ZALENNA SUAL/ SUALLO

MNF Party-in Pu Laldenga hruaina hnuaia Independence an puan kum 50-na champha an lawm avangin inhnialna a chhuak leh chiam mai a; an inhnialna erawh chu Social Media lam, Facebook leh Whatsapp lamah a ni a. Ka hriat chinah (ka hre tlemin ka chhiar tamlo viau) chanchinbu lamah chuan a lang lem lo a nih hmel a; a lang a nih pawhin a langsar lemlo ni awm tak a ni. Kan Mizo thalaite'n an ze ngai chhuaha thlalak thiam pakhatin Mizo puan (thangchhuah diar) a hren dan chungchang titina lamin a hliah khuh zui ta bawk si a; Mizoramin zalenna a sual leh sual loh chungchanga Facebook leh Whatsapp lam inhnialna pawh a hlamzuih ve ta nghal deuh mai a nih tak kha.

Mizote hi kan dawihzep ta hle em ni chu aw ka ti fo thin. Zalenna chungchang, kum 1966-a independence puan chungchang han sawi chhuah lehte pawh India ram hmelma (anti-national) a puh hlauhthawnna-in kan khat ta a. Indian Air Force indo thlawhnate'n March ni 5, 1966-a Mizoram hmun hrang hrang an beih chungchangah pawh thenkhat chuan bomb an thlaklo an tih loh leh bomb lian ni lovin tenau deuh chauh a lawm an thlak tia sawi duh hram hram te kan awm nawk a nih hi. Ka thianpa nupuiin a pasal duhdan kalh tih hre chunga khawtlang thila pawisa a lo thawh ve chungchanga an in-cha-chhuahna-ah a nupuiin, "Rs 20 chauh a lawm ka thawh ve, chhungkaw tinin thawh vek tur an ti si a," a ti a. A pasal chuan, "Stephan-a denhlumnaah khan tel ve ni ta la, 'lung te reuhte chauhvin a lawm ka vawm ve' i ti dawn a ni maw?" a tih kha min hriat chhuah tir.

Helaiah hian chiang taka thil kan ngaihtuah ngai a awmin ka hria. Thenkhatin Politics thila inbeihna atana hmangin "Hnam pasaltha nunna chante kha chuan zalenna kha an sual tak tak a; an (MNF) hruaitute kha chuan an suallo," te an ti a. Thenkhatin mimal taka Pu Laldenga beiin zalenna an puan hnu lawka India sorkar biak tum nghal leh a tirte atanga Independence suallo hrim hrimah te an puh bawk a. Politics-a inbeihnaah hian Mizote hian kan duhtuilo tih hi hai rual a ni lo. Kan politics hi a a bilhah a tho lova, 'Politics haitho' tia vuah awm tak a ni. Kum 1946-a political party lo ding hmasa ber kha Mizoram Common People's Union tiin an vuah a; a hnu-ah Mizo Commoners' Union tia a hming thlak lehin Mizo Union tiin an vuah ta a. Lal ban kha an thupui ber a nih avangin a tira an pawl hming pawh Hnamchawm Pawl tih a ni a; a hnu-ah tihluihna ang reng deuhvin lalte pawh huam thei turin a hming an thlak leh ta ni awm tak a ni.

Mizorama political party ding hmasa ber Mizo Union-in a tum langsar hmasa ber chu lal ban a ni a. Tuna Mizote ram chin lo sat a lo humhalhtu Mizo lalte kha ngaihsana chawisan taka ruangin Lalte thuneihna chhuhsak kha an tuipui hmasak ber a ni a. Chumi an thil tuipui avang chuan Lal hau ngam leh Lal In chung vawm ngam ngaihsan kha an inzirtir ber a ni awm e. Mipui rorelna leh thuneihna thupui (democratic principles) hrethiam tak tak si lova kan politics bul intanna chu huatna leh diriamna a nih tak ber awm chu. Chumi kal zelah chuan politics thila inbeih kawngah hian ramri kan kham thiam ta meuh lova, tui pangngai-a intheh aiin tui nu taka intheh kan thiam ta zawk niin a lang.

