SORKAR ACCOUNTS

Kum 1998 khan Delhi chhim lama Jangpura Extension venga PTI Guest House-ah keini Press Trust of India a probationer leh trainee-ho kha mi 10 tling lo deuh kan khawsa a. Kan ṭhian zingami Bengali kha, Nagaland a piang sei lian, Naga hnam hrang hrang inbiakpawhna ṭawng chawhchawrawi phuahchawp (pidgin) ‘Nagamese’ an tih mai pawh anmahni Naga-ho ang chiah a thiam hi a ni a.

Ni khat chu he kan ṭhianpa hian an Nagaland state sorkar sum hman dan ziahna – Comptroller and Auditor General of India (CAG) audit report hi kan PTI khualbukah chuan a rawn hawn a. Tunhma kan tleirawl lai a kan thawnthu bu chhiar ve ṭhin ang tiat lek, a kawm pawh uk khik khek leh pan zet hi a ni a. Rambuai an nih avangin Nagaland sorkar sum hman dan kha awmze neiin an Accountant General hnathawkte khan an audit thei lo nge a chhan chu ka hre bik ta lo.

“VVIP pakhat hnenah cheng nuai 16 pek a ni,” tihte, “VVIP/VIP 4 hnenah cheng nuai 46 pek a ni,” tihte kha an audit report a an ziah dan a ni a. Keini Mizoram sorkar sum hman dan audit report nen chuan a kar a hla hle mai. Tunah hian a la ni em chu ka hre lova, Manipur sorkar hnathawk khian hel pawl hnenah thla thar hlawh lãk rualin chhiah an pe vek a, an pêk zãt pawh an hre vek a. Chu chu an department cashier-te khan an hlawh aṭanga la hrangin helho kutah an hlan mai ṭhin niin an sawi a. An lãrsãp chauh tak tak erawh khi chuan a chawi lo mai thei, an ti.

Tunhma kha chuan Manipur hi hel pawl an tam em em mai a. Hmun tam takah sorkar hian awmzia a nei lova, sorkar official pawh hmun kilkhawr, ramri hnaiah chuan an awm lo tih theih a ni a. Sorkarin ration buhfai leh mipui mamawh dang, Public Distribution System (PDS) kaltlanga a pek chhuah ang chite pawh hel pawlte’n an awmchilh bialah chuan an sem mai a. Officer ṭhenkhat hmun kilkhawr a zinte chu Police-in venhimna pe lovin khalai a hel pawl chak ber khan an venghim mai ṭhin an tih chu.

Mizoram hian tun hma chuan Shillong khawpui a hmunpui nei Accountant General pisa a thawkte kha sorkar sum hman dan endik (audit) tur hian kan hmangin kan ṭawm ve mai ṭhin kha a ni a. Tunah hi chuan Aizawl khawpui-ah ngei Principal Auditor General-in min ṭhut chilh tawh a. Hel kan nei ve lova, kan ram a ralmuang hle bawk. Chutih rualin Finance Accounts-te report ang lo takin Audit Report hi Assembly-ah an pharh tlai fo tho mai a. Hemi kawngah hian ṭan laka hmasawn kan mamawh hle mai.

Mipui sum (public money) eiruk a awma chhuitu tur hi Central Bureau of Investigations (CBI) te, Enforcement Directorate (ED) leh Income Tax Department leh a dangte an awm a. Eirukna chhui a nih a eiruk hmangte hrem a nih theihna atan Indian Penal Code (IPC) bakah dan khauh tak Prevention of Corruption Act, 1988 a awm bawk a. He’ng dan kengkawhtu atan hian CBI leh a dangte bakah state-ah Anti-Corruption Bureau (ACB) an awm a. Thuneihna hrang nei Central Vigilance Commission (CVC) te, state ṭhenkhatah Lok Ayukta te an din a. Prevention of Corruption Act dan kengkawh bik turin Special Court din a ni bawk. ṭ

Sorkar laipui sum hman dan endik tur hian CAG a awm a, state hrang hrangah CAG hnuaiah Principal AG emaw, AG emaw an awm leh bawk a. CAG Audit Report kan tih mai a sorkar laipui ministry leh department-te sum hman dik loh tarlante hi Parliament-in a din Public Accounts Committee (PAC) in an bawhzui leh a. Sum hman dik lohna a mawhphurtute hrem an nih theihna atana rawtna siamtu a ni a. Chutiang bawkin state sorkar sum hman dik loh chhu zui a chhui zui turin Assembly-in PAC a din hi mawhphurhna pek a ni.

Sorkarin eng hna atan emaw sum hman tur a ruahman anga hman a nih loh thu CAG emaw report dangah emaw a awm chuan Committee on Estimates in an chhui zui a. Sorkarin sumdawng tura a din Corporation kan tih mai Public Sector Unit (PSU)-te sum hman dik loh report chhui zui turin Committee on Public Undertakings (CPU) te pawh din ṭhin a ni. Hemi piahah pawh hian India ramah hian mipui sum eirukna vengtu leh chutiang a awma chhui zuitu tur hi ruahmanna tam tak siam a ni.

