SYNOD RESOURCE CENTRE A KAL TLUANG ṬAN

Synod Resource Centre (SRC) chungchâng hi nikumah khân ṭum hnih ka ziak tawh a; tûnah hian ka’n thual nawn leh dâwn a ni. A lo inṭan dàn kha sawi nawn leh thuak ila. Kum 2018-ah khân Lunglei East Presbytery aṭangin Synod Inkhâwmpuiah agenda pakhat a lo lût a, “All India Services & Central Services-a Mizo tlin tam theih dàn tùr Synod-in kawng zawng rawh se,” tih a ni (2018 Synod Gen.16).

Synod Executive Committee (SEC) chuan a bawh zui ta a. Kum2020 kum bul aṭanga Covid-19 hripui lêngin hma lákna kawngah nasa takin min ti ṭhuanawp a. A kal hmang tùr duang tùrin SEC chuan mi tlêm tê a ruat a; an ruahmanna chu SEC-in a pawm hnûah Synod Officers Meeting-in Zirlái Viltu Committee (ZVC) member tùr a rawt chu SEC-in a pawm leh a (SEC 281:21). Hripui lêng kârah ZVC pawhin hna a thawk chak thei lo. Chuti chung chuan Synod Resource Centre chu SEC phalnain Sikulpuiah hawn a ni ta a.

Synod Resource Centre-a in-register tùr hian Gradu- ate chin chauh ni loin High School-a zirlái aṭangin member tùrte zawn an ni a. Tûnah hian Synod Resoure Centre-a mem- ber awm zât chu hetiang hi a ni:

Member zawng zawng: 76

Mipa: 36

Hmeichhia: 40

AMC huam chhûnga mi: 45

AMC pàwn lam mi: 31

Graduate chin: 53

College kal lâi: 09

Class XII chin: 14

Zirlai Viltu Committee chuan Civil Services exam tumte tân lehkhabu pali a siam tawh a; chûngte chu:–

(1) All India Services & Central Services Group A&B- a inhlan kài tumte LUHKÂ

(2) Civil Services (Main) Examination Syllabus Bû (Book Series 1)

(3) Indian Forest Service Examination Syllabus Bû (Book Series 2)

(4) Other Active Examinations under UPSC Syllabus Bû (Book Series 3)

Hêng lehkhabute hi Synod Resource Centre-ah leh Synod Bookroom-ah lei theih a ni.

Zirlai Viltu Commitee chuan Mizo ṭhaláite hi All India Services & Central Services-ah chauh ni loin Central Secre- tariat Services-a hna hniam deuh zâwk anga lang, pawimawh tak sî-ahte khuan a tam thei ang ber lût se a duh a. Anni chu Section Officer aṭanga ṭanin Joint Secretary leh Director thlengin Central Secretariat-ah an kái sâng thei a. An fate zirnaṭhaah an zirtîr thei a; an faten All India Services & Central Services exam chu awlsam zâwkin an tling thei ta ṭhin a ni. Manipur-a mite zîngah chutiang chu tam tak an awm tawh a; Mizote pawh hi kan harh chhuah ve a hun tak zet a ni.

Zirlái Viltu Committee chuan Synod Resoure Centre- a dah tùrin Prelims Exam atâna lehkhabu pawimawh chauh ni loin Main Exam-a General Studies Paper I-IV atâna lehkhabu pawimawh leh ṭha elkhèn eng emaw zát a chah chhuak tawh a. Hetiang tluka lehkhabu ṭha hi Mizoram hmun dangah a la awm rih lo ang. Hêng bákah hian Delhi-a Dristhi IAS Coach- ing Centre buatsaih ‘study materials’ thar pawimawh eng emaw

zât chu chah tùrin a buaipui mêk bawk a; rei lo têah a lo thleng thuai ang. Chu chauh pawh chu a la ni lo ta cheu! Mizo zînga Civil Services Examination beih tumten Optional Paper-a an thlan duh tùr chi subject 9 pawh a thliar fel tawh a. Hêng subject 9 atâna lehkhabu ṭha ber berte chu rei lo têah a chah thleng leh mai ang; subject 9 báka thlan duh dang nei an awm pawhin chûng lehkhabute chu ngaihtuah zêl a ni ang.

Mizoram Synod-in Synod Resoure Centre a dinah hian Mizoram ram chhûnga chêng nghet, Mizo hnahthlák tawh phawt chu, kohhran pâwl eng mah inthliarna awm loin, CSE- a tlin tum tak takte chu a ṭanpui duh vek a. Tûnah chuan Graduate chin tân chuan member hi a khat tawhah kan ngâi a; graduate hnuai lam, a bîkin High School leh College kal laite tân member nih dil theih a la ni.

SRC member-te hi ID siamsak vek an ni a; ID neite chauh SRC-a luh phal a ni. SRC hi September–February chhûngin Thawhṭanni–Inrinni-ah, zîng dâr 10:30 aṭangin tlai dâr 5 thleng hawn a ni ang a. March–August-ah erawh chuan dâr 10:30 (AM) aṭangin tlâi lam dâr 6 thleng hawn a ni ang. Synod office chawlh nî-ah erawh chuan khàr ve a ni ang a; thla tina Inrinni hmasa ber chu chawlh a ni bawk ang.

