ZU POLITICS

Mizorama Political Party ho hi an Party innghahna thu (Policy) hi a inang deuh thup thup a. BJP te chu kan hre chiang vaklo chungin ram pum huap party leh tualto party te pawh hi chuti takin a danglam vak lo. Inthlan dawna mipui hnena an thutiam leh inzawrhna (Manifesto) phei hi chu entawnin an siam tlang emaw tih mai tur a ni hlawm a. An tawngkauchheh a danglam tih mai chauh a ni. Entirna’n ‘Mizo/Zo hnahthlak inpumkhatna, rorelna khat hnuaia insuihkhawm’ tih ang chite hi chu an telh vek hlawm a. Ngaih pawimawh a hlawh leh hlawh loh chu thudang daih a ni.

Chuti chung chuan ro an rellai leh eptu lama an thut laia an thil sawi leh tihdan chu inanglo tak a ni a. Eptu lama an awm chuan sorkar thiltih apiang a pawng a takin an do fova, rorellai party (sorkar) lahin an hma a sorkar thiltih a bawhzui duhlo chang ni lovin an hma a sorkar hming vuahte thlak an ching a, sorkar hmasa hnathawh kallai an hun lo thlena zawhte pawh an hawng duh manglo bawk thin.

Mizoram hian kum 1972 May thla aṭang khan ama pualin sorkar leh Assembly a nei ve tan a. Assembly inkhawma kan ram hruaitu thlan chhuahte thusawi hrang hrang han chhiar leh hian thusawi thiam tak tak, ama’rawhchu mahni ngaihdan leh dinna nghet (principle) neilo deuh hlir - Assembly chhunga an thutna hmun a zira an tan lam thlak mai zel an ni tih a lang chiang hle a. A bik takin zu chungchang (Zu Politics)-ah hian hei hi a chiang zual a ni.

UT sorkar hmasa ber, Pu Ch. Chhunga kaih-hruai Mizo Union khan zu zuar duhte dan anga zu zawrh phalsak a, zu khuahkhirh (regulate) turin hma an la hmasa ber a. The Mizoram Excise Bill, 1973 chu khatihlaia Finance Minister Pu Khawtinkhuma khan pulutin ni September ni 25, 1973 chawhnu dar 2 aṭangin he dan siam tura putluh hi sawiho tan a ni a. Sawiho zo hman lovin a kar lakah sorkar rintawk lohna motion te sawiho lehin a hnu October ni 10, 1973 khan pawm a lo ni ta a. Khatihlaia eptu Congress MLA te chuan an dodal thu an sawi nasa hle a. (Hemi kum vek hian Mizo Union leh Congress hi inchhun finin an sorkar zui a nih kha). Hemi tuma na taka he bill dodaltute zingah hian Pu Zalawma (L), Pu Lalkunga, Pu J. Thanghuama (L) leh Pu Lalsangzuala (L) te an tel a ni.

He bill hi pawmin dan (Act) lo ni ta mahse dan tesep (rules) siam a nih loh avangin a taka hman a ni lova. Congress (Merger Congress an tih mai) sorkar a tlak hnu-ah Brig. T. Sailo kaihhruai People’s Conference (PC) an lo sorkar ve leh a. Anni hunah hian dan tesep (The Mizoram Excise Rules) chu siam nih thu a hnu-a Chief Minister Pu Lal Thanhawla’n Assembly-ah a sawi chhuak a. Khatihlaia Chief Minister Brig. T. Sailo khan inthlan a hnaih tawh avangin rules siam hi hman rihloh nise tiin file-ah a ziak niin Pu Lal Thanhawla chuan a sawi a. Chumi behchhan chuan kum 1984 kum bul lam aṭanga sorkarna chelh tan Congress sorkar chuan he rules siam zawh tawh hi November ni 15, 1984 khan Assembly-ah an pharh a. A hnu lawk aṭangin zu dawr hawn phalna turin sorkarin hriattirna a chhuah ta a nih kha.

