TRANSPORT

Hman deuh tawh atanga Central YMA lamin an buaipui-a an lo enthlak zui fe tawh leh sorkarah pawh lehkhate thehlut a chhui chiang tura an lo ngen tawh, Luangmual rama Mizo Carbon Products chungchangah thu thar kan hre leh ta a. Pu P.L. Liandinga’n Facebook kaltlanga a sawmna chhangin kar hmasa khan mi thenkhatin a hmunah an zu tlawh a. A hmuna zu hmutute hian an hmuh tum angin a lo ropui lem lo mai pawh ni lovin hnathawh nei awmin an hmu lova, chuti chung chuan cheng vaibelchhe 10 leh nuai 34 zet an bungraw phurh man (central transport subsidy) an dil mek lawi si a ni awm e.

He thil sawngbawlna hmun (industry) chungchang hi sawi fiah deuh hlek a ngai a. Lungalhthei thlitfim (coal processing) chu an thawh ber nia inchhalin February ni 14, 2012 atanga hna thawk tan anga insawiin sorkar phalna nei an ni a. October 1, 2012 leh December 31, 2012 inkar (thla 3) chhung khan Meghalaya-a Khliehriet atangin lungalhthei metric ton 3,690 zet chu truck 363 hmangin Mizoramah an phurlut nia sawiin an lungalhthei phurh man hi Rs 1,16,84,250/- a ni a. He an thil phurhna atan hian Hauva Filling Station atangin diesel (HSD) Rs 1,27,447/- man an lei niin an insawi bawk a, mahse, he Filling Station manager chuan diesel hi Mizo Carbon Products te hian an leilo niin Central YMA hruaitute a hrilh thung nia thudawn a ni.

Central YMA hruaitute sawi dan chuan Mizo Carbon Products neitu hi Ravi Gulgulia a ni a, lungalhthei phurhna’n hian Zoram Transport Company, Zemabawk ami an ruai thin niin an sawi na a, Zemabawk Local Council leh YMA hruaitute’n an vengah Zoram Transport Company a awm tih an hrelo. An lungalhthei thlitfim sa metric ton 321.26 chu Rs 26,23,023/-in Lengpui-a Central Lime Industry hnenah an hralh niin an sawi a. Lengpui khawtlang hruaitute erawh chuan he industry hi a hming chauhva awm ve leh hetianga lungalhthei tam tham lei thei tur nia an hmuh loh thu an sawi. Central YMA hruaitute’n an sawi zel dan chuan he thila inhnamhnawih company 3 - Mizo Carbon Products, Zoram Transport Company leh Central Lime Industry te hian HDFC Bank-ah account an hawng vek a, chu’ng an bank account-te a vaia khawih (operate) tu chu Mizo Carbon Products-a an Manager Vimal Kishore a ni.

A hma lama kan sawi tawh ang khian Meghalaya aanga Cachar thlengin truck 363-in lungalhthei an rawn phur chhova, Cachar atanga Aizawl daifem Luangmual thlengin truck 222 hmangin an rawn phur leh thung a. Vairengte-a Taxation Check-gate Inspector te’n truck 222 in a kaltlang ngei niin an lo hriatpui thlap a, chutiang bawkin Industries department hnathawkte pawhin an hriatpui bawk a. Chutih lai chuan lungalhthei laih chhuah ve ngailohna Mizorama heti zat zat lungalhthei rawn lut hi a a tu-khaw-kha mahin an lo hre pek lova; an dahna leh sawngbawlna hmun nia an sawi Luangmual michengte pawhin an hre lemlo niin a lang a; a mak fu niin Central YMA hruaitute chuan an sawi a ni.

Vanglaini-in Right to Information Act, 2005 hmanga Industries department a zawhna chhanna atanga a lan danin Mizoram sorkar hnuaia State Level Committee chuan Mizo Carbon Pro-ducts tanpuina atan hian sorkar laipui-ah cheng vaibelchhe 3.4 a dil sak tawh a. January 1, 2013 leh September 30, 2014 inkar chhungin Central Capital Investment Subsidy (CCIS) atan cheng nuai 93.90 leh an thil siamchhuahna tur hmanrua (raw material) phurhna senso sorkar laipui-in a tumpui ve tur Central Transport Subsidy (CTS) cheng vaibelchhe 2.47 an dil a. Chu an dilna, District Industries Centre, Aizawl-a an thehluh chu rem tih puiin State Level Committee chuan an dil zat ang hi pe turin sorkar laipui-ah rawtna an siam sak a. Hemi hnu hian Mizo Carbon Products hian CTS atan cheng vaibelchhe 10 leh nuai 34 dilna chu Aizawl DIC-ah thehlut leh tawhin SLC hian a pawmpui tawh bawk niin Central YMA hruaitute chuan an sawi.

Kan thian pakhat, a tak taka industry dina kum tam tak Printing Press lo enkawl tawh (tuna offset press kan tih ang chi awm hma daiha lo nei tawh)-in a sawi dan chuan Central Transport Subsidy hi a tak taka industry neia thawk tak tak leh dik taka dilte tan hmuh hleih theih a ni lo. Chu kan thianpa ngei chuan an lehkhapuan leh thil dang phurhna senso behchhanin CTS hi a dil ve a; an phur ngei tih chianna ‘Invoice’ te a thil tel ve thlap chungin cheng khat mah a hmu ve theilo. Chutih laiin a tak nilo, Industries department-a hetiang lam khawihtute’n invoice lem an siam sak, an buaipui sak vek a; industry neitu (leh nei chiahlo pawh an ni awm e) nen a hlawkna insemin thil an ti a. Chutianga tih chuan hmuh a awl em em a; a dik taka CTS dil chu hmuh theihloh tluk niin a sawi.

Kan Mizoram, Kristian za a za awma inchhalna; Pathianni-a mahni in rauhsan thak khawpa Bible leh Kristian Hlabu zakzeha inkhawm thinte chenna ramah hian he thil fello hi hun rei tak a kal tawh tih chu he Mizo Carbon Products thawnthu hian a rawn hailang chiang ta hle mai.

He industry neitu hi hnamdang (kan politician-te’n ‘Ringlo mi’ an tih zing ami) ni mah sela, diklo taka sum leh pai an hmuh theihna kawnga tangkai berte chu Mizo Kristian (inti) official-te an ni zel tih hi hai rual a ni lo. India sorkar leh state sorkarin industry dintute hmakhua atana dan tha tak tak an siam diklo taka hman kawih theihna remchanga la thinte hlawkna ramah Mizoram hi siam mek a ni. Dik taka thilti-a dilna siamte aia diklo taka sum hmu tura thiltite an hlawkna ramah kan siam mek a, nakina tih tak zeta thil la ti turte hmakhua an tichhe mek a nih hi.

A ti tak takte aia a tilo leh a lema thiltite’n hlawkna an telna ram chu ram hausa leh changkang a ni thei lovang a, ram nuam phei chu a nilo hlei hlei ang. Mizoram hi a taka thiltitute’n an chanvo chang lova a lema thititute dinchanna rama kan siam zui zel a nih chuan a mawhphurtute chu Mizote hi kan ni ang a. Diklo taka thiltitute hian anmahni ngawtin an ti theilo, thiltitheitu an tanrualpui a ngai a. Sum duh avanga diklo taka thiltitute duhamna avanga vur belh mektute hian Mizoram an tichhe mek a, dodal lova ngawi renga lo thlirtute pawhin mawh kan phur a ni tih hriat a hun ta hle mai.