AIS & CS

‘AIS & CS’ hi ‘All India Services & Central Services’ tihna a mai ni. ‘All India Services’ tih hi kan hre chiang tâwk lo; ‘Central Services’ tih hian IAS & IPS pawh a huam vek emaw ti an tam hle. Mizoram Minister pakhatin, “Central Services-a tling kan tlèm chhan chu kan nawmsak vàng,” ti-a a sawi pawh khân a rilrûah chuan IAS & IPS a lang lian berin a rinawm. M.Lalmanzuala (IAS Rtd) khân Vànglaini (3.4.2021)-ah a rawn sawi fiah tawh a; khati chung pawh khân la fiah chuang lo kan la awm fo maithei! Hrilh fo pawha fiah thei chuang lo kan ang hle!

‘All India Services’ tihah hian Services pathum, (1) Indian Adminis­trative Service (IAS), (2) India Police Service (IPS) leh (3) Indian Forest Service (IFS/IFoS) chauh a huam a. Indian Forest Service kaih tàwi hi Central Services zînga pakhat Indian Foreign Service (IFS) nèn hriat pawlh loh nân IFoS an ti tawh mai bawk.

All India Services & Central Services-a mi kan neih dàn chu - IAS 10, a senior ber 1987, a junior ber 2014; IPS 1 (1995); IFoS 4, senior ber 1983, junior ber 2013; Central Services-ah IFS (Foreign) 3, senior ber 1993, junior ber 2005; IRS (Income Tax) 6, senior ber 1991, junior ber 2008; IRS (Customs & CGST) 5, senior ber 2006, junior ber 2014; IA&AS 3, senior ber 1986, junior ber 2005; ICAS 4, senior ber 1982, junior ber 2002; IDAS 2, senior záwk 1991, junior záwk 2012; IDES 1 (2011); IRAS 2, senior záwk 1990, junior záwk 1993; IPoS 2, senior záwk 1999, junior záwk 2001; IES 2, senior záwk 2001, junior záwk 2012. Central Secretariat Services (Group A) 1 (1996) te an ni.

Mizo IAS & IPS-ah hian AGMUT Cadre an awm lo a; IAS senior pahnih, tûna Mizoram CS leh Additional CS-te hi Gujarat leh Manipur Cadre-a mi, kum 1962-a piang ve ve, nakkum March leh May thlaa pension tùr an ni.

UPSC-in Civil Services Examination a buatsaiha inziak tling ni lo, State Civil Services (SCS– IAS) leh Non-State Civil Services (Non-SCS –IAS) eng emaw zât kan nei a. Anniho hi IAS-a an kai sàn hian upa lam an ni deuh vek tawh a; chuvàng chuan Chief Secretary ni thei tùr an awm lo ang. Tûna promoted IAS kan neih zînga naupang ber Aizâwl DC hi kum 42 a nihin Non-SCS–IAS-ah a kâi sâng a; kum 17 emaw a service zui ang a; a pension dâwnah pawh Chief Secretary nih theih ngaihna a awm lo ang! Chutiang khawp chuan tûnah hian IAS senior kan tlachham tawh a; Mizo Chief Secretary tùr hian Mizo IAS-ah chuan ṭàm táwk ang mai kan ni! Jharkhand cadre-a mi Lalbiaktluanga Khiangte (b. 26.10.1964) pawh khu 2024-ah chuan a pension a hun ve tawh ang.

Tûn hnãiah hian video clip pakhat WhatsApp Group hrang hrangah theh darh a ni a; chuta thupui ber chu Mizo IAS kan tlákchham thû a ni. Dr. BD Chakma hoa Chakmahoin ṭan an lák nasatzia, Delhi-a IAS Coaching Centre ṭhaa an indah chungchâng a ni. Ṭhahnemngaihna mangang âu râwl a ni a; ngaihtuah a ti thui hle. Chutih lai erawh chuan khatiang mai kha chuan kan inau harh zo ngût ang em tih mai a awl!

Tûnah hian Mizoram Youth Commission chuan Mizo nula leh tlangvâl 20 chu Delhi-a IAS Coaching Centre ṭha tak pahnihah a kaltîr mêk a. Amaherawhchu, chûng mi 20-te chu IAS &IPS-ah an tling nghâl vek lo ang a; Central Services-ah pawh tling pha lo an awm nawk tho maithei! India rama tribal dangte hi thiamna lamah an sâng tawh khawp mai a; a bîk takin Rajasthan-a Meena te, Himachal Pradesh-a Negi te khu kum 1980 hma lam deuh aṭang khân an rawn sâng thar thut emaw tih mai tùr an ni. A chhan pakhat chu Indian Constitution Sixth Schedule-a an ṭawng hmanga an exam thei ta kha an sàn phah niin a lang. Keini Mizo ṭawng lah chu Sixth Schedule-a dah tùrin na lo takin kan la nawr teih teih chauh a ni bawk si! Tûnah hian Sixth Schedule-a ṭawng dah tùra dîl 44 zîngah 31-na kan ni!

