LENGPUI RAMA SORKAR MAWH

Kar hmasa Zirtawpni khan Mizorama kan aiawha kan thlante rorel inkhawmna sâng ber Assembly House chhungah private member resolution sawiho a ni a. Hetah hian Lengpui ram chhunga mi 7-te ram lei chungchang hi CBI-in chak takin chhui rawh se tih lam an sawiho a. Rorellai leh eptu lamte nasa taka inhnial chungin he resolution hi a thu siam danglam hreta lungrual taka pawm a ni ta lawi a nih kha.

Lengpui rama mimal ram 7, Indian Air Force (IAF) te inbunna tur atana Mizoram sorkarin a lo laksak chungchâng hi VANGLAINI a ka lo ziah ve nual tawh avangin engemaw tal chu sawi zui ve a ngai-in ka hria a. Kan lo ziah ve tawhte hrilhfiahna ang deuh pawh a ni ang chu. Political party-te inpuh mawhna leh inpuh tawnna-ah hi chuan buai ve lo ila. A dik lo leh felhlel lai erawh chu kan phawrh chhuah a ṭul a, mipui hian ram hruaitu leh mipui rawngbawltute(public servant) thiltih a thudik hriat hi kan chanvo a nih miau avangin.

Chutiang a nih lai chuan political party-te inpuh tawnna karah hian mipui tan thu dik tak hriat a harsa ta hle a. Tam takin kan hriat dan hi chu veng hrang hrang epa awmte'n veng dangte aurinna thupuan kan hriat pawlh nuaih nuaih ang hi a ni awm e. Political party-te inpuh mawhna bakah pawh social media a mahni ngaihdan ziak an tam a, ziaktu tam ber lah chu hre thûk lo tak tak, mi thu-leh-hla pu kual mai mai an la ni zui a. Hei hian mipui an tichi-ai nasa khawp mai.

Chuvangin thil kal chhoh dán leh chumi kâra thil dik lo inzep hi sawi fiah kan tum ang. Sihphir rama IAF in ram an lâkah hi chuan thil fel lo a lo awm a nih pawhin a ram neitu dik takte kutah zangnadawmna sum hi a lut miau a, sawi pawr a ṭul rih lo. Lengpui ram lei chungchânga ram neitu ni si lova pawisa tam tham lutuk tak mai dawngtu Henry Lalremsanga Hlawnmual hian IAF officer-te nen ram neitute hi chu an han hmu thin tih erawh an sawi.

Lengpui ram chhunga mi 7 ram lak chungchangah hi chuan Pu Rohmingliana'n an ram a lei khawm, VC Pass atanga Garden LSC a leh a nihna (Sale Deed tiin affidavit-ah chuan an ziak)-ah khan ram neitu ni ṭhinte hian hming an ziah loh thu chiang taka sawi-in ziak pawhin an dah ngam tlat mai a. Chuvangin he'ng 'sale deed' an tih, a ram inleina man zat pawh tarlan lohna hi a lem (forgery) a pawm tur a ni ang. Lehkha lem (forged document) tlawhchhana ram leina sum pek chhuah hi thil dik a ni lo chiang hle bawk. Hei hi sorkarin dan a bawhchhiatna chu a ni. Thil dang ni se, official-te an khauh em emna tur a nih lai-in he thil an kal tluantir purh mai chhan hi kan hriat hunah engkim a chiang chho kuar thei ang.

Sawi tâk ang khan kalphung pangngai kalh leh a ram neitute hriatpui hauh lohva VC Pass kha Garden LSC-a leh a nih avang leh ram inlei leh hralhna, a man zât pawh inziah lohna, a ram neitu ṭhinte’n an hming an ziah hnan loh ni a an sawi ‘sale deed’ hi a tak (genuine document) a ni thei lova. A lem (forged document) ni a a lan avangin a tír te aṭangin IAF tâna Lengpui ram lâk hi dán kalh ngei ni-in a lang a. Hetiang thil fel lo ni ngei a lang si i-he lova lo pawm a, mawhphurtute hi chhui chhuah a ngei ngei an ngai a ni. An chalah phûng a táwp tlat.

Ram lâkna túra preliminary notification leh final notification kha dán bawhchhia-in chanchinbu a chhuah a ni lova, khawtlâng hruaitute leh ram neitu anga official a pawm (an hming chuang tlang zak) mi 7 te pawh hrilh an ni lo. Zirtawpni a Revenue Minister-in Assembly-a zawhna ziaka a chhanna-ah khan chanchinbu a chhuah a nih loh chhan hi hmanhmawh thlâk thil a nih vang niin a sawi a. Right to Fair Compensation and Transparency in Land Acquisition, Rehabilitation & Resettlement Act, 2013 section 11, section 9 leh section 40 tlawhchhanin ‘special powers in case of urgency to acquire land in certain cases’ tih chu a chhuanlam a ni. A hmanhmawhthlâk viau chu a ni awm phawt e. Ram venhimna lam thil a nih avanga VC leh tlawmngai pawlte pawh hrilh an nih loh thu a târlang tel bawk.