Thil thuk tak leh thui tak sawi a ngai hranpa-in a lang lo. Khawvelah hi chuan ngaihdan inanglo, inpersan leh insual hi a awm reng dawn a, mi pathum thukhawm zingah ngaihdan pathum a awm fovang. Chutih rual chuan pawm dan hrisello tak leh kan Mizo Hnam chanchin (history) diklo taka kaihlek (distort) a nih erawh chuan a fello thui thei hle tih chu kan hriat a tul khawp mai. Kan hla pakhatin - "Ngaihdan a tam pawm dan a tam" a tih ang mai kha kan awmdan hi chu a ni a. Kum 1875-a British sorkar laka helna kha Sapho chuan 'Sipaite Helna' (Sepoy Mutiny) tiin an vuah lek fang a. India mi, India ram chanchin ziaktute erawh chuan India-in British awpbehna laka zalenna sual tanna hmasa ber (First War of Indian Independence) tiin an vuah thung.

Entirna dang han siam ila, kum 1959 atanga Spain rama Basque hnam bitna bial zalenna sualtu ETA an tih mai pawl (Euskadi Ta Askatasuna) hi Spain leh a thian sorkarte chuan inlakhran tum (separatist) an ti a, Spain sorkar phei chuan firfiak pawl (terrorist group)-ah an ngai a. Anni erawh chuan zalenna sualtu-ah an inngai chiang khawp mai. Russia laka Chechnya la hranga zalenna atan beitu Chechen pawlho chu Russia sorkar chuan hel a ti satliah lova, firfiak pawlah a puang a. Chutihlaiin Ukraine ram chhunga Crimea bial la hranga Russsia-a behtir tum ho Russian hnam hel pawl tia Ukraine-in a puante erawh chu Russia sorkar hian zalenna sualtu tiin a tanpui nasa hle lawi si a ni.

Mizoram chungchang bikah chuan kan thian pakhat thusawi hian ngaihtuahna a ti thui khawp. "Kum 20 zet rammu MNF hruaitu thenkhatin Mizoram state sorkara thuneihna an chelh laia an chet dan thenkhat leh hamhai dan kha chu ram hmangaih vanga rammu leh Mizote tana tha ber tur ngaihtuaha zalenna sual rim an nam lo. Mahni leh chhung leh khat haivur tumna ngawr ngawr a ang," zu ti mauh a. Politician hrim hrim leh ram leh hnam tana tawrh huama zalenna sualtute chu an chet danah pawh an danglam tur chu niawm tak chu a ni a, chutiang tih ching chu zalenna sualtu pawh nise mipuiin kan hnawl a tul ang. Chutih rual erawh chuan rammu zinga thenkhat an depde avanga Mizote'n zalenna suallo anga sawi hi chu politics tuinu tak leh thangthar lo awm zel tur, thil thlen dan hre pha velote tana Mizo chanchin diklo taka kaihherna a ni.

Khawvel ram lian leh chak, mimal zalenna leh hnam zalenna ngai pawimawh tura ngaih meuhte pawh hian an ram awp chhuahsana zalenna pek ngawt hi thih hrehin an hreh fova. American ho bak chu tharum hmanga anmahni awptute hneha zalenna sual chhuak ngat hi chu hnam tlemte an ni. A nawlpui-a zalenna hmute chu ram nitla seng lova roreltu Kumpinu-in Indopui II-na reh hlima (a lo tiam tawh anga) a zalentir tak huk zinga telte kan hria a. Chubakah chuan kum 1991 Krismas Ni tlailam-a Soviet Union tia hriat (Union of Soviet Socialist Republics - USSR) keh darh tak avanga he lalram hnuaia awm thehnem tham tak an zalen tak thute leh Balkans ram kan tih mai thin sakhua leh engemaw avanga independent ram tam taka an inthen darh tak dante chu kan hre awm e. 'Balkanisation' emaw 'Balkanise' emaw chu saptawng thumal ram thendarh tihna a lo ni ta hial a ni.

Mizoram chungchanga thudik tak chu Mizote hian zalenna kan sual ngei a; India ram atanga inlakhran tumin kan zalenna kan puang a. Sipai leh ralthuam bakah sorkar chakna lamah India kan hneh lova, chumi bakah chuan Mizo mipuiin an tlin tak loh avangin rammute chu remna siam turin kan kovin kan tah-awh a. Anni'n India sorkar nen inremna an ziak ta a ni. A karah thu tam tak, inhnialna tam tak a awm thei ang, mahse tlar hnih/khata kan tarlan hi thudik tak a ni.