GORKHA-TE OBC

Central YMA thuneitu sâng executive committee hi Thawhṭanni hmasa (August ni 5) zan khan an ṭhukhawm a, chutah chuan Mizoram Gorkhali-te’n Other Backward Classes (OBC) dinhmun an dil chungchang an sawiho tih a tuk Thawhlehni a an thuchhuahah khan an tarlang a. “Central YMA chuan Mizorama Gorkhali-te’n OBC status an dil tirh aṭang khan Mizo hnam himna khawih chhe thei ni a a ngaih avangin a lo dodal tawh ṭhin a ni,” tiin an thuchhuahah chuan an ziak a. Mizo hnam/Mizoram leilung fate tan Gorkhali-te OBC dinhmun pek hi kawng hrang hrangin a him dawn lo ni a an hriat thu leh chumi avang chuan Gorkhali-te’n OBC dinhmun an dil hi pek ṭha ti lovin a tawp thlengin an dodâl dawn tih an tarlang a ni.

Hman deuhah tawh khan central YMA office bearer-ah pawh thlan tlin lo ni tawh leh central executive committee (CEC) a hun rei tak lo awm tawh ṭhin hian central YMA hruaitu lawk chin (office bearer) hi a thlan a thlan ngat a ni chungin a luh chhoh dan kawng min hrilh a. “Mi fel leh fing nih a ngai hranpa lo. A kailawn leh a ‘kaida’ hi a awm ve a. Vanneihthlâk taka lut fuh tân chuan kawng a tluang purh mai a, president han nih pawh hi rin ai-in a awlsam thei – YMA inkhawmpui liana inthlan kuma vote zawn kan chin tâk hnu phei kha chuan,” a ti mauh mai.

A hua hua chuan lo haw mai se la, a pawi lem lo. Central YMA president hial leh dinhmun pawimawh dang lo chelh tawhte han hriat chian hian kan central YMA hruaitu hlui sawi hi a dik ngei ang tih a nemnghehna ni-ah a ngaih theih a ni. Hetianga kan sawina chhan chiang tak pakhat chu hmânah tawh khan central YMA hian Aizawl Seventh-Day tlâng leh Vaivakawn bawr velah Pathianni-a dawr hawn an lo khap tawh a, tunlai ṭhangthar tam tak chuan an hre pha tawh kher lovang.

Chuta central YMA executive committee ṭhukhawmin an rél lai a general secretary dinhmun chelhtu Pu P.L. Liandinga khân nasa takin, CYMA ziaktu lian a nihna dahṭha-in hnial mah se a tlu ta tho va. “Kha kan thuchhuaha ka hming ka ziak kha ka hun kal tawha pawi ka la tih ber a ni a, lo bang ta zawk ila a ṭha tùr,” tiin a inchhir zia ka hnenah ngei a sawi a ni. Kha tah khan CYMA khan Sabbath (Inrinni) serhtu kohhran/pawl leh mimal zalenna rapbet zawngin thutlùkna râpthlâk tak, India ram constitution kalh an siam a ni.

Hei bâkah hian YMA inkhawmpui liana thurél tùr, Mizorama Panchayati Raj leh Nagarpalika (phairama an tih anga thingtlâng leh khawpui inrelbawlna tualchhung sorkar) hman ve ni se tih vawi 2 a lut a. Putluh a nih hnu-ah helam lo zir chiang tawh tak pakhatin Mizoram leh Nagaland sorkarin an duh ve loh chhan a rawn sawifiah a, sawi zuitu tùr awm tawh lovin he thulut (agenda) hi a tla dér a ni awm a sin. Hmâna Champhai YMA inkhawmpui a Chakma autonomous district council ṭhiah rawtna pawm huk ang chi kha thil awmze nei lo hi an pulut tam ve ta khawp mai.

Hetianga kan sawi chhan chu Mizo hnam pawl lian ber leh zahawm taka ngaih hian Gorkhali-te OBC dinhmuna an din an dodal danah hian an ngaihtuah chiang lova an zir thùkin an chik ngai lo tih a lan chian êm vang a ni. Mizoram sorkar home department hian Mizorama chéng Gorkhali-te’n OBC dinhmuna din ve an dilna zir chianga ngaihtuah tùr hian Permanent Body a din a. Kalphung pangngai-ah chuan a dintu sorkar hian Permanent Body rawtna hi a pawm ngei tùra ngaih a ni bawk.

Eng pawh ni se la, Permanent Body-in August ni 26, 2011 a sorkara rawtna an thehluh tlawhchhan a Gauhati High Court judge pakhat ṭhutna bench-in thutlukna a lo siamah khan chiang takin a inziak a. OBC dinhmun chang thei tur Mizorama Gorkhali-te chu an thlahtu (pi leh pu leh nu leh pa), January ni 26, 1950 hma lama Mizorama lo chêng nghet an ni tùr a ni, tih a ni a. Chu bâkah chuan thu delhkilh an siam nghâl bawk a. Chu chu – “that whatever benefit(s) /reservation(s) goes with OBC status should solely be for the purpose of employment(s)/benefit(s) under the Government of India and in no case and under no circumstances in future shall the same be applicable for/under the Government of Mizoram or any of its undertakings,” tih a ni.

