CM THUSAWI

November ni 7 chawhnu lam khan number ka hriat ngai loh aṭangin min rawn bia a. Republic television channel-a thawk a nih thu leh Mizoram CM Pu Lalduhoma’n September thla a United States-a a thusawi “inhnialna titam tak” tichhuaktu chungchang sawihona a tel turin min rawn sawm a lo ni a. Chhuang tak khan, “He sawihona (panel discussion) hi amah Arnab Goswami ho ngei a tih tur a ni a,” a rawn ti kher pek a.

Kei lah ka pa te thin a tithawk tawk a tling a. An hotupa Arnab Goswami, “a hminga” chanchinbumi a inchhal ni ve si, chutiang tura vuah tlâka ka ngaih ve loh thu ka hrilh te te a. Ani (Arnab) te ang tihdan phung (brand of journalism) chu ka huat zawng tak a nih bâkah amah pawh ka ngaihsan loh chi tak a nih thu ka hrilh nghâl ta law law a nih kha. Hetianga ka ṭawng a dêngkhawn’ viauna chhan hi eng dang ni lovin chanchinbu lam zirna kawng leh hnathawh dan a sikul hlui chhuak kan nih vang a ni ber awm a sin.

Kei ni’n kan zir ve danah chuan kan thil ziah leh mipui hriat tura kan puan zawng zawng kha mipui mimir tâna ṭha thei ang ber (public interest) a ngaih a ni tur a ni a. Kan chanchinbu chhiartu emaw kan Tv/radio ena, ngaithlatute tana ṭangkai thei ang ber, ngaihnawm satliah ni lovin hriatna tizau (informative) tur a ni tih kha kan zir ve dan a ni. Chu chu keini rualho kha chuan ‘journalism’ dik taka kan ngaih ve chu a ni a. Chutiang ngaihdan nei ve chu Delhi khawpui a Press Club of India-a tlai lama lenglut ṭhin media a thawk hlunte an kuh ṭul mai zu ni a.

He pa (Arnab Goswami) hi hna lamah chuan kan thawhpui a ngaih tur chu a ni a. Mahse, Republic tv channel a siam ve hma aṭang tawh khan a thiltih dan phung kha ka duh loh zawng a ni sa tawh hrim hrim a. Mi a kawm rêng rêngin thil ṭangkai tur sawi chhuahna hun a pe lo satliah pawh ni lovin an ngaihdan an sawi dawnin a khap loh paw’n a sawi khalh zêl a.

Sawihona a tel tura mithiam a sawm pakhatmah an ngaihdan sawina hun leh a sawm chhan ber thil sawi thei turin remchanna a pe ngai lo. Sawi an tum pawhin a ngaihthlâksak ngai lova, amah a indah sang ber a, a thusawi kha ropui ber leh mipui-in an hriat atâna ṭha berah a ngai tawp mai a ni. Hetiang mihring avang hian khawvel hi a nawm tur angin a nuam lo ṭhin a, mahni ngaihdan midang barhluih hi mimal/mihring zalenna rahbehna diktakah kei chuan ka ngai hmiah. Mi’n an ngaihdan an sawi kha kan pawm zawng a nih loh pawhin an ngaihdan kha kan zahsak tur a ni.

Thuhmahruai ka’n neih duah chhan chu eng dang ni lovin, he media khawvelah hian media pangngai emaw media thar an tih mai ‘social media’ a darh zawng zawng thu dik leh thu tak bera ngaih leh pawm kan ching ta ni a ka hmuh vang a ni a. Mi-in an ngaihdan an sawi a kalphung pangngai a ṭha lo an tih an sawichhuah a an dodalna (right to dissent) an neih phalsak hi mimal zalenna thuthlung innghahna a ni zawk. Thuneitute thutlukna dodal ngam leh dodal thei awm lohna chuan democracy rim a nam lova, thuneihna pumhmawm lam a hawi a ni.

Kan chief minister-in sorkar a kaihhruai dante, a intiamna a tihhlawhtlin dante hi mipui hriata sawisel tam pawl tak ka nih ka ring a. A sorkar kalphung (functioning) pawh hi ka sêl nasa viau mai. Chutih rual chuan US a a zinna a Mizo hnam inpumkhatna a zu sawi erawh kha chu za-a za ka pawmpui thu ka’n sawi hial teh ang. Kan hnam hruaitu ṭhenkhat pawhin hetiang hi an lo sawi fo tawh a. An sawina dawhsân erawh chu a inang lo.

Mizoram ti a kan sawi hma, Lushai Hills pawh kan nih hma, ‘Mizo’ tih hming a lo chhuah hma daih aṭang tawh khan kan hnam hruaitute chuan Chin, Lusei (Lushai) leh Kuki ti a hnam dangin min lo koh ṭhinte kha hnam khat, thisen inzawm bakah thlahtu thuhmun (sharing the same ancestry) kan nihna hi an lo hre daih tawh a. An lo sawi fo a, an lo bawhzui fo tawh a. ṭhangthar tam tak hian kan hre pha ve lo mai mai chauh a ni.

