GOVT OF BHARAT?

Hmàn deuha G20 siper inhmuh khâwmna chi khat Mizoramin a thlen dâwn khân Mizoram sawrkar chu nasa takin a inbuatsaih ve a. Aizâwl khawpui kawtthlêr hrang hrang pawh engtin tin emaw chei ve chiam a nih kha. Tûnah erawh chuan khatih lâia Aizâwl khawpui cheina hnûhma kha hmuh tùr a awm tawh lo a, a reh fãi ta phiar mai a ni. Hetiang hi thil awm dàn pângngãi ve rêng a ni ṭhin. Tûnah hian India sawrkar chuan Delhi khawpuiah G20 inkhâwmpui lian a thleng dâwn a; khawvêla sawrkar lian hotu lawk hrang hrangte an lo kal dâwn a, Delhi khawpui chu nasa takin a inbuatsaih a. Tûnah chuan G20 thleng tûrin Delhi pawh a inpeih tawh an ti.

Hê thil lo thleng tùrah hian tûn hmâa India sawrkarin a tih ngâi loh, tûn ṭuma a tih thar liau liau chu ram dang hruaitute lo kal tùr, India President-in zanriah kîlpui tùra a sàwmna lehkha (Card)-ah ‘President of Govt of India’ ti loin ‘President of Govt of Bharat’ a ti ta tlat mai hi a ni! India hi ‘Bharat’ tih a ni ve tho tih hi chu Indian Constitution chhiar tawh chuan kan hre vek àwm e. A chhan chu Indian Constitution, Article 1-na bul ṭannaah khân, “India, that is Bharat, shall be a Union of States,” tih a ni a. Chuvàngin India ram hian hming pahnih ‘India’ leh ‘Bharat’ a nei tih chu a chiang viau; mahse, ‘Bharat’ tih hi chu hman zen zen a ni lo.

Central-ah BJP an sawrkar ták hnû hian anni hi India ram hi Hindu ram hlanga siam tum ta rêng rênga hmanhlel an ni bawk a; chû vàng chuan hming thlák apui an ngah ta hle mai a. Narendra Modi, Prinme Minister a nih hnûah hian a hluar lehzual a. Hetiang thilah hian Modi chu a phèna awm, chak taka thil kalpui tùra turtu chu a ni ngei ang!

BJP sawrkar hian khaw hming te, hmun hming te, sawrkar thil hming nei ṭhat sá reng rengte thlengin a thlák mawlh mawlh a ni ta ber mai a. Hei hi a chhan ber chu BJP party hi Hindu kulmûkho intèl khâwmna a ni a; India ram thil engkim mai hi tih Hindu an duh a. BJP thahrui ti chak tùrin an hnungah pawh ni loin, an hmáah hian langsàr takin RSS, VHP, Bajrang Dal te an awm a; anni hi Hindu firfiak an ni ber. An duh dàn ang tak hian India hi kalpui ta se la chuan sakhaw dang betute hi Hindu-ah min inleh luihtîr vek ang! Chuti khawpa Hindu sakhaw tâna ṭhahnem ngái chu an ni.

Zirna lamah ni se, khawvêla thil thleng tawh, nuai reh theih loh ang chi pawh tih danglam an duh zêl a. Indian History hi tûn hmá aṭangin Ancient period (Hmãnlái), Medieval period (Hun Laihãwl) leh Modern period (Tûnlái) tiin kan lo zir tluk tluk ṭhin kha a ni a. BJP education policy-ah erawh chuan Medieval period kha Muslim-ho lal lái a nih avàngin zirlái bu aṭangin paih an duh tawh a. Thil thleng tawh chu thil thleng tawh a ni a, thài bo theih a ni lo. Medieval period tel loin Indian History hi zir ta i la, hun rei tak chhûnga thil thleng kha eng mah hre loin kan awm dáwn tihna a ni a. Kan thiamna pawh a chhum bung rem rum dáwn tihna a ni a; chutiang chu thiamna tluantling a ni ngâi lo ang! BJP sawrkar hi chuan máwi leh máwi lo pawh a thlu lo a ni ber mai!

