RTI

Right to Information Act, 2005 dán siam a nih champha pual RTI Hapta chu kan lo hmang zo leh ta a. Aizawla he Hapa hmanna pui bera State Chief Information Commissioner (CIC) Pu John Neihlaia'n report a pek hi hriat ve atan a ṭha awm e. Pu John Neihlaia chuan Mizoram chu India rama RTI Act bawhzui tha berte zinga mi a nih thu sawiin, RTI buaipuitu zawng zawngte fakawm a tih thu a sawi a.

July ni 1, 2022 atangin Mizoramah RTI online system kalpui a nih thu leh India rama hetiang kalpui thei hmasa state zinga 8-na a nih thu a sawi a. October ni 7, 2025 thlengin RTI online hmanga dilna 22,078 a luh tawh thu leh, chawhrualin nitin zawhna 18.5 zel lut anga ngaih a nih thute, 2025 ah nitin zawhna 23.6 leh October thla bikah nitin zawhna 31 zel lut anga chhinchhiah a nih thute a sawi bawk.

Kum 2006-a Mizoram Information Commission din a nih atanga kum 19 chhungin complaint 171 an dawn tawh thu leh case pending pakhat mah a awm loh thu a sawi a. Hemi hun chhung hian RTI Application 45,000 chuang lutin 98% te SPIO chhannaah an lungawi a. Heng zinga 730 (2%) te chauh hi SPIO chhan dana lungawi lo, thuneitu sang zawk first appellate authority (department appellate authority) hnena zualko an nih thu leh, chuta la lungawi lo 257 (35% of 730) te chauh second appellate authority-CIC hnena zualko an awm thu a sawi a. December 2023 atangin hmunhlaa awm leh hna avanga buaite tan hybrid hearing/online hearing kalpui a nih thu leh 2023 ah VC/LC te RTI zawhna dawng thei tur public authority atana ruatna hriattirna chhuah a nih tawh thu a sawi bawk.

Ṭhangthar tam tak chuan RTI Act, 2005 hi Parliament dán siam dangte ang mai-ah an ngai awm e. Saphovin India an awp lai khan sorkar thil reng reng India mi ‘mihang’ an tih maite’n an hriat ve vek loh na’n sorkar thiltih kha thurúk ang veka kalpui a ni a. Chu chu kenkawhna atan Official Secrets Act te pawh siam a ni a. Sorkara mawhphurhna neite (public servant/government servant) an hna a lâkluh an nih dawnah pawh thurûk vawng tura thutiamtir (oath of secrecy) vek an ni.

Sorkar thil reng reng mipui mimir hriat phal loh kha saphovin India an chhuahsan a a zalen hnu-ah pawh sorkar chelhtu ram hruaitute leh sorkar hnathawkte chuan ṭha an ti a ni ngei ang, India ram a zalen hnu-ah pawh kum 60 dawn lai an kalpui zui a. Hnam dang awp ni tawh lo, mahni a ro inrél, chu pawh mipui thlan sorkar leh nghal a sorkar thil thup tlat a ni hi a dik thei lo ti-in mi ṭhahnemngaite’n nasa taka kum tam tak an beih hnu-ah kum 2005 khan Parliament chuan dan a lo siam ta ṭâwk a ni.

Awlsam taka he dán hi nei kan ni lova, mipui rorelna (democracy) ramah chuan mipui-in kan thlante leh an hnuaia sorkar hnathawkte thiltih hi hriat theihna chanvo (right to know) kan nei a ni, ti a he lama miṭhahnemngaite’n kum tam tak an beih hnu a nei thei chauh kan ni. Chutiang bawkin sorkarna chelhtu thuneitu sang ber ber thlenga mipui pawi an khawih leh eirûkna chhui a hrem thei túr Lokpal leh Lokayukta te pawh hi a suala sual chhuah a ni. Dik tak chuan he ramah hian thil ṭha neih hi a awlai lova, mingoho awpna zungzâm (British Raj legacy) khan zung a kaih ngheh avángin thil ṭha tam tak hi sual chhuah ngai a ni hlawm.

Kan CIC hian RTI Act hman kawngah Mizoram chu India rama tiṭha ber zing ami kan ni a ti na a, hmasâwnna tur chu kan la ngah hle mai. Kan sorkar hnathawk zinga RTI Act hmanga zawhna chhan lama mawhphurtu SPIO tam tak hian tun hma lam ngaihtuahna (mindset) dik lo tak kha an la pu reng hlawm ni-in a lang a. Zawhna chhán nghâl theih mai pawh danin a phal angin ni 30 an nghâk kher ṭhin emaw tih tur a ni a. ṭhenkhat phei chuan chhán loh dán ngawt an ngaihtuah emaw tih mai tur a ni.