Ngaihtuahna thar awm thei ta pakhat chu Mizorama awm nghet Chakma leh Bru (Tuikuk) te do viau loh hi a ṭha tawh záwk ang em tih hi a ni. An zîngah Chanchin Ṭha kan hril a, Kristian eng emaw zât an awm tawh a; a ṭhente phei chu kan Pastor an ni tawh hlawm. Kohhran ṭhenkhat phei chuan chi bil hming hmangin Kohhran an din hial a. Hetianga Kristianna thila zài khata luang zà tùra kan beih lâi hian politics thilah erawh chuan a nasa thei ang bera en hran kan duh lawi a. He ngaih dàn hi thlák a ṭha tawh záwk ang em?

Mizorama Chakma leh Bru awm nghet, electoral roll-ah pawha chuang dîm diam tawhte hi engti kawng mahin kan ûm chhuakin a rinawm loh a; chuvàng chuan lamṭang/ ṭhianah kan siam zâwk a ṭha tawh lo’ng maw? Zirlai pâwlte pawh hian beng tharin ngaihtuah tawh se la. Kan do reng hian kan do hneh lo tial tial zâwk niin a lang! Dik tak chuan dàn hmâah thiam kan chang hlei thei lo ang; Indian Supreme Court-ah kan thû hi lût vaih se chuan kan tla vai vai záwk maithei a ni.

Tripura-ah chuan Chakma SCS-IAS bákah Regular Recruit IAS pakhat an nei tawh a; an la neih belh thuaiin a rinawm. Dr. BD Chakma hoa heti taka All India Services leh Central Services-a lût tùra an beih chuan dan rual lohin an la hlawhtling ngei ang a; a ṭhente chu AGMUT Cadre-ah an awm ang a; chutih hunah chuan Mizoramah lo chhuakin DC leh SP-ah te, a áia sáng záwk Secretary/Commissioner-ah te an la awm ngei ang. Hei hi dan rual loha thil lo la thleng ngei tùr a ni ang. Chutih hunah chuan Chakma/Bru IAS&IPS Officer-te hmâah Mizo nula leh tlangvâlte an la kûn ang a; an duh emaw duh lo emaw ‘Sir’ ti-a an koh a ngâi tawh ang. Mi ṭhenkhat phei chuan an intlawnsiak ang a; nu leh pa tam tak chuan mákpa ah duhin an khèl záwk hial maithei!

Chu vàng chuan tûna Mizorama awm nghet tawh Chakma leh Bru laka inthliarna rilru kan put hi kan thlák loh chuan an rilru kan hneh thei ngai lo ang. Dik taka sawi chuan politic-ah CADC-ah MNF leh INC chuan sawrkarna siam an inchuh reng mai a ni a; an va thawhpui duhte chu tû dang ni loin Chakma member vek an ni. Beng sikin i ngaihtuah tláng teh ang u.

Thil pakhat, mi ṭhenkhatin an sawi leh zauh ṭhin, Mizoram CM pawhin Central-ah a thlen tawh ni àwm tak chu All India Sevices Mizoram Cadre siam hi a ni. He thil hi uluk taka ngaihtuah a ngâi ang. Hmãn deuh khân M.Lalmanzuala (IAS Rtd) khân hemi chungchâng hi a ziak tawh a; mi tam tak chuan All India Services Mizoram Cadre hran neih hi ṭha tùrah an ngái maithei. Ngaihtuah chian erawh chu ngâi tak a ni.

All India Services, Mizoram Cadre siam a nih chuan IAS chauh ni loin All India Services dang pahnih Indian Police Sevice leh Indian Forest Service a huam tel dâwn a. IAS bîk hi han thlûr bing ta ila. Mizoram IAS Cadre nei ta ila, Mizoramsawrkara IAS hna chu 50 âwrh chauh a ni ang a; Mizoram cadre chu Mizo hlang awmna tùr a ni chuang miah lo; state dang mi tam tak kha Mizoram cadre-ah an lût tho dâwn a ni. Kum 10 vêl kal taah khân Mizo IAS officer pakhat chuan Mizoramin All India Service Cadre lo nei ta ila, kan dinhmun tùr hetiang hian a lo chhût tawh a:

“IAS-ah cadre strength 52 ni ta sela, 331/3 % chu State Service kai sànna tùr a ni ang a. RR–IAS tân 34 vêl a ni ang a; Leave Reserve + Junior Post chu 4 vêl a ni ang a. Kum tin IAS vacancy pakhat pawh kan nei lo ang. Tûna Cadre Allotment Policy ang chuan Insider leh Outsider tân an reserve chhâwk ang a; Reserved leh Unreserved quota tel lo pawhin Mizo IAS tling tharten Mizoram cadre an chan theih hun hi kum hnih/kum thum danah a inher chhuak chauh ang. Mizo IAS tling thar kan awm loh chuan mi dangin an luah ang a; he vacancy hi carried forward theih a ni lo lehnghâl a. Mizo IAS tling ve zeuh zeuh pawh ni ta ila, combined AGMUT Cadre chan âi chuan Mizoram Cadre chan chu a harsa viau záwk dáwn a ni. Cadre hran kan neih avàngin Mizoramin Mizo IAS kan neih tam phah dâwn chuang lo,” tiin.

