HUNPUI

Muslim sakhaw betute chuan kumin atana an sakhaw thla serh pawimawh ‘Ramdan’ (a ṭhen chuan Ramadan emaw Ramzan emaw an ti bawk) an hmang zo tawh a Hindu sakhaw betute’n an hun pui an hmang chho mek a, Kristian-te hunpui Krismas pawh ni tlemte-in dang tawhin thla thar November atang chuan Krismas hla kan ngaithla ngun leh hle tawh dawn a ni. Mizorama cheng tam zawk Kristian a inchhalte leh India ram hmun hrang hranga sakhaw dang betute hi hunpui kan hman danah inan’na lai kan nei chungin inan’lohna lai pawh kan ngah viau mai.

Hetiang lam sawi hi chuan kum 1998 puja hunlai kha ka hre chhuak thin. Delhi-a kan office-ah khan Mizo awm chhun ka ni a (ka thawhna company-a thawk 1,500 dawn zingah Mizo awm chhun ka ni hrim hrim). Khatih lai khan India hmarchhak mi, Assam, Nagaland leh Tripura mi (Meitei nula Shillong a inbengbel tih loh) te chu Bengali deuh vek an ni a; tlangmi awm chhun ka la ni zui a. Kan ṭhianpa, kan aia senior fe Nagaland-a piang (a pa Orya hnam a nu Naga) kha Kristian a ni ve mai thei tih loh chu kei lo chu Kristian-a inchhal an awm pawh ka hrelo. Ka Kristian pui ni awm ber kha zing atanga ‘tlukloh rim nam reng’ mai a nih avangin han kawm ngeih chi vak a ni lova; a nih chiah leh chiah loh pawh ka zawt ta lo.

Khatih lai hunah khan kan thawhpui Hindu ho kha an fel ngawt mai. Puja hunlai chuan nitin mai hian eitur tuihnai tak tak hi an rawn keng a, office hun awlah kan eiho thin a, eng sakhaw bia nge ka nih min zawt ngai lova, an thil ken apiang kha office-a awm tawh phawt chu Muslim leh Kristian, Sikh thlengin phal takin min hlui tawp mai a ni. Kei, ka hlawh atanga Aizawla ka chhungte hnena thla tina pawisa tam thei ang ber thawn ngai tan chuan a thlawna chawchhun ei kha thlakhlelh tham a nih bakah, anmahni an phurin an inhawng bawka nuam tak a ni. Mizorama kan naupan laia kan lo hriat ve thin thin Krismas thlarau min man dan nen a lem chuang lo. Vaiho hi a tlangpui-in an thilphal viau lova, Mizo phei chuan ‘phakar’ tih tawngkauchheh hi vaiho laka kan chelek tam deuh ber a ni a; an hunpui-ah erawh chuan an nunphung a dang daih zu nia!

Hunpui leh hunpui thlen dawna phairama kan thil hmuh kumtin chu a taka hunpui behchhana mipui-in an lei thin thawmhnaw leh thildangte an titlawm (discount) thin hi a ni a. Hemi kawngah hian keini Kristian-te hian Hindu ho hi kan tluklo tlata hriatna ka nei fo. Anni chuan thawmhnaw leh mipui tam berin khami huna an lei tam ber thinte a takin an ti tlawm thin a. Dik tak chuan sumdawngte pawh an hralh tam lai a nih avangin an hlawk thova; a leitu mipui pawhin a hlawk tih hria in an bawh hle thin.

Kum 1991 Krismas bawr vel khan Non Resident Indian (NRI) an tih mai, Oman leh Saudi Arabia vela American Company hnuaia tui in tur laih chhuah lam hnathawk thin hi kan mikhual a. A u kha chanchinbumi ve bawk a nih vanga inhmelhriat chawp kan ni a, a ute an sawn thut hnu-a a thlenin pa nena harsatna an neih avanga min rawn bel a ni. Kan mikhualpa chuan hlep neia hralh chhawn leh turin savun jacket engemawzat hi Kolkata (khatihlai chuan Calcutta) atangin a rawn lei a. A thlenin hmasa a a awm laia a pawisa a hloh vek avangin, a sawi dan takin ‘man tlawm te te-in’ tihral a tum a, loh theih loh avangin ka buaipui nghe nghe a. Jacket pakhat zel Rs 1,500 a hralh a tum a, chuti chung chuan hlep a la neih tho thu a sawi a. Mahse chutihlai chuan Dawrpui phei-a dawr pathum/pali-ah ka zawt chhin a, ‘Christmas discount’ tih an tar chiai chuai chungin chutiang jacket ang chiah chu Rs 3,500 in an zuar vek a ni.

