ṬHANMAWH-BAWK

Mizoram sorkar, tlawmngai pâwl, kohhran leh mi ṭhahnemngai engemawzât hian UPSC ekzam buatsaiha All India Service (AIS) kan tih mai, IAS, IPS leh IFS (forest) bâkah central service dang danga Mizote kan lût thei lo rei ta lutuk hi an vei thu an auchhuahpui chámchî tih kan hre vekin a rinawm. He tianga ṭhahnemngaihna thu sawi chhuakte hian National Eligibility cum Entrance Test (NEET) leh India ram pum huapa zirlai thiamtheite inelna lian tham dang an la sawi tel lo mah mah.

Tún hmâ, kan mi hmasa leh he lama súlsutu, IAS officer hmasa ni bawk Pu Lalkhama, Pu P. Rohmingthanga te leh midangte bâkah IPS lama kan hnam hmahruaitu Pu FLR Siama leh midangteho kha ṭhangthar tam ber hian an ngaisâng pha lo ni hian ka hre ṭhin a. Tún thleng hian Mizo Hnam ban nghet tak leh hnam kan nihna a min tihmingṭha a, hnamdang zah kan phurh ve chhante an ni. An hnu-ah pawh kan rual-ute zingah IAS/IPS/IFS bakah foreign service lam pawh Mizo/Zofa zingah chhuanváwr kan nei ngah viau a. Mahse, he tiang lam her chhuahna khâwl (civil service production power house) nei ang hial a hnamdangin min hmuh ṭhin kha kan nih lohna a rei tawh hlê mai.

Ti ve khanglâng ila – Mizoram Board of School Education (MBSE) din tirh a Matric ekzam pha ve kha kan ni a. Kan Board khan mark an han ren lu lai khawp a. Tún lai a distinction a pass kan ngah ang leh subject eng emaw zât a ‘letter’ hmu tam tak an awm ta ang hi keini hunah kha chuan vána rah ang a ni a, tukkhum ang mai a hmuh harsa deuh thaw a ni. Túnah erawh chuan an thei sem ta mai mai a ang ber a. Ekzamna a hlawhtling an tam ta hle a, sikul/college luh lehna túr lama harsatna awm khawpin ‘passed’ an ṭhahnem ta hial a. Mahse, kan zirna dinhmun (quality of education) hniamzia a lang chiang hle.

Hei bâk hi a la awm cheu. UPSC chauh a ni lo, a aia zuamawm zâwk deuh Staff Selection Commission (SSC) ekzam bei ngam an vâng pharh mai a. Mizoram pawn, a bikin Manipur a kan Zofa unaute an tlin zawih zawih lai, Aizawl Exam Centre-ah pawh anniho deuh hlîrin ekzam an beih lai hian Mizoram mi chu kan tling hlei thei lova. Ekzam ngam lo an tam êm êm bawk. Hnam dang/state dang zirlaite nena inelna, NEET ang chite tling thei a lawi an awm lova. Sâp sikul ti a kan sawi mai ṭhin (English Medium School) chhuak, an sâp ṭawng thumal an thiam china nâl takin an ṭawng theih aváng mai a lehkha thiama kan ngai nghet ta tlat hi a pawi takzet a ni. Sap ṭawng (English) hi khawvêla ṭawng pakhat a ni mai a, a hmangtu an tam avánga he ṭawng thiam apiang lehkhathiam a kan ngai ta mai hi thil kan man loh váng tih loh rual a ni lo.

Sap ṭawnga ṭawng nál fu si, zirlna lam leh hriatna tak taka hnufual si kan ngah ta lutuk a. Hna thawk tlâk leh chhawr nahawm (chhawr tlâk), India ram pum huap inelna pawh a filawr zak zak túr chu Mizoram tân thil theih loh tluk a ni tawh a. Chu chu sawi loh, tling hrim hrim túr pawh kan ván ta takzet chu a nih hi. India rama ziak leh chhiar thiam kim (totally literate state) hmasa bera puan kan ni hi a lawmawm lo tih rual a ni lo. Mahse, chutih rual chiah chuan India ram pum huapa lehkha thiam inelna-ah enge kan dinhmun tih leh hna sâng thawk a chhawr tlâk kan chher chhuak em tih lamah hian kan pachhe ta hle a, hei hi a pawi takzet a ni

