ENG TIN NGE NI ZEL ANG LE?

Inthlan kan zo ta; result puan a nih hma chuan sawrkarna chan inringin party liante chu an awm reng rih dâwn a. Inthlan chu buaina awm loin zawh a ni ta; Mizoram CEO Ashish Kundra tân chuan thâwk huaina tham a ni. A thusawi pawh a làwmawm e, “Mizoram, the most democratically organised society. A lot to be learnt by the rest of the country from Mizoram,” a ti. CEO a nih hma Mizo hnam chhan hnatlâng boruakin a nghawng chhuah avànga CEO-a dah kha a ni a; a kaihhruaina hnuaiah inthlanna muanawm tak a awm kha a tân chuan a làwmawm lehzual ang. Inthlan a zo ta bawk a; sawrkar hian Ashish Kundra hi a hna ngaiah dah lêt leh ta zâwk sela, Mizoram Higher & Technical Education-in hma a sâwn phah ang. Ashish Kundra, i thawk ṭha e; thlamuang tak leh ṭhahnemngai takin thawk zêl ang che.

Jt NGOs phût anga Tuikuk-in Tripura-a vote thlák loa Mizoram chhûng Kânhmun-a vote an rawn thlák ta kha thil chhinchhiah tlák tak a ni bawk; Mizote ṭanrualna rah a ni. Tûn hmain ECI-in ṭan an khawh tlat ṭhin kha a ni a. Khati taka tamin Mizorama vote thlák an rawn duh a nih chuan lo hâw hlen lâw lâw tawh sela; tûn hnûah Tripura-a an awm zui zêl a inhmeh tawh lo. Mizorama vote thlák duh chin zawng chu lo hâw hlen sela; a duh lo zawng chu Tripura-in nei hlen rawh se. Mizoram chu an tân a râlmuang a ni tih an rawn hmu; chuti chunga lo hâw duh lote chu ngaihsak zui zêl chi an ni lo.

Tûnah chuan inthlan results a la chhuak lo bawk a, inrinsiakin kan khat rih dâwn chu a ni a. Inthlan kha kâr hnih khat emaw thla khat emaw-in tlai ta sela chuan Congress leh MNF party pahnih chance chu a chhe lehzual sauhin a rinawm. Ṭhalaite hian hêng party pahnihah hian beiseina an nei sâng lo hle tih a lang chiang tawlh tawlh. Congress-in HSLC pass apiang laptop pêk an tum phei hi chu a tiha tih ngeih loh chi a ni. Laptop hi a ṭangkai khawp mai; inthlana vote zawn nân erawh chuan hman a ṭha ber lo. States danga laptop leh sari sem an lo intiam ang deuha tih ve ni àwm taka ṭhalai vote zawn nâna tih a ni a. Laptop ai chuan zirna ṭha pêk an mamawh zâwk; Mizoram hian zirna ṭha, ṭawngka chauha ‘world class education’ ni lo, a taka khawvêl hriat thama zirna ṭha kan mamawh a ni.

High School pass chin laptop pêk tum chungchângah WhatsApp-ah chuan, ‘Ka ṭhianpa mittui a tla’ tih thu hetiang hian an rawn târ lang a, “Ka ṭhianpa thil min hrilh hian ka ngaihtuahna a ti thui khawp mai. Ka ṭhianpa hi sawrkar High School-ah zirtîrtu a ni a. A class lák laiin naupang tihphûr pahin a fuih a, ‘Matric ṭha taka in pass chuan sawrkarin Laltop ṭha deuh a pe dâwn che u a, ṭang nasa rawh u. Kan hun lai chuan laptop chu sawi loh, calculator takngial pawh kan nei pha lo,’ a ti a. A student pakhat chuan, ‘Sir, laptop ai chuan sawrkar hian school building ṭha zâwk leh study material ṭha zâwk hi min ngaihtuahsak se a pawimawh daih zâwk, kan thiamna an duh vàng pawh niin a lang lo,’ a ti a.”

