BINGBILET

An bingbileh ṭan tuk khan ka naupang thlah pahin Mission Veng Bazar-ah ka hmu ve a. An hah hmel hle a. Keini ang tan chuan vawi hnih/khat bingbileh pawh a huphurhawm tehlul nen an peih hi ka’n ti khawp mai a. Miin a ṭul miauva an hriat a an peih na na na chuan bingbilet hrim hrim kha sawisela lo sawi hnawm chi-ah pawh ka ngai hranpa lova. Ka hmu thlarau chiam hek lo. Bingbileh hi Pathian thlarau chan’ nena a inzawmna ka hre pha lova, hrilhfiah thiamte erawh chuan an sawi thlarau thiam leh ngawt thung mai. North Vanlaiphai-a nausen anga bawnghnute siam chawp hne ho awmdan phung pawh kha a hmuna han kal chuan hrilhfiah thiam an lo awm a; awihawm angreng taka min lo hrilh tur an chham chuang lo.

Mi ṭhenkhatin an sawisel ber chu khawpui lun laia an bingbilet a; lirthei leh ke-a kal tana harsatna an siam kha a ni a. Hei hi a pawmawm ka ti a. Political party-te emaw eng pawlin emaw Bandh an huaihawt te, mipui harsatna siam zawnga kawng an zawhte hi sawisel reng ka ni a. Minister pakhat thiltih emaw sorkar thutlukna emaw an duhloh tak tak chuan mipui tibuai lovin a Minister emaw sorkar office pawimawh Secretariat emaw kha bitum ta mai se tih hi ka ngaihdan reng a ni. Pathian hminga thiltih nia an sawi avanga sawisel ngam lohna tur chhan ka hre hek lo. Midang tana bengchheng siam kawngah pawh tute rui phurin emaw lengzem hla pawr taka an sak rin luat kan ngaihtheihloh ang thovin aurinna hmang emaw hmanglo emaw a Pathian thu zan reha aupui vak vakte hi kan hlahthlem tur an ni chuang lova; a tuartu tan chuan thil inang reng a ni. Mi mut hahdam duh hun zan reh-a bengchheng a nih chuan pawr taka ‘Di Cham Bawihpuii’ tih hla sak leh aurinna hmanga thusawi leh thu chhiarte, sihal u, sakei hram dan tih ang vel kha a ninawm leh a chimawm dan a inang reng a ni.

Political party kawngzawh ang thovin bingbilet-te avanga lirthei tangkhang zingah khan ambulance te an tel a; damlo na tak, a hma thei ang bera Damdawiin thlenpui mamawh ngawih ngawihte an tangkhan’ phah kha chu a pawi hle thin a ni. Kan Pathian thu lak dan hi a langsar thei ang bera inpho lan tuma chetna a ni chiah mai. An bingbileh ni hnuhnung ber khan Mission Veng Bazar chhovah mipa leh hmeichhe naupang, school uniform ha-in berh vekin an bingbilet ve a; TV local channel-a an hmuh an entawn a ni tih hai rual a ni lo. Mi ṭhenkhatte’n traffic ti jam lo tura World Bank kawng lamah bingbilet zawk se tia an lo rawtte hi chu an rilru nen a inmil hauh lovang. Pindan chhungril lam hi chuan kan lung a len lova; a langsar thei ang ber kan duh tih a chiang hle a ni.

Hmanni khan Aizawl-a sikul pakhatah chuan zinglam hunserh an neih zawhah zirlai thenkhat lam rui leh tul an awm a. Mahse, an zirtirtute’n an khap a, an zirlai tibuai thei tur leh midang tibuai tura awm an phalloh thu khauh takin an hrilh a; an reh ve mai tih an zirtirtu pakhatin a sawi. An fakawm hle mai. Hlim leh lam leh harhna chhuanlama lehkha zir zawm hlei theilo tam tak hi an hmakhua ngaihtuah a ngai. Lehkha thiamlova an chhuah chuan an hlim zui reng dawn si lova; a hun laia kan buaipui angin tuma’n an buaipui reng dawn lo. Mi beidawng, khawtlang leh ram tana mi hnawksak tam tak an lo chawr chhuah phah thei a ni tih hi hriat reng a tul khawp mai. Kan rama mahni intihlum tam chhan pawh hi mi beidawng an tam vang a ni tihloh rual a ni lo.

Kan Kristian danah hian pindan chhungrila tawngtai lam chu kan hawilo khawp a, a langsar thei ang bera chet chiam hi kan tum leh duhdan ber niin a lang. Kan thawm pawh a ring thei ang ber a nih loh chuan kan ngaih a ṭha lo. ‘A ring a piang boral lo a’ tihah pawh hian ‘rinna’ lam ni lovin thawm ring lam sawinaah kan ngai em maw ni chu a tih theih. Tunlai leh hmanah pawh la ngai reng chu hetiang harhna leh hlimna nia kan sawi a lo thlen hian lansarh tumna leh a maksak lam hian min hruai thui a, intihhmuh hri a darh chak hle bawk. A bikin naupangah intihhmuh hi a hluar.

Rilru lam doctor (Psychiatrist) pakhatin a sawi dan chuan naupang leh naupang lovah pawh an chhungte leh thiante’n an ngaihsak lohte hi hetiangah hian an che langsar duh. Mihring hi mi ngaihsak leh ngaihven nih duh kan ni a. Ngaihsak leh ngaihven hlawhlo deuhte hi mi ngaihsak leh ngaihven hlawh theihna tur kawngah an che firfiak fo. Bingbileta khawlai fangte’n ngaisangtu leh bawrtu an ngah tih media lam aṭanga an lo hriat chuan a bik takin naupang lamin an ti ve dawn tih sawilawk tur hian zawlnei nih a ngailo.

Bingbilet emaw, sihal u emaw, sakei hram dan zir emaw-te hi a tangkaina kan hre pha lova; a changtute leh a tan zawnga hrilhfiah thiamte erawh chuan an sawi pawimawh thiam khawp anga, Bible-a inziak leh tih ve tul ang hialah pawh an chhuah thei ang. Ṭhenkhat chuan Bible ziah dan lovin zu pawh sual tinreng bul-ah kan chhuah der tawh hi. Keini Mizote’n kan mamawh ber hi harhna aiin takna, maksaka chetna aiin nghehna; langsar taka chet maksak leh lam hut hut aiin simna nun leh dikna, rinawmna leh taimakna a ni zawk.

Hetianga hnathawh thulha kan rik hut hut reng avang hian a lawm kan ram hian hma a sawn theih lohva kan retheih tihte pawh hi hriat a hun ta hle mai.