THUTLUKNA SIAM

Kan ṭhian, kan nau ni bawk pakhat chu hmanah tawh khan nupui a ru ve a. An kohhran committee-in kohhran dana phuar turin thutlukna an siam a. Mahse, kohhran thil chhinchhiahna an han en chian chuan kohhran member puitlingah an lo la ziak lut reng reng lo tih an hmuchhuak a, a ho der mai. Chuvangin thutlukna kan siam dawn hian kan zir chian phawt a, thil awmdan kan hriat chian phawt hi a pawimawh hle. Chuti lo chu nasa taka mualpho theih pawh a ni.

Congress sorkarin a sum sen tur (financial implications) lam ngaihtuah chiang lo leh inthlan lo awm tura tlin leh ngawr ngawr an khelh avanga kum 1998 inthlan hma a district thar 5 siam a nih thu an puan leh kum 2008 (inthlan dawn ṭepah tho) MNF sorkarin district thar 3 an puan ang chite kha thil tih sa loh a ni. Vote zawnna atan liau liauva thiltih a ni chungin an sorkar a tla ve ve a nih kha. He ram zimte, mi state a PWD SDO bial tiat pawh ni lovin district kan ngah lutuk hi sumthuninu mai a ni a, ram leh mipui hmasawnna eiraltu ‘Sai vâr’ bak a ni lo.

MNF leh India sorkar inremna thuthlung (1986)-ah khan Mizoramin University hrang a nei ang tih a inziak a. Kum 1987-88 a Chief Minister Laldenga khan khatih lai a Union Minister for Human Resources Development (Education) PV Narasimha Rao (a hnu a Prime Minister ni ta) hnena lehkha a thawnah khan Mizorama University din dilna a ziak a. Chutah chuan chu university chu sorkar laipui-in a senso zawng zawng a tum (totally centrally funded) a ni tur a ni tih chiang takin a ziak lang.

Laldenga khan university enkawlna atana senso sanzia a hre chiang tih a lang reng a. State sorkar sum dinhmun ngaihtuahin state ding tir sorkar senso a university din kha tih chi hauh a ni lo tih pawh a hmu tlang chiang hle tih central minister hnena a lehkha ziahah khan a tarlang chiang em em a ni. Chutiang a nih lai chuan a thih hnu-ah university din chungchang hi (Congress sorkar lai-in) assembly-ah an sawiho a. Rorellai leh eptu MLA-te kha ‘state university’ din turin an inthurual tlat pek a nih kha.

Assembly-a an sawiho lai a Chief Minister khan ‘state university’ zawk din sawimawina atan, Delhi khawpui a Jawharlal Nehru University (JNU) khu entirna atana hmangin ‘kan university chu politics khelhna hmunpui (hot-bed of politics) a ni tur a ni lo’ tiin uar takin a sawi a. Eptu MNF MLA chhuanvawr leh doctorate degree hial neite lah khan hei hi thlawpin India sorkar leh MNF inremna anga university din a nih dawn chuan Mizoram sorkar ta ngei a ni tur a ni, tih kha an thurolum a ni a. MNF dintu leh MNF sorkar hmasa ber hruaitu Laldenga’n sorkar laipui a lehkha a lo thehluhte pawh hre hauh lo leh ngaihtuah lem lo khan Mizoram rorelna sang berah an lo ar-mit-tet-khuan ve mai mai a ang khawp mai.

Tun hnai-ah Mizoram Institute of Medical Education and Research (MIMER) tih hming pu a, Mizorama medical college hmasa ber leh awm chhun, MNF sorkarin Zoram Medical College (ZMC) ti a a hming a thlak tak, Mizoram sorkar enkawl hi sorkar laipui enkawlna hnuai-ah awm se tih rawtna lian tak a awm a. Tun hnai mai pawh ni lovin MNF sorkar pawh khan sorkar laipui thuneitute dawrin Ministry of Health & Family Welfare kuta hlan a lo ngen tawh a. BJP hruaitute pawhin BJP-in sorkarna an chan chuan sorkar laipuiin a enkawl tawh ang tih kha an intiamna a ni bawk.

MIMER hming pu a medical college din a nih chhoh lai vel khan sorkar laipui chuan All India Institute of Medical Sciences (AIIMS) hi ramchhung hmun hrang hranga din/sem turin ruahmanna a siam a. Mizoram sorkar khan medical college pakhat pawh neih loh chhuanlamin an dil ve lo nge an dil a, min pe ta lo tih kan hre lo. Meghalaya chuan state hrang hrang aṭanga damlote’n an pan huai huai North Eastern Indira Gandhi Regional Institute of Health and Medical Sciences (NEIGRIHMS) an nei ta reng mai le.

A thuhrimin thil hming thlak hi kan uar hle a. A ṭangkaina tur pawh kan ngaihven zui lem lo. MIMER chu medical institute a nih avangin a hotu ber kha Director a ni tur a ni a. India rama medical institute dang enkawltu a an hotu ber kha Director vek a ni. Chubakah society-in an enkawl deuh vek a ni. Keini hi MIMER ni tawh lova Zoram Medical College a nih tawh chuan ZMC hotu ber hi college hotu chauh a nih tawh avangin a nihna hi Director aṭangin Principal ti a thlak tawh awm tak a ni – college dangte ang bawkin.

Engpawh ni se medical college enkawl hi a hautaukzia tam takin kan hre phak kher lovang. Sorkar laipuiin enkawl se la chu Mizoram sorkar sum harsatna a chhawk zangkhai ngei ngei dawn a. Chu ai a pawimawh chu a changtlungin, zirtirtu pawh hlawh tam zawkin rawih an ni thei tawh ang a. Medical sicence lama mithiam rual ngat zirtirtu pawh rawih theih an ni tawh ang tih a rinawm. Chu chuan ZMC zirlaite pawh mithiam lehzualah a chhuah ngei ang.

