TOURISM DIRECTOR

Tourism Director dinhmun atanga Ningani kalta a inhnukdawk ta Pi R. Lalrodingi boruak hi MZP-in an dodal avanga mitdelte hriat khawp lo ni ta a ni tih kan hre awm e. Amah hi hre chiang inti leh faktute chuan officer chak tak leh hna thiam tak, vai nêkah pawh ṭha tak niin an sawi a. A thluak a ṭhat hle niin an sawi bawk a. North Eastern Council (NEC) a deputation a a awm lai pawhin Mizoram sorkar leh mimal ṭhenkhat tan a tangkai hle a ni, an ti. Amah sawiseltute erawh chuan Commerce & Industry hnuai a Bamboo Development Agency (BDA)-a General Manager hna a chelh laiin Assembly Committee on Estimates-in a hna thawh dan an duhkhawp loh thu report an siam niin an sawi ve thung a. Engpawh ni se, Mizo nu pakhat, boruak siam ve laih theih chu a ni hrim hrim tih a chiang e.

Tourism department director atana Pi Lalrodingi deputation a dah chungchâng buaipui chhoh a nih dán hi mipui ngaihven leh nasa taka social media luahtu a nih bakah a ngaihnawmin keini ang bawka sorkar kalphung hre lote'n kan lo hriat ve atan ka'n chhawp chhuak ve hrim hrim ang e. A thawnthu inṭanna ber chu nikum October ni 27-a Chief Minister Pu Lalduhoma'n DP&AR Minister Pu K. Sapdanga hnena DO letter a thawn aṭang khan a ni a. CM thuziah atanga a lan dan chuan Officer on Special Duty (OSD) to Chief Minister Pi Lalrodingi hian Additional Director, Commerce & Industries Department dinhmun a chelh mek hi sorkara a hlawh lakna a ni a. Hei bakah hian Director, Tourism Departmen hna chelh mek bawk a ni.

Department hotu (head of department) hna hi hneh leh tlin takin a chelh niin CM hian a ziak a. Chu bakah a kaihhruaina hnuaiah tourism a hmalakna pawimawhte kalpui-in a kaihhnawih agency-te nena thawhhona pawh a ṭha hle niin a sawi bawk a. Hetiang hi a nih avangin Pi Lalrodingi hi Commerce & Industries Department atang hian Tourism department-a Director ni turin deputation a kaltir ni nghal mai se thiltih awm tak a ni a. Deputation a a kalna tur hi ruahmanna siam ni se tiin CM hian DP&AR Minister hnenah hian rawtna a siam a ni.

CM lehkha hi October ni 31 khan DP&AR pisa a thleng a. Hemi hnu a file kal hi chu lehkhapuana ziah ni lo, e-file a kal deuh vek a ni tawh hlawm. October ni 31 hian file hi department chhungah a kal chhova, tuma'n engmah an ziak lem lo. Joint Secretary (CSW) DP&AR chuan chawhnu dar 3.43 khan thu ziah a nei ta a. Chu tah chuan hemi chungchang hi zir a nih thu a ziak a. Tourism Director hi recruitment rules (RR)-ah chuan 100% hi kaisangte tâna zuah a ni a, a theih ngang loh chauhin deputation a lak tur a ni. Tourism Director tur hian deputation a mi dah theih a nih lai-in dah tur reng reng chu kum 56 aia upa an ni tur a ni lo, tih a tel thung a. "He officer hi April ni 30, 2026-ah a hna atangin a chawl (retire) tawh dawn a, kum 56 a pel tawh a. Chuvangin Tourism Director a deputation a dah tur chuan RR hi thlah dul (relax) a ngai dawn a ni,” a ti.

E-file hian Commissioner & Secretary thleng chho in November ni 3, 2025 chawhma dar 10.36 khan heti hian a lo ziak ve leh a. Joint Secretary thu ziah hi a pawmpui a. Chu bakah chuan chung lam duhdan anga officer hi deputation a dah a nih dawn chuan deputation a a awmna a a hlawh tur bakah deputation allowance pek theih a ni em tihte chinfel a ngai ang, a ti a. Pension hnu a deputation a kaltir hi khapna chiang tak a awm lo chungin a pension lehkhate tihfel chungchângah harsatna a awm theih a avangin a awmna department-ah a pension hma ngei a kírtîr leh hi kalphung pângngai a ni, a ti. Finance department ngaihdan lâk a, DP&AR pawhin deputation chungchânga RR siamṭhat phalna lak a rawt bawk. Hemi ni hian e-file hian Chief Secretary a kal tlang.

November ni 10 khan CM pisa chuan Commissioner & Secretary thuziah hi a lo hmuh thu leh a pawm thu ziah a ni a. DP&AR Minister pawh kaltlangin hemi ni vek chawhnu hian Commissioner & Secretary hian Finance department leh CSW chu a rang lama ráwn ni se tiin a ziak leh a. November ni 13 khan Assistant chuan Additional Director, Commerce & Industries Department leh Director Tourism department-te hi hlawh inang/inzat Level-13 of Pay Matrix ve ve an ni tih a sawifiah a. Finance (E) ngaihdan dîlna tur pawh duan a nih thu a sawi.

