THUNEITU TUNGE?

Kan naupan’ lai chuan uniform ha tawh phawt hi chu zaha an thu awih viau turah kan ngai tawp mai a, lal tak leh thuneihna kengtu-ah kan ngai ṭhin. Rambuai chhah vanglai kha a takin kan hre pha ve chiang lo chungin India sipai che rawva zual chanchinte kha chu mi sawi kan hre tam a. Keini in ngeiah pawh a ruala rawn luh khup khup an ching a, ka pa kha an man zauh zauh bawk a, chuvangin zah ai mahin a hlauhin kan hlau ṭhin.

Mipui rorelna (Democracy) sorkar hi a hmingah mipui sorkar a ni chungin a huhova mipui rorelna a ni lova, haw haw-a rorelna chu democracy a ni heklo, sapṭawng chuan ‘anarchy’ an ti a. Democracy dik tak chu mipuiin sorkar enkawla mipui tana thawk tur an thlan chhuahte’n ro an relna a ni. Chutianga ti tur pawh chuan roreltu, sorkarna chelhtute khan mimal lal hrawtna (autocracy/ dictatorship) emaw political party pakhat chauh awm phalna Communist sorkar te angin an duh duh danin thu tlukna siamin ro an rel ngawt thiang lo. Dan hmanga rorelna (rule of law) a ni tur a ni. Dan zah lohna leh palzutna, dan hnuaia intluktlanna awm lohna chu Democracy dik tak a ni thei ngailo.

Democracy dik taka kalpuina ramah chuan ram inrelbawlna-ah pawl pawimawh tak tak pathum an awm a. Chu chu a saptawng chuan Legislature, Executive leh Judiciary an ti a, Mizo lungthu pathum anga democracy bel chhuan tlu lova tungdingtu an ni a. Legislature hi Mizo tawng chuan dan siam pawl kan ti mai a; an dan siam angin sorkar (Executive) in hna a thawk ang a; dan bawhchhetu nia sorkarin a hriatte chungthu erawh chu court rorelna (judiciary) hian a khawihin thutlukna a siam thung ang. Chu chu mipui rorelna sorkar inrelbawl dan bulṭhut chu a ni.

Mizoramah hian mipui mimir hi thuneitu ber hre thei lovin kan chi-ai mek niin a lang. Tun dinhmunah hian tunge thuneitu ber hriat theih a ni ta mang lova, hetianga kan awm zel chuan kan chet dan avanga vui liam pawh pawi kan tih loh democracy kuang khuhna-ah perek hnuhnung ber kan kilh ang tih hlauhawm tak a ni ta. A chhan chu democracy-ah chuan dan rorelna a awm tur a ni a, dan rorelna (rule of law) awm tur chuan danin thuneihna a pek thuneitu an awm a ngai bawk. Danin thuneihna a pek ni si, mahni nihna leh thuneihna hmang diklote hremna thlengin fel taka ruahman vek a ni a. Chutiang a nih laia thuneitu ber hriat lohna ram kan nih chuan kan democracy chu ngaihtuahawm tak a ni a, kan inenleta kan insiamṭhat loh chuan thil ṭha duh inti si hian kan ram leh mipui rorelna hi kan tichhe vek anga kan vuiliam mai dawn a ni.

Kum 1972 aṭanga kan neih ṭan kan rama dan siamtu rorel khawl sang ber Assembly chuan dan tam tak a lo siam ve tawh a. Hemi hma, Assam hnuaia kan awm laia Assam State Assembly leh Lushai/Mizo District Council-in dan a siamte bakah rampum huapa Parliament dan siamte, India indan hmaa British sorkar dan lo siam Mizorama hman zui takte nen tam tak a awm bawk. Tunhnaia a dan siam tam tak chu a kengkawhtu tura chu’ng an dan siamin thuneihna a pek Police leh dan kengkawhtu pawl (law enforcement agency) dangte aia kengkawhtu nasa zawk kan nei ta fo mai a. Tlawmngai pawlte kha Police leh Excise and Narcotics department hnathawkte aiin tam takin an zawm ṭha-in an hlau zawk emaw tih tur a ni. Hetiang hi ngaih thuaka a ṭha hle-a ngai an awm a, mahse, nula hmelchhe tak en thuaka ṭha thuak, en chet chet a chhe chet chet ang a ni.