British hun lâia an lo sak, Parliament House mâwi tak kan nei a. BJP sawrkar chuan Parliament in thar an sa a, luah a ni tawh nghe nghe. Tûnah chuan ‘Parliament’ tih ṭawngkam pawh an hmang duh tawh lo; ‘Parliament’ tih áiah ‘Sansad’ tih an hmang ta daih mai! Tûn hnãia ISRO-in thla-ah Chandrayaan 3 a han ṭumtîr a; Indian National Flag a han zâr a; chû pawh chu ‘Tiranga’ an ti ta daih mai a. Keia lái sen lung mãwl chuan ka lo hre thiam lawk lo a, ‘tiranga’ ni-a ka hriat ve chu sikul naupangten an ei ṭhin, ei lo tùra kan khap kha a ni si! Sipai bâng ka ni lo náin ka bo map hman mai!

Tûn hnãia thil thleng pakhat chuan Indian Penal Code leh Criminal Procedure Code pawh siam ṭhat an tum a; hêng dànte hi British hun lâia siam kha a nih avàngin siam ṭhat ngâi tam tak a awm tawh rêng a; a ngãi ngãia hman chî loh a tam tawh ang. A dàn siam ṭhat chauh ni loin a hming thlengin Sanskrit ṭawngin thlák an tum leh ta bawk a. India chhim lam Tamilnadu Chief Minister chuan BJP sawrkar thil tih tum dàn chu a duh lo nasa mai. BJP erawh chuan hemi chungchângah hian fing vervék thiam takin IPC leh CrPC hming atân ‘Hindi’ ni loin ‘Sanskrit’ alâwm kan hman an ti hlauh thung a. Mahse, Hindi leh Sanskrit chu ṭawng inzûl, danglam êm êm lo a ni a; a hawrawp pawh a thuhmun reng a ni.

India indan hnûa Congress sawrkar thil tih tam tak kha sawisêlin tih danglam an duh bawk a. Prime Minister Nehru pawh an sawizêl hreh tawh lo a; Mahatma Gandhi ngei pawh hi an sawi chhe ṭan titih tawh a ni. ‘The Nehru Memorial Museum and Library (NMML)’ tih pawh ‘Prime Minister Museum and Library (PMML) Society’ tiin an thlák leh tawh a; an ṭan chhan chu Nehru sûlhnû chauh dah a ni tawh lo a, Prime Minister dangte sûlhnû pawh dah zêl a ni alãwm an ti ve tlat! Dikna chin chu a awm ang; mahse, a hming thlák kher chu a ṭûl ber lo. Nakin lawkah chuan Mahatma Gandhi pawh ‘India Hnam Pa’ a nihna hi an la paih duh ang a, ‘Modi’ záwk hi ‘India Hnam Pa’ tih an la ti záwk maithei! Engati nge heti taka hming thlák ãta BJP sawrkar hi an ãt tak mai hriat thiam a har; a chhan ber erawh chu India hi Hindu rama siam an duh vàng a ni.

Tûn ṭum G20 inkhâwmpuia lo kalte India President-in zanriah kîl tûra a sàwmna Card-ah ‘President of India’ ti loa ‘President of Bharat’ tih an hmang tlat hian inhnialna a ti tam hle a. Nakin lawkah chuan BJP sawrkar hian Indian Constitution aṭang hian ‘India’ tih hi an la paih duh mai ang tih hi thil rinawm tak a ni. BJP pawh hi a lam pum chu Bharatiya Janata Party tihna a ni.