Tun hma kha chuan chanchinbumite’n kan official-te thil kan zawh khan thurúk tak tak a nih lém loh chuan chawp leh chilhin min chhâng mai ṭhin a. RTI Act a awm hnû hi chuan thla khat min nghahtir ta ziah mai. The Frontier Despatch chanchinbu kan tihchhuah ṭan lai vel khan Land Revenue & Settlement department-ah Mizorama LSC, land lease, periodic patta, agriculture land, house site pass, stall pass, forest reserve leh pass dang ang chi reng reng awm zat leh a zau zawng kan zawt a. Min chhang lo tlang tawp. A hma lama PRISM-in an zawhna an chhanna kha an la hre reng ni maw. Pass/LSC leh ram an pek zawng zawng belh khawm kha Mizoram zau zawng km. 21,081 bial aia a let engemaw zâta zau a lo ni ta awm e.

Vawi khat leh chu hemi hma, Mizorama RTI Act kan hman ve ṭan chhoh tirh khan politician pakhat thih dan kan rinhlelh avangin post-mortem examination report kan dil a. Aizawl SP pisa lam khan an thil chhui tibuai thei tih chhuanlamin min pe duh lova. CIC-ah kan zualko a, ani thupêk ang khan titau deuh reuhin min pe hrâm a ni. He dán ṭha tak kan neih hi tun hnai-ah hi a tidal (dilute) zawngin kan kal em aw a tih theih. Department officer ṭhenkhat chuan chhánna an pêk dâwnin an minister-te phalna an lá hmasa tih thawm a awm leh zauh ṭhin a, a ṭha lo khawp mai.

Chu bâkah RTI Act hmanga zawhna zawh theih loh (exemption) te an siam belh chho ta fo pawh hi a ngaihtuah chian a ngai a, thil thup hrim hrim tumna ang chi hi a ṭha lo. Hmânah, Kargil indo lai khân mi pakhatin India sipai thîte kuang (coffin) man kha RTI Act hmangin a zâwt a, sipai chungchâng, ram vénhimna thil chhuanlamin an chhâng duh lova. Mahse central CIC-in eirukna awm thei a nih avángin chhâng túrin an ti a. An kuang leina man kha a lo to uchuak hle a lo ni tih mipui-in kan hriat phah tâk kha.

He tiang hi thil awm dán a nih avângin zawhna chhang duh lote tâna kawng hawn zausak viau hi a ṭha lova, RTI Act siam a nih chhan thuthlung kalh a ni. Chu mi piah lamah eirukna thupna atân a ṭha lutuk a, ram leh hnam tân a pawi a ni. Sorkar thurûk tak tak, ram himna lam tichhe theite, buaina chhuah phah theite hi chu a awm a, kan hre thiam vek mai. Chu bâkah mimal thil (privacy) lutuk inphawrhsak ṭul lo, ṭhenkhatin sum siamna atâna invau beh theihna thil pawh a awm thei. Chu tiang hawi a nih loh chhûng chuan RTI Act hi siam a nih chhan ngei, mipuite’n thuneitute thiltih dán hriat theihna chanvo an neih tihlawhtlingtu lo ni reng rawh se.

He dán ṭha tak hi siam a nih chhan ang leh mihrâtkhawkhêngte’n siam a nih theihna atâna an lo beih dánte hre rengin a tidal zâwng leh pehhêl theih dán zawngtute laka humhalh hi mipui hian kan mawhphurhna a ni tih hria ila. Ram hruaina leh sorkara kan chanvo dik tak kan chan reng theihna atân theihtâwp chhuahin i vênghimin i hmuhalh tlat zêl ang u.

RTI Act section 4 (1) (b)-in a phût tihlawhtling túr hian kan chief secretary lo ni tawhte pawh kan lo nawr ve fo tawh ṭhin a. Anni pawhin thupêkte pawh an lo chhuah tawh ṭhin. Chuti chung chuan mipui mimirin an zawh chhuah kher ngai lova an department website a mipui hriat tur leh hriat duh pawimawh tár chhuah kawngah hian department hrang hrang hi an mawng a la rit êm êm reng mai hi a mak ngawt mai. Mipui sum tam tak sênga an official website siamtir vil ṭha lo department tam lutuk pawh hi ngaimawhawm tak a ni.

Sorkar ṭha leh kalphung ṭha (good governance) nei túr chuan thup awm lo (transparent) leh mipui laka mawhphur (accountable) a nih a ngai a. Chu mi atâna hmanraw pawimawh ber pakhat chu RTI Act hi a ni. Tihdal tumte, mipui hriat duh thup tumte leh sorkar thurûk tih chhuanlam hmanga an eiruk thup tumtute lakah hian mipui-in he dan ṭha tak hi i veng him tlat ang u. Ram changkangah chuan khua-leh-tui thil hria (well-informed citizenry) hian sorkar an khalh ngîl a, ramin hmâ a sâwn a, an changkángin an ram leh hnam a ropui ṭhin. Hei hi kan hre reng túr a ni ang.