh ‘Joe, You know I won’ tih kha ka telh a. Trump-a pawh ka dem zui deuh nghe nghe a! Ka thuziak kha Inrinni zîngah facebook-a ka dah lâiin ‘fake news’ a ni tih ka hre hnuhnawh a, fb-ah chuan ka paih leh nghâl a. Vànglaini-a chhuah tawh erawh chu ‘artui thlauh keh tawh hnû a tihpum leh theih tawh loh’ tih angin tih ṭhat hman a ni tawh lo; a ngai ngaiin a rawn chhuak ta a ni.

Trump-a’n thuziak a hnutchhiah chu Biden-a’n thu ṭha tak a ni tih a sawi náin eng thû nge tih erawh chu a sawi duh tlat si lo. Trump-a nèn an inbiak hnûah chauh sawi tùr anga a insawi chu tûn thlengin an la inbe ta lo nge tih pawh kan hre lo a; an inbe kher ang em tih pawh hriat a ni bawk hek lo. Biden-a’n “Trump-a’n thuziak ṭha tak min hnutchhiah,” a tih pawh hi ‘fake news’ tho a ni ang em? Trump-a leh Joe Biden inkârah hian thutak nge tam ang a, ‘fake news’ tih hi hriat hran harsa khawpin a inpawlh chuat a ni ber! Anmahni kamchhuak ngeite pawh a tak awm lo ‘fake news’ a ni nual hlawm si!

US President inthlanna neih hmâ aṭang khân thutak hriat a harsa daih tawh zâwk a. Mi ṭhenkhat, a dik a dawk thlu loa Trump-a ṭan êm êmtuten fake news-a puh apui kha an ngah êm êm a. USA-a Mizo pakhat pawhin CNN leh BCC-a thupuante pawh ‘fake news’ a ti vek a; inthlan hun hnaih tak takah phei kha chuan Trump-a ṭantu nia a sawi ṭhin ‘Fox News’ meuh pawh kha rin tlák loh, ‘fake news’ puang ṭhinah a puh leh hman daih tawh a ni.

USA-a Mizo tam tak chuan Trump-a kha an ṭan tûk mai a; Trump-a’n inthlanah chak zâwk nia a inngaihna leh ṭan a khawhna zawng zawng kha dik fai vekah an ngâi a ni ber. Chutiang deuh bawk chuan Mizoramah pawh Trump-a ṭan tawh laklawh chuan lehlam thû kha an bengkhawn duh tawh lo, ‘fake news’ ah an ngai vek zêl. Kohhran Upa pakhat phei chuan Trump-a lák luh dâwn thleng pawhin beiseina neiin ‘fake news’ sei pui pui a la vawrh darh reng a; a thû erawh chu ui benga hlin tùr a awm tak tak si lo!

Biden-a’n US President nihna chu a chelh ta a; fake news a la pun belh zêl tho. Kum 2014-a Florida State-a thil thleng ‘Satanic Coloring Books Distributed at Florida Public School’ tihte chu Biden President nih ták vànga thil thleng thar ang maiin an vawrh darh leh ta a; a chunga ‘September 17, 2014’ tih chu an hmuh hmaih lui emaw ni? Pastor leh Kohhran Upa awmna WhatsApp group-ah meuh pawh thutak chei hmiah hmiah tâwk an awm thei zêl.  Mawngkawhur, tuai leh patil infâwp thlalâkte pawh vawrh darh a ni a. Hêngte hi Biden-a President a nih hnûa thil thleng thut a ni lo; hmânah tawh khân khatiang thil tenawm kha chu US-ah khuan a thleng daih tawh.

USA chu mi an zalèn a, ngaih dàn hrang hrang lah a tam êm êm a; Pathian thu lamah pawh ngaih dàn hrang hrang a tam. Kohhran pâwl ṭhenkhat chuan Bishop ah mawngkawhur an pawmna a rei tawh. Mizoram Presbyterian Kohhran pawhin kum 2012-ah khân Presbyterian Church (USA) nèna inzawmna kan neih pawh kan chhut chah hial tawh kha. Pathian thûah pawh ‘feminist theology’ firfiak takte hi USA khu a bu khuarna hmun a ni a; he theology hian chhûngkaw tam tak a nghawng chhia a; nupa tam tak nun a tichhe bawk. 

