HNAM HUMHALH

Hnam humhalh chungchâng hi tûnlaia Mizoram boruak lian tak pakhat a ni. Mizo hnam humhalh chungchâng hi Central YMA chuan thupui ber pakhata a neih a ni a; chutiang bawk chuan MZP pawhin zirtîrna laipui ber pakhatah a neih reng bawk a. Tûnlai tak phei chuan zirlaite hnênah hnam dang nei lo tûra intiamna beihpui a kalpui mêk nghe nghe. Central KṬP pawhin KṬP Branch tinte chu ‘Ram leh hnam, ṭawng humhalh leh vèn him’ chungchâng thupuia neiha lo zir tûrin a hriattîr bawk.

Social media-ah tûn hnaia Mizo nula pakhatin hnam dang a neih chungchângin sawi a hlawh hle. Ṭawngkam duhtui vak lo pawh a lehlam lehlamah an awm. Hnam dang neih ṭha lo ti pâwlin ṭawngṭam duhtui lêm lo takin an bei a; lehlamah hnam dang neih pawisa lo pâwlin ṭawngkam duhtui bîk lo takin an bei lêt bawk a. Social media-a kan ṭawngkam hmante hi a uchuak mah mah ṭhin a; a bîkin nula leh tlangvâl, tleirãwl zîngah ṭawngkam nalh lo tak tak hman a hluar zual! Mizo ṭawng kan ziah dànte hi a entawn tlák loh hle. Mizo ṭawng humhalh leh vèn him ṭûlna aṭanga thlîrin social media-a Mizo ṭawng kan ziah dàn hi kan duhtui loh luih zêl chuan kan ṭawng tichhetu ni satliah mai loin kan ṭawng ralna thlen thei tûr pakhat a ni ang.

Mizo zînga hnam dang nupui pasala neih hi thil thar lutuk a ni lo. A tlângpuiin mipa chuan hnam dang hmeichhia an nei vak lo. Tûn hma deuh khán Khasi nula nupuia nei an awm ṭhin a; vai kan tih tak hi chu Mizo mipaten an nei duh vak lo emaw tih tûr a ni. Mizo hmeichhe zîngah erawh chuan hnam dang neih hnial lo an awm a. Social media-a an sawi dàn ang deuhin Mizote hian sâp hi kan ngaisáng laklawk a; vun ngo an neih chuan kan ngainêp phal lo. Mâkpaa sâp neih chu kan uanpui êm loh pawhin rilrûah chhuanna a awm deuh em ni âw tih theih a ni. Kan chheh vêl vaiho ai chuan an lo changkâng deuh a; pasala neitute chauh ni loin an chhûngte pawhin an mâkpate chu an chhawr deuh ṭhin. 

Ram buai lai khân ei leh bàr harsatna avàngin Mizo hmeichhiate khân hnam dang (vai) an nei nual a; eng zát takin nge vai nei erawh hriat theih a ni lo. Kan ram nun kha a harsa êm mai a, ei leh bàr neihna tûr a nih phawt chuan  nun chhan nân an ti a ni ang. Chutiang chu a hriat thiam theih deuh ang em? Kawng lehlamah erawh chuan Mizo hmeichhe ṭhenkhat hi chuan pasal an duhtui lo hrim hrim em âw tih theih a ni; kawng laia lo chhuak mi dum (Santal) neite pawh an awm nawk mai. 

Hnam dang nupui pasala neite hi mi chènbeh lam an ni ngawt bîk lo. He inneihnaah officer liante pawh an tel a; an tû leh fate pawh an tel chhunzawm zêl bawk. Pastor fa an bãng lo a; Kohhran Upa fa pawh an bãng chuang hek lo. Hnam dang neitu chhûngkua chu an milen deuh chuan kan sawisêl phal/ngam lo deuh a; rilru chhûngrilah erawh chuan tâng a awm deuh ṭhin! Hnam dang pasala neite chu nula fel tak tak te, officer lian te, Pathian thu zir chhuak tawh te, college-a zirtîrtute an ni nawk mai. Kan inṭhenawm khawvênna aṭanga sawisêl mawi lo chin a awm thei a; inhmangaiha innei an nih ngat phei chuan sawisêl ngawt thu a chêng lo ang! Tûnlai phei chuan internet-ah khawvêl lehlama mite nên an inhmêlhriat a; Mizo hmeichhiaten pasal ah vun ngo an chaw chhuak ta zeuh zeuh a nih hi!

