GIG MOTORS SCHOLARSHIP SEMNAAH KA TEL VE!

May 11, 2019-ah khân ka huangah hian “HSLC Top Ten lawmnaah ka tel ve” tih ka ziak tawh a. HSLC Top Ten lawmna kha Vânapa Hall-ah MZP Hqrs-in a buatsaih a; hun serh ka hmang a. GIG Motors (A Unite of 3:16 Solution) neitupa Pu John Lalpêka nèn kan ṭhu dùn a; ani chu hmun leh hmuna ka hmuh hmasak ber ṭum a ni. MZP Hqrs leh GIG Motors hi an lo thawk dùn ṭha viau a; khami ṭum pawh khân sènso a tumsak bákah kum 2019-a HSLC Top Ten mi 20 tân khân kum khat chhûng thla tin Rs 1000/- scholarship pêk a tum thu a puang a; kut kan beng ring hle a ni.

A tum dàn tak kha chuan HSLC Top Ten-te khân bank-ah account hawngin an account-ah chuan thla tin Rs 1000 dahsak a ni a. Amaherawhchu, HSLC Top Ten-te khân bank account an lo hawng remchâng thei vek bîk lo a. Hun a lo kal liam zêl bawk si a; chuvàngin a hlãwma pêk vek záwk a tum ta thung a. A hun atân August 13 (Thawhlehni) chawhnu dâr 1 ruat a ni a; a hmun chu MZP Conference Room a ni. August 12 (Thawhṭan) zànah khân Reiêk KṬP Branch inkhâwmah ‘Ram leh hnam, ṭawng humhalh leh vèn him’ tih thupui sawiin ka lehlâng a. Zàn dâr 9-ah Reiêk aṭangin kan hâw ṭan a; Tlawng lui kam vêla kan awm lai chuan John Lalpêka chuan min rawn phone a ni àwm e. Kei lahin motor hnung lamah mobile phone ka dah daih a; a mi phone chu ka lo hre dèr si lo. August 13 (Thawhlehni) zîng lam dâr 9 vêlah chuan min rawn phone fuh ta a. GIG Motors Scholarship semnaah chuan hun serh hmang tûrin min rawn sâwm a; kei pawhin tihtûr dang ka neih bawk loh avàngin ka lo pawm ta nghâl a ni.

August 13 (Thawhlehni) dâr 12.45-ah MZP Conference Hall chu ka thleng a; zirlai pahnih khat lo thleng tawh tih lohah chuan a thleng hmasa ber ka ni a. GIG Motors Scholarship semnaah chuan khuallian chu Pu Lalruatkima, Hon’ble Minister of State (Rural Developtment, Information & Publicity, Land Revenue & Settlement) ) a ni a; ani chu a pa Upa Kâpthanṭhuama aṭanga ka lo hmelhriat ve nual tawh a ni. Mi dangte pawh chu a hun taka ṭan hmanin an lo thleng hlawm a.

GIG Scholarship sem inkhâwm chu MZP President L. Ramdinlianan a kaihhruai a. Thufingte 6.6,9; 13.4; Jn 5.17 ka chhiar a; ṭawngṭai nghâl mai loin thu tlêm azâwng ka sawi a. Mizo hnam humhalh tûrin theih tâwp chhuaha lehkha zira India rama hna sâng All India Services & Central Services (Group A&B)-ah Mizo a tam thei ang ber luh a ṭûl thute ka sawi a. August 5, 2019-a Presidential Order hmanga Indian Constitution Article 370 & 35A paiha Jammu & Kashmir chu Union Territories 2-a siam a nih ták mai thu leh Mizoram humhalhna bîk Indian Constitution Article 371G leh Inner Line Permit pawh hi eng hunah emaw chuan Central sawrkarin a nuai bo mai theih thu te, chutiang hun chu lo thleng a nih pawha Mizo hnam chu ral mai loa a din chhuah zêl theih nân tûn aṭanga ṭhangtharten taihmákna leh tumruhna nèn lehkha an zir a ngaih thute ka sawi a. 

Tûn kum 5 kal ta chhûnga IAS Topper zînga mi 4 kha hnam hnuaihnung (Scheduled Caste & Other Backward Classes) an nih thu leh chutiang ni ve lo pakhat lah chu pianphunga rual ban lo a nih thu te, khâng zînga ṭhenkhat chuan vawi 4 an exam-naah IAS Topper an nih theih thute ka sawi bawk a. Tûn aṭanga kum 10 vêlah chuan HSLC Top Ten zînga mi eng emaw zât chu IAS & IPS an nih kan lo beisei dâwn tih thute ka sawi bawk. Khuallian Pu Lalruatkima pawhin thu hran vak sawi loin Mizo IAS leh IPS an kangchat titih tawh a; chuvàngin sawrkar pawhin theih tâwp chhuahin Mizo nula leh tlangvâlte IAS leh IPS an nih theihna tûrin nasa takin ṭan lák a nih thute a sawi a. Kan khuallian chu BD ka zir chhuah hlima Hrângchhuana High School-a thla khat lek ka thawh lailáwk lai khân ka lo zirtîr ve lawk a ni tihte chu a rawn sawi chhuak a. Bangalore-a BD kan zir laia kan ṭhianpa pakhat, ṭawngkam thiam tak, Zokhawthara Biak In a hawnnaah phei chuan “A hrawk a hnâwng ṭha kher mang e” an lo tih khawpa dangnãl, têl ṭin dawlh tih mai tûrin min sawisakna “Lehkha i zir ngut ngut dâwn em?” tih nân “I Chuauṭhuam dâwn em?” a tih thute chu rawn sawi chhuakin Top Ten-hote fuih nân a rawn hmang a. Kei mi zakzum tân phei chuan kimkit châwih châwih a awl khawp mai!

