POLITICS TUI NU

Mizote hian politics haitho kan khel a, kan bul ṭan dan a fuh lo tih kan hre vek. Min awptu Kumpinu (British) sorkar khan Mizote politics khelh a political party din an phalsak ngai lova, lehkha thiam sâng an awm pawh duh lovin zirna sâng zawk zir theihna sikul pawh din an remti lo kha a ni a. Lehkha kan thiam san an phal lova, politics a kan mit a keu hma an remti hek lova. Khawvel kha eng hmu phak lutuk si lo leh hnam rilru ṭhangharh lo tawk si a Kristian a min leh vek a, mingoho thuneihna dodal zawnga Mizo lal leh pasalṭhate an chet lohna tur leh nuamsa taka min awp kha an tum ber niin a lang.

Kum 1939 September ni 3 atanga Indopui pahnihna a lo chhuah khan British sorkar chuan India ram zalenna sualtute tihlungawi a tum ṭan a. Indopui-ah hian Germany leh a thawhpui ramte hneh tura an thlawpna an hmuh phawt chuan zalenna pek an tiam chho a nih kha. Chutiang bawkin Mizo lalte kha an lam ṭangah siam tumin an bei a. Mizo lalte khan an ṭanpui ta rêng a. Chuti chung pawh chuan Mizote politics leh hnam thila an ṭhanharh an remti mai lo. Kum 1945 September ni 2-a Japan a tlawm a, Indopui a tawp takah pawh khan Mizote chu political party din phalsak an ni chuang lo.

Kum 1947 chawhnu herah British sorkar chuan India ram chhuahsan a, hemi hma kum khat awrh, April ni 9, 1946-ah khan Mizo Commoner’s Union, a hnu a a hming thlâk a Mizo Union tih tak kha din a ni ta chauh a. Hei pawh hi Mizote awptu British thuneitute remtih vak loh ni awmin a lang a. Mizo Union hruaitute leh bawrhsâp pawh an inhmu thiam lo viau a nih kha. An inhmuh thiam loh chhan dang pawh a awm thei tho bawk.

Kumpinu sorkarin India chhuahsan a India ramin zalenna a hmuh tâkah khan kum khat awrh inzirna hun nei, kan ram politician-te chuan politics haitho an khél ta nghal a. Politics thila mit keu ta lo na na na chu an thiltih chhoh dan kha ar-khawthim-dai tak meuh meuh a ni a. Ram leh hnam himna leh hmasawnna aiin thuneihna duhna avanga lalte itsikin lal ban kha thupui berah an neih ta a, Mizo leh Mizo inchemharna an chawk chhuak ta a nih kha. Lal huat inzirtir a bantir kha ram leh hnam damkhawchhuahna leh hmasawnna ai-in an dah chungnungin an ngai pawimawh zawk a ni.

Ram leh hnam tana hmathlir (political vision) thui an nei lo hrim hrim a. An thiltih pawi ta ber zawka chu an lalna leh thuneihna dâltu ber ni a an hriat lalho bantir an duh luata khawtin mai a an pawl mite huatna thinlung an tuh kha a ni awm e. Mizo Union hruaitute khan hna ṭha tam tak an thawk ngei mai. Mahse, politics haitho khél a, thuneihna chan duh avanga an Mizo puite ngei a chhe thei ang bera an beih vak khan rah ṭha lo eltiang a chhuah zui a. Chu chu kan chhawm zui ta zêl a ni ber. Dik tak chuan kan politics tui nu hian fim lam a pan hauh lo mai a, thuneihna ruih chilh kan political party hruaitute’n lui hnâr lam an tihnut vak zêl avangin ‘tui-tifimi-nu’ pawhin a tifim zo tawh lova kan nu ta telh telh mai zawng a nih tâk hi.

Mizote tana zalenna sang ber neih tuma MNF-te an rammut lai khân he politics tui nu hi a nu zual a. A chhan ber pakhat chu rammute’n silai an hùm vang leh India sorkar hnuai a Mizo District Council leh UT sorkar inthlan an dodal vang a ni a. Chubâkah ramhnuaimi (MNF sipai) kha India sipai henna hék ching, ‘kawktu’ an tih mai te an awm a, a ṭhen phei chuan MNF a inhnamhnawih rêng rêng lote pawh hêkin an kawk ṭhin. Chutiang rambuai boruakah chuan kan politics kha a nu phuan buah buah mai a ni.

Chutiang a ni chung chuan kan rammute kha khawvêl hmun dang leh India ram hmun ṭhenkhata hel pawlte chêt dan êm êmin an che lova a lawmawm hle. Firfiak (terrorist) angin lo che se la chuan kum 1986 June ni 30-ah khan India leh khatih laia ramhnuai sorkar khan inremna thuthlung ziak eng ang mah sela tuna kan chen ang muanna hi kan hlat ngawt ang. Hei hi tam takin an ngaihtuah pha lêm lo niin a lang.

