THIL MAN TO

Ka ṭhian, ramdangmi leh ‘vai’ kan tih mai, India mi lo zinte hian Mizoram, a bikin Aizawl a thil man tozia hi an hrilhfâk ṭhin a. Lirthei chuan man a to an ti êm êm a, chawhmeh leh an thil lei duh dang bakah engkim mai hi India ram hmun dang an tlawhte ai-in a to uchuak vek ni-in min hrilh ṭhin. Aizawl piah lama district hmunpui leh thingtlang lamah pawh phairam lam aṭanga chawkluh reng reng hi chu a man a to vek mai a, an thlai thar erawh chuan thingtlang kilkhawr apiangah a man a tlawm thung.

Eng pawh ni sela, Mizoramah hian engkim mai hi a man a sangin a to lawtlak a ni tih hi phat rual a ni lo. A bik takin mipui nitin mamawh (essential items) hi a man a to êm êm mai a. Thingtlang kilkhawrah a zia-awm deuh. Kum 2010 December thla a Mizo IR battalion hmunpui Darrang district khawpui Mangaldoi khawpui a Masi kan zu hman khan kan chawhmeh man inthlauhzia ringawt kha hahipa sawi tham a ni. Keini’n Aizawl khawpui a zikhlum leh pârbawr kg khat man to fe-a kan lei lai khan anni chuan a thing tawlailir zawngin an rawn zuar mai a, a man tlawm dan chu he lai a kan ngaihtuah phâk bâk hi a ni.

Sap ṭawnga ‘economics’ ṭawngkauchhehah chuan mipui nawlpui mamawh leh thil man hrim hrim sang hi ‘inflation’ an ti a. Chu chuan pawisa hlutna tlahniam a kawk tel bawk. India ram hmun dang chu sawi loh, hmarchhak state zinga thil man tona ber kan nih reng chhan hi Mizoram kilkhawr bik vang leh engkim mai a phurh thlenna hlat bik vang chu a ni teh meuh mai. Chu tih lai chuan kan Mizo sumdawngte’n India rama chhiah rit ber mai income tax an chawi ve lo chunga heti tak mai a engkim mai a to uchuak hi chu zir chian a ngai a ni.

Engkim mai zir chianna (research) behchhana thutlukna siam tura inthlan hma a mipui hnena intiam leh sawi ṭhin tuna kan sorkarna chelhtute hian an lo zir chiang chiah bik lo emaw ni aw tih palh a awl ta khawp mai. Stamp duty man tihsante hi chu lo dahṭha ta pawh ni ila, petrol leh diesel an tihsan hun hi a fuh em? An tihsan hun leh tihsan dan hi an sawi dana ‘research-based’ chu a nih loh hmel ta riau. Tun kum 20/30 vel chhunga kan châklâkna Silchar-Aizawl kawngpui chhiat lai ber leh kan hriat ve phak china Aizawl khawpui kawngpui, Kulikawn leh Bawngkawn inkar pawh a chhiat lai ber kan thlen lai taka petrol leh diesel man tihpun rawttu hi tunge ni ang? Research-based a nih loh chuan ‘Kawlrit rawt’ a ni thei mai ang em?

Chhiah chawi hrim hrim hi mipui-in an hreh hranpa lova, a hun erawh a awm a, an dinhmunin a zir pawh a ngai a ni. Kum 2020 bul lama Covid-19 hri a rawn len hnu khan khawvel a buai a, hnathawhna hmun tam tak khar a nih avangin tuialhthei laihchhuah thleng a nghawng na hle a. Tuialhthei thlitfim loh (crude oil) man a to a, India ramah pawh tuialhthei man a to takzet a nih kha. Sorkar laipui chuan state sorkarte chu chhiah lak tihniam turin a ngen a. Mizoram sorkarin VAT a lo lâk zat pawh tihniamin mipui phurrit lutuk chhawk na’n tuialhthei man tihhniam a nih kha kan la hre reng awm e.

Tuna petrol leh diesel a chhiah tihpun leh cess lak a ni ta hi hmasawnna hnathawhna atana hman tura tih a ni chungin dodal a hlawh viau mai a. A chhan bul ber chu mipui nitin mamawh (essential items) man a to phah nghal leh kawngpui chhiat lutuk lai a ni hi a ni. Thil man hi tihto a nih tawh chuan a tihhniam theih tawh loh tluk a ni a - sorkarin chhiah a tihhniam vanga hniam a nih ngawt loh chuan. Chu pawh chu harsa tak a ni.

Sawi leh sawi hnu, petrol leh diesel man tihto hun hi a fuh lo a ni. Petrol leh diesel harsat vanglai taka tihto a ni a. Tuialhthei van chhan lah chu eng dang vang mah ni lovin sorkarin a ngaihthah luat avanga kan châklâkna kawngpui chhiat lutuk vang a ni leh ta zel a. Ni danga tuialhthei zu phur chhuaktute leh mipui nitin mamawh ei leh in tur leh a dangte phurtute’n an zu lehlan theih ṭhin kha ni 8-te an thang a ngai ta a. Rambuai hma hun, kawng fumfe awm loh lai-a kan kir leh hun vanglai takin tuialhthei hi tihpun a ni. Mak tak a ni.

