ASSAM RIFLES LUAH RAM

Aizawl khawpui laili tak ni ta, Assam Rifles battalion hmunpui chu a luahtute'n an chhuahsan dawn ta tak tak ni-in a lang ta. An insawnna tura Mizoram sorkarin a lo pek Zokhawsang ram saw a hun lai kha chuan Aizawl khawpui atangin a hla deuhah ngaih a ni thei e. Tun hunah erawh chuan Aizawl khawpui zauhna atana ram awhawm tak a ni tawh.

Khawpui ṭhang zelah hian khawpui bawr vela ram hla deuha ngaih ṭhinte pawh kum rei vak lo chhûngin khawpui zauhna atan kan ît thuai zel tawh mai a ni. Chu chu thil awm dan a nih avangin kan chief minister Pu Lalduhoma'n Assam Rifles ram chhuahsan tur hmuna assembly house sak a rawt pawh kha pawm chi hauh loh a ni tih hi mi tam tak, a bîkin Aizawl khawpui a cheng hlunte ngaihdan a ni awm e.

Chief minister hi assembly a pã ber chan chang 'house leader' a ni miau a, assembly house leh secretariat building sakna atãna Assam Rifles chhuahsan tur ram a hmu tai hi a dinhmun aṭang chuan thil awm lo tak a ni lem lo. Chu tih rual erawh chuan mipui sorkarah chuan ram mipui ṭhat tlánna ber ngaihtuahtu tur chu mipui-in an thlan chhuahte an nih miau avangin ngaihtuahna thui leh thúk zawk an sén a ngai a, 'house leader' hi a pawimawh zual dawn.

Dik tak chuan tuna kan assembly house awmna hian a zir ngang lova, mipui tãn chuan hnawk tak mai, bawlhhlawh bawm ang a ni a. Kawngpui tichêptu lian tak a nih aváng hian sawn chhuah ngei chu a ngai a ni. Kan house leader, minister leh MLA zawng zawngte tãn hmun awl zau leh thawl zawka assembly building suan chhuah hi an zahawmna pawh khawih pha a ni tih kan hriatpui pawh a ngai.

Kan assembly house chhunga lirthei húnna hmun awl awm chhunah hian CM/house leader car dah a nih chuan amah zuitu lirthei dangte húnna chu sawi loh assembly speaker car dahna pawh a leng lova. A nihna takah chuan kan state assembly house hi Shillong khawpui a Khasi hills autonomous district council (KHADC) council hall hmunhma pawh tluk lo a ni a. Kan Aizawl khawpui kawngpui lún ber lai a in-êk-beng hi a inhmeh tawh lo. Chu mi váng erawh chuan Assam Rifles hmunpui chhuahsan túr nasa taka nêkchép tur zawnga he ram chhunga assembly house din hi chu tih sa loh a ni thung.

Assembly hmunhma a ni emaw sorkar pisa reng reng hi Aizawl khawpui laili-ah chuan sak belh tawh hauh loh túr a ni tawp mai. A awm sa tam ber, a bîkin mipui punkhawmna leh sorkar thil pawimawha inhmuhkhawmna ang chi reng reng pawh a theih ang anga khawpui pawna suan chhuah dan zawn zawk túr a ni. He ti'ang zawnga ngaihtuahna kan sen loh chuan khawpui ṭawp tak, lirthei hawl chhuah awmze nei hauh lo, saphovin 'concrete jungle' an tih ang mai, in ringawta khat leh chenna tlãk loh khawpui-ah kan chhuah tak tak dawn a, tunah pawh hian a ni mêk tawh a ni.

Kum engemawzãt kal ta-ah khan Vanapa Hall hi Aizawl khawpui pawna sawn chhuak tur leh helai hmun hi lirthei húnna/dahna atãna a chhawnga sa zawk turin ziakin ka lo rawt tawh a. Khatih lai a khawpui enkawltu UD&PA minister khan min thlawp thu hmaichhanah min hrilh nghe nghe. Mahse, amah ngei pawhin rawtna a siam kha art & culture minister (transport minister ni bawk) khan council of ministers ṭhutkhawmna-ah a dodal avangin a tlang ta lo niin a sawi.

Kha ta ka rawt chiam chhan chu Vanapa Hall hi khawpui pawna sawn chhuah a nih a, a hmuna lirthei tam tak húnna siam a nih chuan lammuala tihpui nikhua-ah kawngpui kama lirthei dah ngai lova a awm theih ka beisei vang a ni. Keini mai mai pawhin kan hriat ve phãkah hian sorkar department thenkhat hian Aizawl khaw daifêm leh khaw pawn hla deuhah hian an hman tangkai lem loh ram ruak hi an nei nual.

Entirna pakhatah chuan nikuma Remal thlichhia tuartu Melthum leh Hlimen khaw mite an lo dah lailawkna ram, a neitu Transport department-in rei tak an lo rula-raw-neih tawh ang chi, ram zau tha takte saw sorkar hmun pawimawh tur in sakna atana hman ṭangkai a ṭha ngawt mai. Engkim mai Aizawl khawpui chhunga daha din kan tuma kan in-ek-beng zui zel chuan he kan ram khawpui ber hi chénna tlãk lovah kan siam thuai dawn a ni.