Hmân nia Vànglaini-a ziaktu pakhatin pluralist-ho chuan an ṭawngṭai pawhin Pathian hming an lam tawh loh thû a rawn sawite pawh kha US-a thil thleng chauh a ni lo; India ram hmun tam taka tih dàn a ni tawh. Feminist theologian firfiak deuh phei chuan Lalpa Ṭawngṭaina bul ṭannaa ‘Kan Pa’ tih pawh hi an duh tawh lo! ‘Our Father and Mother’ ti duh ngatte pawh an awm tawh asin. US-ah chauh hêng thil hi a thleng lo; kan bul hnâi kan mit hmuh phák ngeiah hian min awmchilh reng tawh zâwk a ni! 

USA leh United Kingdom (UK) khu kan ngâi sâng êm êm a; ngaih sàn chhan tùr tam tak a awm ang. Chutih lai erawh chuan kan ngaih sàn ang êm êm chu an ṭha fai vek bîk lo; a bîk takin Kristiannaah an tlahniam êm êm a. US-ah kum 2019 khân Kristian chu puitling zîngah 63% chauh an ni:– Protestant 53%, Catholic 20%, Mor­mons 2%. Kum 2020-ah England & Wales-ah Kristian chu 59.3% chauh an ni. UK-ah pawh Hindu emaw Muslim Prime Minister an la ni lo ang tih a sawi theih loh; tûnah hian Asian an tihte chuan politics-ah an thleng sâng tawh hle. UK-ah chuan Asian an tih chu Indian, Pakistan leh Bangladeshi an ni. Kum 2016 aṭanga London khawpui hotu ber Mayor pawh Pakistan Muslim Sadiq Khan a ni. Tûna British Parliament Member zîngah khuan Indian mi 15 an awm a; hnam dang ‘ethnic minority’ an tih zawng zawng chu 65 lai an ni: Conservative Party-ah 22, Labour Party-ah 41, Liberal Democrat-ah 2 an ni. 

Mahni anpui inkawp chung­chângah Mizoram pawh hi kan fihlîm lo hle tih chu ‘fake news’ ni loin thutak a ni. Tûn hma deuh (2010/2011) khân Synod Social Front chuan Aizâwl khawpuia mipa leh mipa, hmeichhia leh hmeichhia inkawp awm zât a chhui tawh nghe nghe a; tûnah phei chuan an tam lehzual tawh ang. USA-a mawngkawhur, tuai leh patil kan zuk vei viau lâi hian kan khawpui ngei pawh hi hêng mite hian min al hneh hle lo’ng maw? 

Mipui pawh hian anniho hi kan làwm záwk emaw tih tùr kan ni. Pangpâr khawi thiam te, sam siam thiam te, TV-a thil zuartu atâna kan hmante pawh hetiang mi hi an ni nawk hlawm a. An zînga mi hi mipui awm khâwmnaah lo kal sela, kan làwm záwk emaw tih tùrin kan lo nuihpui huat huat zêl a; anni lah an lâwm zaw mah emaw tih tùr a ni bawk. Hêng mite kan lawm dàn en hian USA-a mi daih zuk vei êm êm tùr kan ni bîk lo; kan hmâah hian an awm reng a, huat enah kan en phal si lo. Chhûngkaw inenkawlna leh khawtlângin kan thlir dàn azirin hêng thil hi a hluar zêl emaw a kiam emaw a ni thei ang. Eng lam nge kan hawi dâwn le?

India ramah ‘Lesbian, Gay, Bisexual and Transgender’ (LGBT) hi hnualsuat an ni tawh lo hle. Hêngho thiam loh chantîrna dàn chu IPC Section 377-ah awm a. September 6, 2018-ah Supreme Court chuan IPC Section 377 chu ‘unconstitutional’ tiin a puang ta mai! “On 6 September 2018, the Supreme Court issued its verdict. The Court unanimously ruled that Section 377 is unconstitutional as it infringed on the fundamental rights of autonomy, intimacy, and identity, thus legalising homosexuality in India. The Court explicitly overturned its 2013 judgement.” tih a ni. Khaw­vêla chanchin thar puangtu langsàr ber pakhat BBC chuan, “In a historic decision, India's Supreme Court has ruled that gay sex is no longer a criminal offence.The ruling overturns a 2013 judgement that upheld a colonial-era law, known as section 377, under which gay sex is categorised as an ‘unnatural offence’. The court has now ruled discrimination on the basis of sexual orientation is a fundamental violation of rights” tiin a puang a nih kha.

