Ram ka thlir a DAMKHAWCHHUAHNA!

Ziaktu ropui Zikpuii Pa (K.C. Lalvunga) khan sap hovin ‘Survival of the fittest’ an tih hi Mizo tawngin ‘A ruh no no chhuakah’ tiin a dah a, Mizo tawngkauchheha lo awmsa a hmang thiam hle a ni. Hnam hi engtinnge a din chhuah a, engvangin nge a borala, chimrala an awm thin tihah hian inhnialna tam tak a awm thei a. Aizawl huan nei hlawhtling hmasa Venghnuai pa Pu Taivela’n, “Huan nei hlawhtling tur chuan kum 20 tal rilru ngai reng put a ngai,” tiin a sawi a. Chutiang chiah chuan hnam damkhawchhuahna (survival) pawh hi terei peihna leh tawrhchhelhnaah a innghat thuk khawp mai.

Kum 1619 khan Africa rama mihang engemaw zat chu a vawi khatna atan America ramah sal (slave) atan Virginia-a Jamestown khua hruai thlen an ni a. A hnu kum zabi dawt lehah mihang maktaduai 7 zet hruai thlen an ni leh a. An hruai chhuah dawna Africa khawmualpui tuifinriat kam pana ke ngata an kal tirnaah mi maktaduai 2 chuang an thi a ni. Hnuaichhiah leh tihduhdah tuar chungin kum za tam an khawsa a. Mihang leh mingo zinga mitin intluktlanna chawilartute, a bik takin kum 1808-a United States-a sal lakluh khapna dan siam a nih hnu leh sala inchhawr (slavery) tihtawp a nih hnu khan an nihna a lo lang chhuak a. US mai nilo, khawvel puma hriat hlawh mi ropui leh hlawhtling ber ber chu mihang an lo ni ta.

Filmstar lar ber ber, zai thiam lar, kawng hrang hranga mithiam lar, infiamna lama a ber tam tak hi America mihang an ni tih kan hre vek a, tuna US president Barack Obama pawh mihang a ni. Kum za tam tak hnuaichhiah, rahbeh leh tihduhdah an ni chunga khawvel ram ropui ber US leh Europe ram dang thlenga ‘a ber’ nihna an hauh theih chhan hi chhui chian a pawimawh ngawt mai. Ziaktu lar tak Joseph Cummins chuan hetianga US-a mihang an damkhawchhuaha zangkhua an bungbut tir theihna chhan hi an ziarang an humhalh tlat vang a ni a ti a. Sal niin khuahkhirhna hnuaiah awm mahse an insuihkhawm ru a, an hnam dan leh hla chham leh sakmite, an hnam thawnthute inhlan chhawng zelin an nghet tlat a. Mi tam tak Kristian a an inleh hnu-ah pawh Israel fate Aigupta sala an awm laia chhanchhuah an nih dan chanchin hmangte’n an infuih thin a ni.

Chutiang chiahin khawvel ram tina darh tawh, an ram ni thin chhuahsan fai deuh veka Palestinian leh Arab dangin an luah sak tawh luah let leha hnam ropui taka din leh tu Juda hnam pawh hi an teirei peih hi an damkhawchhuahna a ni. An hnam leh sakhuaah an chiang a. Hitler-a Nazi sorkarin Juda maktaduai 3 chuang a suat hnu leh khawvel ram hrang hranga tihduhdah tuara awm darhte chu inhruai khawm lehin tunah chuan an thenawm Arab ram lian pui pui tana chala chil hnawm ngamloh tur khawpin an lo ding chhuak leh ta a nih hi. An ram leh hnam a ding chhuak a ni satliah lova, khawvela mi hausa leh scientist thiam ber ber hi Juda mi an ni a; kawng hrang hranga khawvela ber nihna hauh an tam hle bawk.

Mizote hi engtinnge hnam kan nihnaa kan din chhuah anga min hual veltu hnam lian pui pui-in min chimral lohna turin enge kan tih ang tih hi ngaihtuah a ngai khawp mai. Bengal Eastern Frontier Regulation 1873 hmangin sap hovin humhalhna dan min siam sak a, chumi kaihhnawihah chuan Inner Line Permit (ILP) kan nei a. Chu chuan thlamuangin kum tam min siam a, sapho dan siam tlawhchhana damkhawchhuak ni berin kan inhre bawk. Mahse, dan ringawt hi damkhawchhuahna leh chimralna lak atanga invenna atan a tawk lo.

Damkhawchhuak turin tihtur kan nei. Pathianin a thlawnin ruahtui min pe a; tuizem emaw baltin emaw tala kan dawh ve loh chuan awmzia a neilo ang hi a ni. Tunah hian hlauh kan ngah hle a, rel lo lut thuk turte, Gorkhali te OBC dinhmun pekte, hnamdang thenkhat sumdawng theia siamte thlengin kan hlau mek a nih hi. He hlauhna hi kan damkhawchhuahna leh hnam dangin min chimral lohna tura hmanraw tha a ni hauhlo. Kan teirei peihna, keimahni’n a taka kan thawhna leh kan vel amite thiam chen ang thiama an thawh ang kan thawh ve zel theihna hi kan damkhawchhuahna tur a ni.

United States-a Red Indian kan tih ho khu Reservation-a dahin chimral an nih lohna tura dan tam taka hung an ni a. Mahse a nawl puiin an zir loh avang leh tunlai hunah hruaitu tha an neih loh avangin an ral thawthang tawh a. Kan ram thenawm lawka awm Tripura tlangmite khutiang an nih takna chhan chu thluak leh taihmaka Bengali ho an tluk loh vang a ni ber. Khawvela hnam boral tam tak leh ram ropui tluchhe tam tak chu an thatchhiat, nawmchen leh thiamna lam an tlakchham vang a ni.

Thiamna hi a pawimawh a, chumi awmzia chu zirna a pawimawh tihna a ni. Uttar Pradesh tlangram (Uttarakhand state ni ta) a scheduled tribe ni ngailote an han nih tak hnu-a India rama ST dang (Mizote tiamin) tana Civil Service a tlin a harsat tak chhan chu he state-a zirna (education) a that em vang a ni mai. Tharum ngah aiin thluak hi damkhawchhuahna atan a pawimawh zawk a. Thiamna hi hnam damna a ni. Mahse, kan ram hruaitute hian thiamna tak leh zirna tha hi an mutmawh hnar mawhah an hmang tak taklo tih hi hai rual a ni lo.

Nuamchen ringawt hnam a dam lova, thatchhe hnam, thawh peihloh ngah hnam an dingchhuak ngai hek lo. Mahni hnam ziarang aia hnamdang culture bawh zawk na zawng an dingchhuak hek lo. ILP a inhung reng ngailo tura kan insanphek hi a hun lutuk tawh. Min chim ral thei tur kan chhehvel hnam tluk tala lehkha kan thiam a, kan chhawr tlak a, kan taimaka an thawh ang kan thawh ve a; kan hnam ziarang kan humhalh that chuan Mizo hnam hi a damkhawchhuak ang. Nuamchen leh lal hrawt ngawt lova chutiang zawnga Mizo hnam hruaitu hi kan mamawh em em bawk a ni.