Tuialhthei a vâng mai a ni lova, mipui nitin mamawh leh insakna bungrua thlengin a phurtu lirthei liante kal hun chhung a rei tâk avangin a vâng ta a, hun an hman rei bâkah kawngpui chhe lutuk avangin tuialhthei an heh êm êm mai a, engkim mai, phailam aṭanga kan lak chu a man a to lo thei ta lo a ni ber e. Kawng a ṭhat leh hunah pawh thil man hi a to zui zel ang tih a hlauhawm a, a chhan chu hei hi kan kalphung reng a nih vang a ni.

Sorkarma siamtute hian thil thar emaw thil hlui an tharthawh leh dawn emaw hian ‘research-based’ chu sawi loh, engmah ngaihtuah chiang leh zir chiang hauh lo hian thil an kalpui ta ṭhin a, hei hi ram leh mipui-in namen lovin kan tuar a. A hnu-a a tak taka mualpho chu sorkar bawk a ni ziah a, an mualpho tih pawm harsa an ti mai chauh a ni. MNF khan sorkar theihna a nih beisei-in kum 2018 assembly inthlan dawn khan zu khap a, zu zawrhna dawr khar leh vek an tiam a. An sorkar ta a, zu khapna dan chu an siam ta ngei a.

An ngaihtuah tawizia tilangtu chu erawh Mizoram Liquor Prohibition Act, 2019 an siam lai khan he dan hmanga mi tam tak man an nih dawn thu leh kan tanin (jail) neihte’n a dawl zawh dawn loh turte an ngaihtuaha an chhut tel pha hauh lo kha a ni. Tun thlengin kan sorkar jail tam berah tang awm thei zat ai a tam satliah pawh ni lo, beng muka liam zawih zawih an tâng mek a, sorkarin jail a enkawl zawh loh avang leh pawisa a awm loh avanga jail chhe lutuk leh hnathawk indaih loh avanga tangte an tlanchhuak vek lo hi ‘Pathian malsawmna’ kan ti leh mai dawn zawk em ni?

Hei hi entirna pakhat mai a ni. Tuialhthei man kan tihsân/tihto dawn pawh hian ngaihtuahna sêng tam lova thutlukna siam a ni tih a lang chiang hle mai. Tuialhthei man a tihsan hma hian sorkar hian mipui tawrhna nasa tak thleng thei ngaihtuah telin thil dang man sâng tur (inflation) tur dan dân tur a chhut tel nghal ang chu maw le. Thil man sâng lutuk tur ven theihna tur (prevention of inflation mechanism) awm si lova thutlukna siam ngawt zel mai hi mawlmang lutuka sorkar hmasa-in zu khap hmakna dan a siam leh ringawt nen khan a lêm chuang lo. A nghawng tur, a bikin Mizoram mipui tawrh theihna tur kha ngaihtuah hmasak ngei ngei a ngai a, thuneitu tih vanga engkim mai mitdel sarêp chhut chawrh chawrh zêl ngawt loh tur.

Chhiartute’n in lo ngaihtuah ngai emaw? Sorkar hian department hrang hrang hnathawh tur leh mawhphurhna a siamsak vek a. Chu chu ‘Allocation of Business Rules’ an ti. Mahse, mistiri (a vai a zovin) hlawh tur bituktu hi Commerce & Industries department ni awm tak a nih lai-in central YMA hlawh bituk hi kan pawm ta mai ni awm a ni a. Vawksa leh sa dang mante pawh district bawrhsap fel deuhin an district chhung bik sa man tur an bituk bâk hi sorkarin engmah a ngaihven kan hre zui lo chu a nih hi.

Mipui mamawh thil man to (inflation) hi chu a awm ve reng mai a, pawisa hlutna tlâkhniam vang ngawt pawha awm thei kan tih tawh kha. Sorkarin thutlukna engemaw a siam, a bikin chhiah a tihpun emaw chhiah lakna a tihtam emaw avanga mipui tawrh theihna tur thutlukna siam hma hian sorkar chuan mipui mimir tawrhna awm thei tur leh thil dang man sâng tur veng turin ruahmanna a siam hmasa ngei ngei tur a ni a. Chu tianga ti tur chuan economist thiam rawih a ngai thung. Chu chu sawi loh, thil man bithliah kawnga thuneitu ber pawh hre lova kan awm hi a zahthlak hle. Thuneihna an chelh avanga mi-in an tlawn tih hre thiam lova fing leh engkim hria emaw inti ve ta ngawt hi kan nei fo tawh.

Mizoram, engkim mai state ṭhenawm aia a tona-ah hian mirethei kan chêp hle a. Sawr fu tlak loh khawpa thil engkim mai man tovin a rahbehte hi nasa taka sawr fu kan ni mek a. Sorkarin hrileng a hmachhawn fuh loh avanga tho chhuak thei lo leh hna leh eizawnna châna hloh hlen tate chu thla aikhirh ang mai-in kan êk cheh ṭhut ngawt ngawt mai a nih hi. Sorkar ber lah chu a la inkhualtelem chet mai mai a.