BIAK IN KAWTA PHOTO BOOTH SIAM!

WhatsApp Group pakhatah Pastor pakhat hian, “Innei tùr an awm a; biak in kawta photo booth siam an rawn dîl a. Engtia tih tùr nge? Eng nge in ngaih dàn? Senior-te khân han sawi teh u,” a rawn ti dêk dêk a! Kei pek chuan, “A chî loh. Biak in kawta a duh duhin thla lákna hmun siam ngawt chi a ni lo. Photo booth-a thla lák kher avàngin an inneihna a ngheh phah chuang lo ang,” ka lo ti nghâl ṭhuai mai a! Hei hi ka ngaih dàn dik tak a ni.

Mi ṭhenkhat chuan, “Hmun tam takah an siam tawh asin,” a la rawn ti tak deuh deuh a. Kei chuan, “Kohhran Upa leh Pastor-ten khap tùr alâwm. Kha leh chen photo booth-a thlâ la loin mi sâng tam tak an lo innei tawh,” ka’n ti leh mai a. Biak in chheh vêla ‘photo booth’ an tih ták mai siam hi Bial KṬP Conference-a an tih chhuah a nih hmèl a; an siam hmâ hian Kohhran Committee leh Pastor-te an râwn em? Anmahni thûa an lo siam thâwr mai a nih phei chuan a tih chî loh lehzual ang. KṬP hian thil eng eng emaw hi biak in leh a chheh vêla tih thar an nei a ni maithei; chutiangah hian annniho pawh an fîmkhur a ngâi hle a ni. KṬP emaw, Kohhran Hmeichhia emaw, Kohhran Pavalâi Páwl emaw rêng rêngin biak in leh a chheh vêlah an duh duhin thil thar an rek ngawt tùr a ni lo.

Biak in tual vêla photo booth siam hi hmân deuh lawk aṭang khân an lo ti ṭan a ni àwm e. Hmân kumah Presbytery kan hmanna biak in pakhatah khân biak in hnuai hall pâwn kil khatah chutiang deuh chu a lo àwm a. Chu lâia kalte chu an ding leh chuih ṭhin a, “Engtizia nge ni?” ti-a ka’n en chian chuan thla an la lek kha lo niin; kei chuan ka la duh ve lo.

A kum leh lawkah chuan Presby­tery thlenna tùra Kohhran Hmeichhia khân ‘photo booth’ an tih siam châkna thlarau an chang chhah phian a ni ang; mi pakhat vèn thàwn deuh erawh chu an nei a ni àwm e, “Chu mi chu a lo kal ve dâwn si a,” tiin an siam ta lo ni àwm tak a ni! Tû emaw mi pakhat vêng thãwnga hlau bîk loin Pathian ṭihna avàng zâwkin siam lo mai se, a làwmawm lehzual ngawt ang. Kohhran inkhâwmpui (Church court inkhâwmpui) ngat phei hi chu kan sawi dàn tlânglâwn tak chu ‘inkhâwmpui urhsùn’ tih a ni a; a ti urhsùn lo thei tùr thil hi chu pumpelh hrãm hrãm a ṭha ang. Chutianga church court inkhâwmpui bîk kan sawi avàng chuan fellowship-hoin an duh duh tih a thiang chuang lo; church court inkhâwmpui zia chu an la kâi ve zâwk tûr a ni ang.

Krismas leh kum thar inbuat­saihnaa biak in leh a chheh vêl an chei hian photo booth vuah chiah si loin biak in kawtah a cheina angrenga ngaih theih, thla han lâkpui atâna ṭha fahran han siam mai an chîng thar a. Hetiang pawh hi biak in cheina rilru âia thla lákpui atân tih rilru pû-a siam a nih chuan a ṭha bîk chuang lo! Biak in hnaih lutukah phei chuan hetiang pawh hi siam loh a ṭha ang. Biak in leh a chheh vêlah hian thla lák hi kan uar lutuk mah mah tih tùr a ni ta. Kan biak Pathian âi hian keimahni hi kan inngâi pawimawhin kan indah lian ta zâwk daih a; thla hi kan la ta sup sup mai a ni ber àwm e!

Biak ina inkhâwm hi in lama kan inbuatsaihna aṭangin kan rilrûah Pathian hi lian ber sela; biak ina eng emaw thil dang tih kha enghelh berah neih loh tùr a ni. Tûn hmâ deuh khân Synod Inkhâwmpuia inkhâwm urhsùn neih lâia lâm lâi thla lák sup sup an chîng a. Ram pâwn lam aṭanga lo kal, Sâp leh Vái mikhualte khân ding chung meuhin zài lâia lâm lâi thla an la ṭhin a; anni tân kha chuan ‘ennawm mak tak’ pawh a ni mahná! Khatiang pawh kha a ṭha vak chuang lo. Sâp-in an la tih avànga Sâp ni ve loin lák ve kher a ṭûl ber lo!

