THIL PATHUM

November 11 (Nilaini) thim hlimah Lailapur aṭangin Mizoram motor an rawn chhuahtîr a; Ningani zîng dár 5-ah chuan motor 562-in Vairéngtê a lo thleng tawh. Hetianga Lailapur aṭanga motor an rawn chhuahtîr leh ta thut mai hi ngaih a ṭha lo lek lek záwk a. WhatsApp group hrang hrangah Lailapur aṭanga motor an rawn chhuahtîr chhan inrinsiak a ni a; rin dàn chi hrang hrang an rawn sawi chhuahte chu:–

(1) Mizoram Bar Association-in Gauhati High Court-ah PIL an theh luh vàng a ni ang. (2) Central YMA-in dárkár 48 hun a pék vàng a ni ang. (3) MPCC President Dr. Lal Thanhâwlan Prime Minister Modi-a inrawlh tùra a ngen vàng a ni ang. (4) MZP-in Mizoram Governor ngâwi reng an dem vàng a ni ang. (5) NESO-in Mizoram ṭan zâwnga thû a chhuah vàng a ni ang. (6) Mizoramin Silchar ni lo, hmun dang aṭanga Oil & Gas a lák luh theih ták vàng a ni ang. (7) Mizoram mipui ṭanrual ṭhat vàng leh ramri bul hnaia awmte huaisen ém vàng a ni ang. (8) Saihapui V nuhoin Assam Police leh mipui tiang nèn an dan kîr ngam vàng a ni ang. (9) Phainuam nuho ‘hnam chhan hnatlângin’ Assam lam véngtu SSB an hlauh loh vàng leh Assam-in Mizoram an tihbuai reng chuan independent puan an tum vàng a ni ang. (10) Cachar Truck Owners thinrimin Lailapur-a buaina siamtu ‘a kaikuang’ ber Raju-a mantîr mai an duh tawh vàng a ni ang. (11) Lailapur-a vaihoin “ramria Mizoram Police duty hnuh kîr a nih loh chuan Mizoramah kan lo kal dâwn lo” an tih chu Kolasib DC-in, “Chuti a nih chuan in dam chhûngin in lo kal dâwn lo a nih chu” a tih vàng a ni ang. (12) Kolasib-a journalist pakhat ZMP Tlau chu eng vànga vaihoin motor rawn chhuah ta mai nge an nih ti-a ka zawhna min rawn chhànna chu, “Nimin Lailapur inbiaknaah khân ka tel ve a, motor dangtute hian thlâwptu an lo nei tlêm tawh êm a ni; chu chu ni berin ka hria,” tih a ni.

Hêng chhan hrang hrang inrinsiakte hi dika mual mual a awm ngei ang a. A hmasa pathumte khi a chhan a nih ngai chuan engati nge anniho hian ni 10 chuang nghâk kher loa an chêt loh tih chu zawhna awm thei a ni ang. Cachar lamin motor an rawn chhuah avàng hian sawrkar leh mipui pawh kan inthlahdah tùr a ni chuang lo; vai chalàkzia hriain inring renga awm zêl tùr a ni. Tûn ṭum ramri buai chungchângah hian Mizoram sawrkar pawh kum 2018-a Zophai buaina ái kha chuan a che ṭha deuh záwk a. Tûn aia khauh záwk hian ṭan la zêl sela tih hi mipui duh dàn chu a ni. Ramri buai hi chu a reh mai dawn lo; buaina boruak so sáng a kian deuh avàngin ramri hrûl ngaihthah leh mai loin tihhmasâwn dàn tùr ngaihtuah zui sela; tute tân pawh ramri bula awm chákawm thei tùrin tihhmasáwn thuai tùr a ni.

Mizote hi eng kan ti teh réng nge ni USA leh Israel hi kan páwngpaw ṭan tawp mai a. Israel kan ṭan chhan ber ni-a lang chu ‘Pathian hnam thlan’ an nih vàng a nih hmèl a. USA hi eng vàng taka ṭan nge kan nih? Khawvéla sawrkar ropui ber leh chak bera kan ngaih vàng em ni ang? Mi tam takin Mizoram leh Cachar ramri buai an buaipui luai luai laiin mi ṭhenkhat erawh chuan US President inthlan chu an lo tuipui ém ém thung a; tuipui satliah pawh ni loin an ruihchilh a ni ber záwk! Thu sei tak tak ziaka WhatsApp Group hrang hranga theh darh a tam ém ém a; chhiar peih lo tán chuan a hlâwma paih mai a ṭûl ṭhin.