Central-a BJP sawrkar hnû kum 2016-ah khân Supreme Court-ah PIL pakhat a lût tawh a; chû PIL chu thil eng kimah ‘India’ áia ‘Bharat’ hman rawtna a ni. Mahse, Supreme Court chuan chû PIL chu a hnâwl a; a ngaihtuahtu zîngah chuan khatih láia Chief Justice of India, TS Thakur kha a hruaitu a ni. Tûn hnãiah India rama Opposition Party hrang hrang intel khâwmin an hming atân I.N.D.I.A (Indian National Developmental Inclusive Alliance) tih an hman dodàl tumna PIL chu Supreme Court-ah Rohit Kheriwal chuan a theh lût a; mahse, Justice Sanjay Kishan Kaul leh Justice Sudhanshu Dhulia chuan an lo hnâwlsak a ni. Justice Kaul chuan Rohit Kheriwal ukil hnênah chang fakin, “You can either withdraw it voluntarily, or we will dismiss it,” tiin a hrilh nghe nghe a ni.

Opposition Party inhmu khâwmin an hming atân I.N.D.I.A tih an hman avàng hi em ni ang, G20-a lo kal ram hruaitute zanriah kîlpui tùra sàwmna lehkhaah ‘President of India’ ti loa ‘President of Bharat’ tih an hman luih ták tlat mai tih hi hriat a ni lo. BJP thil tih duh dàn erawh hi chu a mak a, hriat thiam a har. Nakin lawkah ‘India’ tih hi ‘Bharat’ ti-a thlák tùrin Bill an buatsaih lo ang tih a sawi theih loh. Tûn hi Parliament in hnihah an chak vànglái tak a ni a; nakkum 2024-ah MP inthlan a nih chuan, tûn ang êm êm hi chuan an chak zui tawh lo maithei. Chû vàng tak chuan tûna Parliament term tawp hmá ngei hian ‘India’ tih áiah ‘Bharat’ tih záwkna tùr Bill hi hmanhmawh takin an pass duh mai ang em tih tih hriat a ni lo; an ‘chalãk’ dàn hi namén lo tak mai a ni si a!

BJP sawrkar hian ‘India’ tih hi hmang tawh lo tawp tùra dàn an siama ‘Bharat’ tih chauh hman tùr ni ta se, hming tam tak hi thlák a ngái dáwn tihna a ni ang a. Indian Constitution chu ‘Bharat Constitution’ tih a ni tawh ang a, India President chu ‘Bharat President’ tih a ni ang a, India Prime Minister pawh ‘Bharat Prime Minister’ a ni tawh ang. Supreme Court of India chu ‘Supreme Court of Bharat’ a ni tawh ang a; Chief Justice of India pawh ‘Chief Justice of Bharat’ tih a ni tawh ang.

IAS, IPS leh IFS te pawh BAS,BPS, BFS tih a ni ang a; Central Services chi hrang hrang hming bula ‘Indian’ tih zawng zawng chu ‘Bharat’ tiin thlák vek a ngâi ang a. Reserve Bank of India (RBI) pawh Reserve Bank of Bharat (RBB) a ni ang a. Chutih hunah chuan BJP tâna meizang hlaptu ruhkawl ber ber RSS, VHP leh Bajrang Dal te chu an nui khi ver ver tawh mai dáwn a ni. ‘Presbyterian Church of India’ (PCI) tih pawh hi ‘Presbyterian Church of Bharat (PCB) ti-a thlák a la ngái lo ang tih sawi theih a ni lo! Huiha! A hahthlák láwk mang e!

Hetiang boruak kâra kan lèn tawh láia BJP kan la sawi sawi máwi fo te hi chu a tiha tih ngeih loh a ni! Central leh North East India-a BJP nèna inthlun khâwmna NDA leh NEDA tih angrenga la tel zui zêl pawh hi tih chî a ni lo; bànsan hmak ngam a hun tawh. BJP nèna innghèng hnãi taka an pangti lum chhim tuma zawm luih tlat hi chu eng party tân pawh tih loh atân a ṭha ber. Chutianga ti lui tlat an awm chuan mipui hian fing taka hnãwl hmak a hun tihna a ni mai dâwn lo’m ni?