CHINGPEN!

Hman deuh tawh khan kan thianpa Officer pakhat chu a motor a nuar tlat mai a, Workshop-a a kalpuina-ah a chhan an hre thei lawk lova. Mechanic pakhat chuan a petrol chu paih ruak veka a thar hlak thun turin thurawn a pe a; petrol thianghlimlo/ dal a thun vanga a motor chu nuar a nih a rin thu a sawi a. Aizawl Hunthar Veng-a ‘Police Petrol Pump’ an tih mai, Fire and Emergency Services ho Filling Station atang khera petrol lei turin a rawn nghe nghe a. Chutiang taka a tih hnu chuan a motor chu a lo tha leh ta a; a kawl chhung khan khatiang tak harsatna kha a nei zui talo niin a sawi.

Kei ngei pawh hian harsatna ka tawk tawh a. Kan motor siamthatu Mechanic chuan Aizawl-a ka petrol lakna thin Petrol Pump/ Filling Station atanga la tawhlo tura thurawn min pek bakah Petrol thianghlim an zawrhna Filling Station 4 vel a that/ fim dan indawtin min hrilh a. Lirthei-a Petrol thianghlim lo kan thuna engine-in a tawrh nasat theih dan leh Petrol thianghlim leh tha chauh kan thuna kan lirthei engine a tlo bik zia min ‘sermon’ khum chiam bawk a. Tunah hi chuan kan inhlan chiang ta khawp mai. Ani pawh hian Police Petrol Pump chu a tha ber zing ami nia a hriat thu a sawi a; a chhan chu thununna hnuaia awm petrol phurtu driver-te’n an pute an hlauh em vang nia a hriat thu a sawi a ni.

Mizoram pawnah hian lirthei hmangin kan zin ve zeuh zeuh va, kan state pawna petrol kan lei-in an pawlh dal leh a thalo tia an sawi ka hre ngai lova. Kan zawh chian ngai loh vanga hrelo ka nilo. Silchara in leh lo nei, Mizorama hnathawk, ka Vai hmelhriat pakhat chuan a hriat chinah petrol pawlh dal a awm ngailoh thu huaisen takin a sawi a; “Mizoram ang a ni lo,” a ti tlat zu nia. “Ringlomi” tia kan hotute’n an sawi thinte’n rinawmna kawnga (za-a za deuhthaw Kristian awmna state-a cheng Mizoram) min ngaihsan viau loh avang hian tlawma han lak vak erawh chu a tih chi lem lo chu a nih hi maw. Insawifiah kan tum poh leh kan nihna kan hailing ting mai ang tih a hlauhawm.

Assam chauh ni lovin Meghalaya lama kan thiante ka’n zawh kualin Petrol Pump-te an sawiselna ber chu teh tlin chiah loh an ching tih a ni a. A pawlh dal lam chu an sawi ri ve heklo. Tling lova pe chhuaktu zingah hian ‘ringlomite’ chauh lo pawh an tel ve niin an sawi bawk.

He’ng thenawm state pahnih-a ka mi rawnte hian petrol pawlh dal a nih veloh chhan an sawi chu thuneitute, a bikin an District Bawrhsapte’n khauh taka dan an kenkawha thiltisual an hrem nat em vang a nih an rin thu an sawi.

Eirawngbawlna Gas tihchingpen chungchang phei hi chu an rawn phurh luhna National Highway dap chilha Central YMA te’n an umzui fe chung pawhin tunhma angin kan gas cylinder-te hian a daih rei thei ta reng reng lova. Kan chhungte’n an sawi dan phei chuan tunhma nena khaikhin chuan tunlai gas cylinder-ah hian a zahve aia tam deuh chauh an thun a ni mai awm mang e tih tur a ni. Hei pawh hi ‘ringlomi’ tia kan sawite chenna kan state thenawmah chuan a awm ve ngailo niin an sawi a; a chhan pawh sorkar (District Administration) an khauh em vang tho niin an sawi a. Chubakah Mizorama thil thleng ang hi awm ve sela chu mipui thinrim an che na ngawt ang an ti a ni.

