NAWMSIP BAWL THLAH THEILO

Kan sorkar hian Finance department hna­thawkte hnenah sorkar inrenchemna tur rawtna siam turin an ti ni ngei tur a ni a, chu chu mipui rawn tura inkohkhawm (public consultation) huaihawt turah January ni 20, 2015-a sawiho tur a pharh atan tih a ni a. I lo zir chiang teh ang.

Finance Department hnuai bika rawtna langsar zualte chu - 1. K. Deposit a pawisa dah hi tihbo dan emaw tihtlem dan emaw ngaihtuah ni se, a ṭul chuan Plan Holiday pawh puan mai ni se sorkar a bankrupt mai loh na’n. K. Deposit hi ceiling siam nise, dah rei zawng tur pawh a amount a zirin siam mai ni se. 2. Public Sector Undertaking zawng zawng hi sum thawkchhuaktu aiin eiraltu an ni zawk mah a. Chuvangin sorkarin a zirchiang tura a ruatin recommendation a siam ang khan an chungchang thu hi ngaihtuahin hmalak ni se. (Hei hi Delloite in Mizoram sorkar hnuaia Corporation te zirchianga nuaibo mai a rawt kha a nih hmel). 3. Budget siam dan kalphung hi tihdanglama siamṭhat ni se, development atan sum dahbelh ni se. Sorkar hnathawk hlawh daih ngei tur Budget-ah hian dah ngei ni bawk rawh se. 4. Sorkarin economic measure hrang hrang a siamte hi kenkawh nise. Petrol Coupon pawh hi tihtawp mai a ṭha, a chhan chu hman diklohna nasa tak awm theia ngaih a ni. DDO leh Cashier te hi kum hnih danah thlak ngei ngei ni se, Office Expenses pawh a tlem thei ang ber dah ṭhin ni rawh se. 5. VIP Quota chi hrang hrang kan pek ṭhin leh officer te’na hamṭhatna an dawn chi hrang hrang e.g. motor leh petrol te, ina awmpui an neih (household peon) te leh phone leh mobile phone hman man tum sak ṭhin ang te hi tihtawp emaw tihtlem emaw ni se, an dawn tur ang bak motor pawh kawltir loh ni se. 6. Sorkar sum indaihlohna (fiscal deficit) hi 13th Finance Commission duhdan leh FRBM Act, 2006 zulzuiin tihhniam leh control tum ni se.

Assembly Secretariat chungchanga rawtnate: 1. Assembly session-a pre-hold leh post-hold ni 3 hi ni 1 a tihtlem nise, chutiang bawkin Assembly Committee a pre-hold ni 2 hi ni 1 a tihtawi ni bawk se. 2. VIP leh an ṭhuihruai zin veivahna a an ei leh in senso hi anmahni TA/DA aṭanga pek tir ṭhin nise la, anmahni zuitu (entourage) pawh a tlem thei ang ber hruai ṭhin ni se. 3. Parliamentary Secretary te hi anmahni leh an personal branch enkawlnate a hautak tham a, chuvang chuan Minister te hian an department te hi an enkawl zo thovin a lang a, malkhai mai se a ṭha mai lo’m ni? A thuhrimah Parliamentary Secretary te pawimawhna pawh hi zirchiana ennawn ni thei se. 4. Minister/VIP te’n kumtina an in chei ṭhat ṭhin hi tihtawp emaw tihtlem theih ni se.

DP&AR chungchanga rawtnate: 1. State Service MCS, MPS etc kumtina lak ṭhin hi tih tawhloh nise, sum sen a hautak si a. Doctor leh nurse te hi mamawh zual phuhru tura lak zawk ni se. 2. Sorkar hnathawkte hi semrual dan ngaihtuah ni sela, a titlem zawng pawha hmalak dan ngaihtuah tel nise. Ruihtheih thilin a tihbuai sorkar hnathawkte phei chu chawlhtir dan (invalid pension) ngaihtuah mai nise. Pensioner rawih nawn ṭhin ang pawh hi tih tawhloh ni thei sela, a ṭul chuan department officer te’n kawp mai se. 3. Personal Secretary (PS) atan hian sorkar hnathawk lai hman dan ngaihtuah nise, pawn lammi hman an nih hian Group A anga hlawh te pek a lo ngai a, a hautak hle a ni. 4. Public Sector Unit (PSU) a chairman te hi sorkar hnathawk lai emaw MLA ṭanglai emaw hman mai ni se, inrenchemna atan a ṭangkai hle ang.

