K. LALHMUNSÂNGA PUAL

Mi azawnga rual pàwl thiam lo pâwl tak ni mah ila, tu tute emaw hian min ngaina der ve ṭhin a. Kum 2016-ah khân tute nge an nih tih pawh ka hriat sa lutuk lêm loh intêl khâwmin ka hmingin lehkhabu ‘The Revd Chuauṭhuama’ tih chu an chhuah a. Phû lo mah ila, ka lâwm khawp mai. Tûn hmaa tute nge an nih ka hriat lêm loh bawk chuan ka hmingin WhatsApp group ‘REVD CHUAUṬHUAMA HUANG’ an siam a; rei lo tê-ah member awm thei zât a khat a. G

Group 2 an siam belh a; chu pawh chu a khat leh a; Group 3 an siam leh a. Hêng group member-te hi mi chi hrang hrang - Pastor, Kohhran Upa leh nula leh tlangvâlte an ni a. An duh duh an sawi a; an inhnial laih laih a. Kei a hming putu ber lahin thu leh hlaah ka châwm hman mang si lo; an thu leh hla erawh hi chu ka lo chhui zui ve ṭhin a. A ṭhenin an chhuahsan a, mi dang an lo lût ve leh a; chutiang chuan hlim tlâng takin an titi laih laih ṭhin. 

Hêng WhatsApp group 3 bákah hian group tênau zâwk pakhat ‘The Cantab’ tih chu Kohhran Upa pakhatin a siam a; member pawh kan tam lo. A chângin 30 aiin kan tam deuh a; a ṭhen an chhuak a; tûnah tak hian ‘The Cantab - 27’ tih a ni. Member-te hian an duh duh an sawi a; an inhnial a; an inhau a; a ṭhen an chhuak tau a; rei lo tê-ah an lo lût leh a. Chutiang rêng rêng chuan hun an hmang a. Thu ṭha leh ṭangkai tak tak an sawi châng a tam a; thu ho tak tak sawia an inhnial châng lah a tam. Ninawma láksak chi a ni lo a; an hlim phah ve tlat si avàngin lâwm taka thlîr mai chi a ni. 

The Cantab member tam ber chu Aizâwl vêng hrang hranga mi an ni a. Ṭhenkhat erawh chu Lunglei, Champhai, Vaphai, Delhi, Kolasib Diakkàwn, Khuangpuilàm, West Phailêng, Sihphîr, Hualngohmun leh Ṭhiak-a mite an ni nawk mai. Anniho hian kan ina chaw ei an duh tlat pek a. Pawisa an thawh khâwm a; an bazar a, rawng an rawn bâwl a; chutiang chuan hlim takin kan inah ṭum hnih chu chaw kan ei khâwm tawh a. An pawisa thawh khâwm aṭang chuan thil eng emaw leiin min pe ṭhin bawk. An zînga tel ve nu pakhat hi kan chaw ei khâwmnaa lo kal ngai miah lo, pawisa thawh lama inphal êm êm si a awm lehnghâl a. Nikum Krismas dâwn khân zan khat tal kan ina Krismas hla saa zai ho an duh a. A hun kan ruat a, âr sa ka lei a; Aizâwla buhfai tui ber chi Juha nèn ka lo buhchiarsak a. Kan hlim ve khawp asin! 

The Cantab member pakhat chu Lunglei Chanmari tlangvâl K. Lalhmunsânga (s/o Sailochhîngi) a ni. Kan ina chaw ei tûr ringawt khân Lunglei aṭangin Aizâwlah a lo phei nal nal a. ATC-a ka zirlai chhuakten kum 70 ka tlin lawm nân Festschrift ‘Mizote leh Pathian Thu’ tih lehkhabu an siam a; Synod Conference Centre-a tlângzarh ni pawh khân phûr takin a rawn tel ve a. Tlangvâl nungchang ṭha, fel tak, Pathian ṭih mi, kohhran leh KṬP-ah pawh inhmang tak a ni. Kum 1991–1992 chhûnga Lungleia Pro Pastor ka nih lai khân naupang kum 10 mi âwrh chauh a nih avàngin ka hre hman lo; ani erawh chuan min hre hman ngei ang. 

