ISUA KRISTA vs BJP PATHIAN

Tûn ṭum MLA thlan lo awm tûr atân hun tlêm tê chauh kan nei ta. Party tin an campaign ngawrh êm êm a. Congress leh BJP phei chuan campaign-pui tûrin lam hla tak ata kaichhan sâwmin vai paho an chah chhuak a; ṭhenkhatte phei chu chah ngai loa rawn âr kawh chhuah ve ringawtte pawh an ni mahna! Kâr leh Nilaini-ah chuan i duh duh i vote thei; mahse i vote khân ram leh hnam hnuk a khawih tih hria la. A bîk takin i sakhua a khawih thûk lehzual ang. Tu lakah nge i rinawm? Pathian leh kohhranah nge, i duh apiang i vote tûr politicial party-ah tih erawh chu i kut i hman hmain ngaihtuah chiang ang che. Pathian laka i thihna tûr i vote palh hlauh ang e!

‘DEVELOPMENT’ hi BJP àu hla lian ber pakhat a ni. A dik khawp mai. Mizoram hian development kan mamawh tak meuh. Tûn kum 2 chhûng leka kan kawngpui dung chhiatzia kan ngaihtuah phei chuan kum 10 ve ve sawrkarna lo chelh tawh party pahnihte hi thiam chantîr an harsa tak zet a ni. An dik lo a, an thiam lo bawk. Anmahniho erawh chu an in-develop nasa hle thung. Inthlan leh inthlan inkâra an neih sum leh pai neih pun nasatzia ngaihtuahin ‘lian tual tual’ an ni ringawt; pheichham an man kan hre bîk lo; mahse ‘ṭha sâwta’ tih ngam vek khawpin an ṭha sawt si.

Ram hruaituten an zir chuan hmasâwnna khawp hi chu sum a awm thei zêl a; a bîk takin Chief Minister-in a zir a ngai zual. Central-ah eng party pawh sawrkar se States chan tûr hi hrêk ngawt theih a ni lo; hai chhuah thiam leh thiam lohah a innghat thui hle zâwk. State revenue nei tam lutuk lo mah se, Central aṭanga hai chhuak thiam leh hmang thiam tân chuan hmasâwnna khawp hi chu sum a awm hrim hrim. DONER leh NEC hnuaiah state hrang hrang chan tûr ruahman ṭhin a ni bawk. Sawrkar lu ber Chief Minister-in a zir phawt chuan sum hmuhna tûr chu a tam hle. State sawrkara sum hmangtuten an thiam loha mahni inhai vûr nân ringawta an hman chuan Central aṭangin belte phai thei lo sum dawng ṭhin mah se, Mizoram hian hma a sâwn tak tak chuang lo ang. Chuvàngin Central sawrkar chelhtu party zawm kher hi thil ṭha ber leh ṭûl ber a ni lo.

Chu bákah tûna Central-a sawrkarna chelhtu party phei chu India ram hi Hindu ram bil HINDUTWA-a chantîr tum tlat party a ni a; Mizoram tân hian inthlun zawm ngamna chi a ni lo bur. Mizo Kristianten BJP hi chu kan malmák ngam tûr a ni; chutianga BJP kan hnãwl ngam loh chuan kan inchhîrin bân a chen thuai ang a, kan ṭahna khua a sei thlàwn mai a ni ang. BJP member-te pawh hi an tân khua a tlai hma hian harh chhuak hrâm teh sela âw. A hriain kan sawi a, kan ziak a, zawm ve mai tawh tûr a ni. India ram hmun dang chu sawi loh, North East States-a an chêt dàn kan hria; sawrkar siam tûr chuan eng hmanrua pawh an hmang hreh lo. Mi ṭhenkhatin Mizo zîngah MLA lei theih an awm dâwn em ni an tih hi chu BJP chêt duh dàn tûr an hriat chian loh vàng a ni.

Tûn ṭum inthlanah hian party mal khaia chak bîk tak a awm loh chuan MLA Bazarpui a inhawng ngei ang a, State dangah pawh thil thleng ṭhin, MLA thuhrûk (kidnap) tih angreng thlengin kan ramah hian a thleng lo ang tih a sawi theih loh. Politics-a lal châkna hi a na êm mai a; chumi rual chuan sum lama ṭàmna hi a na lehzual a. State danga an tih ang bawkin BJP hian chêng vaibêlchhe eng emaw zâtin MLA pakhat hi an lei hreh miah lo ang. Tûnah pawh hian an chetla hi en chiang teh, tûn hmaa an neih ngai loh eng engte nge an neih tawh tih chu kâr loah a lo lang chhuak vat ang. Mizote chu mahni thil neih thup thiam lo kan nih hi. ‘Next Christmas with BJP Government’ tih hmachhuana ṭan an lâk tak tak chuan sum thlîra politics khèlho chu an tlu duai duai ngei ang.

Chuvàngin tûn ṭum MLA thlan hi a pawimawh tak zet a; kan thlan tlinte azirin kan ram dinhmun chauh ni loin Mizoram - Kristian State tih ang hiala thang chhuak tawh hi a danglam dâwrh ang a. Gospel Centenary lawm laia ram dang mikhualten ‘kum 50 hnûah eng nge in an ang?’ an tih kha kum 25-na lekah hian Hindu pathian beho hnuaiah kan kûn mai dâwn em tih hi inbih chian a ngai. BJP party hnuaiah lo pawh kan ram hruaituten an chal min hnawih sensan tawh a, kan phun luai luai a ni lâwm ni kha? BJP hian min zuam sual ang nge sual lo ang tih chu vote i thlákna azirin a lo lang chhuak thuai dâwn. Christmas lo thleng tûr hi Krista nèn nge i hman dâwn Pathian tak tling zo lo, BJP pathian suak nên tih chu i kuta innghat a ni e. BJP pathian suak nêna development neih ai chuan Krista nèna retheih rih deuh pawh a thlan nahawm zâwk. Ani chuan retheihna khur thk ber daia kraws-a thiin min chhandam a nih kha.

Tu nge Mizoram CM ah i duh ber? Chief Minister hi an lo pawimawh ber mai. Mizoram tidanglam thei tûra beiseina i nghah ngamna chu tu nge ni? Kum 2005-a Nitish Kumar-a Bihar Chief Minister a lo nih khân term khat ral hmain Bihar State hmêl a tidanglam hman asin. Mizoramah pawh Chief Minister ṭha nei ila chuan term khat ral hmain Mizoram hmêl a danglam hman ve ngei ang. Chutiang thlen thei tûr chuan tu nge i rin ber? Chu mi ngei awmna party candidate chu vote mai teh.