Hemi chungchangah hian thu lungchhiatthlak ang reng tak chu thuneitute’n an mawhphurhna an la zam lutuk thin hi a ni. Tunlaia lar ta em em, Aizawl chhimlam daifema Zampuimanga Hmun bul kan kal tlang lai sawn eirawngbawlna Gas phur truck lian bulah hian truck te chi leh taxi hi a lo ding nual a, eirawngbawlna gas bur hi an lo hlang thla luai luai mai a. Legal Metrology Inspector pakhat ka phone a; ani chuan Mizoram pawna a awm thu sawiin an pu pakhat phone number min pe a. Mahse, chu ka officer va phone chuan a lo uksaklo hle. “LPG Distributor-te hian an Kudam atan Explosives Licence an nei a; chutah chuan dah phawt a, chuta tanga pek chhuah tur chu ni-awm tak a nia; hetianga kawngpui-a sem mai hi chu dan kalh a ni lo’m ni?” te ka’n tih ngial pawhin a benga-rawng-ah a thun duh lova; “Dan ang chu nilo mahse, a awlsam zawk a lawm,” ti te-in min chhang liam piat piat a. Kan kalna turah kan tlai kan hlau bawk si avangin khua leh tui tha nih zui kha ka tlin rei ta biklo a ni. Khatianga a duh duh lei theiha kawngdunga an thei-sem phawt chuan a changtu tur diktak chanvo tam tak chu a heu ngei ang tih hrethiam pha turin mithiam nih a ngailo.

Kan ramah hian Petrol pawlh dal emaw eirawngbawlna gas khawih chingpen emaw bakah mipui pawikhawihna ang chi reng reng a tamna chhan hi za-a za Kristian kan nih vang a ni lova, ringtu kan intih vang pawh a ni vek biklo. Thuneitute’n dan an kenkawh tak tak loh vang pakhat a ni.

Khauh taka dan kengkawhin dan bawhchhetute hi dan ang takin han hrem zat zat sela chuan tam an hrem hman hma-in thil fello leh dan bawhchhiatna tam tak hi chu a reh vek em loh pawhin nasa takin a tlem ngei ang. Mahse, dan kengkawhtute’n an ken’kawh tak tak loh avang hian mipui pawikhawih hi a hlauhawm lo em em a, sorkar leh mipui hi a paurau apiangin an chungtlak ta mai a ni.

A hma a kan sawi ang deuh khian eirawngbawlna gas tihchingpen chungchang a ni emaw, petrol pawlh dal a ni emaw thuneitute chuan a takin dan an kengkawh lova. Hetiang a nih avang hian a lawm, danin dan kengkawh tura a ruat hauhloh YMA te leh pawl dangte’n dan kalha dan kenkawh a tul tlata an hriat chhan tam tak hi. Mipui pawh hian petrol pawlh dal leh eirawngbawlna gas khawih chingpen ang chite hi kan pawmzam mah mah a, a buk tlinglo pawh la mai duh zel kan nih avangin misual tan nawr kan nuam em a ni.

Sawi tawh angin ‘Ringlomi’ kan tih te zinga thlenglo, Mizorama nasa taka thleng mek hi inenletna’n kan hman a pawimawh khawp mai. A lang chin chauh leh a mawi chin chauh zawnga sakhawmi kan nih chhan hi inen kan ngaih lai chu a ni. Thingzai ni se a te telh telh a “Kohhran upa chartin” tithe chu kan sawi duhdan a ni ta a, lung kan chher pawhin ‘Double Cubic’ meuh pawhin tunhma Cubic lung a tiat ta mang lovang tih hlauhawm a ni ta. Thlaraumi, BiakIna lam derh derh awm tak mi huan/ lova thlai ilo thil ruk hreh hauhlo lah chu kan ngah ta. Ringlomote’n an tih duh hauhlo uarna ram kan lo ni ta leh kan depde ta lutuk hi mawhphurtu chu an awm ngei ang. Sorkar, kohhran leh pawl hrang hrangte inenlet a tul takzet a ni.