Hemi hnuah hian Indian Parliament chuan ‘The Transgender Persons (Protection of Rights) Act, 2019’ a pass tawh bawk. 

Supreme Court thu tlûkna sawisêl zâwng hian India rama Kristian insuih khâwmna sâng ber NCCI meuh pawhin âw a chhuah lo! Mi rinawm tak hnên aṭanga thu ka dawn dàn chuan NCCI member-te pawh an ngaih dàn a rual lo a; Church of South India (CSI), Mar Thoma Syrian Church leh Lutheran Church ṭhenkhatin Supreme Court thu tlûkna hi inhawng takin an hre thiam a ti. Hetiang hi India ramah pawh kan awm dàn a lo nih tákah chuan Mizorama kohhranten duh lohna thuchhuah kan siam hlawm em? Hetiang mi hi kan chhûngkhat lainate awm ta se, kan pawm zam mai dâwn em ni? 

Mizoram Synod erawh chuan mipat hmeichhiatna chungchâng pawm dàn puan chhuahna fel tak a siam tawh a. Mipa leh hmeichhia chauh nupaa insiam thei tùr an nih thu te, mahni anpuite lakah mipat hmeichhiatna hman hi Pathianin mihring nih phung tùra a siam dàn bawh chhiatna a nih thû te a tel (2011 Synod Gen. 51; SEC 239:35). Kohhran mipui hian  Synod-in a pass ang tak hi “Kei leh ka chhûngte erawh hi zawngin kan pawm,” kan ti thei em?

US President thlan (2020) chung­chângah ‘fake news’ a tam êm êm. Rom lal nunrãwng Nero (AD 37–68) thih khân a thih tak tak ring lo, lo tho leh tùra ring tlat an awm hlawm. Domitian (AD 51–91) a lo lal khân a chêt dànah Nero nèn inanna lai an nei a ni ang, ‘Nero tholeha - Nero redivivus’ an ti hial. Trump-a ngai sâng laklawh tawhte pawh hian ‘Trump redivivus’ awm tùrah an la ring ta fan a ni maithei!

‘Fake’ chu a tak ang tak, a tak ni si lo hi a ni! Mizoramah pawh hian a tak ni àwm taka lang, a tak ni si lo a tam hle. A tak anga lang hmangin mi tam takin zângna dawmna an dawng tawh. Hmânah pawh kan sawi tawh kha; computer awm hmâa pass siam anga lang ni si, computer-a chhut, rapchunga rèp un chawpte pawh a awm an tih kha. Tûnah pawh hian National Highway No. 306 zauhna tùrah Bîlkhawthlîr, Thingdawl leh Kàwnpuiah zângna dawmna dawn tum mi 165 zet an awm. Bilkhawthlîrah chuan hmana VCP hming ziak ang tak leh a seal lem an hmang tih hmuh chhuah a ni a. Joint VC-in Police hnênah FIR an theh lût a; kan lo lawm hman hle. Mahse thil dik lo tituten ngaihdam an dîlna chhe tê avàngin FIR chu an sût leh tawh an ti; kan hnual leh rawih mai.  Bible ṭawngkam ang deuh han hmang ta mai ila, “Ingaihdamna àwm leh hun a awm a, inngaihdam lohna àwm leh hun a awm,” kan ti tùr a ni dáwn lo’m ni! Tuar tlák hi chuan tuar zêl záwk rawh se. National Highway No. 306 chungchâng hi kan lo thlîr reng dâwn a; sawrkar pawhin puan hnuai thil tih awm loin dik takin ti ngam sela. Tuirial Hydel project siam dáwn lai ang kha thleng nawn lul suh se.

USA daiha thil lem thleng buaipui âi chuan kan rama a lema thil tih tam lutuk hi tihbo tuma buaipui záwk tùr kan ni. Mizoram politics pawh hi ‘fake news’ tamna pâwl tak a ni ang em? Hman ni facebook-a thuziak pakhatah chuan kan ram hruaitu pakhat thusawi, a taka thleng si lo an chhinchhiah chu 40 a nih tawh thû a chuang! Ram hruaituten ‘fake news’-in mipui min chãwm tawh suh se; a tak rama luh kan duh tawh. Thutak nunpui tùr politician mi tak kan mamawh tawh.