He thilah hian ṭhangtharte hi hrâng hlui lam hian kan dem nasa viau mai a. A dik chin pawh a awm ngei a. ‘Ṭhangthar beng tla lo’ tih pawh an hlawh réng a ni. Tún dinhmunah ngat phei chuan ‘mut nachâng hre lo leh thawh nachâng pawh hre lo’ tih hi kan ṭhangtharte kan sawi dán a ni mêk. Nu leh pa/pi leh pute hian hun engemaw chen aṭang khan kan tu leh fate hi kan thunun hlei thei tawh lo tih hi thu dik tak a ni a, mawhphurtu dik tak chu ṭhangthar nu leh pa leh pi leh pute hi kan ni a, kut sil kan tum a, anmahni bûrbun kan tum ngawt a nih vaih chuan an hlawhtling hauh lovang a. Juda ram awptu lârsâp, Pontia Pilata’n Isua Krista chungcháng an rêlna a mawhphurhna tlánsan na’n ti a, kut a sil ang chauh kha kan ni ang.

Zirtawpni khan Election Commission of India-in state 36-a chanchinbumite pualin inthlan, electoral roll siam leh thil dang kaihhnawihah Delhi khawpui a India International Institute of Democracy and Election Management (IIIDEM)-ah inkhawmpui/training a huaihawt a. Mizoram Election hotute duhsakna-in an hnung zui-in kan zuk kal ve a. Chutah chuan Manipur lama ‘Zohnahthlâk/Zofa’ kan tih officer pawimawh tak takte nén hun thâwl takah kan inkawmho a. Principal Secretary ve ve an ni a. Pakhat chu ka hnampui ‘Hmar’ a ni a, pakhat zâwk chu ‘Kom’ hnam a ni thung a. Ngaihtuah an tithui duh hle mai.

AIS emaw central service bâkah sorkar laipui a hna pawimawh thwk thei túrte, India ram pum huap inelna tak taka kan tlin theih loh chhan mután hi eng ber nge ni ta le? Tuna kan khawtlâng nun leh kohhran inkaihhruaina felhlel hrin hi a ni em? Kohhran leh khawtlangin kan ṭhalaite a beisei dán dik loh vangte, zirna atâna kan hun hman tlém chhanah te hian mawhphurhna an nei em tihte hi chîk a ngai ta. Kohhran inkhawm tam lutuk, khawtlâng thila ṭhalai lehkha zirlaite inhmanna tam leh kohhran leh khawtlâng thila thu rélhona atâna hunk an khawh ral tam hian thiamna tak tak paw chhuak tura kan zirna a tibahlah em tihte hi ngaihtuah a ngai.

Khawtlâng leh kohhran a inhmang túr hian tihluihna chu a awm hauh lo chungin min phût tlat chin a awm ni hian a hriat a. Kan inkhawm zing lutuk leh zan lam inkhawm ṭan hma aváng hian kan zirna leh eizawnna hi a chhe zâwnga a nghawng hi a thui viau mai thei a ni. Zir chian a awm lova, inkhawm tihtlém sawi rîk a nih pawhin bial, Presbytery leh Synod lamah chuan a tla zél rih chu a ni a. Hei hian hmasawnna kawng hrang hrang, a bîkin zirna lama thiamna tak tak paw chhuak thei túra kan theihna sual chhuah min dál a ni thei a. Mizoram hi nuam kan ti lutuk a, hmun danga chhuah hrehna hian thui tak min dál a ni thei bawk.

Kan sawi tam tawh a. Kan ram hruaitute’n ṭawngka-in an sawi fo bâkah ram veitu tam takin he lam hi an sawi ri zing ta fu mai tih kan hria a. Hmasâwnna erawh chu hmuh túr a la awm lo. Ziak leh chhiar thiam kim ni a kan inchhal lai hian thiamna tak tak, mihring hnathawk thei, thluak ṭha leh chhawr tlâk chherchhuah kawngah hian kan hnufúmin chaurau-êk kan thai zui zêl dawn niin a lang. Kan ṭhanmawh-bâwk ber hre chhuak a hneh túrin tih tak takin tha kan thawh a pawimawh a ni. Chu mi a nih hma chuan Mizorama awm Mizote hi hnam zahawm kan ni ngai hlek lovang.