Rammu MNF te lo haw-in kum 1986 chawhnu lam aṭangin MNF leh Congress sorkar intawm a lo ding a. Kum 1987 Assembly inthlan hnu-ah MNF sorkar lo dingin anni hian Congress sorkar thiltih chu a ngai angin an kalpui a. Chief Minister Pu Laldenga thusawi dan aṭanga a lan dan chuan a sorkar chuan dan anga zu zawrh phal chu chhunzawm zel a duh niin chiang takin a ngaih theih a. Pu Laldenga hian zu chu mihring thian emaw hmelma emaw ni lovin ‘thil’ a ni a; a duh chuan an zalenna hmangin in sela, in duhlote chu tihluih tur an ni lo a ti a. Zu ruih vanga dan bawhchhia chu na taka hrem tur a nih thu leh mahni duhdan leh ngaihdan chu midang barhlui lovin midang duhdan leh zalenna chu zah sak tur a ni, tiin thiam takin a sawi thin a ni.

Thla 19 vel a sorkar hnu-ah Pu Laldenga sorkar chu a tlu-a kum 1988 chawhnu lamah Mizoram chu President’s Rule hnuai-ah awmin kum 1989 kum bula Assembly inthlanah Congress leh MNF (D) ṭangrual chuan hnehna an chang a. Mizoram chu zu zawrh phalna pe chiah silo, zu khap bawk chiah si lovin hun engemaw chen a awm chhova. Kum 1993-ah Congress leh MJD (tuna MPC) tangrualin sorkarna chang lehin kum 1995 khan zu khapna dan ‘Mizoram Liquor Total Prohibition Act, 1995’ chu siamin February ni 20, 1997
aṭangin zu khapna hi hman tan a ni ta a. Chu chu tha lova hria-in kum 2008 kum tawp aṭanga sorkar leh tan Congress sorkar chuan an term 2-na-ah Mizoram Liquor Prohibition and Control Act, 2014 chu siamin nikum March thla laihawl aṭang khan MLPC Act hmang hian zu dawr hawn ṭan a ni ta.

Eptu party lian ber MNF chuan sorkarna an chan chuan MLPC Act hmanga zu zawrh phalna hi tihtawp an tum thu tunhnaia an puan bakah Chief Minister hnenah lehkha thehlutin zu zawrh phalna pek mek chu titawp turin an ngen a ni. Chief Minister hnena an thu thehluh point hmasa ber hi a nuihzatthlak ngawt mai. “Zu zawrh tulna chhan nia sawrkarin a sawi pakhat chu Chhiah (Revenue) tam tak lain kan hlawk phah dawn a ni tih kha a ni a. Tunah hian kan hriat dan chuan Sawrkar hian chhiah aṭangin cheng vaibelchhe za vel chu la tawh niin kan lo hria a. Chutih lai chuan zu leina man atan a let li vel vaibelchhe zali zet chu Mizoram pawn vairamah Mizo mipuite pawisa a luang chhuak ve thung niin kan hria a. A nihna takah chuan cheng sawm tihbo zawn nan cheng sawmnga seng ang kan ni. Financial chhiarkawp nuihzatthlak tak leh awmze nei hauh lova Revenue lak luh tum leh sawimawina niin kan hria” an ti a ni.

Mizorama kan hriat chian em em chu zu khap bur lai khan tun ang tho hian a duh tan chuan zu lei tur a awm reng a; a man erawh chu a to. A in mi leh sum nei deuhte sawi dan chuan Aizawl khawpui hmun hrang hrangah hian lei theihna bik a awm reng a, tuna Wine Shop ang hian an hung tlar ve lem lova; duhthlan tur a awmlo mai chauh a ni. Chumi awmzia chu MLTP Act hman hunlai pawh khan phailam aṭangin zu hi tam tham tak lakluh reng a ni a, mahse, chu’ng zu lakluh aṭang chuan sorkarin chhiah a lalut velo mai a ni zawk a. Ui-awm tak a ni. Chuvangin tuna sorkarin chhiah a la ta hi a hlawk hle a, eptu nih vanga thu ngaihsual theih puan kher hi ram tana tha ni lemin a lang lo. Zu politics-ah hian sorkarna chelh tawh party te hi tumah insawisel thei an awm lova, chutih rual chuan ram tana pawimawh - hmasawnna hrang hrang, inkalpawhna, zirna, hriselna leh hnam inhumhalhna atana hna a tam em em laia zu buaipui tawk kan la ni erawh hi zawng a la hniamin thu tak kan la pawh phak lohzia a lang ngawt mai.