'Smart City' mission te hi nei ve bawkin, khawpui enkawltu sorkar, Aizawl municipal corporation (AMC) pawh nei mah ila, khawpui nalh leh fel (smart city) kan din phah dawnin a lang lo. Heti chung hian kan Mizoram khawpui ber hi lirthei tlán hleih theih lohvin a tawt deuh reng a, furpui thlen hma chiaha ruahsurin thli tenawm ber ber rawn lén chhuakin a thli rawng pawh a dum ngut mai a. Khawpui pawna inzarpharh hi kan khawpui chhanchhuahna atana thil pawimawh a ni tawh zawk a ni. Assam Rifles chhuahsan ram hi kan suasam leh vaih phei chuan hé kan khawpui ber hi tibawrhbãng zual zél dawn a ni.

Pachhunga University College ram ngaw leh Bethlehem Veng YMA ten Lammual thlang lam, an veng ramri depa ngaw an lo siamte hi ‘Aizawl chuap’ a ni ta ber a, awm lo phei se la chuan hei ai hian Aizawl khawpui hi a hrehawm hle tawh ang tih a chiang. Kan khawpui hian concrete building sak belh ai-in hmun awl humhalh leh thing pakhat phun belh pawh a mamawh tawh zawk. Assam Rifles hovin in an lo sak tawhsa hi hmun hlui/in hlui a nih anga humhalh ni se. In pakhat pawh sak belh hauh lovin pahnih/khat hi chu ‘central park’ hmun atana kan hman dawn chuan eitur zawrhna atan thianghlim taka hman chu a sual lo mai thei e.

Mizoram khawpui ber ve riang ruang Aizawlah hian vantlãng len vahna hmun (public park) kan nei hauh lova. Chumi atan ngawr ngawr chuan hman ni rawh se. Aizawl khawpui kawngpui chêp lutuk tihzia-awm na’na kawngpui awmsa her danglam erawh chu a ṭangkai thei ang. Chu mi bãk chu a nih ang anga humhalh a, ram ngaw leh zuala siam túra awmze nei a thing phun belh hi a pawimawh ber a ni. Chu tianga kan ti thei dawn lo a nih chuan Assam Rifles hnena pêklêt leh a ṭha zawk fê ang.

Ṭhianpa PL Liandinga néna New Delhi khawpui a Shanti Path leh Diplomatic Enclave vela kan len vah ṭumin PL-a’n, “He lai hmun kawng zau leh nuam, a sîra phaitualhnim mawi lutuk hi kan ṭhalaite lirthei a an tlãn na’n ka va ît tak, intihhlimna hmun an nei si lo,” a ti a. Kei chuan, “Kan ramah chuan awm se thuneitute’n an patta/LSC zo leh vek tawh ang chu. An rilru a awm ber chu ‘Ram zawng zawng hi ka ta ni se’ tih a ni a,” tiin ka chhang a. Hei hi kan hriat chian êm avángin Mizorama thuneihna chelh leh thiltitheite hi rin ngam a harsa tawh a êm êm a ni.

Eng pawh ni se, kum 2002-ah assembly-in Assam Rifles chhuahsan hunah an chhuahsan ram hi vantlãng tan chauh hman a nih theihna túrin dán an lo siam tawh a. He dán bawhchhia an awm phawt chuan mipui-in kan kawh rawn túr a ni a. Chu tah chuan Aizawl Mihlun Thlahte tia invuah pawlte, Aizawl Hmathlir pawlte hian hma an hruai-in hnu an dawl turah kan beisei ang. Thil ṭha leh dik duh mipui lakah bãk chuan beisei tur hi a tlêm tawh êm êm a, pawl 2-te hi an huaisen i beisei tel bawk teh ang.

Kum 30 chuang kan lo nghah tawh Assam Rifles-in kan Aizawl khawpui laili an chhuahsan tak tak túr hi kan lawm phawt tur a ni. An ram chhuahsan kan sawngbawl zui dánah erawh chuan Aizawl khawpui tána lawmna tur a ni dawn nge, ṭah leh haṭhialna a thleng dawn tih hriat a la harsa hle. Keini ang duang rawtna ang tal pawh hi pawma kalpui a nih chuan Aizawl khawpui a chêngte tan chauh ni lo, thingtlãng lam leh min rawn tlawhtu ram chhung leh ramdang zinmite tãn thlenga chhenfãkawm a ni ngei ang le.

Sorkar hian Assam Rifles chhuahsan ram hman ṭangkai dan túrah hian CM kaihhruaina hnuai-ah minister, official leh pawl hrang hrang aiawhte telna pawl a din tih kan lo hria a. A ṭhat viau rualin an déldúl mah mah anga, thu ṭha an ngaihtuah chhuak lovang tih a hlauhawm rum rum mai. Sap thufing pawhin khawsak rêltu an tam lutuk chuan an eisiam a suakbãk ṭhin, a tih kha. He lama ngaihtuahna tam tak lo sêng tawh Aizawl Hmathlir Pawl ai-awh an telh ve hi a ṭha hle a. Chu bãkah chuan sorkara an thawh lai a Assam Rifles chhuahsan hmun ṭangkai zawka hman a nih theihna atana thluak lo hmanga ruahmanna pawh lo duang tawh mithiamte hi telh belh ni se a ṭha ngawt ang – pawl aiawh ni ngawt lovin.