Chumi hma pawh chuan khatih lai a min awptu British sorkar khan Chin hills bâkah Lushai hills chhim (tuna Bangladesh a awm ta) leh Lushai hills (tuna India rama awm ta) a chengte hi hnam khat leh thlah khat an ni tih an lo hre tawh a. September 1892 khan Bengal larsâp Charles Alfred Elliott kaihhruaina-in Calcutta (tuna Kolkata) khawpui-ah Chin-Lushai Conference an lo huaihawt tawh a. Khami ṭum khan Assam Chief Commissioner hnuai-ah heng hnamte hi rorelna pakhat hnuai-a dah an rel a. British India thuneitu ber Viceroy Landsdowne hnenah pawh rawtna hi thlen a ni a, ani pawhin a pawmpui.

Mahse, khatih lai a Burma Chief Commissioner khan a dodal avangin tihkhawtlai a ni a. Chin hills bik kha Burma CC hnuai a dah a lo ni ta a ni. A bâk chu India-in zalenna a hmuh aṭanga kan hnam ṭhendarh kan nih dan chu kan hriat vek hi. Chu chu kan CM hian a pawm loh thu a sawi a. A sawina hmun hi Mizoram emaw, Manipur emaw Myanmar ni lova US a nih avangin sorkar laipui thuneitu tlawna intihlar tumte’n a thu sawi aṭanga thla 2 zet liam hnu-ah an ching pawr a, a ri ta hluai mai mai a ni.

Hetianga rawn sawi thar lehtu hmasa ber chu BJP hruaitu Savio Rodrigues a ni a. Ama enkawl chanchinbu Goa Chronicle-ah Pu Lalduhoma chu India ram pawisawi-ah leh India ram inpumkhatna tichhe zawnga thusawi-ah a puh a ni ber e. Hemi hnu hian ram chhung chanchinbu hrang hrangah chuk zui a hlawhin a thusawi aṭanga thla 2 a liam hnu-ah an chai ta luai luai mai a. India ram mipui tam zawk, Mizoram chu sawi loh India hmarchhak ram dangte awmna pawh hre lote’n Mizo hnam dinhmun an hriat phah ta a ni.

India ramin zalenna a hmuh hma daih tawh khan Chin hills, Lushai country/hills leh Chittagong Hill Tracts a chengte hi hnam khat vek an ni tih British sorkar thuneitute’n an lo hre tawh kan tih tawh khi. Tuna Mizoram kan tih tâk leh a chhunga chengte ‘Mizo’ ti a kan invuah hma daih khan mingoho leh Bengali-hote chuan Kuki, Chin, Lushai tite-in kan hnam hming hi min vuahsak tawh ṭhin a. Inawpna lama a awlsam zawk na’n Bengal, Assam leh Chin hills-ah te min awp darh mai a ni.

British sorkarin ‘British India’ an tih mai a chhuahsan dawn khan London a cheng ukil pakhat, a hma lama India (sub-continent) la rawn tlawh ngai reng reng lo, Sir Cyril Radcliffe chu British India zalen hnu a ramri rin turin ruat a ni a. Chawlhkar 5 chiah hun pek a ni. A ramri siam dan chu sakhaw zuitu tam zawngin a chhut a. Pakistan pawh West Pakistan a chengte leh East Pakistan a chengte kha hnam hrang daih mah ni sela Muslim sakhaw betu an tam avanga ram inhlat êm êm ni si ram pakhata siamtu a ni a. Tihfuh a lawi a nei lo.

A bik takin kan hnam chu India, Burma leh East Pakistan-ah thendarhin kan awm ta a. Kan chenna ram erawh chu inzawm vek (contiguous) a ni. India sorkarin state hrang hrang a ṭhenin Mizoram chu Assam state a district pakhatah min dah a, Manipur a kan unaute awmna tlangram chu Manipur-ah a dah thung a. Khawthlang lama Mizote chenna ram zau fe pawh Tripura state sorkar hnuai-ah a dah a. Mizoramin UT a hmuh khân Assam a Mizote chenna ram zau tak chu Assam state-ah a behtir zui bawk.

District council hun lai aṭang tawhin kan ram leh hnam hruaitute’n insuihkhawm leh inpumkhat thu hi an lo aupui tawh ṭhin a. Kan political party hmasa ber Mizo Union bakah, MNF te leh party zawng zawngin an thiltuma an dah chu insuihkhawm a ni. UT leh state nih hnu-ah pawh sawi rik reng a ni a. Tun hnai a kan CM-in US a zinna a a sawi hi a hnuhnung ber a ni zawk a; a sawina hmun hi ram pawn a nih vangte leh India ram political party hruaitu leh chanchinbumi ṭhenkhatin sawi hnawk tur an zawn avangin a langsar ta a ni.

A tha e. Mizoram a awm tih pawh hre ngai lote thlengin kan hnam dinhmun an hriat phah ta a. A darh zau a, hretu an tam poh leh a lawmawmah i ngai zawk teh ang. Kan CM hian Mizote dinhmun dik tak a sawi chhuak a, hlauhthawn tur a awm lo. Kan duhthu chu sawi loh min rawn hauh lova ṭhendarh kan ni tihte khawvel hriata puanchhuah leh hriat a lo ni ta hi thudik tak ni si, a hre lote’n an lo hriat phah ta a nih avangin i lawm ang u.