K. Lalhmunsânga kha mi hlim thei tak a ni a. Mi thil phal tak a nih kha chhinchhiah tlák tak a ni lehzual. Pathian thu zir si loah chuan Pathian thu zirna lam lehkhabu a lei nasa viau a ni ang, chutiang lehkhabu chanchin pawh chu a hre hle. Mi thil phal tak a nih avàngin The Cantab member-te hnênah a lehkhabu man to tak tak chu a pe ṭhin a; kei pawh bu khat chu min pe ve nghe nghe a ni. 

Tlangvâl hrisêl leh hma lam hun êng tak neia kan hriat laiin kum 2017 tàwp lam aṭang khân a lei leh hrawk a sawisêl ṭan a. Kum 2018 March thlaa Lungleia a inentîr chuan cancer a ni tih hriat a ni a. April 2018-ah Guwahati-ah a zuk kal a. Guwahati-a a kal dâwn hian Bethlehem Vênga a thlen inah ka zuk tlawh ve hrãm a; ka ṭawngṭaisak hnûah thlamuang taka kal tûrin kan inthlah a, ka kalsan ta a. 

Mizoram Cancer Institute, Zemabâwkah inenkawlin Aizâwlah a lo kal zauh zauh a. A tîra a natna tak chu a dam tawh viau a; a leia bâwk pawh a reh tawh a. Amaherawhchu, June thla tâwp lamah a khabê-ah bâwk a lo awm leh a. July 3 khân inentîr tûrin Aizâwlah a lo phei a. July 10 &11-ah chemo lain ni 5 lai a awm hahdam hnûah July 17 khân Lungleiah a phei a. July 18 zîng lamah a pum nawm loh avànga doctor-te râwna damdawi nèna inenkawl tûra an inbuatsaih laiin chawhma dâr 9.45-ah khân chatuan ram a pan ta zâwk a ni. 

Ningani (18.7.2019) chawhma dâr 10 vêlah chuan ka WhatsApp group pakhat chu ka han en a, K. Lalhmunsânga thih thu chu a lo chuang reng mai a. Min ṭhâwng hle mai. Group member dangte pawhin an han hriat chuan an thin a 

ṭhâwng hle hlawm a; ṭhenkhat chu an ṭap nilêng a ni ber mai. Amah an ui thu chu an sawi sup sup a. The Cantab member-te phei chuan awm ngaihna an hre lo lehzual a; an thu rawn ziah aṭang chuan amah an uizia a lang chiang hle. Hna thawh zai kan rêl thei lo. 

Hetah tak hian The Cantab member-te inngainatzia leh inhmangaih tlânzia a lo lang a. The Cantab group siamtu chuan bul tumin a vuinaa tel tûr an inzâwt a. Group siamtu account-ah pawisa an dah hlawm a. A ruang chunga dah tûr pangpâr an lei a. Ningani tlai dâr 6.30 vêlah chuan car pahnihin group member 10 (mipa 7 leh hmeichhe 3) chu Lunglei panin an phei ta a. Ṭhiak khuaa The Cantab member pakhatin âr talhin zanriah a lo buatsaihsak a; chumi hnûah chuan kal zêlin Zirtâwpni zîng lam dâr 2.26-ah Lunglei chu an thleng ta a ni.

Tûnah chuan Mahmuna chuan natna hrehawm tuar tawh loin min lo chawlhsan ta; hlim takin Pathian ângchhûng thianghlimah chuan a awm tawh ang a. Keini pawh a hnênah chuan kan la kal ve ang. The Cantab member pakhatin a thlahna hla a rawn siam hian ka thu ziah hi ka’n khãr ang e: 

MUANGIN CHÂWL NÃNG CHE

Kan beisei, kan nghah vàn khawpui mâwi,

Lalpan kan tân a siam ngei chu;

A pan ta e, lei thuam dahin,

Lungngaih, hrehawm, buaina kalsanin.

Hmuna! Ṭhian rinawm Hmuna!

Mite tâna neih sum hlàn a,

Û leh nau ianga mi tin dawmtu,

Nang ang ṭhian ṭhen kan tiam lul lo!

    

Sâwta luipui sâw i kai ta mâw?

An sawi vàn khawpui chu i thleng ta mâw?

Ngaihlai Lalpa i belh ṭhin khân, 

A âwm nghêngin pawm mawlh che rawh se.

Kan thlîr, kan ngai, i lènna ram,

Hmangaihna ram, khawpui mâwi chu;

A chhûnga Krista ângchhûng nuama’n,

Âw ṭhian rinawm, muangin chàwl nãng che.