THUP NGHAWNG

Mimal enkawl damdawi-in inzuihkhawm pawl, Non-Government Hospital Association of Mizoram (NGHAM) aiawhte chuan tun hnai khan sorkarin mipui mimir tana damlo inenkawlna tur ruahmanna a siam ‘Mizoram Universal Health Care Scheme’ (MUHCS) ti a a vuah an zawm ve rih loh chhante leh an zawm ve theih dan tur chungchangah thu an chhuah a. ‘Mimal enkawl’ tih hi ‘private hospital’ tihna a ni ber a. Mimal ni chiah lo, doctor rual leh doctor ve kher lote inzawmkhawm, society emaw partnership emaw hmang a, damdawi-in din ta an ni deuh ber a. Sorkar ta ni lo, pawl leh kohhran enkawl ang chi hi a huam thei vek awm e.

An thuchhuahah chuan an pawl ami damdawi-in zinga MUHCS la zawm ve lo chu 9-te chu - Trinity Hospital, Aizawl Hospital, Rosewood Hospital, Ebenezer Hospital, LRM Hospital, City Hospital, Greenwood Hospital, Agape Multispeciality Hospital leh Aizawl Adventist Hospital te an nih thu an sawi a. An zinga damdawi-in ṭhenkhat hi Mizoram a a lian ber ber, damlote’n an bawh em em leh damlo natna hriat theihna khawl/hmanraw nei ṭha berte an ni a. Dam duh miau chuan sum puk chawp pawha mi tam takin kan pan duh ber berte an ni hlawm tih hi a chiang viau.

NGHAM hruaitute’n an thuchhuahah hian MUHCS an la zawm ve theih loh avanga damlo tam tak leh an chhungte’n an tuar ṭhin chu pawi an tih thu an sawi a. MUHCS an la zawm theih loh chhan leh damlo tam tak an damdawi-in mamawh leh pan ṭhintute harsatna tawh leh mipui tam zawk ban phak a an damdawi-in-te an awm theih dan tura an rawtna leh ngenna te sorkar leh mipui hriat atan an han tarlang tih sawiin, “MUHCS 2.0 hnuaiah hian a zawm ve lo hospital-ah emergency thilah emaw, khum chan loh avang emaw a damlo rawn lutte hi an ṭhahnemin mi tam tak an mangang em em thin a,” an ti a ni.

An sawi zel dan chuan tun dinhmunah hian sorkar ruahmanna siam avangin khawlhkham an nei nual a. Chu ta chiang taka an tarlan chu Mizoram sorkarin kumin April ni 30 a thuchhuah a siam kha a tel. He ta sorkarin thurolum a neih chu damloh chi hrang hrang - ICU a dah nghal ngei ngai, an nunna chhanhim na’na zai nghal ngaite leh chetsualna tawh vanga nunna chhan nghal ngai te chauh bill phalsak an nih avangin rikrum thil (emergency) dang zawng zawng, damdawi-ina thawkte’n admit ngei ngei ngai a an ngaihte telh an ni ve si lo hi ṭha lo an ti a.

Entir na’n - BP sang lutuk te, zunthlum sangte, heart attack te, nikhaw hrelo a awmte, puitling leh naupang khawsik sang, rikrum thila enkawl ngai ICU- a awm ngai lutuk si lo an nih chuan bill phal loh vek an ni a. Hei bakah hian MUHCS zawm damdawi-inte aṭanga facility tha zawk mamawh vanga a zawm lo hospital a kal a ngaihin an bill thei lo bawk si hi damlo leh an chhungte tan a manganthlak em em a ni. Hei hian MUHCS a inziaklut mai bakah sorkar hnathawkte pawh a huam vek lawi si hi buaithlak an tih thu an sawi.

Hetiang a nih avang hian NGHAM chuan sawrkarin rate ṭha pangngai tak, kohhran hospital thenkhat leh hospital dangte pawh a pek ang emaw, phai lama hospital tam takte a pek ang emaw a sorkarin a pek ve theih chuan MUHCS zawm hi an hnial hauh lo tih an sawi a. MUHCS an zawm ve hian mipui mimirin hamṭhatna tam tak an dawn theih dawn avangte, phai lama pawisa tam zawk sen ngai lova, Mizoram chhung ngei a inenkawl a theih chuan mi tam tak tan malsawmna a ni dawn tih chu an ngaihdan a ni a. Phai lama sum tam tham liam thla hi tihtlem a nih chuan Mizoram ‘economy’-in a ṭhat phah dawn bawk a ni, an ti a ni.

Mizorama mimal enkawl damdawi-inte hian Mizoram ram tan ‘entreprenuership development’ (sorkar pawisa hmang hek lova mahni kutkawih lama thawh hlawk pawl tak) ni ve in an inhria a, Damlo enkawlna lamah hmasawnna tam tak thlentu an nih piah lamah ṭhalai sang tel tana hna siamsaktu an ni mek tih n sawi, hei hi pawm loh theih pawh a ni lo. a ni. Chuvangin Mizoram sorkar hian Mizoram a mimal enkawl damdawi-in kan neih ve te hi phai lam hospital-te nena an inremna zulzuiin inremna min siam pui thei se an duh tih an sawi a ni.

