FIRFIAK

India Constitution hi November ni 26, 1949 a Constituent Assembly (Parliament hmasa ber leh Constitution duang/siamtu atana din i ti mai ang)-in a pawm a ni a. Chutih lai chuan India ram chu sakhaw tih bîk nei lo (secular state) a ni ang tih hi emergency hun lai, kum 1976-a India Constitution siamṭhat vawi 42-na-ah khan a thuhmahruai (preamble)-ah telh a lo ni ta a. Tam tak chuan Constitution thuhmahruai a ‘secular’ tih thumal telh hi khatih lai a na taka lal hrawt Prime Minister Indira Gandhi kutthlâkna liau liau-ah riak an pawm thlap.

Ṭhenkhat erawh chuan he ngaihdán hi a dik zîktluak lo ni-in an ngai thung a. Kum 1994-a Supreme Court-in S. R. Bommai vs. Union of India thubuai a thutlûkna a siamah khan India ram hi a zalen/din tirh aṭangin sakhaw tih bik nei lo (secular) ram a ni sa hrim hrim a ni, tih kha a pawm dan a nih thu a lo puang tawh a. Court sang ber chuan he ramah hian sorkar (state) leh sakhua (religion) hi inzawmna nei lo leh thil hrang hlak a ni sa hrim hrim tih chu a thurolum a ni a. Lal Isua’n khawvel thil (Kaisara thil) leh Pathian thil a ṭhen hrang ang chiah kha Supreme Court pawm dan a ni tihna a nih chu.

India Constitution hian sakhaw zalenna hi a ngai pawimawh êm êm a. State sorkarin sakhaw tih bîk a neih vaih chuan he Constitution vêk bung 356 tlawhchhana sorkar ṭhiah a, President rorélna hnuai (President’s Rule) a dah theih a ni a. Chu bâkah India Constitution bung 27-na-ah chuan sorkarin mipui chhiah a lakkhawm aṭanga eng sakhaw bil emaw hamṭhatna túr bîk atâna sum thehchhuah a khap a ni. He tianga India Constitution duangtute’n sakhaw duhsak bîk leh hlamchhiah bik nei lo túra an lo duang hi a ropui tak zet a ni.

Chu tiang a nih lai chuan Mizo Kristiante hian he sakhaw vulh bîk khapna, dan pangngai pawh hi lo, ram danpui-in India mi zawng zawng tâna a lo duan hi kan bawhchhe nasa hle a. Muslim firfiak kan tih mai Afghanistan a sorkarna chelhtu Taliban kan tihte leh Muslim pawl dang, an sakhaw zuitu firfiakho Islamic State-te, al-Qaeda leh a dang dangte nén hian kan danglam chuang lo chu a nih hi maw le! Social media-ah ringawt pawh hian Kristian sakhua emaw an awmna kohhran emaw tai pawng pawnga pawngpaw ṭan chingho hi chuan an thiltih avang khan martar ang hialah an inngai a ni awm a sin.

He ngaihtuahna tak hi sakhaw thila firfiak lo chhuahna bul chu a ni. Muslim-ho an firfiak chhan hi an sakhaw lehkhabu thianghlim Koran/Quran vang a nih loh thu an sawi kan hre fo awm e. An sakhaw inzirtirna sikul ‘madrassa’-ah hian sakhaw rinna thihchilh ‘jihad’ hi an zirtir nasa a. A nihna takah chuan Koran/Quran hi chuan ‘jihad’ hi dikna leh felna tiin a hrilhfiah daih a. Madrassa tam takah erawh chuan Muslim sakhaw hminga martar-na tur leh ‘indona thianghlim’ tiin an hrilhfiahin an zirtir a ni.

Madrassa a an inzirtirna firfiak hian Muslim zingah nunau pawisawi lo thah burh burh pawh pawisak hauh lohna a hring chhuak a, chu chuan firfiak pawl a pian chhuahtir nual ta rêng a ni. Ringlomi an tih maite thah kha indona thianghlimah an pawm a, anmahni’n an thih phah pawhin martar-ah an inngai hmiah a, vanram an thlen hunah nula thianghlim 72-in an lo hmuak dawn tih chu an pawm dán a ni.

Kristiante hi hemi kawngah hian kan báng bîk hauh lo. Muslim lalte’n ‘Ram Thianghlim’ (Israel) an awp la lêt leh túr khân Roman Catholic Pope leh Europe ram lalte ṭangrual khan tharum hmangin thisen chhuah beihpui an thlâk a, a hmingah pawh ‘Crusade’ an vuah a. Khata pasalṭha zuk kalte kha ‘Crusader’ emaw kum AD 1118 a din, ‘Knights Templar’ ti-in emaw an hming an vuah a. Kristian sakhaw hminga tharum thawh leh mi thah kha an tân chuan a thiang a, Ram Thianghlim chhanchhuak tura indona thianghlim bei túra inpé-ah Catholic kohhran khan a pawm hmiah a ni.

Khatih lai khan Catholic kohhran khan sum a mamawh êm avángin an kohhran hruaitu ber Pope-in Europe khawmualpui a ram hrang hrang lalte kha Pathianin lal tura hriak a thih leh chanvo a pêk (divine rights of kings) kha sum tuakna atân an hmang hial a nih kha. Pope malsawmna behchhanin an khua-leh-tuite lakah duh thâla tamin chhiah an khawn tawh mai a, lal ṭhenkhat phei chu uchuak takin an hausa (filthy rich) rêng a ni. Chu chu kan Kristianna leh kohhran chanchin a awm reng tawh túr a ni a. Hei hian tún thlengin India rama kilkháwr ber Mizoramah pawh hlet a la chhuah zui ve ta reng a nih hi.