Mizorama Gorkhali-te hi OBC dinhmun pek lo ni ta se la, chumi hlawkna emaw hna leh thil danga OBC nihna hmanga hauhsak bik an nihna chu India sorkar hnuai-ah chauh a ni ang a, tun hnu lo awm zel turah pawh Mizoram sorkar emaw a hnuai a awm (corporation leh a dangte)-ah hna leh thil dangah hauhsak bik an ni ngai lovang, tihna a ni awm e. Chutiang a nih lai chuan hauhsak bik vang ni hauh lovin Mizorama chêng nghet Gorkhali-te hi Mizoram sorkar hna-ah an lùt ve zeuh zeuh reng a ni tih tam takin kan hre kher lovang a, an chanvo dik tak a nih avangin an lùt ve a ni mai a, kan sawi mêk zawk chu a bika hauhsak (reservation) chungchang a ni.

Chiang taka kan hriat ngai chu Mizoramah hian sorkar laipui ministry hnuai-ah department/institution engemawzât a awm tih hi a ni a. Chù’ng zingah chuan Mizoram University, College of Veterinary Sciences, RIPANS, NIT Mizoram leh Horticulture College te hi kan hriat lar zual a ni awm e, a bâk pawh a awm nual mai. Ngaihtuah chiang lova kum tam tak Gorkhali-te OBC dinhmuna ding tur kan lo dodal tawh ṭhin avang hian heng institution hrang hrangah hian kan ṭhenawm, kan ṭhian leh kan chhungkhat hial pawh ni kumhlunte’n hna an hmuh theih loh phah tawh a. ṭhenawm state-a kan unaute laka hleilentu Meitei-ho leh state danga hnam dangte tan kél-kawngkâ kan hawnsak reng tihna zawk a ni.

June ni 8, 2017-a Gauhati bench (judge pakhat ṭhutna) leh nikum February ni 9-a acting Chief Justice leh judge pakhat ṭhutna bench-in thutlùkna an lo siam tawh hi zir chian chuan Permanent Bench-in Gorkhali-te OBC dinhmun pe tura rawtna a lo siam hi dan hmanga hnialna tur a awm lo tih a chiang hle. A thuhrimin kum 2001-ah khan Mizorama Gorkhali awmte (kum 1950 hma lama Mizorama lo awm tawh leh an thlahte) hi mi 4,453 chauh an ni a. Home department-in an chhiar (census) hnuhnung ber, kum 2021 (kum 20 hnu-ah) pawh 7,686 chauh an la ni. Chhim lama ramdangmi dan kalha lo lut an tam avanga pung thur thur ang an ni ve lo.

A thuhrimin kum 1966-a MNF-in zalenna an sual ṭan khan Gorkhali 10 ai a tlem lo chu Mizoram zalenna sualin an rammu tihte hi theihnghilh mai mai chi a ni lova. Mizoram leh hnam tâna an thawhna hi hriat reng tlâk a ni zawk. Chu mai a la ni lo. Kum 2020-2021 a Mizoram leh Assam ramri buai lai khan Gorkhali paho rual chu Mizoram ramri veng him tùrin an khukri nen Vairengte lamah an phek thla tihte a hunlai khan social media-ah an ziak tlat a ni.

Chutih rual erawh chuan hetianga Mizoram tâna an inpêkna leh an lo thawh tawhna avang hian Mizoram a hnam hrang hrang chéngte zingah OBC dinhmun hi an phu a ni kan ti lo. Dan ang thlapa home department-in OBC dinhmun an dil ve chungchâng ngaihtuah tùra a din Permanent Body-in rawtna a thehluhah Mizorama chéng Gorkhali-te OBC dinhmun pêk ve hi a thlawp (recommend) a. Chu chu High court pawhin a nemnghet tawh kan ti mai a ni.

Tùna CYMA hruaitu ni mêkte hi lehkha thiam tak taka ngaihte an nih lai hian an zir chiang hman lo emaw, peih lo emaw a nih a rinawm ta ber a. A nih loh vêk chuan thil tak taka thutlukna huai taka siam ngam ai a inthlan leh huna tlin theihna tùr ni a hria a thutak pawm ngam lo an ni ngei ang. Keini kan pian hma aṭanga Mizorama lo inbengbel tawh thlah kal zel, India Constitution ngei pawhin ram leilung fa diktaka a pawm tawh leh kan ṭhenawm leh ṭhian kumhlun, a ṭhente phei chu kan famo leh makpate chanvo rapbet a, an chanvo diktak tùr an chan theihna tùr daltu nih hi a nunrawnthlak a. Chutih rualin state ṭhenawma Zofate laka hlei lentuute aia duhsak zawk ang maia thil kan ti hi a la pawi thui dawn chauh a ni.

Chu bâkah Mizo tan OBC chanvo hi chan ve theih loh a ni. Hetianga kan tih zui zel chuan naupan lai a kan zir ṭhin Esopa thawnthu fing ami ui sual ang mai hi kan ni dawn a ni - “Ranthlengah hian ui pakhat hi a mu a, bawngpa buhpawl rawn ei turte chu a lo ngurin a lo bauh zêl a. Bawngpa pakhat chuan, ‘He ui zet hi chu a va sual tak em! Amahin buhpawl chu ei thei lawi si lovin, a ei theite ei chu a phal lova,’ a ti a.