SRC-a member-te hi Group 3-ah ṭhen an ni a. Group C chu a tam ber, Graduate chin an ni. Anniho chuan ni tin chawhma dâr 10:30 AM–2:30 PM chhûngin SRC an hmang thei ang a. Group dang pahnih-te chuan September–February chhûngin chawhnu dâr 2:30–5:00 PM thleng an hmang thei ang a; March-August-ah chuan chawhnu dâr 2:30–6 PM thleng an hmang thei ang. Zirláiten an school/college bàn huna an hman theih tùra ruahman a ni.

Synod Resource Centre-ah hian photo-copier dah a ni a; member-ten lehkhabu an chhiar aṭanga an duh lâi chu man châwiin Office Assistant an xerox-tîr thei ang. Lehkhabute erawh hi chu lák chhuah phal a ni lo.

Group C tân hian 26.2.2022 chawhma dâr 11-ah khân Sikulpui Hall-ah kawng inkawhhmuhna hun (briefing session) neih a ni a; Rev. Dr. K. Lallàwmzuala (Executive Secretary i/c ZVC)-in a kaihhruai a. ZVC Secretary Pi Zirkûngi Chhakchhuak (Principal Synod Higher Secondary School)-in ZVC7SRC chungchánga thil lo tih tawh dàn a sawi a. Pu R.L.Rinawma (IRS Rtd) chuan ZVC lehkhabu buatsaih tawhte kal hmang a sawi fiah bákah member-te tâna thil hriat tùr pawimawh tam tak a sawi a. Pu C.Lalsâwta (IRS Rtd) chuan member-te zawhna a chhâng bawk a. Group C member-te pawhin an hlâwkpui hle tùrah kan ngâi. Group S&R tân 25.3.2022-ah kawng inkawhhmuhna hun hi hman ve leh a ni ang.

Synod Resource Centre hi Office Assistant fel takin a nghah reng bákah hian Sikulpui Headmaster Upa Zonunmâwia (ZVCMember) hi biak ràwn mai theih a ni bawk a. ZVC chuan SRC-a member lo kalte puih an ngaihna apianga pui tùrin, an remchàn hun apianga SRC-a ṭhu tùr an inruat bawk a; chûngte chu: (1) Pu C.Lalsâwta (IAS Rtd, Chairman Mizoram Lokayukta); (2) Pu R.L.Rinawma (IRS Rtd); (3) Pu Benjamina (ID&AS Rtd); (4) Revd Chuauṭhuama te an ni. Anniho SRC- a an ṭhut theih ni tùr chu Zirlái Viltu Committee Secretary-in member WhatsApp Group-ah a târ chhuak ṭhin ang.

ZVC member Pu Benjamina chu March 3 khân SRC- ah hian a ṭhu tawh nghe nghe a; IAS tharlâm tak A. Srivastava (IAS-2018) chu SRC member-te hnêna thu sawi tùrin a sâwm a. SRC member-te pawhin an hlâwkpui hle tùrah kan ngái. Zirlái Viltu Committee chuan online campaign pawh a buatsaihṭhin ang a; ZVC member chauh ni lo, mi dang chinchâng hre tak takte pawh rawih an ni ang. Youtube pawh hman ṭangkai tum a ni a; mock test pawh buatsaih ṭhin a ni ang a, a remchan dàn angin Delhi lama mi thiamte pawh sàwm ṭhin an ni ang.

Kan hriat tùr pawimawh tak chu SRC hi Coaching Centre a ni lo tih hi a ni. Zirlái Viltu Committee hi chuan All India Services & Central Services-a tlin tum tak takte chu tih tak zeta puih a tum a; chumi atâna buatsaihna hmun ‘Resource Centre’ nih hi a tum ber a ni. All India Services-a lût tum tak takte chu High School aṭanga inbuatsaih a pawimawh a; chutiang tùr chuan Mizorama zirna pawh hi sawrkarin a siam ṭhat a ṭûl bawk ang.

Tûna Synod Resource Centre awmna Sikulpuia pindan pakhat hi a táwk mai hauh lo a; tûnah rih erawh chuan kan hmun neih theih awm chhun a ni. Nakin deuhah chuan Synod Office bul lamah pindan zâu deuh záwk pawh a la awm thei mahná. Mizoram Christian College (MCC) hi a hmun tùr dik tak Tanhril rama a awm hunah phei chuan Synod Resource Centre hi MCC pêng pakhat la ni tùrah ngâi ila. Chutih hunah chuan Synod Resource Centre hi All India Services & Cen- tral Services chherna PÛM pawimawh tak a la ni thei ang tih hi beiseina nung neiin kan thlîr láwk a ni.

Synod Resource Centre website tlawh duh tân:– http://synodresourcecentre.com hawn a ni tawh bawk a; SRC- a thu thawn duh tân email–synodresourcecentre@gmail.com a ni.