“Hmeichhe ṭhenkhat chuan Mizo mipa zîngah pasal tlák an awm lo” an ti a ni àwm e; an duh ang an hmuh loh vàng pawh a ni mahná! Chutianga sawi theihna khawpa Mizo mipate an tlâwm a nih chuan inen fiahna tham a tling ang a, insiam ṭhat phah nân hman tûr a ni ang. Hmeichhe ṭhenkhatin Mizo mipa an sitna ṭawngkam phei chu zahmawh rawngkai a ni a; sawi chhàwn mai mai chi pawh a ni lo! Chutiang chuan hmeichhe ṭhenkhatin lo sawi bawk mah sela, an sawi zawng zawng chu a dik bîk lo. Phai lama lehkha zir Mizo nulaten hnam dang kawp an chîng tih hi chu mit ngeia hmutu zîngah ka tel. Pathian thu kan zir lai khân Mizo nula, college kalten hnam dang an kawp kha buaipui tûr an awm deuh reng. Iran (Turkey) lam mi te, Irag mi te leh Negro thlenga kawp duh kha an awm ṭhin a; an guardian nih kha a hahthlák khawp mai. 

Social media-a hnam dang neih sawi mâwitu pakhat chuan “Mosia pawhin hnam dang nupuiah a nei” a rawn ti a; Mosian hnam dang mi nupui a neih avàng khân a unaute nên an inngeih loh phah a nih kha. Aigupta-a Israel-te an awm lai aṭanga tûn thlengin Mizote ang bawka ‘saphun’ nei hnam an ni. Aigupta aṭanga an chhuah khân anmahni ang bawka Aigupta-hoin an tihduhdah hnam dang tam tak chu an zîngah an kal ve a (Ex 12.38); khâng hnam dangte kha Israel hnamah an inchhûng lût a, ‘saphun Israel’ an ni zui ta a ni. Chûng zînga langsàr tak pakhat chu Juda hnam aiawh Kaleba kha a ni a (Num 13.6); a pian leh mûrna lamah chuan Ken mi (Kenite) a ni a (Num 32.12); Juda sa a phun avàngin Juda hnam ah chhiar a ni. 

Tûn thlengin Mizo ṭhenkhatin Juda sa an la phun ta zêl; Israel rama pêm tûr chuan Juda sakhua (Judaism) zawm hmasak a ngai a. Israel rama Mizo pêmte hi Juda sa an phun avànga pêm thei chauh an ni. Tûn hma khân Israel ramah an chhuk phawt a; chutah chuan Juda sakhua an lo zirtîr a; chumi hnûah saphun Juda-ah an siam ṭhin. Kum eng emaw zât kal ta khân an Parliament (Knesset) chuan dàn thar a siam a; Juda saphun sa an nih loh chuan pèm an phalsak ta lo a. Vawi khat pawh Zuangtuiah Mizo 98 lai Juda saphunah an siam hmasak nghe nghe kha.

Hnam dang, a bîkin vaite hian Mizo sa an phun thei em? Vai ṭhenkhat Mizo saphun anga awm, Mizo hnam ṭhenkhat anga inchhâl, an hming pawh Mizo hming pû an awm nual. Mizo saphunna dàn dik takah vaiten Mizo sa an phun thei em ni? Tûn hmaa Mizo zînga saphunte kha sal an ni deuh vek a. Khawchhak lam mi an ni emaw, khawthlang lam mi an ni emaw, Mizoin râl an rûna an mante khân Lal sa an phun thei/thiang lo a; hnam hnuaihnung sa an phun duh lo a; lal khàwnbâwlho sa an phun ṭhin. Lal khàwnbâwlah khân Pachuau an tam ber a; Pachuau zîngah saphun an tam ber. Hnam dang hian saphun hi an nei ve em? Hmàn deuh khân Râlte hnamah saphun awma an sawi ka hre ve zauh! Sal ni si loin Mizo sa an phun thei em?