Chuti chung chuan, a bîk takin Assembly-in hetiang bawhzui tura a din leh ruat, PAC leh Assembly Committee dangte bãkah Mizoram sorkãr, eirukna do kawnga mawhphur tura sorkãr hnathawkte hian an mawhphurhna leh tihtur (statutory duty) hi an ti ṭha tawk lo tih chu a lang reng mai. Kan duhkhawp lohna chhan ber chu mipui sum tichingpentute sorkarin a hrem ngai mang lo ni tlat a ngaihna hi a ni.

ACB-te’n thubuai an siamsak (ACB hi Mizoram Lok Ayukta kutke a ni tel tawh bawk a) pawh tunhma kha chuan Special Judge (PC Act) hian a hrem ngai lo tluk a ni a, a hrem chhun pawh na tak a ni ngai hek lo. A bik takin sorkarna chelhtu Minister te leh dik lo taka lãkluh sum ngah tawntaw sorkar official-te an him pial deuh zel a. Tunah hian Aizawlah Special Judge huaisen, dikna duhtu leh rorum tak kan nei ta a, mipui sum eiruk chingte an tawm tãwk tãwk turah ngai phawt teh ang.

‘Financial control mechanism’ kan tih mai hi India sorkar laipui bakah state sorkarah kan nei ṭha êm êm mai a, mahse, kan hman dan hian duhthu a la sam lova. Kan IA & AS officer fam ta Pu R. Rozîka khan vawi khat chu keini mi mawl hriatthiam phãk turin seminar/workshop-ah a sawi a. A pawimawh teh a sin. PWD hi entîr na’na hmangin, “Division awptu Executive Engineer (EE) leh MFAS officer, Accountant te, Finance Accounts Officer (FAO)-te an inkawmngeih lutuk tawh chuan FAO/accountant kha sawnchhuah a hun hlê tawh a ni,” tiin a sawi.

Mizoramah hian Assembly Committee (ṭhenkhatin Mini Assembly ti hiala an sawi)-te hian hna an thawk ṭha tlãngpui a. An report pawh a ṭha hlawm viau mai a. Chutih rual erawh chuan duhthawh erawh chu a la na tho mai. Pu Zosiama Pachuau (fam) kha PAC chairman dinhmun rei tak chelh a ni a, a tak taka hnathawk ṭhin a niin ka hria. Hetiang lam sawi hi chuan hriat chhuah loh theih loh a ni.

Lai Autonomous District Council (LADC) sorkarin Lawngtlai khawpui a Areopagi an siam leh Council House tur sakna a sum an hman dan dik lote, Lawngtlai khaw bul lawka Sericulture Demonstration Farm an tih mai, kum tina cheng tam tak an senna ni si, thingtheihmu kung pakhat chiah leh a enkawltu chowkidar chenna thlam tiat leh awmnate kha a hmunah an tlawhchhuak thlap a. Mizoram State Transport (MST) bus pakhat an lei thar kuma a ke (tyre) thar 46 a hman ral chungchang leh Secretariat Administration Department (SAD)-in Gypsy chung leh bang (hood) man to uchuak taka an lei an phawrhte kha pui tak a ni.

Hun engmaw lai khan CAG hian an audit report-ah hian sorkar sum hman dik lohna (misappropriation/corruption) a awm ngei a a lan chuan a mawhphurtu official chala phûng tihtawp (fixing responsibility) bãkah eirukna chhuitu ACB in emaw chhui turin rawtna a siam ṭhin a. Tun hnai-ah hian hetiang lam hi ziak lang lem lovin a bawhzuitu Assembly committee-te kutah a dah ta mai emaw tih tur a ni ta.

Tun hnai-a Assembly dawhkana dah tak Sports and Youth Services department-in Lunglei Zobawk a State Sports Academy din tura ruahman a zawhfel theih loh chungchangah PAC-in a chhui zui dan chipchiar takin report a siam a. He thilah hian mipui sum eirúkna a awm ngei ni a a lan avangin ACB-in chhui se tiin rawtna a siam a ni. Mipui sum eirukna a awm ni ngei a a lanna ang chi-ah rêng rêng hi chuan a mawhphurtu zawn chhuah a, a chhuitute chhuitir ngei tura rawtna siam zél hi eirúk hmangte an ngampat lohna atan a pawimawh êm êm a ni.

Mizo chauh pawh kan ni bik lova, mihring hrim hrim hi hrem hlauhna (deterrent) tel lo chuan kan kal ngil thei lo fo tih hi thil chiang tak a ni. Mizoramah ngei hian sorkar hnathawk pisa thleng tlai leh a hun hma a haw chingte hi kan Chief Secretary tam takin thuchhuah siamin hremah an vau tawh ṭhin na a, a taka inhrem a awm îhin loh avangin zawm a hlawh ngai lo. Chutiang chiah chuan mipui sum eirúk leh tihpelhé chîngte hi hrem an nih ngei theih na’n a tak taka ṭan lak a ngai tawh.

Assembly Committee pawimawhte hian hma han hruai sela, sum eiru zawnga dan bawhchhetute hrem an nih theihna atana a taka thawktu, Lok Ayukta, ACB, Police te bakah mipui hi nasa taka kan ṭhanharh a ngai tawh a. Eiru hrem ngam dan hmanga roreltu pawh kan neih zêl hi a pawimawh takzet. Hei hi ‘Kristian ram’ ti a inchhala chengte’n kawng dik kan zawh loh theih lohna atan a pawimawh êm êm a ni. Sual dova thisen chhuak khawpa ṭanlãk a ngaih hmã ngei hian.