November ni 14 chawhnu herah khan Joint Secretary (CSW) DP&AR chuan a hma ang deuh tho kha a ziak leh a. Pi Lalrodingi hi deputation a a kal chuan a awmna pangngai department a a hlawh bak deputation allowance la lo tur a ni mai em tihte duhthlanna siam turin a rawt a. OSD to CM hi deputation a Commerce & Industries aṭanga Director Tourism a kaltîr a nih dawn chuan vawi khat atân (hun danga tih tawh kher loh turin) Mizoram Tourism Department (Group A posts) Recruitment Rules, 2024 hi thlah dul turin DP&AR(GSW) hnênah file hi thawn ni se, tiin Superintendent (CSW) DP&AR chuan rawtna a siam leh a.

An e-file vawm kual vel dan kimchang leh rawtna chi hrang hrang chu kan tarlang kim sêng lovang a. December ni 1, 2025 chawhnu dar 2.04 a Joint Secretary (CSW) DP&AR thu ziah erawh hi chu a ngai ngai-in dah teh ang - "HCM atanga rawtna a ni chungin hetiang dílna hi chu thil la tih ngai loh a nih hmél a, ti hmasatu nih hi kan sawrkar tan hian nakin zêlah repurcussion ṭha lo leh precedent ṭha lo, dem an hlawhna tur a la ni mai ang tih an hlauhthawnpuiawm hle mai! Age relaxation hi lo pe ta ila, a hrin chhoh zel tur nia lang chu deputation post-a a pension hun thlenga kal rawn díl chhunzawmte, chumi hnuah extension of service emaw reemployment in the deputation post te a la hring zel thei dawn a, chu’ng hunah chuan sawrkar tan hian a sensitive-in bad precedent a ni leh zual ngei ang. For order pls." (HCM hi Honourable CM tihna mai a ni).

A tuk December ni 2 chawhma dar 9.55-ah Commissioner & Secretary (CSW) DP&AR chuan hetiang hian a ziak ve bawk a - "Tuna proposal ang hi kan hriat theih chinah thil la awm ngai lo a ni a. Hotute thu thu ni se, a chung lama sawi ang hian fimkhur erawh chu a ngai khawp mai." He mi ni vek tlai lam dar 7.44-ah Minister DP&AR chuan hetiang hian a ziak ve bawk a - "Pi Lalrodingi deputation-a Tourism director-a kaltir hi, a chunga tartan ang khian, a remchâng meuh lo niin a lang a, kaltir loh mai rawt a ni e. Put up for decision pl."

Hei lo pawh hi e-file aṭang hian tam tak tarlan túr a awm na a, sawi tawh angin ziahlan vek sén a ni lo. DP&AR (CSW) a kan official-te hi an fîmkhur hle a, nakîn thlenga entawn túr ṭha lo kumhlun (bad precedent) siam hlauvin sorkar an vénpui nasa hle a. Huaisen nopui dawm tlâk kan hmu nual áwm a sin. DP&AR Minister-in ‘a remchang meuh lo niin a lang a, kaltir loh mai rawt a ni e,’ ti a Mizorama thunei ber CM hnena a e-file thehchhoh hian awmzia a nei thui vak lém lo thung.

December ni 4 chawhnu dar 1.53 khân CM chuan DP&AR Minister leh a hote’n dán leh kalphung lo zui tawh mila kal loha, entawn zui túr ṭha lo siam an hlauh thu an sawite hi pawmsak anga insawi chungin nawr tlang a tum thu chiang takin a târlang ta a. A bîk takin Tourism department kalpui mêk PM EKTA Mall, Vantâwng khawhthla Ropeway siam leh Thingsúlthliah khua a Convention Centre din bakah hmabak dangte tipuitling túr hian Pi Lalrodingi hi Tourism Director a a awm ngei a ngai tih tiatin a ziak ta râwt mai a. Sorkar hnathawk padâwp deuh chu an ṭîk ta dial dial.

File lama dodál ngam erawh chu an awm chho zêl a. CM lamin tun hma a service pawhsei lo awm tawh leh rawih nawn lo awm tawhte hming thur chhuakin ṭan an khawh thung a. He’ngte hian tikhawtlai chho zel mah se, thuneitu ber thu a tlang lo thei ta lova. CM pisa berin, "The concerns expressed in the previous notes are appreciated. At the same time, it is expected that the wishes/decisions of the political executive are to be implemented in good faith, unless something is patently illegal or without precedent. It is regrettable that this has not been the case here," tiin ziak miau tawh hek. Kumin April ni 24 khan OSD to CM Pi R. Lalrodingi chu Tourism Director atana dahna thupêk chu DP&AR (GSW) chuan an tichhuak ta nge nge a, a hnu lam thilthleng chu kan hriat vek tawh kha.