“Mi dang pawh an ngaih dàn sawina hun a hawnsak ta a. Pakhat chuan, ‘Sir, laptop ai chuan exam laia electric awm ṭhate hi a pawimawh daih zâwk, kan nu leh pate vote an duh vàng mai maiin min tiam niin ka hria,’ a ti a. Mi dang pawhin an sawi tliar tliar hnu chuan pakhat chuan, ‘Sawrkar hian zû hi zuar ta lo se, pa ka la nei ang a; ka pa thlazàr hnuaiah ka nih tum officer pawh hi ka nih theih ka ring. Mahse, tûnah chuan ka nu thawh chhuah ringawt chuan ka zir sàn theih pawh ka ring lo; zirna sènso a hautak si a,’ a ti chhuak phawng mai a. Ka ṭhianpa chu a hnuk a ulh a, a mualpho hmain toilet-ah a tlân lût ta hial a ni.” tiin. Laptop pêk tiam hi vote zawnna a ni chiang khawp mai.

Kum 10 ve ve lo sawrkar tawh MNF leh Congress chuan an thil tih dik tâwk lohah ngaihdam an dîl a; anni pahnihah hian a tu zâwk emaw lo sawrkar leh teh zèn a nih pawhin a hnua ngaihdam dìl ngai tawh lo tûrin hna ṭha thawk tawh rawh se. Anni pahnih ngaihdam dìl thu ka lo hriat khân High School-a ka thawh laia kan zirlai pakhat ka hre chhuak zawk; chu zirlai chuan thil a tisual zing khawp mai a, ngaihdam erawh a dîl hreh miah lo. A thil tihsual han man ila, “Sir, min ngaidam rawh,” a ti zung zung a; ngaidam mah ila, a hnu lawkah a tisual leh ṭhin. Chutiang deuh chu hêng party pahnih ngaihdam dîlte hi an ni palh ang tih a hlauhawm deuh roh. MNF chu zu zuar lo tûrin an intiam chiang ngam nghâl a; Congress lahin‘se bo hnûa se kawng khàr ang’ tih ang maiin, “Kohhran kan râwn tawh ang,” an han ti hnuhnawh a. An sawrkar leh hlauh a nih chuan zu zawrh hi titâwp nghâl rawh se.

Zû hi kan ṭhatpui lo. A hlâwkpui awm chhun chu a la lûttu - ware-house neitu chhûngkaw pahnih, a zuartute leh nawhchizuarte chiah an ni tih a zir chiangtuten an hmuh chhuah tawh kha. ‘Hmeithai siamna khâwl’ a ni; hmeithai an tam sâwt êm êm a; school-ah fahrah an tam phah êm êm tawh bawk. Chûng fahrahte chu a bîk deuha enkawlte pawh an ngai deuh a ni ang; zirtîrtute pawh an mangang ṭan deuh tawh a ni. Mizorama kohhran lian ber Presbyterian Kohhran chuan inkhâwmpui lian Synod a hmang ṭan mêk a; kâr leh Inrinni-ah chuan Statistician-in kohhran statistics a rawn pharh ang a; chutah chuan mitthi tamzia a lo lang chiang hle ang. Mitthi-ah pawh hmeichhia aiin mipa an tam ngial ang. October thlaa Presbytery inkhâwmpuiah khân Pastor Bial pakhatah chuan mitthi 34 awm thu report a ni a; mipa 29, hmeichhia 5 a ni. Mipa leh hmeichhia thi zât chu inthlau tak a ni. Mitthi tam zâwk fê thih chhan phènah hian ‘ZU’ a awm zêl. Hei hi phat thu a chêng lo ve. Heti khawpa tlân paha chhiar pawha fiah a nih tawh laia zû la zawrh zui zêl hi a dik lo.

Mualphothlâk khawpa kan hrisèl lohzia tichiangtu chu Aizâwl Bawrhsap Dr A. Muthamma (District Election Officer) thusawi hi a ni. Inthlanna duty tûr sawrkar hnathawk mi 400 zet an koh khâwm zîngah hrisèl loh avànga pha an tam hle a ni ang, hetiang hian Dr A. Muthamma chuan a sawi a, “Election duty tûrin sawrkar hnathawk 400 vêl kan ko a, mahse kan koh zînga mipa tam tak chuan ZU leh ruihhlo kaihhnawih natna hrang hrang (thin ṭha lo, kal nâ, cancer) vàngin an phâ a. A ṭhen chuan, ‘Ka ding rei thei lo, ka chak lo,’ an ti a; an chhuanlam hi a genuine si a, kan tilui thei lo. Productive rual lek sawrkar hnathawk heti tak maia ruihhloin min tibuai hi ngaihtuah chian a va ngai êm!” a ti. Kan va mualpho deuh ve; sawrkar pawhin a hnathawkte hi bih chiang deuh teh se.