Tûn ṭum US President inthlanah chuan Mizo tam ber chu Donald Trump-a an ṭan tûk ringawt mai a; Aizâwl lama mi tam tak hi chuan Presbyterian Kohhran member a nih ṭhin vànga ṭan an nih hmèl hle. Tûnah erawh chuan Presbyterian pawh a ni tawh lo, ‘páwl lo páwl Kristian’ a ni tawh záwk! Donald Trump hi Kristian ṭha tak a nih leh nih loh chu keini sawi phák rual a ni lo. Kum 2016 US President inthlanah khán mipui vote hmu tlém záwk siin President-ah a tling teh tlat a!

Donald Trumpa-a ṭhat vena tak chu US President a nih hnûah a chènna White House chu a chei Kristian thar leh ta a; Trump-an Obama sûlhnû ṭhiata a rawn tih-Kristian ták deuh avàng khân ṭantu a ngah phah a. A bîk takin Trump-a hi evangelical Kristianten an ṭan hle; chûng zîngah chuan Billy Graham-a fapa Franklin Graham pawh a tel.

Trump-a hi mawngkawhur leh patil ngái sáng lo a ni a; nau tihtlák duh lo a ni bawk. Héngte avàng hian Kristian khermei (conservatives) tân chuan ngaih sàn loh theih a ni lo. Mizoten Trump-a kan ngaih sàn chhan ber pawh héng thil vàng hi a ni ang; Kristianna a cháwi sáng a, US-ah Kristiante an zalèn thar niin an sawi. Hêng hi tak tak a nih chuan Trump-a chu a ṭha viau tihna a ni ang a, ṭan pawh a mawh lo ang.

Kawng lehlamah erawh chuan Trump-a hi a mizia rêngah pa dàr lum lam deuh a ang a. Preisdent a nih hnûah pawh a thawhpuite a bàn hnem tawhzia ngaihtuah phei chuan a bula thawk nih chu a nuam loin a hahthlák hle ang. Tun ṭum President thlana a tlin tak loh hnûah pawh White House staff eng emaw zât chu a bàn leh tawh a ni àwm e. Trump-a hi pa ti phut phut, ngaih dàn thlák thut thut chi, rilrua lo lang apiang tihpuitlin duh zél mi niin a lang a. Mi ṭhenkhat sawi dàn chuan thuràwn petu ṭha a nei thei lo; a thû a kàwi a ngîla zàwm thei lo chu an láng zêl a. Amah hlauh tlawna ṭantu (sycophants)-ten an hual a; mi ṭha tak a hrawn hlei thei lo an ti.

Tûnah pawh mi ṭhenkhat chuan US President-ah thlan nawn a ni lo chung hian court-ah te kalin hnehna la chang leh ngei tùrah ngaiin thu an theh darh ṭhin a. Hetianga mipui bum zâwnga thu theh darh hi a hrisêl lo hle. Mi pângngai àwm tak takte pawh hetianga thu theh darhtu zîngah hian an tel nghe nghe a ni. Mizoten Trump-a kan ṭan viau avànga hláwkna tùr kan nei lêm lo; kan rilru nawmna satliah mai lo chu!

USA President-te hi an ṭhat leh chhiat tehna siam ṭhin an awm a; mi ṭha na ná ná chu tute pawhin teh sela, an sáng reng mai. US President 16-na Abrahama Lincoln-a kha US President ṭhat leh ṭhat loh tehtu tam ber chu ‘Pakhatnaah’ an dah vek a. President chhe ber chu US Civil War hma chiaha mi George Buchanan a ni.

Tûnah Donald Trump chuan a hun a la hmang zo chiah lo náin US President ṭhat leh ṭhat loh tehtu tam ber chuan ‘President chhe ber’ an ti tawh pang a ni. Eng vànga President chhe ber ti nge an nih? Trump-a US President chhe ber an tih chhan tlángpui chu—(1) Hnam tipumkhat loin a tiphel záwk; (2) Covid-19 hripui léng a hmachhawn dàn a dik lo; (3) Ram dang mi a thliarin a duh lohna a tilang nasa (xenophobic); (4) Chi inthliarna (mi ngo leh mi hàng) kárah a tihluar; (5) A thil tih dàn a ‘extreme’ lutuk ṭhin tihte hi a ni deuh ber. Rice University-a history Professor Douglas Brinley-a chuan, “He will be remembered for leaving the country worse off than he found it,” tiin Trump-a a hmuh dàn a sawi hial a ni. Kum 4 term chu a hmang zo ṭêp ta a; January 20 hma hian eng thil mak tak tak nge a tih leh dáwn tih hi thlìr thiam pawh a harsa a. US-ah ‘Civil War II’ ém chu thlen lo tùrah ngai ila. January 20, 2021 hmáa a thil tih dàn tùr hi i lo thlîr zêl mai phawt teh 

ang u.