India ramah hian Hindu sakhaw betu hi a mihring awm zat aṭanga 80% vêl báwra chhût a ni a, khawvel puma Hindu zînga 94% hi India ramah an chéng thung. Hindu sakhaw bia kan tih maiho hi ṭhian hnai tak tak ka nei ve nual a. Ka ṭhian tam ber chuan Hindu chu sakhua a ni lo, nunphung pangngai (way of life), kum tam tak an lo nunpui tawh leh khawvel awm chhûnga nunphung ṭha ni a an ngaih an zui ni mai-in an sawi hlawm. Ka hriat ve phâk an tlêm a ni thei a, ka kawm ve phâk chinah Hindu, an sakhawmi zîngah pawh, an sawkhaw âtchilh bur ka la tawng lo.

He tianga ka sawi chhan chu sakhaw dang betute an nêk ve rún lova, rin dán dang neite tân an hnawksak lêm lo tihna a ni. Sakhaw dang, a bîkin Muslim leh Kristian ngaithei lova kan ngaih Hindu kulmût pawl – Sangh Parivar an tih maite erawh chu thudang daih a ni. Sangh Parivar pawl hrang hrang zînga Rashtriya Swayamsevak Sangh (RSS), Vishva Hindu Parishad (VHP), Akhil Bharatiya Vidyarthi Parishad (ABVP) leh Bajrang Dal (BD)-te hi kan hriat lâr zualte an ni áwm e. He’ng pawlho hian Hindu-te an pun chak loh êm êm lai a, an sakhaw dán tlawhchhana nupui tam tak nei theih vánga uchuak taka inthlahpung Muslim-te lakah hlauhthawnna-in an khat a. Hindu aṭanga an sakhua-a inlehtîr túra nasa taka beitu Kristiante pawh an vei tel a ni. Hindu sakhaw zuitu nâwlpui erawh chuan an buaipui ve vak lêm lo.

Keini Kristiante hi kan rin Bible hian ram tina kal a, thilsiam zawng zawng hnena chanchinṭha hril tura thupêk kan nih hi harsatna kan tawh phah fo tih chu kan hre ṭheuh awm e. Chuvang tak chuan India ram state ṭhenkhatah pawh mahni sakhaw vawn lai thlauthla a sakhaw danga inleh khapna dante pawh an siam hlawm hi. Kan Bible-in ti tura min tuk hrethiam ve lo tân chuan kan huatthlala viau ang tihte pawh hi ngaihtuah tel ve tho a ngai. Mihring ni lo Pathian thilsiam dang laka kan chêt dán phei chu chanchinṭha hril lam a hawi lo hle bawk.

Mizoram hi mahni a inrêlbawl hrang ram ni ngat ila chuan sakhaw dang betute chu sawi loh Kristian ve tho leh kohhran hrang, kohhran lian zawkte rindán pawm ve lote an retheihzia túr hi ngaihtuah ngam pawh a ni lo hial mai. Tun hma khan Khanpui khua-ah te, Ngopa lam bâkah hmun ṭhenkhatah boruak chhe zet kan hre tawh ṭhin a. Tun hnai-ah Mizoram hmar chan Kolasib district-a Pangbalkawn khua leh chhim chan Lunglei district-a Rotlang East khua-ah kohhran dang din khapna thuchhuah kan hmu leh a nih hi. A zia lo tih mai hian a sawifiah pha lova, he ramah hian India Constitution-in mitin hnena a pêk, mimal sakhaw zalenna nasa taka rahbehin a awm chho mêk zél a ni.

Pangbalkawn hi Presbyterian kohhran tam berna a nih hmél a, Rotlang ‘E’ khua hi chu an YMA branch hruaitute thuchhuah aṭanga en hian Baptist kohhran a lian ber tih a chiang nghâl mai thung a. Pangbalkawn khua-a Seventhday Adventist kohhran din dodaltute hi VC leh tlawmngai pawl dangte an nih lai-in Rotlang ‘E’ khua a kohhran dang din khaptute erawh chu YMA branch hruaitute an ni. India rama awm si-in India Constitution an bawhchhia tih an hre lo pawh a ni thei e, an khaw awmna en hian.

Election Commission of India-in Mizoram assembly inthlan emaw Parliament inthlanpui emaw a buatsaih dawn hian kohhran pawl hrang hrang hruaitute chuan sakhaw zalenna changchawi-in Pathianni (Sunday) leh Inrinni (Ṭhenkhat tana Sabbath) a vote thlâk leh vote chhiar hun ruat lo túrin an lo ngên ṭhin a. A ‘farisai’ ngawih ngawih. Local council/VC leh YMA/MUP/MHIP-te’n veng/khaw pum hnatlâng an koh ni tam ber hi Inrinni a ni deuh ziah tih kan hre vek.

Kan Kristian puite ngei kohhran te zâwk laka kan rilru put hmang leh an rindan palzút kan hreh loh dán ngaihtuah hian ‘secularism’ sawi ve ngam túr hi kan ni lo a ni tawp mai. Piangthar derin khawmhma thinga siam kraws záng tak pu-a an duh hun huna an paih bawl bawl hi kan ang ber awm a sin! Berám inrûksak pawisa lo kohhran puipate hian Zakai-a anga simna tak tak tel ‘Piantharna’ kha an mamawh ber zâwk a lo nih hi. Mizote zînga khawtlâng hruaitute chu kohhran lian nêna puan inzawn vek an ni tih hi tuma’n kan hai si lo.