GIG Motors (A Unit of 3:16 Plan Solution) neitupa Pu John Lalpêka chuan mipui vàntlâng leh sawrkar tâna ṭangkai ni tûra hma lákna pêng hrang hrang an lo kalpui dàn a sawi a. An sumdàwnna hnuaiah chuan pêng hrang 7 a awm a; ṭhalai mi 155-in eizawn nân an hmang mêk a; chûngho chu Mizo deuh vek an ni. Mizoram sawrkarah pawh chhiah an pêk luh a tam tial tial a; mi dang tâna luan chhuah chu tihmákmawhah an ngai a. Mizoram sawrkar nèna thawh dun kawngah te, mi chanhaite ṭanpui kawngah te, chhiat táwkte puih kawngah te, Mizo ṭhalaite hmasâwnna tûra thawh kawngah te kê an pên mêk a ni.

May 11, 2013-a Laipui tlâng leimin avànga chhiat táwk chhûngkaw 14 hnênah khân 3:16 Plan Solution chuan Television, Refrigerator leh Washing Machine-te a lo pe tawh a. Mizorama hnuchham leh ruihhlo ngaite enkawlna hmun pawimawh tak pakhat Thutak Nunpuitu Team thlâwptu leh ṭanpui an ngaihna kawng hrang hranga puitu a ni bawk. Kum 2015-a Bairabi khuain YMA General Conference a thlen khân Mizoram sawrkar hnuaia Swatch Bharat Mission chuan Clean Mizoram beihpui a thlák a; khatah khân sum thawhtu a ni a. Sawrkar ṭanpui nân Chief Minister’s Relief Fund-ah sum  a chhûng lût ṭhin bawk a ni.

Kum 2010 vêl aṭang khân Mizo ṭhalaiten infiamna lama awmze nei záwka hma an sâwn theih nân leh infiamna hi eizawn nân hman a nih theih nâna infiamna hrang hranga inelna an buatsaihah 3:16 Plan Solution chu sponsorship sum thawhtu langsàr ber a ni hial ang. Mizoram Premier League (Football)-ah te, LPS Pro Fight (Boxing)-ah te, Pro Volleyball League-ah te, Mizoram Super League (Volley Ball)-ah te, Taekwondo Fight League-ah te sum thawhtu 

ṭangkai ber zînga mi a ni bawk.

Khawvêl hmun dangah pawh mi hausate hi mi dang tân an luang chhuak nasa hle ṭhin. Mi pahnih pathum lek han thur chhuak ila. USA mi hausa John D. Rockefeller chuan Rockefeller Foundation (Estd. 1913) a din a; chutiang bawkin Edsel Ford & Henry Ford chuan Ford Foundation (Estd. 1936) an din bawk a. Chûng foundation hmang chuan mi tam tak mi thiamah chher chhuah an ni a. Tûn hnaiah Bill Gate (born 28 October, 1955) chuan a hausakna chu mi dang tân a luan chhuahpui nasa hle bawk.

Mizo zîngah hian mi hausa tak tak an tam tawh mai. Kan naupan laia ‘millionaire’ kan ngaih ropui aia nasa záwk daih ‘multi-millionaire’ tih tling pawh tam tak an awm tawh. Chûnghote chu han luang chhuak huau huau sela; mi rethei leh harsa, puih ngai tak takte hi han ṭanpui sela, mi tam takin an din chhuah phah ang a, Mizoram hian hma a sâwn ngei ang. He chanchinbu kal tlanga kan rawn sawi tawh kum 2019-a HSSLC Exam (Science)-a pahnihna Lalduhawma pawh kha tûnah chuan mi inphalte puihna azârah India rama College ṭha ber zînga mi St. Stephen’s College (Delhi)-ah a zir ṭan mêk a. IAS nih tum tlat a nih avàngin tûn aṭanga kum 5-10 chhûng chuan IAS ni ngei tûrin kan lo beisei dâwn a ni. Mizo hausate hi han luang chhuak zêl teh u. In puihna mamawh ngawih ngawih, puih tlák mi tam tak an awm a ni.