KOHHRAN LEH ZU

Sorkarin zu zawrhna dawr hawnga zu lei duhte tana zu lei theihna card a pek chhuah takah hian zu khap hmakna dan (MLTP Act) hlih duh lohna an lantir dan hi an tih atan chuan a mawi tawh em em love tih khawpa ṭang na Kohhran hruaitute chet lak dan tur kan thlir ṭhup a ni ber a. A hma lamah khan Presbyterian kohhran bik chuan vawi 2 lai kohhran tina ṭawngṭai rual an huaihawt a, tlawmngai pawlte’n thlawp phei sela chuan a aia na zawka kal pawh an tum niin a lang a. Kawthlerah mipui hmuh turin zu an duhlohzia ziahna lehkhate an tar a. Zu zawrhna dawr hawn ni khan Pastor pension pakhatin a kawtah puan dum a zar a. Aizawl khawpuia veng pakhata Presbyterian Kohhran puipate chuan Joint Action Committee din turin tlawmngai pawl an ṭuk khawm a, he JAC chet lakna tur hian kohhran sum an thawh nghe nghe a. Hemi venga zu zawrhna dawr hawn tum chu JAC member pungkhawm hian an dang ta hial a; Police lam kha khauh deuh sela chuan tharum thawhna a thleng mai thei awm mang e an ti a, mahse zu lei tumte’n duap an kaih bawk a, engmah thil duhawmlo a thleng zuilo. Veng pakhatah pawh Kohhran hruaitute’n zu zawrh tumna dawr neitu hnenah phallo tura an ngen avangin tun thlengin zawrh a la ni ta lo.

Kohhran hi a inrawlh thuk ta hle a, politics lamah pawh an inrawlh thuk khawp mai. Kar hmasa Nilaini-a Vanglaini chhuak phek 2-naah khan Ruantlang Mualvenga tlawmngai pawl leh political party te duhdan kalhin mi pakhatin VC inthlanna tura Congress ticket-a nomination a file luih thu leh NGO, political party leh kohhran hruaitute ṭhukhawmin nomination file tu chu inhnukdawn turin an ngen niin a inziak a. Aizawl-a veng bil thila tualchhung kohhran inrawlh hi kan intihhmuh zel dawn ni fa hmiang. Kohhranin a din JAC invuahte avang hian tharum thawhna lo thleng ta tak tak sela, kum 2005 chho vela kohhranin sum leh paia a ṭanpui SRS-in mi nunna hial an lak kohhrsnin s ngseihpui tlat tak ang khan kan ngawihpui leh mai ang tih a hlauhawm hle. Chuti a nih chuan Muslim lal Saladin-a kut aṭanga Ram Thianghlim lalet tura Catholic kohhranin thisen chhuah a pawiti lo anga chet kha Isua Krista zirtirnaah kan pawm zui mai dawn em ni ang?

Zu zawrhna dawr hawn ṭan hma, sorkarin zu lei duhte tana card siam a nih tur thu a puan khan UPC Kohhran chuan card neite chu kohhran rawngbawlnaa an tel theih loh tur thu an puang a. Anni hi zuk leh hmuam do kawnga ti ṭha tak an ni a; zuk leh hmuama fihlimlo rawngbawltute chu Pulpit aṭanga rawngbawl phallovin Biak Ina thupuangtu leh ṭantu dinna (lectern) aṭang chauhva an rawngbawl a lo phalsak tawh a. Aizawl Ramhlun North Presbyterian Kohhran chuan rawngbawltu zingah zu lei theihna card nei an awm a nih chuan inthiarfihlim turin kohhranin a beisei tih an puang bawk.

Ṭhenkhat chuan Kohhran ṭhenkhatin hetia an han tih hi awm lovah an ngai a, an kuanglo nawrah an puh bawk a. Mahse, kei chuan an kuang diktak an nawrah ka ngai thung. An la tina lo mah mah em aw ka ti bawk. Tunhma chuan kohhran hian zu rui, zu nam, zu sa leh zuarte chu dan pawnah a hnawtchhuak (phuar) ṭhin a. Kohhran duh fir tak tak lai phei kha chuan love letter inthawn, Pathianni-a ram kal leh zin leh nula rim thleng kha inphuarna chhan tling a ni. Hun a lokal zela, beram inruksak hlauh vangte, khawvel dinhmunin a ken’ hrim hrim vangte-in Kohhran pawh tunhma angin a fir hlei thei ta lova; a thikthu a tichhe ngam ta vaklo mai ni lovin tunlai ṭawng takin a h^m ‘strict’ hlei thei ta meuhlo chu niawm tak a ni. Synod inkaihhruainaah pawh eiruk vanga court-in thiamloh a chantirte leh zu chungchanga inhnamhnawihte thunun chungchang chu tualchhung kohhran kutah an dah ta hmiah mai.

Tin, heti hi a ni a. Kohhran pakhat na na na chuan zu a do dan pawh a inang tur niawm tak a ni a; zu in theihna atana card neite laka thununna a lek dan pawh a inang tlang tur niawm tak a ni. Zu dona lehkha tar, ṭawngṭai rual leh kawng hrang hranga zu zawrh duhloh lantirtu Kohhran chuan zu zawrhna tura dan siam dawna zu zawrh sawimawi leh ṭhlawptu, zu zawrhna tur dan siamna atana pawmpuina vote petu MLA-te pawh a thunun ngam ngei tur a ni a; a bikin kohhran hruaitu (Upa) te lakah chuan a thikthu a tichhe zual tur a ni ang. Tunah hian MIFCO, MAMCO leh ZIDCO te’n dawr an hawng mek a, zu zuar company tih loh theih an ni lo. Heng corporation a thawkte zingah hian rawngbawltu an awm phawt chuan (an awm ṭeuh ka ring) an thunun ngei ngei tur a ni bawk. Chutianga thunun an ngam loh chuan zu hi kohhran pawnah dovin sorkar nawr chiam tawh suh se.

Kohhranin zu khap tur emaw thlah dul lo tura sorkar a nawr hi an kuanglo an nawr a ni a, anmahni huangchhunga dan an neih (canon/creed) an chelek hi an kuang dik tak nawr an ni. Chumi nawr ngam lova kuanglo nawr hi sim a hun ta a, Muslim ang maia khawvel thila chet hi sim a hun khawp mai.

Kohhran bakah hian Kohhran leh puithiam ṭhenkhatin an fuihpawrh ṭhin Aizawl veng hrang hrang hruaitute pawh hi an inngaihtuah chian’ a ṭul ta khawp mai. Kan vengah hmeichhe awm ṭha duhlote zu zuarte kan duh lova kan hnawtchhuak ṭhin a, veng danga an awm a, kan veng pa leh tlangvalin an va dawr em tih kan uksak zui chuanglo. Tunah pawh kan venga zu zawrh kan phallo ngawt hi a ngaihtuah tlem thlak. Tunlaiah engmah hi a puanhnuai theih tawh lohva, miin RTI Act hmanga veng tina card nei zat an zawh chhuah chuan kan venga dawr hawn phallotute hi card nei ngah veng kan lo nih chuan zah nachang hre tan chuan hnar hmuh len’ a la awl ngawt ang. Lemder chang mai kan nihna kan pholang chiang ngawt ang le.