Hmànlai aṭangin ram dangah hnam dang nupuia neih hi an chìn dàn pakhat chu a ni ve ngei mai. Israel lalte zîngah pawh hnam dang nupuia nei an awm nual. Solomona khân nupui 700 leh hmei 300 a nei a; hnam dang hmeichhe tam tak a nupui zîngah an tel. Aigupta lal fanu phei kha chu a nupui zîngah a dah chungnung bîk a, a chènna tûr in hrang a saksak nghe nghe a (1 Lal 9.24). Pathianin finna a pêk, khawvêl mi fing bera ngaih Solomonan Pathian a hawisan chhan chu a nupuite vàng a ni a; Aigupta lal fanu kha a tlûk chhiatna thlentu bulpui ber a ni. Israel lal Ahaba khân Phoiniki hmeichhia Jezebeli a neih kha Israel leh Judai ramin an tuar nasat phah hle. Baal biaknaa hnûk luttu bulpui a nih kha!

Babulon sal tâng kîr leh hnûah khân Juda-ten hnam dang nupuiah an lo nei a; an fate pawh hnam dang ṭawngin an ṭawng zut zut ta hlawm a. Persia ram aṭanga Judai ram Lârsâp atâna lo kal Nehemia khân a ngaithei bau lo. Nehemia bûah hetiang hian kan hmu a, “Chûng lai chuan Juda mi, Asdod hmeichhia te, Amon hmeichhia te, Moab hmeichhia te nupuia neite chu ka hmu a. An fate zînga a zâtve chu Asdod ṭawngin an ṭawng a; chûngho ṭawng dàn ang ang chauh lo chuan Juda ṭawngin an ṭawng thei lo a. Tichuan, anni chu ka ko khâwm a, ânchhia ka lawh a, ṭhenkhat chu ka vua a, an samte ka pawh thláksak a, an fanute pawh chu chûngho fapate neihtîr lo tûr leh chûngho fanute chu an fapate tân emaw anmahni tân emaw nei lo tûrin Pathian chhâlin chhia ka chhamtîr a,” tiin (Neh 13.23-25). Nehemia chuan hnam dang nupuia neite chu ṭhen tûrin a ti a; an ṭhen loh chuan Juda hnam aṭangin an hnawt chhuak a ni (Neh 13.3). Nehemia thîkthu chhiat ang hian kan thîkthu kan tichhe ve ngam ang em? 

Tûnlai boruak kal mêka social media-a Mohan Jyoti Chakma thu ziah hian thin a khei zak mai! Mizo mipa chekin a ngeih theih lo ang; mahse thu dik a nihna chin thui tak a awm si. Hetiang hian a ziak a, “Interracial marriage between Nepali guy and Miss Mizoram. A friend of mine from Nagaland who stayed in Mizoram for 10 years told me that if you got deep pocket, you can get any Mizo girl you want. I had a little doubt about him until I heard detailed history about this newly wed couple. I then later asked my friend who’s in Kamalanagar, Mizoram about Mizo girls. He told me nothing different but that Mizo girls lack loyalty to their Mizo-ness because money matters most to them more than anything. He told me that he had seen many Mizo girls relating with Blacks, Asians, South Indians, Foreigners and so on for the sake of getting monetary benefit and luxury. Something special and peculiar about Chakma girls is whether they are rich or poor, you’ll hardly find them flirting or hanging out with Non-Chakma guys. The reason is nothing but that Chakma people know their identity well unlike diluted Mizo people,” tiin. 

Mizo hmeichhiate chu hnam dang pawisa ngah tawh phawt chuan an duh duh kawp theih leh Mizonaah an rinawm hlawl lo niin a sawi a; Chakma-te erawh chu pawlh dal Mizote ang an nih lohzia  leh hnam dang nèna inkawp mai mai ve lo an nihzia a sawi thung a nih hi. He pa thusawi hi 100% dik lo mah se dik chin chu a awm ngei ang. Hetianga sawi mai theiha kan awm chhan hi chhûngkaw inzirtîrnaah bul kan ṭan ṭha táwk lo tihna a ni. Thuthlung Tharah chuan he thu hi kan hmu a, “lei chung zawng zawnga awm tûrin bul hmun khat vekin hnam tin a siam a, an tân hun bite a  ruatsak a, an awmna rîte pawh a khamsak a,” tiin (Tirh 17.26). Pathianin awmna ramri min khamsak chhûngah hian kan mi leh sate ngei nupui pasalah innei ta ila, Mizo hnam humhalh leh vèn him nân thil ṭangkai tak a ni ang.