Kum 20 chhung zet, hun thim leh khirh kan paltlang hnu, Mizo leh Mizo inchemharna leh induna lian tham chhuak thei a kan awm lai a, chutiang thleng em lova remna leh muanna kan neih takah hian tam tak chu kan thaw huai awm e. Mi rama thleng ṭhin, hel pawl pawh awm chuang lova ram hruaitu leh hruai tumte thah (political assassination) anga ngaih theih chi tualthihna awm miah lova remna awm hnu a kan ram a muanawm chho ta hi lawmawm tih loh rual a ni lo.

Thing leh raw innawh lai hun theihnghilh a, kan chief minister hlui Brig. Ṭhenphunga Sailo thupui, “Ngaidam la theihnghilh rawh” (Forgive and Forget) tih thuthlung Mizote’n kan pawm hi lawmawm tak a ni a. Chuti ni lo se la chuan he hnam hi inphumkhat leh thei rual lo khawpin kan inepin kan inchemhar reng mai thei a ni. Hetianga kan awm theihna chhanah hian kan rual-ute chuan kan ram hruaitu hmasa Ch. Chhunga leh Laldenga te kha an fak viau a. An fak tlâk viau pawh a nih a rinawm.

Chutianga kan rama remna chauh ni lo, muanna rei tak kan neiha kan chen hnu-ah, India zalen hlima politics tui nu leh rimchhe tak mai ai a chhia leh tenawm zawk fe kha kan ṭhalai thatchhia leh hman lutuk, pi leh pu leh nu leh pate chawmhlawm ni chunga thawh tur nei lote hian an rawn tharthawh leh ta. Social media hman kan uar tâk hnu a Mizote politics khelh dan tenawmzia leh kan politics tui nut takzia hi sawi-in a siak ta lo. A zahthlâk tih bâkin sawi ngaihna pawh a awm hek lo. Ram hruai hna nena inkaihhnawih lem lo, sum eiruk thil pawh ni lo, an mimal nun thlenga candidate-te bei duh an tam ta mai.

Social media a thu ziak tam leh mi thuziah lo chhânga ngaihdan lo sawi ve tu tam tak hian thil an hriat lohzia leh an chik lohzia an mualpho satliah lova, an mawlzia târlangin an mawng zawng zawng an hlim fo zawk a ni. Political party ruihchilhho phei hi chuan an mawlzia an pholang mai ni lovin ram leh hnam pawi an khawih nasa a, pawi an khawih tih pawh hre lo khawpa mawl an tam hle leh nghâl. He ram leh hnam hian mi taima leh thluak fim a mamawh ngawih ngawih lai-in, politics lama thluak nu but mai leh ram leh hnam tâna ṭangkai lo mihring hi a intodelh mah mah a ni.

Social media rau rauvah Facebook a lo chhuak a, Whatsapp-in a hnung a rawn zui a. Mizote bengverh zawng ringawt ngaihtuah leh ram leh hnam tâna mawhphurhna thinlung pu rêng rêng lo, an thiltih chhuah entu an tam a sum lâkluh leh lâr ringawt thlahlel Youtube hmangtute an lo chhuak ta zêl a. An duhtui loh êm êm dan hi chu kum 1980 chho vela magazine hralh tlâkna tur chauh ngaihtuaha thu dukdak lo zet zet thlenga mi bengverh tùr ngawr ngawra thu maksak leh tenawm thleng pawha chhuah duh hunlai, kum 40 kal ta (hun thim)-ah kan kir leh a ni hawt mai.

Youtube a ni emaw, social media dawhsan dang emaw a kan thlalak che thei leh che thei lo pho chhuahte, kan thurolum leh mi thuziah kan chhanna zawng zawng hi a en thei tùr leh chhiartu tur phal chin leh khuahkhirhna a awm tawh si lova. Kum tling lo thlengin an hmu ve thei vek a. Hei ngat hi chuan politics tui nu tawh sa a tihnut belh bâkah kan khawtlâng nunah a ṭha lam aiin a chhe lamah nghawng na tak a nei ngei ngei dawn tih hi hriat sa a ni a. A pawi thui dawn ngawt mai.

He lama inzirtirna ṭha hi kan mamawh a. Chumi piah lamah chuan thuneitute pawhin khauh leh khawng taka dan an kenkawh a hun ta takzet mai. Chutih rual chuan hna thawh tum lo mi thatchhia leh phunchiar, a ṭha lam ni lova, a chhe thei ang bera midang puh chingte hi kohhran leh khawtlâng hruaitu lam pawhin an hmalakna tùrah an ngaih a, an pawm a hun tawh a ni. Mi awmawl leh rilru ngaihtuahna awmze neilote thinlung chu Diabawla hnathawhna hmun a ni tih hi kan hriat reng a pawimawh tawh tak zet a ni.