Chanchinbu a chhuah loh hi a langtlang lo a ni satliah mai lo, dan bawhchhiatna atana ṭangkai a ni fo. Official ṭhenkhat chuan a serh thenna ang chauhin an department tender/quotation te hi chanchinbu copy tlem deuhah (tun hma khan) chhuahtir an chîng a. A chhiartu an tlêm si a, an chhûngte khân an chhâng a, awlsam te-in an hmu mai ṭhin. Corruption kawngka hawnna chi khat a ni. Ram neitu-a sorkarin pawm tluan ṭhak ngeite hriattîr an ni lo leh chanchinbu-ah pawhchhuah a ni miah lo hi dân tlawhchhan si a, puanhnuai thil tihna dik tak a ni.

Dr. R. Lalthangliana private resolution sawihona a rorellai MLA/minister ṭhenkhatin Henry Lalremsanga kha ram leina a commission-tu anga an tehkhin kha insawithiam tumna sawngnawi tak a ni. Tumahin anmahni ram ngei an hralhin a hralhna pawisa 37% chauh a dawn a, a hralhsaktu-in pawisa 73% a hui zawk hi a awm tawh ang em? An ram hralh ve se an remti/phal ang em? Mi pakhatin a aiawha mi dang a ruatna ‘power of attorney’ kha notary public hma a ziah a ni a, sorkar aiawh/district collector aiawhin an hriatpuina a lang lova, mahse, kha kha sorkarin a pawm hmiah mai bawk.

Sorkarin ‘official takin’ a pawm tih tichiangtu chu ram neitu (lei khawmtu) hnena a vai-a zangnadawmna pawisa pe lova a aiawhtu a a ruat bank account-a sorkarin cheng vaibelchhe 117 leh nuai 90 chuang a thun kha a ni a. A ram neitu account-ah cheng vaibelchhe 70 thun a ni thung. Ram hralh/inlei dan mak tak a ni. He mi chungchânga ram neitu-in aiawhtu atâna a hman hi ram hralhtu-in hlawh nei a lei duhtu tur zawngtu a a rawih néna tehkhin chi a ni hauh lo. Power of attorney an lo siam kha sorkarin a pawm ngawt thiang hek lo, mimal pahnihin hriatpuitu awma an thu dah mai a ni a. Pawisa an pêk hmasak lai hian ram lâk remtihna (approval of award) hi a la awm lova, August ni 1, 2025 khan pawmpuina (post facto approval) tihchhuah chauh a ni bawk.

Heta sawi belh ngei ngei ngai chu ukil pakhatin ram neitu-in an ram mana a chan ve tur chungchânga a palaisak thu a sawi hi a ni. Ram neitu hian a tírah a ram lâkna man hi cheng vaibelchhe 100 vel turah ngai-in cheng vaibelchhe 45 a dawn chuan a lungawi a. Cheng vaibelchhe 200 dawn a ni tih a hriat hnu-ah amahin power of attorney a pek ngei hnenah khan ukil nen hian kalin vaibelchhe 100 tal a chang tur a ni, an ti a. Ani chuan ama chan vek tur a nih loh thu leh he thilah hian midang hnêna pawisa tam tak a la pêk tur thu a lo hrilh tih hi he ukil hian chiang takin a sawi a nih kha.

Ram neitu hi vawi (installment) 2 a pek a ni a. He tah pawh hian sorkar official tel lovin notary public hma-a July ni 18, 2025 khan affidavit siam a ni a, notary public hma a ziah leh ukil pakhat hriatpuitu chauh an awm a, sorkar a inrawlh lo. Pawisa an pek chhuah hmasak (25. July 2025) khan Rohmingliana hi cheng vaibelchhe 32 leh nuai 41 chuang pek a ni a. Heti zât an pêk phawt chhan hi he affidavit-ah hian IDBI Bank loan a lak cheng vaibelchhe 30 a pektlâk phawt loh chuan IDBI Bank, Regional office Guwahati a a LSC tâng a tlanchhuah theih dawn loh vang tih a ni a. Affidavit a a ziah ang hian an pe phawt ta a, LSC a tlanchhuah hnu-ah August ni 26, 2025 khan cheng vaibelchhe 37.58 chuang an pe chhuak leh ta a, a vai-in chêng vaibelchhe 70 chiah a ni ta a. Sorkar/Aizawl DC pisa hian an ring tâwk áwm ngawt mai.

He thil chingchivêt chungchangah hian sorkar chuan CBI chhui turin a ti tawh ni-in sawi a ni a. Mizoram Lokayukta pawhin FIR an dawn angin preliminary inquiry an ṭan nghal tih min hrilh. Supreme Court lama public interest litigation (PIL) thehluh an tum an awm bawk. Arunachal Pradesh-a ram lei thubuai ang khân Enforcement Directorate hian chhui ngei se tih hi duhthusám a ni. ACB hi Mizoram sorkar thuhnuaia awm ni lo se la chuan CBI aiin an rintlâk zawk hialin ṭhenkhat chuan an ring. Engpawh ni se, tute-emaw man se tih lam ai-in hetiang thil dik lo hi kan rama a thlen tawh loh na’n chhui chian a, a mawhphurtu hriat chhuah ngei ngei hi chu a ṭul takzet a ni.