Hemi chungchang ka sawi lai hian Central YMA general secretary thu sawi pakhat hi a dikna chen a awm tih ka pawm. Dan kengkawhtu an hlawhchham avangin a kengkawhtu tur ni lo inrawlh a ngai ṭhin niin a sawi a; an duhdan a nih vek bik loh thu leh hrehawm tih chang an neih thu pawh a sawi. Ni e, dan kengkawhtu tura danin thuneihna a pekte’n an hna an thawh loh avang hian harsatna a awm fo. Kum 1990-2000 chho khan nichina kan sawi India rama democracy lungthu pathum zinga dan siam pawl (Parliament) leh sorkar (Executive) in an mawhphurhna an hlen loh em avangin court hmanga rorelna a lo pawng ta vak a, sapṭawng chuan ‘judicial activism’ an ti a ni awm e. Italy rama eirukna nasa lutuk do tura magistrate rualin tha an thawh chiam ang kha a lo thleng a nih kha. Chutiang deuh chuan kan ramah hian sorkar lungthu pathumte’n an mawhphurhna an hlen loh avangin pawn lammi an rawn inrawlh ṭuam ṭuam ṭhin.

A buaithlak ber erawh chu vote zawn thiam kan sorkar hotute hian democracy thuthlung ngaihtuah theilo khawpin kohhran leh tlawmngai pawh hi an tlawnin an hlau ta a. Chu chu kan rama pawl tam ber hian an hre tawh leh nghal a. Kan rama dan siam pawlin khuahkhirh chunga a in lo theilo tan zu zawrh theihna atana dan an siam pawh Muslim puithiam ang maia Kristian puithiam lak aṭanga firfiak taka dodalna an tawn bakah thianghlim bik anga lan tum veng thenkhata tlawmngai pawl intelkhawm chawp leh a fuihpawrhtu kohhran vang hian sorkar pawhin dan angin a thuneihna a kengkawh ngam ta lo em ni tih hi ngaihtuah tham a ni.

Danin thuneihna a pek nilo thuneih tum kan tam ta em em a. YMA branch tin te, Local Council leh village council te, kohhrante thlengin sorkar thuneihna leh dan siam chu kan dodal ta sup sup mai a. Hemi siam dik ngamlo leh dan kengkawh ngamlo sorkar chuan tihtur dang a neilo, a mawhphurhna a hlen ngam loh chuan a hlih a ngai ang. Pawl dingte’n thuneitu ber emaw tia danin thuneihna min pelo chung pawha dan siamtute dan siam leh danin thuneihna a pek sorkar thu kan dodal zel dawn a nih chuan, “Khawsak reltu tam lutukin chaw chhum an ti suakbak ṭhin,” tih hi a takin a thleng dawn a. A thleng mek zel bawk a ni.

Mizoram mipuite hi tunge thuneitu ber pawh hre lovin kan awm mek a. Chu chuan haw haw-a nawr chiam leh in phingchilte a hring mek bawk a. Sakhaw ruih chilh chi, mahni ngahdan leh duhdan midang barhluih chingte an lo pawng ta tual tual bawk a. Hei hi khap beh a nih loh vaih chuan Mizoram hi ram hrehawm tak, mitin chep tak leh zalen lo taka khawsakna ramah kan chhuah ngei ngei dawn a. Dan rorelna kenkawh theihloh leh danin thuneihna a pekte’n thuneihna an kenkawh theih lohna kan ni mek niin a lang a. Thuneihtu bik awm lo ang maia kan awm chhoh zel chuan mipui hi keimahni duhthu ngeiin rahbehin kan la awm dawn a ni.