Hetiang chiah jacket zuartu kan Mizo sumdawngte hian Calcutta atang thovin an lak ngei ka ring a, ka thianpa ai chuan a hlawmin an la tam zawk ngeiin ka ring bawk a. Mahse, Kristian-te hunpui pawimawh berah an Kristian pui, an Mizo puite hnenah to uchuak takin an hralh duh vek hlawm a. An Mizo pui leh an Kristian puite bum leh sum tam tham tak ei sak an hreh miahlo tihna a ni a. Kan thurinin “Tangka sum ngainat hi sual tinreng bul a ni,” a tih chu tuma’n kan sawi tha duh tawh mang lova, Bible-in sawi hauh lo mahse pawm nuam kan tih zawng a nih avangin Zu chu ‘sual tinreng bul-ah’ kan puh thlu ta der zawk a nih hi - Mizo Kristiante hian!

Mizo Kristian thenkhatin ‘Ringlomi’ tia an sawi sakhaw dang betute chuan an sakhaw hunpui a lo thlen hian an thil zawrh man an titlawm tak tak a. Sawi tak angin an hlawk thova, hunpui hmangtu tur mipui (thil leitute) pawh an hlawk a. Mizoramah erawh chuan ‘Ringtu’ inti tam takin Bible zirtirna kalhin sum ngainat luat vangin uchuak taka hlawkna tel an tumna lamah ‘Ringtu’ puite an bum hreh miahlo tihna a nih ber chu. Sumdawng chuan a thil zawrh chu hlep nei tura a zawrh leh hralh a ngai tih hre turin pawl sang tak zir a ngai lem lo, mahse, uchuak tak leh tam lutuk hlep hi chu Kristian rin dan kalh tlat a ni thung a - tangka sum ngainat chu sual tinreng bul a ni tih kan thurinin sawi miau hek. ‘Ringtu’ intite leh ‘Ringlo mite’ kan tih te hi mihring vek, famkimlo vek kan ni chungin ‘Pathian nung ringtu’ intite’n ‘milem bia/ringlomi’ kan tihte rinawmna kawnga kan tluklo fo leh tangka sum ngainat kawnga khua kan hmulo lutuk thin hi chu inngaihtuah chian’ a ngai ngawt mai.

Hunpui chungchanga thu inchuh dang leh chu halpuah leh halmawi chungchang hi a ni. Mizo tam ber hian Hindu ho puja laia halmawi leh halpuah phalrai bik a, Kristian hunpui Krismas leh Kumthar laia khap bik si-ah sorkar kan puh fo thin. A dikna chin chu a awm ngei mai a, hunpui theuh theuh a thena halpuah leh halmawi hal phal a; a thena phalloh bik chu inthliarna a ngaih theih a ni. Mahse, Hindu ho kut zingah Diwali hi chu ‘eng kut’ (festival of lights) a nih avangin halmawi ilo an hal hi chu thil awm tak a ni a, sakhaw thil hi chu inkhap vak hleih theih a nih loh chin a awm. Chuti chung chuan anmahni ngei pawhin boruak an tihchhiat nasat thu hi an sawi chhuak tamin halmawi/halpuah tel lova puja hi an sawi tam ve ta khawp mai. Keini Krismas hi chu halpuah leh halmawi nena inzawmna nei lemlo a ni a; Krismas nena inzawm eng pawimawh ber pawh khawchhak mifingte hmuh arsi kha a ni mai awm e.

Kristian-te hunpui a lo thleng dawn a. He hunpui hi diklo tak leh hlawk uchuak taka sum hmuhna’n kan hmang anga, BiakInah leh lenkhawmna-ah te thlaraumi ber angin kan kalin kan zai le hang em? Mi tana inpekna hun, mi tanpuina hun atana hmang lovin mahni hlawkna um vakna hunah kan hmang a ngem? Mi tana inpe-in, mi tanpui-a midang tana malsawmna ni chungin he hunpui hi hmang thei ila chuan ringlomi kan tihte hi kan khum em loh pawhin kumin atang hi chuan ringtu ni awm renga midang tana luangchhuak zawk turin i inbuatsaih ang u.