Food, Civil Supplies and Consumer Affairs department chungchanga rawtnate: 1. Ration buhfai subsidy a kan pek ṭhin hi a hautak hle a, sorkar hian kumtin cheng vaibelchhe 156 lai a hloh ṭhin a ni. Chuvang chuan tihelm dan emaw tihbo dan (no loss no gain) ngaihtuah ran a ngai a ni. 2. Minister leh MLA te, MDC leh hengho Family Pension la te thlenga subsidised rate a buhfai, K.Oil, chini pek ṭhin hi tihtawp a hun tawh. An ṭan laia an hnathawh avanga kan lo ngaihsak a nih pawhin, an lo pension hnu leh an family pension latute thlenga hetiang subsidy kan pe ṭhin hi a hautak em em a ni. Taxation Department chungchang: State sorkar hian sorkar hnathawkte hnen aṭang hian Professional Tax a lak bakah State Tax chawitir dan ngaihtuah ve tawh se. An hnathawh leh awmna Group a zirin a rate siam mai nise. Heng pawisa tling khawmte hi sorkar building leh quarters sakna’n te hman nise.

Revenue Department: 1. Huan lo ram zawng zawng hi Periodic Patta a leh vek ni se, tichuan chhiah hmuh pawh a lo pung thei ang. 2. Zoram chhiah leh leiman hi ennawn (upward revision) a hun tawh hle a ni. Hemi atan hian a ṭul chuan Dan pawh siam ni se. 3. Property Tax hi lak ve tawh ni sela, RCC Building sate pawhin Building Assessment Value aṭanga chhutin chhiah chawi ve tawh se. Vigilance Department: Sorkar hnathawk hlemhle (corrupt practices) te chu hrem ngei ni se. PHE Department: PHE tuisem hi a line ṭhalo leh phuilovah tui a put nasa em em mai a, hengte hi siamṭhat/ vil ṭhat ni thei se, sum tam tak chawia pump chhuah an ni si a. Rainwater harvesting lam pawh hi uar ni thei se, fur lai chuan tui pump man pawh a lo zangkhai thei hle dawn a ni.

P & E Department: 1. Dan phalloha electric pawt ru hi an awm ngei niin a lang a, a department neitute pawh an bang chuang lova. He thil hi check ni se, a check tu atan Police rawih mai nise a ṭha ang. 2. World Bank emaw Asian Development Bank (ADB) emaw sum ṭanpuina hmangin Hydro Electricity Projects tam zawk siam dan kawng ngaihtuah ni se. Health & Family Welfare Department: 1. Private Hospital te MR Bill theihna atana recognise zel mai hi ennawn ni se, sorkar Hospital te hi ti lianin, ti changtlung zawk ila sum sen a zia-awmin a rinawm. 2. Sorkar hnathawk damlote hian Mizoram pawn lama an inenkawltir hian sum tam tak sen a ni ṭhin. Chuvang chuan Doctor thiamte Mizorama thawk tura lakluh/rawih dan kawng zawn ni se, hei hian sum tam tak luangral tur a veng thei ang. Transport/ Traffic Police: Motor kawng dunga zana motor riah ṭhinte hian parking fee chawi se. Public Places e.g. Field, Secretariat kawt, Hawla Indoor Stadium kawt etc. a motor dahte’n parking fee chawi ve se.

(A thu ngai ngai ‘verbatim’ a ziah chhuah ka duh si avangin VANGLAINI-a he article in hmun a awh tur hisapin a thui lutuk dawn a, engemaw chen kan la bak bawk si a. Karleh lamah chhunzawmin hemi phena thawnthu mak tak mai, a taka inrenchem kan tum loh dan thuruk chu pholan a ni ang. Hei hi lo dah ṭha hram ula, chutilo chuan a chhumbung palh ang e. Thawnthu mak tak bakah ngaihdan pawh kan rawlh ang chu.)