Kum 1992-ah khán Aizáwl Central Jail aṭangin mi sual tâng 6 an tlân chhuak a; Sèrchhîp dáiah nu pakhat pawngsualin an that zui a. Khatih láia mipui thinrim dàn kha nasa tak a ni; mi táng tlân chhuak zînga 4 kha a mantuten an sawisa hlum a. Rawpui daia man leh Dãwn khaw bula man erawh chu Lunglei Additional Superintendent of Police, Pu Lalduhzuala huang chhûngah an lût hman hlauh mai a; nunna an chán ve ta lo. Pu Lalduhzuala chuan kum 1993 khân India President chawimawina, President’s Police Medal a dawng a; a dawn chhan pakhat chu a kuta mi sual tlu lûtte nunna a chhan him vàng a ni.

Mizoramah hian mi sual ûm hlum an awm ta zeuh zeuh a; zêp nák emaw, ûm hlumtute zîngah pawh YMA an tel cháwk. Mi sual man tawh hnû sawisak nasat avànga thi tate pawh an awm leh zauh ṭhin. Mipui rilruah hian ‘sualna’ aiin thil ‘tisualtu’ (mi sual) huatna a lian a; dànin an chunga ro a rèl hmáa kut zála ro lo rèlsak mai hi kan châk ṭhin a ni ang. Tûin emaw thil sual lian tak a tih chanchin kan han hriat chuan “vuak hlum nghâl tùr a nih chu”, “a na thei ang berin hrem ni rawh se” tih hi hmeichhe ká aṭangte pawh hian a ri fo mai! Mi sual chunga a na/chhe thei ang bera rorèl chák hian kan tuihãl hlawm a ni ang.

Ram buai laia Tezpur Jail-a kan tàn lái khân tual that, dam chhûng táng tùr an lo tam mai a. Khatih lai kha chuan dam chhûng an táng tak tak lo; jail chhûnga an nungchang azirin kum tin tàn hun paih ṭhensak (remission) an ni ṭhin a, kum 14/15-ahte chuan an chhuak leh mai ṭhin. Jail chhûnga nungchang ṭha deuh phei chu kum 12 vélah pawh an chhuak thei. Tûnah erawh chuan Supreme Court-in dam chhûng táng tùr chu thih hmá loh chuan táng tùr a ni tiin a rél tawh a ni 

àwm e!

Mi sual thi tùra ro rèlsak, khai hlumna dàn (death penalty/ capital punishment)hi British-in India a awp lai 1860-a a siam kha a ni a; khatih lai kha chuan anmahni British-ho ngei pawhin khai hlum an hmang a. United Kingdom-ah chuan khai hlum hnuhnung ber chu kum1964-ah khân a ni. Khai hlumna dàn chu kum 1969-ah tihtàwp a ni ta a; Northern Ireland-ah erawh chuan 1973-ah tihtàwp a ni.

Tûn hnaiah Aizáwl Additional District & Sessions Judge-in mi pakhat chu dam chhûng táng tùrin a rél a; a tuartu lam aṭang chuan a táwk hauh lo ang. Mahse, roréltu khân a rél thiam hle a ni; mihring nunna hi a hlû a; mi sual ber pawh tûnlai khawvélah chuan nunna inláksak ém hi chu inhremna atân a tih chi vak tawh lo. Khawvél ram 142-ah ‘death penalty’ hi tihbo a ni tawh a; ram 53 erawh chuan an la tibo ve lo. Mi sual tihhlum a nih khán kan tân hláwkna a awm tawh chuang lo a; kan thinlunga phuba lák chákna tihpuitlinna satliah mai a ni. Pathian thû chuan, “Phuba rêng rêng keima lák tùr a ni; keiman ka thungrùl ang,” a ti (Heb 10.30).