Vawi khat chu Synod-ah pawha nih theih zawng zawng deuh thâw ni tawh khân thlalâkna pan tê kha a kawrchung iptê aṭangin a rawn phawrh a; lâm lâi thla chu a la ve ta mai a! A pianpui zia leh nihna leh duh tui ṭhinna nèn khân inhmeh lo tak a ni. Chumi hnû zêlah erawh chuan ka mimei zui deuh ṭhin ná a, biak in chhûnga thla a lâk leh ka hre tawh lo; a sim ta ni hmiang ka ti mai! Pastoral Ministry Kaihhruaina fel tak kan neih ták avàng hian a insûm tawh a ni mahná!

Pastoral Ministry Kaihhruaina (2016)-ah hian Biak in leh a chheh vêl humhalh leh vawn thianghlim dàn tùr thu tam tak a chuang a. Hei hi tûte tân pawhin zawm hrãm hrãm a ṭha ber; duhsak leh thlei bîk nei loa inkhài rualna tùr a ni e. Pastor leh Kohhran Upate pawhin hemi pèla thil thar tih chìn loh tùr a ni ang. Tûte emaw huaisen fâl leh inti dangdãi fãl deuh emaw an awm palh hlauh chuan entawna tih zui ve mai chákna thlarau chang táwk an awm vat ṭhin a; chutiang lakah pawh chuan invèn tlat tùr a ni!

Hmân kuma biak in maichàm vêla fa lem hrin an intih hmuh lâi pawh khân Aizâwl West lam vêng pakhat aṭangin Ramhlun Bial Pastor hnênah nau lem hring thiamte kha an lo chho a. Pastor hnênah chuan maichàma an nau lem pài der hrin lem lem kha tih an dîl a ni àwm e; Pastor khân khatiang thlarau lam thila inkhual telemna, nau lem hrin kha a lo phal lo a ni ta àwm e. Pastorin biak in leh a chheh vêl vawn thianghlim a duhna kha a fakawm khawp mai. Pastor leh Kohhran Upa ṭhenkhat hi chuan mipui hi an khêl ta ṭhin a; tláktlum loh an hlau ni maw? Mipui lakah ni loin Pathian laka tláktlum loh hi hlauh ber tùr a ni záwk! Mipui khelh chîng Pastor leh Kohhran Upa nih loh tùr.

Nau lem hrin uar vànglâi khân uar zualna deuh vêng pakhatah Pathianni vawi khat chu Sunday School aṭangin zàn thlenga min rawih avàngin ka zuk inkhâwm ve a. Kha kohhrana Pastor pension awm ve khân an ina ka chawlh lawk láiin, “Nau rawn hring duh táwk an awm maithei a nia,” a ti zauh a! Mahse ka inkhâwm ni kher kha chuan an awm ta lo hlauh! A chhan ka hre lo; khami ni khân nau lem hrin tùr an pãi lo palh ni maw? Nge, kei hi ka rãu ve vak lo a, ka hû kha an nau lem khân a ngam lo a, a rawn chhuak thei lo zâwk ni maw?

Inneihna chungchângah bawk kîr leh ila. Inneih inkhâwm hi kohhran inkhâwm urhsùn zînga mi a ni a. Inneihna tak tih hmâ khân thu hma hruai sei tâwk tak ziah a ni a; innei tùrte lo luh dàn tùr thlengin chiang taka ziah a ni. Kha thil kan ngaihtuah lâi khân Synod Moderator fanu kha a hmâ lawka pasal nei, a pâin biak ina a hruai luh kha a lo ni a. Ani chuan, “Anmahni chauha luh chu an tân a zahthlák ve bawk ang,” a rawn ti zauh a. Kei pek lah chuan, “Pasal nei ngam chin chu an zak lo ang; anmahni chauhin an lo lût dâwn hlei nêm, an ṭhiante nèn alâwm an lo lûh dâwn,” ka lo ti hmanhmawh a; an chhûngtena mo hruai luh kha tih loh a ni ta!

