ZU BUAIPUI HNAM

Kar hmasa khan Zu Politics tih thupui hmangin Mizorama sorkarna chang tawhte hi zu zawrhna dawr hawn an phal chiah loh pawha zu zawrh phalna pek lo tum tawh tal an nih thu leh kohhran duhdan thlira inpuhmawh an chin’ viau rual hian tumah tak tak an fihlim chuang lo tih kan tarlan tawh kha. Tun tum chu kan Kohhran leh khawtlangin langsar taka zu a do dan leh a nihna takah chuan thinlung tak taka an do siloh dante, do dan rau rauva inthliarna a nasat dante hi tarlan’ kan tum ang.

Aizawl Chanmari West khawtlang tangrual leh Presbyterian Kohhranin an venga zu dawr hawngte chunga hremna na ang reng tak mai an lek chungchang hian Mizoram chiah hneh hle lo sela chuan Zu chungchang ziah zui hi a tul lemlo tur a nih laiin an heti ta riap riap mai si a; ngawihbo pui chi a ni ta lo. Zu dawr hawn chungchanga Kohhran chet dan hi chu sawisel teh chiam theih ni pawhin a lang lo, kohhran dan an lek a ni ve mai a. Tunhma, an duh fir zual lai phei kha chuan zu in leh zuarte kha an phuar/thunun hmiah hmiah mai thin a. Ama’rawhchu, zu dawr hawnna building neitu phuar chungchang erawh chu Kohhran danbu-ah a chuang em ka hre lova, kohhran chu phur hlut emaw thinrim emaw avang ngawta danin tihtura a tih lem loh hremna lek lo turah I ngai ang.

Ngaihtuah chian ngai erawh a awm. Zu khapna dan khauh tak (MLTP Act) hman a nih lai khan zu in, tawlh ruk leh zawrh vanga man tam tak an awm a. Danin a khap thil ti an nih avangin court-in tam tak chu thiamloh a chantir (convict) a ni. Ram dan (MLTP Act) bawhchhiat vanga court-in thiamloh a chantir engemawzat zingah hian Aizawl Chanmari West Presbyterian Kohhran member an awm em hriat a ni kher lem lova, Mizoram hmun hrang hrangah erawh chuan Presbyterian Kohhran mi hrem an awm tih chu a chiang. Chuti chung chuan kum 17 chuang kalta chhung khan chu’ngte chungah chuan Kohhranin kohhran dan hmanga hremna lekin pakhat pawh phuar/thunun an neih kan hria em? Hria kan awm a rinawm loh. Chutiang a nih lai chuan ram dan ang thlap leh thuneitute phalna-a zu zuar erawh chu Isua hun laia uire ang maiin kan den rawn mek a nih hi. Hetah tak hian kan Mizo ze dik a lo lang chiang thin a; a ruka thiltite chu dan kalh mah nise hre ru chungin an sualna kan hlahthlem a, dan ang tak pawh nise langsar taka thilti chu kan rindan nena a inmilloh phawt chuan ‘Kraws-ah khengbet rawh’ tiin kan zim luai luai thung thin a nih hi.

Khawtlang (YMA) chu an che na zual a, ensan bakah chhiatni fund an pek pawh kir lehin an chhungkaw mi tupawh lo thi sela an thlan an laih sak lovang a, khawtlangin an buaipui dawnlo a ni bawk awm e. Hetah pawh hian sawi thui vak tur a awm lova; ama’rawhchu YMA thuvawn leh tun thlenga Mizo nuna he pawl hi a la pawimawh (relevant) zelna chhan bulpui zinga pakhat “Ṭanpui ngaite ṭanpui” tih hi thlak danglam a ngai ta a ni thei em? “Ṭanpui ngaite zingah mi ṭha a khawtlangin a pawm zu zuarlote ṭanpui” tiin an thuvawn hi an thlak a ngai ang em?

Mizo zinga zu do nasa te hian an hriat miah loh pakhat chu mi pangngai-in zu leh zu in hi thil sual (crime)-ah an ngai ngailo tih hi a ni a. A bawp-lawka la-a pawngsual pawh khap loh mai awm han tihte phei hi chu sikul rap ve ek ek tawh tan chuan sawi chi a ni lo. Mi nuai khat zingah hian pawngsual ching chu tam an awm lovang. Kuminah pawh mihring nuai 10 chuang awmna Mizoramah hian thla khatah pawngsual thubuai 3 vel chauh a awm tlangpui a, zu in erawh chu mi nuai 1 zingah sing tel an awm thung. Zu ruih avanga chhungte tana harsatna siam thinte, khawtlanga buaina siam thinte hi an awm teh meuh mai a, mahse, an awmna khua leh veng theuh han en ila, hetiang chi hi chu Kohhran Zaipawl member-in an tam hneh lutuk thung.