Mizoramin All India Services cadre hran lo nei ta pawh ni ila, a chunga chhût dàn aṭang khian Mizo IAS & IPS zawng zawng Mizoram cadre-ah an lût dâwn lo tih a chiang táwk hle. Mizo hlang IAS awmna state lo ni palh ta hlauh ila, Mizote hi administration-ah a thiam ber leh ṭha ber ber kan ni lêm si lo a; Mizoram state zîm tê administration-a an experience ringawt chuan state lian záwka experience chu a phák lo hle ang! Chu vàngin kan ram hruaitute pawh hi tháwka phita âr mit ṭet khuan ringawt zêl loin, kan thil dîl hi lo hlawhtling ta se la, a nghawng chhuah chu kan tâna ṭha tùr nge chhe záwk tùr tih hi chiang takin chhût hmasa ṭhin teh se! Sâp thufingah pawh, “Look before you leep” tih a nih kha.

Mizote nula leh tlangvâlte hi IAS&IPS-ah tling sup sup se la; India ram states hrang hrangah awm darh sela. State lian tak takah te Secretary/Commissioner an ni ang a; a ṭhen Central-ah deputation-in an kal bawk ang a. Chutih hunah chuan India ram pum pui administration-ah Mizo officer-ten chanvo pawimawh tak an chang dâwn tihna a ni. Kan mamawh hunah chuan State danga Mizo IAS&IPS officer-te chu Mizorama thawk tùra lák chhuah theih dàn a awm tho si a; chutih hunah chuan State liana an experience ṭha tak kha Mizoaram tân an hmang ṭangkai thei záwk ang.

North East State-a IAS Cadre hran neite dinhmun lo en ila. Assam–Meghalaya-ah tûnah hian IAS 193 an awm a; chûng zînga 66 chu Assam & Meghalaya mi an ni; 127 chu State dang mi an ni. Assam-Meghalaya mi 66 zîngah chuan RR–IAS chu 15 chauh an awm a; a dang 51 chu SCS&Non SCS– IAS an ni.

Manipur-ah IAS 88 an awm a; chûng zîngah chuan 50 chu Manipur State mi an ni a; an zînga 21 chu RR-IAS an ni a, SCS&Non SCS–IAS chu 29 an ni. Manipur hian an State mi RR–IAS an ngah viau a; an zîngah JC Ramthanga (Mizoram Addl CS) leh B. John Tlângtinkhûma (IAS-2008) an tel.

Nangaland-ah chuan tûnah hian IAS 60 an awm a; an zînga 24 chu Nagaland state mi an ni a. Hêng IAS 24-ah hian Nagaland mi RR–IAS chu 4 chauh an ni a, SCS&Non SCS–IAS 20 an ni thung; State dang mi IAS chu 36 an ni.

Tripura-ah IAS 66 an awm a; an zînga 17 chu Tripura mi an ni. Hêng Tripura mi IAS 17-ah hian 3 chauh RR–IAS an ni a; 14 chu SCS&Non SCS–IAS an ni. Tripura mi RR–IAS 3 zîngah kum 2017-a RR-IAS tling Tarik Kanti Chakma a tel. State dang mi IAS chu 49 an ni.

Sikkim-ah chuan tûnah hian IAS 34 an awm a; chûng zînga 9 chu Sikkim state mi an ni. Sikkim state mi IAS 9-ah hian 2 chauh chu RR–IAS an ni a, 7 chu SCS–IAS an ni. State dang mi IAS chu 25 an ni.

IAS (Cadre) Rules hi a awm a; IAS member hian cadre post an nei a; chuti chung chuan an cadre post loah pawh dah theih tho an ni. Mizo IAS (Rtd) pakhatin a sawi dànin tûn hma chuan IAS ni lo chu IAS cadre post-ah dah theih an ni lo; indaih lohna avàngin IAS-a promotion pêk tùr select list-a mite erawh chu thla 6 chhûng dah theih an ni.

Mizoramah hian dàn leh hrai hian awmzia nei vak lo a ni maithei. Director of School Education hi IAS cadre post a ni a; tûnah hian IAS ni loin a chelh mêk a ni àwm e. Director, Social Welfare & Tribal Affairs pawh hi IAS cadre post a ni a; Mrs Ankita Chakravarti, IAS fel zet mai, All India Ranking-ah pawh 17-na kha Delhi-a transfer a nih hnûah IAS ni loin a chelh leh ta a ni àwm e. Hêngte hi IAS indaih loh vàng nge thil dang vàng? Mizoram sawrkar hian thil hi a nih dàn tùr ang takin kalpui ṭhin sela, kan ṭhat phah záwkin a rinawm.