He tih lai mek hian damdawi-in thenkhat, MUHCS thil kalpui dan, sum pek leh sen ngai lova inenkawl (cashless scheme) hi a zawm chuang si lo an awm mek a. An hnena inenkawlte erawh tun hma kalphung ang tho a, medical reimbursement (MR) bill thei si an awm a. Chu’ngte chu ‘deemed empanelled hospital’ tia an sawi mai, entirna’n - Woodland Hospital, Shillong leh Silchar Cancer Institute, Silchar te hi an ni. NGHAM chuan ‘deemed empanelled hospital’ te dinhmun ang tala MUHCS an zawm ve theih hma pawhin dah turin sorkar an ngen a. Hei hi mipuiin nasa takin an hlawkpui ngei an beisei thu an sawi bawk a ni.

MUHCS hi a hming aṭang ringawt chuan ruahmanna ṭha tak angin a lang a. Mi engemaw zat chuan an chhawr ṭangkai ngei tih pawh hi thu dik a ni. Mahse, he damlo enkawlna atana ruahmanna (MUHCS) kalpui a nih dan hi a inkhuangrual lovin ‘Vawkreka fate’ an tih ang zung mai kha a ni a. Phai ram damdawi-in a damlote inenkawlna ‘rate’ leh Mizoram chhunga damdawi-in rate nasa takin a inang lo ni-in an sawi a. Mizoram ai-in phai ram damdawi-in a an ‘rate’ a sang zawk hle ni a an hriat thawi miau si avangin an thinlungah a riak reng a ni.

Mahse, phai ram lam damdawi-in neitu/enkawltute nena sorkarin inremna thuthlung (detailed pricing) an siamah thuruka vawnna tur (confidentiality clause) an dah mauh mai a, an rate a sang bik viau ni a an hriat thawi chu an finfiah thei si lo. Mizoram chhungah ngei pawh kohhran lian ber Presbyterian kohhran enkawl Durtlang a ‘Synod Hospital’ nen a puanhnuai thilin inremna thuthlung an ziak bawk a. Chu pawh chu mimal enkawl damdawi-in dangte thlimin thurukin an vawng leh tlat bawk a.

Hei hi mipui-in chiang taka kan hriat a ngai. MUHCS hi sorkar hnathawkte, pension-te leh mipui sum thawhkhawm hmanga kalpui a ni. Sorkarin sum a lo ruahman/thawh ve a nih pawhin mipui sum (public money) tho a ni a. Chuvangin mipui sum hmanga mipui huap ruahmanna hi a lang tlang (transparent) ngei ngei tur a ni a, mipui laka mawhphurhna nei (accountable) a ni ngei ngei bawk tur a ni. Thup a thiang lo a ni tawp mai. Chu ti lo chu hmana CBI-in an chhui a, an man tak, PHE EE pakhat, rizai hnuai a cheque ziak ṭhin thiltih dan nen khan danglamna a awm lo.

Tun dinhmunah hian MUHCS hi a nih dan tur angin a kal thei lova. Sorkar damdawi-in baka sorkarin mimal enkawl damdawi-in (Synod Hospital tih loh) thu a thlunpuite chu damdawi-in te zawk, damlo tlem te te chauh enkawl thei an nih avangin he’ng damdawi-inho hi a tawt em em a. Khum indaih lohna nasa tak a awm reng a, mipui-in harsatna namen lo kan tawk reng a. Hei hi mimal tak pawhin kan tawk a, kan hre chiang viau. Ruahmanna ṭha tak tia kan sawi lai hian mipui mimirin a taka kan mamawh huna kan chhawr ṭangkai theih miau si loh avangin ruahmanna felhlel leh ṭha lo takah a chang ta zawk a nih hi.

Lang chiang ta chu, Mizorama mimal enkawl damdawi-in ṭha leh lianhovin MUHCS an zawm lohna chhan hi phairam damdawi-in leh Synod Hospital nena sorkar (Mizoram State Health Care Society) inremna thuthlung anga inremna an siampui ve theih loh vang a ni a. ‘Inremna thuthlung ṭhami’ an siampuite nena an inremna ‘rate’ an thup tlat bawk si avangin NGHAM member-te tan chuan MUHCS zawm ve ngawt ngaihna a awm si lo.

Pu J. Sawma Vanchhawng advocate-in RTI Act hmanga Synod Hospital leh MSHCS inremna copy an dil chu ‘confidentiality clause’ chhuanlamin an pe chhuak duh lova. State Information Commission-in pe chhuak tura thupek a chhuah chu zawm duh lovin Gauhati High Court-ah sorkar chuan a khing zui ta hlauh zawk a. High Court chuan pui sum (public money) hmanna chu a lang tlang ngei ngei tur a ni ti a thutlukna siamin SIC chu Synod Hospital lam thu ngaihthlaksak turin a ti a. September ni 2 khan an ngaihthlaksak ta a. Tunah chuan he thil hi thuruk a ni reng thei dawn ta lo niin High Court thutlukna aṭang hian a lang.

Puanhnuai thil a awm chuan eirukna a lo biru nge nge ṭhin tih hi kan hre awm e. Chuvangin MUHCS chungchanga puanhnuai thil lo inzep hi lang tlang a puanzar a lo nih chuan kan private hospital ṭha leh liante hian an zawm ve thei ngei turah ngai ila, mipui pawhin nasa takin kan chhawr ṭangkai ngei ang. Mipui sum hmanna reng reng hi chu lang tlang vek ni tawh rawh se.