KUMTHAR THUTIAM

Hman kumah tawh khan kuhvakhawr ei ka sim a. Ka inchhirlo hle. Kuhva hi ka heh em em mai ṭhin a, ka ngeihlo tih ka hria a, ka pumnat chhan tam ber kha ka kuhva ei luat vang a ni. Chubakah hnam dang zingah a inthlahrunawm ka ti bawk. Mahse, hei ka sim a, tun thleng hian min tibuai ta lova, ei ka chak tawh hek lo. Kuhva ei ka chin ṭan hnu deuhva ka chin, sahdah hmuam hi ka ti rei ve hman hle a. Kum 2009 kum tawplam khan ka ngeihloh dante leh Cancer thlen theitu a nih dante ngun taka ngaihtuahin sim ka tum leh ta a. Kumthar thutiamah hmangin kum 2010 January ni 1 aṭang khan ka nghei leh ta a. Ka ch^k leh chhin tawh lo.

Mi ṭhenkhat anmahni kumthar thutiam ngei vawng hlenlo ka hmuh ṭhin avangin tunhma chuan Kumthar thutiam hi ka ngai thutak ngai lem lova. Mahse tih tak takna n>n chuan tam takin an lo hmang ṭangkai a, thil ṭha tih zuina’na hmang an awm a, engemaw simna’n tala hman pawh a ṭha tho mai. Chuvangin kumin, 2015-ah hian kumthar thutiam ṭha tak tak kan tihpuitlin ngei tur neih tum ṭheuh i la a ṭha hle ang.

Kan sorkar hian lei (bridge) chim a awm tawh lohna turin ‘Kumthar Thutiam’ nei teh se. Lei chim chhan kha tute’n emaw a kilhna herh thlawna an rubo ṭhin a nih chuan a ven hna thawk mai se; a vengtu ruai sela chumite chuan chhun zan zawmin veng sela, ‘employment’ siam belhna a ni ang a. Lei chim avanga nunna chan a awm loh pawhin a chim avanga siam ṭhatna senso ai chuan a vengtu rawih man kha a tlem f> zawk ngei ang. Thi an awm phei chuan a man chh<t phak a nilo leh nghal. Chutianga lei kilhna rubo an awm a nih chuan sorkar mite’n endik reng sela, a hlauhawm a nih chuan lirthei leh mihring kal tlang tir lova khar ni se. A kilhna rubotute pawn an laka FIR thehlut satliah mai lovin hrem ngei ni se. Contractor tu-emaw (kan duh sak zawng tak hnamdang contractor pawh ni se) motor rit lutuk chu lei nghetlo zawh tir phal hauh loh ni se.

Lei chim pakhat kha mipui nawr chim ni khan kan sorkar hotu ber khan a sawi a. Chutiang chu a thlen tawh lohna’n kan sorkar hian lei chungchangah ‘Kumthar Thutiam’ dang a neih a ngai ang. Mipui nawr ngai lovin a hun takah lei reng reng dawh zawh vek ni tawh sela. A huna hna zolo contractor chu hrem ni ngei sela; an thawh ṭhatloh viau phei chuan ‘blacklist’ ni se. Mipui nawr ngai hauh lova hna reng reng chak taka thawh ni tawh turin thu tiam teh se.

Sorkar hnathawk ṭhenkhatin thla tam tak hlawh an lak theih loh fo ṭhin ti tawp tawh tur leh sorkar sum dinhmun ti ṭha turin ‘Kumthar Thutiam’ kan mamawh hle bawk. Kan Finance Minister hlun Pu J. Lalsangzuala (RIP) khan Mizoram sum harsat chhan chu nawm chen vang niin a sawi kha a ni a; kha kha a la dik reng. Sorkar hnathawk hlawh ṭha tak neite’n sorkar thil, lirthei leh an hnuaia thawkte leh bungraw dangte kha anmahni mimal ta niawm takin nawmchenna’n an hmang fo. Chuvangin, hetiang atana sum hman tam lutuk (wasteful non-plan expenses) hi tihtawp ngei ngei a ngai a. Chutianga sorkar hnathawkte hr>k thei tura ‘moral right’ an neih theihna tur chuan kan ram hruaitute hian sorkara ṭhibeh lianho tana car thar manto lei chiam chiam leh mipui thlan tlin zawng zawngte term tina motor an lei sak ziah ṭhin te tal hi chu an tihtawp ve a ngai thung ang.

Chhiatna, a bikin mihring thihna hial a lo thlenin sorkar hian ngawi mai tawhlova hetianga mawhphurtute hrem ngei tur hian kumtharah hi chuan thu a tiam a ngai a ni. Mizo nunna hi mihring dang nunna ang bawkin a hlu tih hre thar sela, tumah kan arte thih mai mai tawh lohna turin tih takzetin ṭan a la tur a ni ang. Ram pawna ṭhalai hnathawk tura chhuak duh leh tling an awm chuan a ṭha e. Chutiang ti thei chu ngah deuh deuh turin kum tharah hian ṭan i la teh ang u. Mahse, chutianga ṭhalaite tir chhuak tura buai phi chung lo hian sorkar hi chuan Mizoram ngei hi hnathawhna tlakin siam zawk teh se. Sorkar hna siam belh leh thun belh lam ni lovin kan ṭhalaite thawh theih tur (employment opportunity) siam zawnga ṭan lak a ṭul a. Burma ram tlakchhiat vanglai ang maia ram ṭhenawma hnathawh tur zawnga chhuak sup sup lo theilo ang maia kan kal hi chu inenlet leh teh se. Chumi rual chuan dan bawhchhetu hrem ngam, chawi­mawi t<r chawimawi ngam sorkar nih tum tawh bawk teh se.

Kohhran hruaitute hian kum tawp dawna thilthleng kha inenletna’n hmang sela, chu chuan an Kumthar Thutiam ṭhin hi her danglam teh se. Hindu hovin Muslim leh Kristian sakhaw betu ṭhenkhat chu Hindu-ah an inleh let tir lui nia sawi a ni a. Chumi rual chuan BJP kaihhruai sorkarah hian Hindu kulmut pawl Sangh Parivar an tih maiho hi an tlangn>l hle nia ngaih theihin thil a awm a. Hetiang hi sakhaw tih bik neilo (secular) sorkarah chuan thil awmlo tura ngaih a ni a. Hetianga thil awm nia an sawi hi kan duhlo ang bawk hian kan kohhran hruaitute pawhin an sakhaw/kohhran duhdan tipuitling tura sorkar tihtir leh nawr lutuk ang chi hi a rem lo ti a an harh chhuah a hun a. Kristian ni velote leh Kristian pawh ni se kan kohhran rin dan ṭawmpui ve kherlote thlengin sorkar thlazar hnuaiah an awma, kan duhdan leh rin dan zu barhluih hi sakhaw zalenna tihbawrhbanna a ni tih hriat thar a ṭul khawp mai.

Central YMA hruaitute hian YMA zahawmna humhalh tlat turin Kumthar Thutiam siam sela, he pawl zahawm leh nelawm tak hi pawl hlauhawm leh ṭihbaiawm taka ngaih a nih lohna turin ngaihtuahna an s>n thar a pawimawh ang. Chhiartute Kumthar Chibai vek u le.