Eng party pawh sawrkar se mipui mangang âu thãwm an hriat hi tihreh dàn kawng zawng vat rawh se. Anmahniin finna an tlachham a nih pawhin mi fing zawng chhuak sela. Sawrkarna chelhtuin an zir chuan kum 5 chhûngin Mizoram hmêl danglam dâwrh khawpin hna a thawh hman ngei ngei ang. Mizo mipuite hian hmasâwn kan phû; hruaitu chak táwk loh avànga hmasâwnna lama ṭhuanawp reng mai nih hi kan ning tawh. Brig. T. Sailo-in a sawi ṭhin, tûna ZPM-in tihpuitlin an tiam ‘Six Basic Needs” hi eng sawrkar pawhin ngai pawimawh tawh rawh se. Brig. T. Sailo sawi a ni emaw ni lo emaw hêng thilte hi khawi ramah pawh mipui mamawh hmasak a ni hrim hrim.

Eng party mah hi sawrkar siam tûr khawpa an chak táwk lo palh hlauh a nih chuan ‘coalition government’ siam a ngai ang; chutah chuan party hranna boruak chu sîrah hnâwlin lungrual takin thawk thei sela; chutianga tih chu ram leh hnam hmangaihna dik tak a ni ang. BJP hi Chakma zîngah lo tling an awm a nih pawhin eng party mah hian thawhpui lo tawp sela, king-maker-ah ṭantir loh hrim hrim a ṭha. Amit Shah ṭawngkam, “Krismas chu BJP nèn” tih hi Mizote hian dâwtah kan chantîr ngei ngei tûr a ni. Hemi kawngah hian ZPM chuan an hotupa ngeiin inthlan ni-a an interview-ah khân a sawi chiang a, “Keini chuan eng ang pawhin BJP kan thawhpui lo ang,” a tih kha.

MNF leh Congress hi chu rin leh duap an kai deuh; an thil tih tawh dàn enin CADC-ah BJP thawhpui tûrin, “Vànchungnula kan rîm dâwn e, tu kan ṭha ber maw?” tiin an lo intlar ve ve tawh tlat. MNF hotupa hian NEDA zawm leh zawm loh chungchângah chiang takin eng mah a sawi ngai lo a; Congress hoptupa lahin CADC-a an thawh ho tirh khân “Hindu BJP ai chuan Buddhist BJP an hlauhawm lo” a ti mai mai si. Rin ngam an har dûn khawp mai. Mizoram hian BJP hi chu malmák hmak ngam ila, a ṭha ber. Vànglaini (28.11.2018)-a Rev. Dr Ramêngliana (General Secretary, NEICC) thu ziah, “Kan la chiang thei lo maw?” tih kha Mizo mipui lung fing chin hi chuan chhiar vek ila, chuti chung pawha BJP chungchânga la harh chhuak thei lo an la nih fo chuan bo hlen tûra khuanu ruat an nih mahná.

Mizorama inthlan boruak muanawm tak kan neih theih chhan ber chu MPF vàng a ni. MPF din tirh khân Baptist Church of Mizoram (BCM) hotupa Rev. Dr K. Thanzauva kha a phûr viau a; mahse BCM chu MPF-ah a tel ve ta lo. Chhimtuipui district-ah chuan MPF hi ṭha takin a ding ve a; inthlan boruak muanawm tak an neih theih phah. Mizorama kohhran lian ber dawttu BCM pawh hi MPF-ah hian tel ve sela, kohhran dang la tel ve lote pawh hi tel hlawm sela, tûn aiin MPF hnathawh hi a kai rual ṭha lehzual ang. Tûnlai kohhran inpumkhatna boruak len lai leh inkhâwmpui nikhuaah pawha inpalai tawn nih tawh hnu hi chuan BCM hi MPF pâwna awm reng loin rawn luhchilh lâw lâw sela. India ram states dang tân entawn tlák khawpa inthlanna muanawm kan neih theih chhan chu MPF zâr a ni thui hle. He hmingṭhatna khumtu zîngah hian BCM hi tel ve ngei sela. MPF-ah hian kohhran chauh ni loin YMA, MUP, MHIP pawh an tel vek záwk a ni.