Pangpâr khàwi dàn tùr thlengin chiang taka ziah a ni. Vawi khat chu Aizâwl hmàr lama innei tùr kha mi awm thei deuh chhûngkua an lo ni bawk a; mo nû khân biak ina pangpâr khàwi a duh dàn kha Kohhran Committee-in an phalsak lo a ni àwm e; chu nu chuan a ti tau ta a, a fanu pasal neihna inkhâwmah pawh chuan a tel ta lo ni àwm tak a ni. Chutiang chuan mi awm thei deuh leh hû ngah deuhten an duh duha thil tih an tum mai chuan a fel lo hle thei dâwn a ni. Thawhlàwm thawh hnem deuh an niha, an ṭawng chhan dâwn a nih phei chuan Kohhran Committee-in ngaihtuah a, “In thawhlàwm thawh zawng kha kan pe lêt leh ang che u,” tih mai a chákawm thei àwm e!

Thlalák chungchângah pawh biak in chhûngah chuan thla latu bîk pahnih khat neih a táwk tih thlengin ziah a ni a. Thla latu eng emaw zât vei sup sup hi tih chi a ni lo; inneih inkhâwm urhsùnna leh pawimawhna a ti nêp vek zâwk a ni. Biak in chhûng aṭanga chhuah hnûah mipui tam zâwk ṭin tawh hnûin innei ṭhenkhat chu biak in chhûnga lût lehin ing-euh deuh deuha thla lák leh an lo chîng a. Pulpit leh maichàm bul hnãiah inkeih thuak thuak titiha thla la tâwkte pawh an lo awm ták hial avàngin biak in aṭanga chhuah tawh hnûa thla la tùra a chhûnga luh leh phal a ni lo. An duh leh an khum pindanah inkeih tak tak chung pawhin la ang hmiang! Biak in chhûnga tih àwm leh àwm lo hi thliar hran thiam a ṭûl!

Biak in hawng leh hawng lo inneih danglamna chu biak in kawta thla an lákin biak in hawnga innei an nih chuan biak in kawngkapui a inhawng ṭhin. Biak in hawng loa inneiten biak in kawta thla an lákin biak in kawngkhàr an hawng chawp tùr a ni lo. Sihphîr Upa pakhat phei chuan biak in kawta thlalák pawh a phal lo a; a ûm darh ṭhin a tia lâwm Upa Lalnuntluanga, ATC archivist pension ta khân! Chû êm êm zawng keini chuan kan ti ve lâw!

Inkaihhruaina fel tak kan neih tawh hi zawm hrâm hrâm tùr a ni a; biak in leh a chheh vêl hi kan nawm kan máka kan hman bawrh bawrh tùr a ni lo. Hmân kumah khân Aizâwl chhim lama biak in hlun tak pakhatah KṬP-in Synod Zaipâwl tân emaw ni, biak in choka-ah ui sâ an siamsak tih thãwm a awm a; Vànglaini-ah hian ka ziah ták nghe nghe kha. Khata an KṬP hruaitu pakhat khân, “Khawi aṭanga i hriat nge?” tiin ka ngaih dàna aw phàwi hriat nuam vak lo hian min rawn zâwt a. Kei chuan, “Ka hriatna hi in hriat kher a ṭûl lo. Tûn hnûah khatiang ui sâ kha biak in choka-ah siam tawh lo ula a ni mai,” tiin ka lo chhâng ta khawl a nih kha. Ka thil hriat kha a dik a ni ngei ang; an Kohhran Upate thlengin ka dem deuh a ni!

Inneihna hmun sawi dàn chi hnih kan nei, “Biak in hawng leh biak in hawng lo,” kan ti. ‘Biak in hawng lo’ kan tih hian duh duhna hmunah a inneih theih ta tihna a ni chuang miah lo. Biak in hawng loa inneihna hmun tùr chu ‘Biak in vestry, Kohhran hall, Pastor Quarters leh Kohhran Upa in’ a ni tùr a ni a; hemi bâk sah ṭeh chu a ṭha lo ang! Kohhran in ni ngei rawh se.

Tûnlâi hian mi ṭhenkhatin khawi lâi park emaw, picnic spot emaw-a inneih an duh a ni àwm e; chutiang chu Pastor leh Kohhran Committee-in phalsak ngawt tùr a ni lo. Inneih phalna hi Kohhran Committee-ah innei tùrten dîl hmasak tùr a nih kha; an dilna ngaihtuah lâiin khawiah nge an inneih dâwn tih chu Kohhran Committee chuan a ngaihtuah fel nghâl tùr a ni ang . Thâwk-a-phita duh duhna hmuna inneih tum ngawt chî a ni lo; an inneih zawhah an duhna hmun takah chuan ni hnih ni thum pawh innei lem nawn zâwk rawh se. Tûnlâi chuan inneih tûk leh vêlah hian khawi lái lái hmun emaw ni-ah an innei lem leh cháwk ta hlawm a nih hi! An inneihna khân ngheh phah sawt tak ang maw? Lem channa khawvêlah kan chêng a ni ta ber mai!