ZPM sorkar lo ding tharin MNF sorkar duhdan ve thova sorkar laipui kuta ZMC hlan a tum hi thlawp loh chi a ni lova, sum leh pai a kan enkawl zawh meuh loh hi sorkar laipui hian a remtih phawt chuan la ngei teh se. Kawng hrang hrangah a changkan’ phah ngei bawk ang. Chutih lai chuan kan thlawhna ṭumhmun neih chhun Lengpui airport chungchang hi chu thutlukna tawp an siam hma ngeiin ngaihtuah nawnin ngaihtuah chiang se la, zir chiang leh bawk teh se. A pawng a pui a Airport Authority of India (AAI) kuta hlan ngawt hi a him lo nasa a ni.

Lengpui airport hi sorkar hmasa lamah khan AAI emaw Indian Air Force (IAF) emaw kuta hlan hi sawi rik a awm fo tawh a, tun hi a vawi khatna a ni hauh lo. Kum 2022 June thla a Mizoram sorkar leh AAI an indawr kha official taka an indawr hnuhnun’ ber a ni mai thei e. Kha tah khan AAI lam hian inremna thuthlung (Memorandum of Understanding) an duan chu Mizoram sorkar hma-ah an pharh a, sorkar khan pawm chi-ah a ngai ta lo niin a lang.

Heta an MoU duan chhin châng (paragraph1.1-ah chuan Mizoram sorkarin Lengpui ṭumhmun ram leh a ruhrel bakah a kaihhnawiha rotling thil (assets) an lo siam tawh, thlawhna ṭumhmun leh khawpui lam amite zawng zawng nen a bo a bang awm lovin AAI hnenah chatuan atan an hlan tur a ni a. A man senso a awm tur a ni lova, ram inchuh lakah a fihlim bakah zangnadawmna pek loh a awm pawhin pek sa vek a ni tur a ni a, a hnu lama ram lak belh a awm pawhin a senso chu Mizoram sorkarin a tum leh vek tur a ni, tih a ni.

Hei mai hi a la ni lova, AAI-in a mamawh a nih phawt chuan Mizoram sorkarin he ṭumhmun tihzauhna atan hian ram lak belh a nihin zangnadawmna atana senso zawng zawng a tum vek ang. Hetianga Lengpui airport ram zauh duh huna a zauhna tur ram lakna a zangnadawmna senso hi Mizoram sorkarin a tum vek ang a, AAI hnen aṭangin a thing let thei tawh lovang (MoU chang 1.2).

Hei bakah hian MoU duan chhin châng (para) 1.9-ah chuan Lengpui airport-a venhimna chungchanga a ruhrel leh mihring mamawh ang zawng zawng chu Bureau of Civil Aviation Security (BCAS) duan sa angin Mizoram sorkarin mawh a phurin senso a tum vek ang. Director General Civil Aviation (DGCA) kalphung angin AAI-in Lengpui ṭumhmun a lak aṭanga kum 3 chhung chu Mizoram sorkarin kangṭhelhna atana hmasawnna ruhrel leh hnathawkte senso a tum zui ang (para 1.10). A nihna takah chuan kum 1998 December thla a khatihlai a Deputy Prime Minister L.K. Advani-a’n Lengpui ṭumhmun a hawn aṭang khan Fire Service hi AAI kutah a la awm char char zawk niin an sawi.

Inremna duan chhin châng 1.12-ah chuan tuna Lengpui thlawhna ṭumhmuna thawk mekte lakah AAI hian mawhphurhna a nei dawn lo, tih tarlan a ni bawk a. AAI-in a lak hnu chuan airport-a Mizo thawk mekte hi an maipar thlawn tawp tawp a nih pawhin sawi buai theih kan nei dawn hauh lo a ni. AAI hian Lengpui ṭumhmun hi a duh phawt chuan rem a tih hun hunah Mizoram sorkar pawm leh remtihna tel hauh lovin midang (mimal/company tiamin) kutah a hlan thei ang (MoU para 2.8).

Kan sawi kim seng vek lovang a, tuna kan tarlan chin ringawt pawh hi zir chian chuan a pawng-a-taka AAI hnena Lengpui airport pek ngawt hi a him hauh lo tih leh Mizoram sorkarin senso belh tur tam tak a nei zui zel thei bawk dawn tih kan hre thiam vek mai awm e. Airport Authority of India hi tribal a ni lova, chuvangin Mizoram leilungah ram hi kan pe ngawt thei lova, mipui-in kan dodal ngei ang tih a chiang a. Dan ang taka pek theih dan awm chhun chu ‘land lease’ hmanga a hawha hawhtir chauh a ni. ‘Right to ownership’ (ram neitu nihna) pek theih a ni lova, ‘right to occupation’ (luah hawh) theihna sorkarin a pe chauh tih kan hriat tel a ngai bawk.

Mizote’n kan ngaihsan êm êm mingoho chuan ‘look before you leap’ an lo ti a. Engkim mai hi thutlùkna siam hma ngeiin zir chian a chik phawt hi a fuhin a him fo. Sorkar phei chu thutlukna a siam hian mipui a nghawng nghâl tih hriat tur a ni a. Chiang taka thil zir chian hnu-ah chauh thutlùkna siam ṭhin se la a ṭha hle ang. Chuti a nih loh chuan he ram leh hnam tâna pawi thui tak leh thùk tak a khawih theih a ni tih hriat a ṭha a ni.