Zu dotu tam takin social media vela an sawi tam ber pakhat chu, “Kristian rama zu khap loh a inhmeh lo,” tih emaw “Kristian rama zu phalrai a diklo,” tih emaw a ni thin. Hetianga sawi chingho hian an hriat tlemzia an mualpho mai a ni. Khawvel ram hrang 195 zingah hian ram 14-ah zu khap burna dan hman a ni a, chu’ngte chu - Bangladesh, Brunei, Iran, Lybia, Kuwait, Maldives, Mauritania, Pakistan, Saudi Arabia, Sudan, Somalia, United Arab Emirates, India (state 28 zinga 5 - Bihar, Gujarat, Kerala, Manipur leh Nagaland bakah UT 1 Lakshadweep-ah) leh Yemen ramte a ni a. India tih loh hi chu Muslim ram vek an ni a. Chuti chung chuan Maldives, Mauritania, Pakistan leh UAE ramah te hian Muslim sakhaw be velo tan chuan khap a ni velo. Muslim ram tho mahse mipui thlan lal sorkarna Turkey te angah chuan an khap lo bawk. Tunah hian khawvel khawi Kristian ramah mah zu an khap ve lo. Tunhma-a Kristian ram leh Communist rama zu an lo khap tawh thinna ram te chu - United States (1920-1933), Canada (1918-1920), Faroe Island (1967-1992), Russian Empire/Soviet Union (1914-1923), Iceland (1915-1935), Norway (1916-1927), Hungrian Soviet Republic (March 21 - August 1, 1919) leh Finland (1919-1932) te an ni. Hemi hnu hian zu an khap leh ngai tawh lova, an sim hneh viau ni turah a ngaih theih.

Khawvelin firfiak bera a ngaih Muslim ramah mah an rindan pawmpui velote tana zu khapna an thlahdul laia keini’n mi zawng zawng tana khap burh mai kan han duh hi chuan Muslim ho ai pawha Mizo Kristian thenkhat kan firfiakzia a tilang hle mai a. Kan Kristian pui tho Seventh Day leh Sabbath an tih mai, Inrinni (Sabbath) serh hote’n Pathianni (Sunday)-a dawr an hawn khap duh khawpa firfiak kan ni reng bawk.

Chanchintha Luka ziak bung 7, chang 33-34 hi Pulpit aṭanga sawi hlawhlo ber pawl a ni awm e. Heta inziak chu: “Baptistu Johana chu a lo kal a, chhang a ei lova uain a in hek lova, nangnin ‘ramhuai zawl a nih hi’ in ti a. Mihring Fapa a lo kal a, a eiin a in a, nangnin,’Enteh u, mi vir, uain heh mi, chhiah khawntute leh misualte thian saw,’ in ti leh si a, tih a ni a. Catholic Bible (2015)-ah phei chuan “En teh u, chaw heh mi leh uain ruih hmang mi” tiin an letling a ni. He Bible changin a tihlan chian’ em em chu khawvela a awm lai khan Isua Krista khan zu a in thin tih hi a ni. Mahse, he Chanchintha bung leh chang hian sawi a hlawh lem lova, kan pawm duhdan nen a inmilloh vang a nih hmel. Kana khua a A tihpunte pawh ‘alcohol awm lo chi’ tiin va hmu pha ve hauh lovin kan lo sawi ve chiam chiam a, Tirhkoh Paula’n Timothea hnena in zeuh zeuh tura a rawn pawh kha lu hai theih lohna angin kan sawi hram hram bawk. Bible-a Pathianin zu lam chi reng reng (grape rah ei tiamin) khawih lo tura a tihte chu Nazirite ho an ni a (Numbers 6: 1-4), Isua erawh chu Nazirite ni lovin Nazarine mi a ni a; a tan zu in a thiang.

Bible-in vawksa eilo tura a tih Mizo Kristiante hi vawksa eilo chu tlemte an awm ang. An zinga tumahin zu hi thil tha tak a ni e an tih a rinawm lohva, ruih lek phei chu zahpuiawm taka awmna a ni a. Ruih avanga tharum thawh leh dan bawh chhiat phei chu pawi tak a ni. Chutih rual erawh chuan sual a ni hranpa lova, in duh an awm chuan tuma’n kan lo khap ngawt a thiang lo. Zu in leh ruih vanga dan bawhchhia an awm chuan danin an chungah ro a rel mai tur a ni. Zu hi ruih theih a nih avangin khuahkhirh (regulate) ngai a ni a, chutih rualin a hnam pum ang deuh thaw a kan la buaipui luai luai mai hi chu a la hniam thlak lutuk deuh. Zu dawr kawta punkhawma lei tumte lei lo tura lo ngen tih velte phei hi chu thil tullo leh chuangtlai, hna thawh tur neilo thawmhnaw a ni a; “Thawklo chuan ei pawh ei suh se” tih thupek ringtu tih chi pawh a ni lo. Mi zalenna rapbet zawnga sakhaw rinna kalpui chiam hi ram thenkhatah an ching a, chutianga tih ching ramte chu Muslim ram vek an ni a, Kristian ram, mipui sorkarna ramah an ching ve lo.